“7–13 ni Tiseba. Moronai 7–9: ‘Me Laveti Iko Cake mada ko Karisito’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)
“7–13 ni Tiseba. Moronai 7-9,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
Minerva Teichert (1888–1976), Moronai: Nai Otioti ni Nifaiti 1949–1951, waiwai ena masonite, 34¾ x 47 na idi. Univesiti ni Brigham Young na Vale ni Yaya Maroroi ni Cakacaka ni liga, 1969
7–13 ni Tiseba
Moronai 7–9
“Me Laveti Iko Cake mada ko Karisito”
Ni ko vulica na Moronai 7–9, vakarorogo ki na veivakauqeti ni Yalo Tabu, ka vola kina na Nona itukutuku vei kemuni. E rawa ni vakavulica ruarua vei iko na veika o gadreva mo kila kei na veika o gadreva mo cakava.
Vola na Veika o Vakauqeti Kina
Ni bera ni tinia na itukutuku eda kila nikua me vaka na iVola i Momani vata kei na iotioti ni nona vosa o Moronai, e a wasea e tolu na itukutuku mai vei Tamana, o Momani: e dua na vosa vei ira na “daumuria na Karisito ena vakarokoroko” (Moronai 7:3) kei na rua na ivola e vola o Momani vei Moronai. E rairai tomana talega o Moronai na itukutuku oqo ena iVola i Momani baleta ni sa raica oti o koya na vei leqa eso e tautauvata mai na nona gauna kei na noda. Ena gauna a volai kina na vosa oqo, era sa vakanaulu sara tu ga na kawa vaka Nifaiti ki na vukitani. E vuqa “era sa sega ni veilomani,” ka sa taleitaka “na veika kece ka vakavo ga na veika e vinaka” (Moronai 9:5, 19). Ia e raica tiko ga o Momani na inaki ni inuinui—ni vakatavulica tiko vei keda ni nuinui e sega ni vakawaleni se vakaweleweletaki na veileqa e vuravura; e kena ibalebale ni da vakabauta na Tamada Vakalomalagi kei Jisu Karisito, ka sa kaukauwa vakalevu cake ka tawamudu ke vakatauvatani kei na leqa eso oqori. E kena ibalebale “[meda] taura matua na veika vinaka kecega” (Moronai 7:19). E kena ibalebale me tiko ga “na inuinui ni nona lagilagi kei na bula tawamudu, me tiko ena nomu vakasama me sega ni mudu” kei na Veisorovaki i Jisu Karisito (Moronai 9:25). Ia me yacova na siga lagilagi ni iKarua ni lako mai nei Karisito, e kena ibalebale ni sega ni cegu na “cakacaka [me da] vakayacora … me daru vorata kina na meca ni ivalavala dodonu kecega” (Moronai 9:6).
Vakasama eso ni Vuli iVolanikalou Yadua
Na rarama i Karisito e vukea meu vakalewa na vinaka mai na ca.
E vakasinaiti ena vuravura na siga nikua na itukutuku dau veivakayarayarataki; ena rawa vakacava me da kila ena kena e dodonu kei na koya e cala? E solia vei keda na vosa i Momani ena Moronai 7 e vica na ivakavuvuli e rawa ni da vakayagataka me da levea “[vakalelewa] cala” (Moronai 7:18). Ni ko vulica na Moronai 7:12–20, raica na dina e rawa ni vukei iko mo kila na cava ena kauti iko vakavoleka vua na Kalou kei na veika e sega ni kauti iko voleka Vua. Sa rawa ni o vakayagataka na veidina oqo me vukei iko mo dikeva na itukutuku o na ciqoma kei na veika o sotava ena macawa oqo ka vakadeitaka kevaka e sureti iko ka vakayarayarataki iko mo caka vinaka (raica na Moronai 7:13).
Raica talega na “Vakalewai Ira na Tani,” Gospel Topics, topics.ChurchofJesusChrist.org; Bible Dictionary, “Light of Christ.”
Ena vakabauti Karisito, sa rawa niu “taura matua na veika vinaka kecega.”
Ni sa vakavulici oti na kena vakaduiduitaki na vinaka mai na ca, e taroga o Momani e dua na taro e veiganiti ena siga nikua: “E rawa vakacava meda taura matua na veika vinaka kece ga?”—vakabibi ni sa veirawai tiko na veitemaki ni vunica (Moronai 7:20). E rawa ni kune na isaunitaro i Momani ena vo ni wase 7. Ni o wilika na tikina e 20–48, vakaraica na dina, ena vukei iko mo kila na “veika vinaka kecega” o taukena e baleti Jisu Karisito. E vukei iko vakacava na nomu vakabauti Koya me vakasaqara na veika e vinaka? Ena rawa vakacava ni o “taura matua” vakalevu cake na veika e vinaka?
Raica talega na Yavu ni Vakabauta 1:13.
“Na loloma uasivi sa ikoya na loloma i Karisito.”
A raica rawa o Peresitedi Dallin H. Oaks: “Na vuna e sega ni mudu na loloma uasivi kei na vuna e levu cake sara na loloma uasivi mai nai vakarau vinaka … sai koya ni loloma uasivi, ‘na loloma savasava i Karisito’ (Moro. 7:47), e sega ni dua na cakacaka ia e dua na ituvaki se na ituvaki ni bula. … Na loloma uasivi sai koya e dua na ivakarau ni bula eda rawata” (“The Challenge to Become,” Ensign, Nove. 2000, 34). Ni o wilika na Moronai 7:44–48, vakasamataka na ivakamacala ni loloma uasivi i Momani, ka vakarogoca na veivakauqeti mai na Yalo Tabu; ena rawa ni vukei iko o Koya me vinaka cake. Na cava eda gadreva kina na vakabauta kei nai nuinui mo ciqoma na isolisoli ni loloma uasivi?
Ena rawa ni kau tani mai vei au na noqu savasava kei na vinaka?
Na ivakamacala ni valavala ca vakasisila ni Nifaiti nei Momani esa vakavuna me ra nanuma eso ni ra sa voroka na lawa ni tiko savasava o ira era vakayacori vei ira na itovo kaukauwa ni kucu kei na veivakalolomataki. Ia, e vakamatatataka o Elder Richard G. Scott ni sega ni vakakina. A vakavulica, “Au sa vakadinadinataka ena gauna e veivakacacani kina na ivakarau kaukauwa, veivakalolomataki, kucu vei iko, e sega ni nomu ivalavala ca ka sega ni dodonu mo yaloluluqa kina” (“Healing the Tragic Scars of Abuse,” Ensign, May 1992, 32).
E rawa ni’u vakanuinui vei Karisito, se cava ga na ituvaki ni bula au tu kina.
Ni oti na nona vakamacalataka na veika e raica, sa tukuna o Momani vei luvena me kakua ni rarawa. Na cava e vakauqeti iko me baleta na itukutuku ni vakanuinui nei Momani? Na cava e kena ibalebale vei iko me “laveti [iko]” ko Karisito? Na ivakarau kei na Nona ivakavuvuli cava o Karisito “me tiko ena nomu vakasama” ka solia vei iko nai nuinui? (Moronai 9:25).
Raica talega na Dieter F. Uchtdorf, “Na iNuinui ena Rarama ni Kalou,” Ensign se Liaona, Me 2013, 70, 75–77.
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Moronai 7:5–11
Ena Moronai 7:5–11, na cava e bibi kina meda cakava na ka dodonu, kei na inaki dodonu? Eda na kila vakacava kevaka eda masu ka talairawarawa ki na ivakaro ni Kalou ena “yalodina”? (tikina e 6).
Moronai 7:12–19
Ena vukei keda vakacava meda vakayacora na digidigi vinaka ena noda vakayagataka na noda gauna kei ira da vakayagataka vata ena ivakasala nei Momani? Sa rawa ni o sureta na lewe ni matavuvale me ra vakasaqara na nomu vale ka “taura matua” (Moronai 7:19), se me tautauri matua ki na veika dau sureti ira me ra “caka vinaka ka lomana na Kalou, ka qaravi koya” (Moronai 7:13). Vakacaucautaki ira ena veika vinaka era sa kunea.
Moronai 7:29
Ni wiliki oti na tikina oqo, sa rawa ni veivosakitaka na lewe ni matavuvale na cakacaka mana era vakadinadinataka se eso tale na sala era sa raica tiko na liga ni Kalou ena nodra bula.
Moronai 8:5–26
Na cava era sega ni kila vakamatata na Nifaiti era papitaisotaki ira na gone lalai me baleta na Veisorovaki i Jisu Karisito? Na cava eda vulica me baleta na Veisorovaki mai na ivakavuvuli nei Momani?
Moronai 8:16–17
Na cava na ibalebale ni “loloma e taucoko”? Ena vukei keda vakacava meda ulabaleta na rere? Ena vukei keda vakacava meda vakavulica na dina ena yaloqaqa? Eda na tara cake vakacava na loloma e taucoko?
E levu cake tale na vakasama ni vakavulici ira na gone e tiko ena, ituvatuva ena macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Vakayagataka na sere ivakatagi me sureta na Yalotabu ka vakavulica na ivunau “Na sere ivakatagi e sega ni yalani na kena kaukauwa me toroi [keda] yani ki na bula vakayalo e cecere cake.” (“Na iVakamacala Taumada ni Mataveiliutaki Taumada,” Serenilotu, x). E dua na sere me baleta na loloma, me vaka na “Love One Another” (Hymns, naba. 308), e rawa ni vakavinakataka cake na matavuvale na veivosaki me baleta na loloma cecere ena Moronai 7:44–48.
iYaloyalo kei Karisito, na iVakabula, mai vei Heinrich Hofmann