Ivakamacala ni Mataveiliutaki Taumada

Ni oti e tolu na vula na kena tauyavu na Lotu, e a vakasalataka o Josefa Simici na Turaga me baleti Ema, na watina, me digitaka e so na sere dokai ni Lotu: “Raica au sa rekitaka sara na sere sa lagati ena yalodina; io na nodra sere na yalododonu sa nodra masu vei au, kau na vakalougatataki ira kina.”(V&V 25:12).

Edaidai, ni oti e 150 na yabaki mai na kena a tabaka na Lotu na imatai ni ivolanisere, keitou yalomarau me keitou vakaraitaka yani ni oqo na kena ka dikevi lesu. Era sa okati vata tiko yani kei na vuqa na serenilotu ka kunei tu ena noda ivolanisere kei na vica tale na sere vovou. Era sa digitaki me ra sotava na veigagadre e vuqa ni lewe ni Lotu ena vuravura raraba.

iVakatagi ena Noda Soqoni vaka-Lotu

E tiki bibi ni noda soqoni vakalotu na veivakauqeti ni ivakatagi. Na serenilotu e dau sureta mai na Yalo ni Turaga, taracake na yalo ni vakarokoroko, vakaduavatataki keda na lewenilotu, ka vakarautaka vei keda na sala me da cabora kina vua na Turaga na noda vakavinavinaka.

E so na ivunau bibi era vunautaki tiko ena kena lagati na serenilotu. E dau uqeti keda na serenilotu me da veivutuni ka caka vinaka, taracake na noda ivakadinadina kei na vakabauta, vakacegui ira na oca, vakaceguya na yalorarawa, ka vakauqeti keda me da vosota me yacova na ivakataotioti.

Keitou sa nuitaka ni keitou na raica ni sa na levu cake na laga sere vei ira na lewe ni ivavakoso. Keitou uqeti ira kece na lewenilotu, se ra taleitaka na lagasere se sega, me ra duavata mai kei keda ena lagati ni serenilotu. Keitou nuitaki ira na iliuliu, qasenivuli kei ira na lewenilotu era dau kacivi me ra vosa me ra na dau goleva vakawasoma na ivolanisere ni lotu me ra kunea kina na ivunau uasivi, ka totoka, ka sa vakarautaki tu vakamaqosa ena veiqaqa ni sere yadua.

Na lagasere sa dau itovo tu ni bula vei ira na Yalododonu Edaidai ena dua na gauna balavu. E dodonu me tiko ena veitabana kei na tabanalevu yadua ni Lotu na kena matasere ka me dau lagasere vakawasoma ena veigauna. Keitou vakauqeti ira na veimatasere me ra vakayagataka na ivolanisere ni lotu me nodra ivurevure.

iVakatagi ena Noda Vuvale

E sega ni yalani rawa na kena kaukauwa na ivakatagi me yavalati kina na matavuvale ki na veika cecere vakayalo ka vakanamata tiko ki na kosipeli. E dodonu vei ira na Yalododonu Edaidai me ra vakasinaita tiko na nodra vuvale ena voqa ni ivakatagi uasivi sara.

Na noda ivolanisere ni lotu e baleta tiko na vuvale ka vakakina na valenilotu. Keitou sa nuitaka ni na vakadeitaki tiko na ivolanisere ni lotu ena dua na tikina vinaka sara ena kedra maliwa na ivolanikalou kei na veivola ni lotu tale e so ena noda vuvale. Ena rawa ni kauta mai na serenilotu ki na matavuvale na lagilagi ni yalo kei na vakacegu ka rawa ni vakauqeta na loloma kei na duavata ena kedra maliwa na lewe ni matavuvale.

Tuberi ira na luvemu me ra taleitaka na serenilotu. Me ra lagata ena Sigatabu, ena lotu vakamatavuvale, ena gauna ni vulici ni ivolanikalou, ena gauna ni masumasu. Lagasere ni ko cakacaka tiko, ni ko qito, ka vakakina ena nomu veilakoyaki voli vata kei na nomu itokani. Lagata na serenilotu me vaka na sere ni vakamoce gone me taraicake kina na vakabauta kei na ivakadinadina vei ira na luvemu lalai.

iVakatagi ena Noda Bula Yadudua

Me ikuri ni kena veivakalougatataki na sere vei keda ena Lotu kei ira na lewe ni noda matavuvale, ena rawa ni veivakalougatataki vakalevu cake sara na serenilotu vei keda yadudua. Na serenilotu ena rawa ni laveta na yaloda, vakayaloqaqataki keda, ka kauti keda yani ki na ivalavala dodonu. E rawa ni vakasinaita na yaloda ena vakasama vakalomalagi ka kauta mai vei keda na yalovakacegu.

E rawa talega ni vukei keda na serenilotu me da vorata na veitemaki ni vu-ni-ca. Keitou vakayaloqaqataki iko mo cavuqaqataka na nomu serenilotu taleitaki ka vulica na tiki ni ivolanikalou e okati ena kena vakasama. Ia, kevaka e curuma mai na nomu vakasama na vakanananu dukadukali, lagata lo e lomamu e dua na serenilotu, me tabonaka na ca ena vinaka.

Kemuni na taciqu kei na ganequ, me da vakayagataka na serenilotu me sureti mai na Yalo ni Turaga ki noda ivavakoso, noda vuvale, kei na noda bula yadudua. Me da vulica ka vakasamataki ira, cavuqaqataka ka lagati ira, ka vakaivotavota ena kena kakana vakayalo. Mo kila ni nodra sere na yalododonu sa nodra masu vua na Tamada Vakalomalagi, “kau na vakalougatataki ira kina.”

Na Mataveiliutaki Taumada