Ena Veiqaravi ni Nomu Kalou, mai vei Walter Rane

21–27 ni Tiseba

Siganisucu

“Ena Lako mai ki Vuravura me Tasereki ira na Nona Tamata”

Na gauna ni Siganisucu e dua na gauna me ra vakasamataka ka vakaraitaka na vakavinavinaka me baleta na sucu ni noda iVakabula, o Jisu Karisito. Ni o wilika ka vakananuma vakatitobu me baleta na nona sucu kei na nodra bula ena macawa oqo, vakasamataka na sala sa vaqaqacotaka kina na nomu ivakadinadina na nomu vulica na iVola i Momani ena yabaki oqo ni sai koya na iVakabula kei vuravura. Vola na Veivakauqeti e yaco vei iko.

Vola na Veika o vakauqeti Kina

Mai na Nifai ki na Moronai, era yalodina na parofita yadua ena iVola i Momani ena itavi tabu ni vakalekalekataki na ivola tabana ni ulutaga: “Me vakadinadinataki kina vei ira na [tamata] ni o Jisu sai koya na Karisito.” A raici Koya e dua na parofita me vaka e dua na yalo taumada, ka dua tale a raica na Nona sucu kei na Nona cakacaka ena dua na raivotu. A tucake e na lalaga me rau vunautaka na ivakatakilakila ni Nona sucu kei na Nona mate e dua, ia e dua tale a tekiduru e na yagona sa vakaturi cake tale, ka tara na we ni mavoa e ligana, yavana, kei na yasana. Ko ira kece sa kila na dina bibi oqo: “Sa sega ni dua tale na sala se kaukauwa me vakabulai kina na tamata, ena dra ni veisorovaki duadua i Jisu Karisito, o koya ena … lako mai me sereki ira na kai vuravura” (Ilamani 5:9).

Ena gauna ni Siganisucu oqo, ena nodra marautaka wavoliti vuravura na vakabauta vakarisito na vinaka ni loloma ni Kalou ena Nona tale mai na Luvena, vakasamataka sa vakaukauwataka vakacava na iVola i Momani na nomu vakabauti Karisito. Ni o vakasamataka na Nona sucu, vakananuma vakatitobu na cava na vuna e lako mai kina o Koya kei na ivakarau sa veisautaka na nomu bula. Sa na qai rawa ni o vakila na marau dina ni Siganisucu—na isolisoli sa solia vei iko o Jisu Karisito.

Vakasama eso ni Vuli iVolanikalou Yadua

1 Nifai 11:13–36; Mosaia 3:5–10; Ilamani 14:1–13; 3 Nifai 1:4–22

E lako mai ki vuravura o Jisu Karisito me mai noqu iVakabula.

E kena ivakarau me wiliki na italanoa ni sucu ni iVakabula ena Veiyalayalati Vou ena gauna ni Siganisucu, ia sa rawa mo raica na parofisai ni veika tabu vakalou oqo ena iVola i Momani. Me kena ivakaraitaki, era tiko kina na vei parofisai ni nona sucu kei na ilesilesi ni iVakabula ena 1 Nifai 11:13–36; Mosaia 3:5–10; Ilamani 14:1–13; kei na 3 Nifai 1:4–22. Na vakasama cava e lako mai vei iko me baleti Jisu Karisito ni o wilika na veitikina oqo ka vakasamataka na kena ibalebale me baleta na ivakatakilakila ni Nona sucu? E vaqaqacotaka vakacava na nodra ivakadinadina na parofita oqo e Amerika makawa ena nomu ivakadinadina me baleta na Karisito kei na Nona ilesilesi?

Raica talega na Maciu 1:18–25; 2; Luke 2.

2 Nifai 2:6; Alama 7:7–13; 11:40; Ilamani 5:9; 14:16–17

Sa Dauveivueti ni tamata kece ga o Jisu Karisito.

Sa na sega li ni kilikili me marautaka kina na sucu i Jisu Karisito ke sega na Nona isoro ni veisorovaki, ka rawa kina ni vakabulai keda mai na ivalavala ca kei na mate, vakacegui keda ena rarawa, ka vukei keda meda “vakataucokotaki Vua” (Moronai 10:32). Na cava o sa vulica mai na iVola i Momani ena yabaki oqo me baleta na kaukauwa ni iVakabula me vakabulai iko? E tiko beka na italanoa se ivakavuvuli e matalia vei iko? Vakasamataka na cava beka e vakavulica vei iko na ilesilesi ni Vakabula na ivakaraitaki eso oqo: 2 Nifai 2:6; Alama 7:7–13; 11:40; kei na Ilamani 5:9; 14:16–17. Na cava o vakauqeti kina mo cakava me vakaraitaka vei Koya na nomu vakavinavinaka? (Christmas.Mormon.org e tiko kina eso na vakasama e rawa ni o tekivu kina.)

1 Nifai 6:4; 19:18; 2 Nifai 25: 23, 26; 33: 4, 10

Na iVola i Momani e ivakadinadinataki Jisu Karisito.

“E dua tale na ivakadinadina kei Jisu Karisito” e sega walega ni dua na iulutaga lailai me baleta na iVola i Momani; ia e dua na itukutuku ni kena inaki vakalou. Vakasamataka vakatitobu na veika o sa vulica mai na ivolanikalou oqo me baleta na inaki ni iVola i Momani me vakadinadinataki Karisito: 1 Nifai 6:4; 19:18; kei na 2 Nifai 25: 23, 26; 33: 4, 10.

Sa rawa mo vola ena ivolaniveisiga na kena vulici na iVola i Momani ena yabaki oqo sa vakavolekataki iko vakacava vei Karisito. E rawa ni veivuke na vakatutu eso oqo:

• “E dua na ka vou au vulica me baleta na iVakabula ena yabaki oqo e a …”

• “Noqu wilika [na veitikina me baleta na iVakabula] e veisautaka na ivakarau au …”

• “Noqu tamata taleitaki [se italanoa] ena iVola i Momani e vakavulici au ni na iVakabula ena …”

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

1 Nifai 11:13–23; Mosaia 3:5–10; Ilamani 14:1–13; 3 Nifai 1:4–22

Era na taleitaka na gone na droinitaki ni iyaloyalo ni veika era rogoca ni o wilika na italanoa ni sucu kei na ilesilesi nei Karisito, ena 1 Nifai 11:13–23; Mosaia 3:5–10; Ilamani 14:1–13; kei na 3 Nifai 1:4–22. Era na qai rawa ni talanoataka tale na italanoa ni vakayagataki na iyaloyalo era droinitaka.

“Sai Koya nai Loloma”

Me vukea na nomu matavuvale na vakanamata ki na isolisoli sa solia vei keda na Tamada Vakalomalagi ena nona vakauta mai na Luvena, sa rawa ni ologi e dua na iyaloyalo i Jisu Karisito me vaka e dua na iloloma ni Siganisucu. Sa rawa ni veivosakitaka na lewe ni matavuvale nai loloma taleitaki era sa ciqoma se namaka me ra ciqoma. Sa qai rawa ni cereki nai itaba i Karisito ka veitalanoataka na o Koya sai loloma uasivi vei keda. Na vidio “He Is the Gift” (ChurchofJesusChrist.org) e rawa ni vukei iko mo veivosakitaka na sala o rawa ni raica, ciqoma, ka wasea nai loloma ni iVakabula vakamatavuvale ena Siganisucu oqo.

Ena yaga tale beka ga ki na nomu vuvale me vakasamataka e dua nai “loloma” era via solia vua na iVakabula, me vaka na sasaga me dau yalovinaka vei ira na tani se sasagataki me biuta e dua na ivakarau ca. Navuca mo sureta na lewe ni matavuvale me ra vola na nodra vakasama, ologa me vaka e dua nai loloma, ka biuta kina na nodra iloloma e dua na iyaloyalo ni iVakabula.

Na Yalo ni Siganisucu

Ena marautaki me ra tuvanaka na itaviqaravi vakamatavuvale e rawa ni caka ena veisiga volekata na Siganisucu me ra vakila na Yalo i Karisito, me vaka na veiqaravi vua e dua, se lagati vata na sere ni Siganisucu. (Me baleta na vakasama eso, raica na christmas.ComeUntoChrist.org.)

Me ikuri ni vakasama me baleta na nodra vakavulici ni gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Vakatorocaketaki Noda Veivakavulici

Vakamuria na veisureti me caka. “Ni ko sa vakamuria na veisureti mera laki cakacakataka, ko sa vakaraitaka vei ira na [lewe ni nomu vuvale] ni ko kauwai kei na sala sa vakalougatataki ira tiko na kosipeli. Ko sa solia tale tikoga vei ira na madigi mera wasea na veika era sa sotava, ka sa vaqaqacotaka na nodra yalodina ka solia vei ira na veitokoni vakai ira ena bulataki ni kosipeli” (Veivakavulici ena iVakarau ni iVakabula, 35).

Na raivotu nei Nifai me baleta na Yalewa savasava o Meri, mai vei Judith A. Mehr