Na ikuri ni ivakamacala A

E Vakadinadinataka Vakacava vei Au na Yalo ni Dina na iVola i Momani?

O sa na rogoca beka na yalayala nei Moronai vei ira kece era wilika na iVola i Momani: “Ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko Koya ena kaukauwa ni Yalo Tabu ni sa dina” (Moronai 10:4). Ia na cava na kena ibalebale me kilai na dina “ena kaukauwa ni Yalo Tabu”? O na kila vakacava na gauna e vosa kina na Yalo Tabu vei iko?

Ena rawa ni veivuke me da nanuma ni Yalo Tabu ena dau veitaratara vata kei keda ena sala e duatani sara mai na sala sa dau matau tu vei keda. Ia e vinakata na Tamada Vakalomalagi me vukei iko mo vulica ka kila na Yalotabu. Sa solia vei iko ko Koya na iVola i Momani, ka ra vakamacalataka kina na veika era sotava vata kei na domo ni Turaga e vica na tamata yalodina.

Me kena ivakaraitaki, tukuna o Nifai vei ira na tacina ni sa kaya na Turaga vei ira “ena domo malua lailai,” e dina ga ni ra sega ni rogoca rawa ena daligadra. Na ka dina, e kaya o Nifai vei rau na tuakana ni rau “sa yalo vatu” ka sega kina ni rawa ni rau “vakila na nona vosa” (1 Nifai 17:45, vakuri ena matanivola kala). A vakamacalataka o Inosi ni sa rogo tale mai “na domo ni Turaga” ki na “nona vakasama” (Inosi 1:10). Ka vakasamataka na veivosa oqo ka vakamacalataka na domo sa rogo mai lomalagi ena nona rairai na iVakabula sa vakaturi cake mai na mate ena vanua o Vanuasautu: “e sega ni domo kaukauwa, ka sega talega ni rogo levu; [ia], … sa laubasikati ira sara ki na yalodra ka sa vakavuna na raragi ni lomadra” (3 Nifai 11:3).

E rairai o sa sotava beka eso na veika vakaoqo, se duatani beka na veika o sotava. Dau veitaratara mai na Yalo Tabu ena veisala duidui eso, ka rawa ni duidui na sala e yaco mai kina vei keda na ivakatakila. Ia ni sa tiko vei keda na Yalo, eda na raica na nona veivakayarayarataki vei keda ena vuqa sara na sala. A vosa na iApositolo o Paula baleta na “vua ni Yalotabu”—na yalo ni “loloma, reki, sautu, vosota vakadede, ivalavala malua, na vinaka, na vakabauta, yalomalua, dauvosota,” kei na vuqa tale (Kalatia 5:22–23).

Oqo e so tale na ivakavuvuli kei na ivakaraitaki mai na iVola i Momani me baleta na Yalo Tabu. Ni o wilika, e rawa ni o raica ni o a sega ni kila na veigauna sa vosa tiko kina vei iko na Yalo Tabu, ka vakadinadinataka tiko vei iko ni vosa dina ni Kalou na iVola i Momani.

Vakamuduo kei na Reki

E dolavi na iVola i Momani ena nona raica na parofita o Liai e dua na raivotu vakasakiti. Ena raivotu oqo, a soli vua e dua na ivola ka sureti me wilika. “Ni sa wilika tiko,” e tukuni ena kena itukutuku, ni “sa vakasinaiti ena yalo ni Turaga.” Na veika oqo a vakavuna nona vakacaucautaka na Kalou ko Liai ena Nona “kaukauwa, kei na vinaka, kei na loloma cecere,” ka sa “reki kina na yaloi Liai, ka vakasinaiti na yalona” (1 Nifai 1:12, 14–15).

O sa bau sotava mada e dua na ka vaqo? Sa bau vakasinaita mada na yalomu ena vakavinavinakataka na vinaka kei na loloma cecere ni Kalou na nomu wilika na iVola i Momani? Sa bau vakavuna mada na reki ni yalomu na veimalanivosa ni iVola i Momani? Oqori na veivakauqeti ni Yalotabu, ka vakadinadinataka tiko vei iko ni vosa o wilika tiko e lako mai vua na Kalou ka vakavulica na Nona dina.

Na Yalo sa Veisau

Ni oti nona vunautaka e dua na ivunau cecere baleta na Veisorovaki i Jisu Karisito (raica na Mosaia 2–4), a vinakata na Tui ko Penijamini me kila kevaka era “vakabauta na vosa e tukuna vei ira” na nona tamata. Era sauma mai ni ra sa vakabauta na nona itukutuku. Na cava na vuna? “Ni sa vakayacora na Yalo ni Turaga Kaukauwa e dua na veisau levu vei keimami, se ki na lomai keimami, ka sa sega tale kina ni tiko vei keimami e dua na gagadre me kitaka na ka ca, ia me keimami kitaka tikoga na veika vinaka” (Mosaia 5:1–2).

O sa vakila beka i yalomu e dua na ka vaqori ena nomu wilika na iVola i Momani. Taura mada, o a sa vakauqeti beka mo tamata vinaka cake, mo vuki tani mai na ivalavala ca, se cakava e dua na ka vinaka vua e dua. Oqori na ivakadinadina vakayalo o vaqara tiko ni sa vakauqeti mai vua na Kalou na ivola oqori. Ia me vaka a vakatavulica o Momani, “Sa uqeti mai vua na Kalou na veika kecega sa sureta ka vakayarayarataka na tamata me ra caka vinaka ka lomana na Kalou, ka qaravi koya” (Moronai 7:13; raica talega 2 Nifai 33:4, 10; Alama 19:33; Ica 4:11–12).

E Dua na Vakasama Vakarararamataki

Ni vinakata o Alama me vukei ira na Soramaiti me ra “vakatovotovotaka na [nona] vosa” ka kila vakataki ira se dina na nona ivakadinadina, e vakatauvatana o koya na vosa ni Kalou ki na dua na sorenikau: E vakamacalataka o koya, “Kevaka ko ni sa vakatara me tei e lomamuni e dua na sorenikau, ena tekivu me tubucake mai e lomaseremuni; ia ni ko ni sa vakila na tubucake oqo, ko ni na kaya e lomamuni—Sa dodonu me sorenikau vinaka dina oqo, se sa vosa vinaka, raica sa vakalevutaka na yaloqu kei na yagoqu, io, sa vakararamataka na noqu kila ka, io, sa vakatekivu me kana vinaka vei au” (Alama 32:27–28).

O “vakatara me tei” e lomamu na vosa ni iVola i Momani ni o vakatara me vakayarayarataka na nomu bula ka dusimaka nomu digidigi. Ia ena rawa vakacava ki na veimalanivosa oqo me “vakalevutaka na [yalomu]” ka “vakararamataka na [nomu] kila ka”? Ko sa na vakila beka ni o sa bula qaqaco vakayalo. O na vakila beka ni na levu cake nomu loloma kei na kauwai vei ira na tani. O na raica talega ni vinaka cake nomu kila, vakauasivi na veika vakayalo— voleka ni vaka ga ni cilava mai nomu vakasama e dua na rarama. Ko na vakadonuya beka ni “kana vinaka” na ivunau e vakavuvulitaki ena iVola i Momani” Na vakanananu vakaoqori e rawa ni vukei iko mo kila ni o sa ciqoma e dua na ivakadinadina vakayalo, me vaka a kaya o Alama: “Oi, e sega beka ni dina oqo? Io, au sa kaya vei kemudou, io, baleta ni sa rarama; Ia na ka kecega sa rarama sa ka vinaka, baleta ni rawa me kilai, o koya mo dou kila kina ni sa vinaka” (Alama 32:35).

E Sega ni Yaga mo Vakataroga

Oqo e vica vei ira na sala e dau veitaratara mai kina na Yalo. E vuqa tale tu. Vakasaqara tikoga na madigi mo rogoca na domo ni Yalo, ko na ciqoma tikoga na Nona veivakadeitaki baleta na dina ni iVola i Momani.

Sa yalataka tu o Peresitedi Russell M. Nelson: “E sega ni yaga mo vakataroga se cava e dina. E sega ni dodonu mo lecava ko cei mo vakabauta dina. Mai na ivakatakila vei iko, ko rawa ni ciqoma kina nomu ivakadinadina vakai iko ni Vola i Momani e vosa ni Kalou, ni o Josefa Simici e dua na parofita, ka ni sai koya oqo na Lotu ni Turaga. Se cava ga era na tukuna se cakava eso tale, e sega ni dua e rawa me kauta tani na ivakadinadina a tukuni ki yalomu kei na nomu vakasama me baleta na ka dina” (“E dua na iVakatakila me baleta na Lotu, na iVakatakila me baleta na Noda Bula,” Ensign se Liaona, Me 2018, 95 ).