“9–15 ni Noveba. Ica 1–5: ‘Dresulaka na iLati ni Tawavakabauta Oqori’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)

“9–15 ni Noveba. Ica 1–5,” Lako Mai, Mo Muri Au—Me Baleti Ira na Tamata Yadua kei na Matavuvale: 2020

iVakatakilakila

Veilakoyaki voli ena loma ni lekutu o ira na Jeretaiti

Era Biuti Pepeli na Jeretaiti, mai vei Albin Veselka

9–15 ni Noveba.

Ica 1–5

“Dresulaka na iLati ni Tawavakabauta Oqori”

Ai Vola i Ica sai koya na kedra itukutuku na Jeretaiti, era a tadu yani ki na vanua yalataki ena vica na senijiuri ni se bera ko ira na Nifaiti. A vakauqeti Moronai na Kalou me okata na itukutuku i Ica ena iVola i Momani ena vuku ni kena yaga ki na noda gauna. Na cava o vakila ni veiganiti kaya ena nomu bula?

Vola na Veika o Uqeti Kina

E dina ni sa cecere cake mai na noda sala na sala ni Kalou, ka dodonu me da talairawarawa ki na Nona lewa, sa vakauqeti keda talega o Koya me da vakasama ka cakacakataki keda. Oqori e dua na lesoni erau a vulica o Jereti kei na tuakana. Me kena ivakaraitaki, e vaka me taumada ena vakasama nei Jereti na vakasama ni ilakolako ki na dua na vanua vou, “sa digitaki mai vei ira na vanua kecega e vuravura” ka sa “yalololoma kina” na Turaga, ka yalataka me na vakayacora na kerekere, ka kaya kina, “Kau na vakalougatataki iko vakaoqo ni ko sa dau masuti au vagumatua” (raica na Ica 1:38–43). Ena gauna e raica kina o tuakai Jereti na butobuto ni loma ni waqa ena kauti ira ki na vanua yalataki, a sureti koya na Turaga me vakatura e dua na kena iwali, ka taroga e dua na taro eda dau tarogi Koya kina: “A cava ko vinakata meu kitaka?” (Ica 2:23). E vaka me tukuna tiko na itukutuku ni sega ni dodonu me da namaka tiko na Kalou me tukuna vei keda na ka kece me da cakava. Eda rawa ni wasea vata kei Koya na noda vakanananu kei na vakasama, ka na vakarorogo ka solia Nona veivakadeitaki se kevaka e sega ena vakasalataki keda. Ena so na gauna na ka ga e tawasei keda tiko mai na veivakalougatataki eda vakasaqara sai koya na “ilati ni tawavakabauta,” Ia kevaka e rawa ni da “dresulaka na ilati oqori” (Ica 4:15), eda na kidacalataka na veika sa tuvakarau na Turaga me cakava vei keda.

iVakatakilakila

ivakatakilakila ni vuli yadua

Vakasama eso ni Vuli iVolanikalou Yadua

Ica 1:33–43

Niu masu vua na Turaga, ena yalololoma vei au ko Koya.

NaIca 1:33–43 e tukuni kina e tolu na masu i tuakai Jereti. Na cava o vulica mai na nona sauma na Turaga na masu yadua oqo? Vakasamataka mada e dua na gauna o ni vakila kina na yalololoma ni Turaga ena nomuni tagi Vua ena masu. Sa rawa mo na vola na veika oqo ka qai wasea vata kei na dua e gadreva tu me rogoca na nomu ivakadinadina.

Ica 2; 3:1–6; 4:7–15

Au rawa ni ciqoma na ivakatakila me baleta na noqu bula.

E kaya o Peresitedi Russell M. Nelson: “Au kerei kemuni mo ni vakalevutaka na nomuni kaukauwa vakayalo mo ni ciqoma na ivakatakila. … Digitaka mo cakava na cakacaka vakayalo e gadrevi mo marautaka kina na isolisoli ni Yalo Tabu ka rogoca vakawasoma ka vakamatata na domo ni Yalo” (“iVakatakila me Baleta na Lotu, iVakatakila me Baleta na Noda Bula,” Ensign se Liaona, me 2018, 96).

Ni ko vulica na Ica 2; 3:1–6; kei na 4:7–15, na veika dina cava o na raica ni na vukei iko mo kila deivaki na iwalewale ka vakasaqara na ivakatakila yadua? E rawa ni o vakatakilakilataka e na dua na roka na taro se na kauwai nei tuakai Jereti kei na veika a cakava kina, kei na dua tale na roka vakatakilakilataka na ivakarau a vukei koya kina na Turaga me kila na Lomana. Na cava e uqeti iko baleta nona ivakarau ni veitalanoa kei na Turaga na tuakai Jereti, kei na cava o vulica kina baleta na ivakarau me taladrodro kina na ivakatakila ena nomu bula?

Ica 2:16–25

Ena vakarautaki au na Turaga meu takosova noqu “wasaliwa titobu.”

Me ra yaco ki na vanua yalataki, era a sotava na Jeretaiti e dua na itatao levu: ena nodra takosova na “wasaliwa titobu” (Ica 2:25). Na malanivosa na “wasaliwa titobu” e rawa ni dua na ivakamacala veiganiti ni veika eda vakila baleta noda veivakatovolei kei na bolebole. Ia ena so na gauna, me vaka a yaco vei ira na Jeretaiti, noda takosova na noda “wasaliwa titobu” sai koya duadua ga na sala me vakayacori kina na lewa ni Kalou me baleti keda. O sa raica beka na veika e tautauvata ena nomu bula kei na Ica 2:16–25? Sa vakarautaki iko vakacava na Turaga me baleta na nomu bolebole? Na cava beka e kerea tiko mo cakava ena gauna oqo mo vakarautaki kina ki na veika e gadreva o Koya mo cakava ena veisiga ni mataka?

Ica 3

E buli na tamata me ucuya na Kalou.

Ena ulunivanua o Selemi, a vulica kina na tuakai Jereti e vuqa na ka me baleta na Kalou kei na ka me baleti koya. Na cava o vulica mai na Ica 3 me baleta na kena ituvaki vakayalo ka vakayago talega na Kalou? Ena vukei iko vakacava na dina eso oqo mo kila na kemu ivakatakilakila kei na kemu icavacava vakalou?

Ica 3:6–16

O tuakai Jereti beka na imatai ni tamata me raica na Turaga?

Sa vakaraitaki Koya oti na Kalou vei ira eso tale na parofita ni se bera na tuakai Jereti (kena ivakaraitaki, raica na Mosese 7:4, 59), ia na cava e kaya kina vua na Turaga, “Kau sa sega vakadua ni vakaraitaki au vua na tamata”? (Ica 3:15). E vaqo nona ivakamacala kina o Elder Jeffrey R. Holland: “E kaya vaqo na Karisito vua na taci Jereti, ‘Se bera vakadua niu vakaraitaki au vaqo vua na tamata , sega ena noqu lewa ga, ia ena vuku vakatabakidua ni nona vakabauta o koya e raici au’” (Christ and the New Covenant [1997], 23).

iVakatakilakila

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Ica 1:34–37

Na cava eda vulica mai na veitikina oqo me baleta noda masulaki ira na tani? Na dina cava tale baleta na masu e vakaraitaki ena veitikina oqo?

Ica 2:16–3:6

Na cava e vakavulica vei keda na ivakaraitaki nei tuakai Jereti baleta na ivakarau me da kunea kina na isau ni noda lomaleqa kei na taro? De rawa beka ni ra wasea na lewe ni matavuvale na veika era sa sotava ena nodra a vakasaqara ka ciqoma na isau ni nodra taro mai vua na Turaga.

Ica 4:11–12

Ni oti na kena wiliki na veitikina oqo, me ra vola na lewe ni matavuvale eso na veika dau yaco e veisiga ka vakayarayarataka na nomu matavuvale (me vakataka na iyaloyalo yavala, sere, qito, se o ira na tamata) ena veitiki ni pepa ka biuti ira ena dua na bilo. Oti me ra qai veivukevuke ena nodra tomika e dua ka veivosakitaka se a “vakauqeti ira me ra kitaka na ka vinaka” (Ica 4:12). Na veisau cava soti e vakauqeti kina nomu matavuvale me vakayacora?

Ica 5

O rawa ni vunia e dua na iyaya se dua na ivakalomavinaka ena dua na kato ka sureti ira na lewe ni matavuvale me ra rai e loma ka solia vei ira na vo ni matavuvale na ivakatakilakila me vukea na nodra kila. Ni dou wilika vata na Ica 5 , veivosakitaka na vuna e bibi kina na Nona vakayagataka na Turaga na ivakadinadina ena Nona cakacaka. Eda na wasea vakacava na noda ivakadinadina ni iVola i Momani vei ira na tani?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Vakatorocaketaki Noda Veivakavulici

Dau tuvakarau e veigauna. “Na gauna ni veivakatavulici sega ni vakarautaki e dau tasiri totolo yani, o koya e bibi kina me da vakayagataka ni ra yaco mai. …. Me kena ivakaraitaki, e dua na yabaki tinivakacaca e sotava tiko na gauna dredre ni vakatulewa sa na vakarau beka me vulica na sala ni kena ciqomi na ivakatakila yadua” (Veivakavulici ena iVakarau ni iVakabula, 16).