Na Rarama ni Matana Sa Serauni Iratou, mai vei Gary L. Kapp

28 ni Sepiteba–11 ni Okotova

3 Nifai 17–19

“Raica, Sa Vuabale Na Noqu Marau.”

Dina ga ni vakanamata ga ki na vosa ni iVakabula na vei wase sa oti, wase 17–19 na 3 Nifai e vakamacalataka na Nona cakacaka vakalotu kei na ivakavuvuli ena kedra maliwa na tamata. Ni o wilika na vei wase oqo, na cava e vakavulica vei iko na Yalo me baleta na iVakabula?

Vola na Veika o Uqeti Kina

O Jisu Karisito a se qai veiqaravi oti ga ena siga oya ena vanua ko Vanuasautu, ni vakavulica tiko na Nona kosipeli, ka solia tiko vei ira na tamata e dua na gauna me ra raica ka vakila na kena ivakatakilakila ena yagona sa tucaketale, ka vakadinadinataka tiko ni sai Koya na iVakabula sa yalataki tu. Ia oqo sa kena gauna me sa biubiu o Koya. E gadreva o Koya me sa lesu tale vei Tamana, ka kila tu ni ra gadreva na tamata na gauna me ra vakasamataka vakatitobu na veika a vakatavuvulitaka o Koya. Ni yalataka oti o Koya me lesu tale mai ena siga ka tarava, a vakasukai ira na lewevuqa ki na nodra veivale. Ia a sega ni dua e lako. Era a sega ni tukuna na veika era a vakila, ia ko Jisu e a vakila rawa: era a nuitaka tu ni na “tiko ga vakalailai tale vei ira” o Koya (3 Nifai 17:5). E a tu tale eso na veika bibi me cakava o Koya, ia na madigi me vakaraitaka na yalololoma sega ni dau yaco mai ena dua na gauna e veiganiti, a mani tiko vata kei ira vakalailai tale o Jisu. Na ka a yaco tarava e a dua beka na ivakaraitaki vakaciriloloma duadua ni veiqaravi ka volai tu ena ivolanikalou. O ira era a tiko e kea a rawa walega ni kaya sa sega ni vakamacalataki rawa (raica na 3 Nifai 17:16–17). O Jisu vakai Koya a umana na veisovaraki vakayalo oya ena malanivosa rawarawa oqo: “Raica oqo, sa vuabale na noqu marau” (3 Nifai 17:20).

Vakasama eso ni Vuli iVolanikalou Yadua

3 Nifai 17

Na iVakabula sa noqu ivakaraitaki uasivi ni veiqaravi.

Eda kila ni rauta ni 2,500 na tamata (raica na 3 Nifai 17:25) e ra a sotava na imatai ni veisiko i Karisito, me vaka e volai tu ena 3 Nifai 11–18. Ia a raica e dua na sala na iVakabula me veiqaravi vei ira yadudua. Na cava o vulica me baleta na veiqaravi mai na ivakaraitaki ni iVakabula ena iwase oqo? Na gagadre cava soti a veiqaravi kina o Koya? Vakasamataka vakatitobu na sala ena vukei iko kina na Nona ivakaraitaki mo qaravi ira na tani.

Raici Ira Nomuni Lalai, mai vei Gary L. Kapp

3 Nifai 17:13–22; 18:15–25; 19:6–9, 15–36

Na iVakabula a vakavulici keda ena ivakarau ni masu.

Raitayaloyalotaka mada se na vakacava beka mo rogoca na iVakabula ni masulaki iko. Na cava beka ena kaya o Koya ena vukumu? Nona ivakavuvuli kei na masu ena wase oqo e rawa ni solia vei iko e dua na vakasama. Ni o wilika vakatitobu, na cava o vulica mai na ivakaraitaki i Karisito ka na rawa ni vakavuna me vakaibalebale vakalevu cake na nomu masu? Na veivakalougatataki cava ni masu o sa raica ena nomu bula?

3 Nifai 18:1–12

Au rawa ni vakasinaiti vakayalo ni’u vakayagataka na sakaramede.

Ni o wilika na 3 Nifai 18:1–12, vakananuma vakatitobu ni tauri sakaramede ena rawa ni vukei iko mo “vakasinaiti kina” vakayalo (3 Nifai 18:3–5, 9; raica talega na 3 Nifai 20:1–9). Me ivakaraitaki, o rawa ni cakava e dua na lisi ni taro eso me vakauqeta na nomu vakasama titobu ena gauna o taura kina na sakaramede, me vaka “Na cava au vakila me baleta na iVakabula kei na Nona solibula ena vukuqu?” “E veivakayarayarataki tiko beka vakacava na Nona solibula kina ni noqu bula e veisiga?” se “Na cava au cakava tiko vakavinaka me vaka e dua na tisaipeli, ka cava au na rawa ni vakavinakataka?”

Na vosa oqo mai vei Peresitedi Henry B. Eyring e rawa ni vukei iko mo vakasamataka vakatitobu na sala e rawa ni vukei iko kina na sakaramede mo vakasinaiti vakayalo: “Ni ko dikeva na nomu bula ni yaco tiko na cakacaka ni sakaramede, au nuitaka ni nomu vakasama e sega ni dabe wale tiko ga ena veika cala ko a cakava ia me tu talega ena veika dodonu—na veitiki ni gauna ko a vakila kina ni marautaki iko na Tamada Vakalomalagi kei na iVakabula. E rawa ni ko taura e dua na tiki ni gauna ni yaco tiko na sakaramede mo kerea kina na Kalou me vukei iko mo raica na veika oqo. … Niu sa cakava oti oqo, sa vakadeitaka vei au na Yalo ni dina ga au se bera sara ni vinaka taucoko, au sa bau vinaka toka nikua mai na siga e nanoa. Ia mai na ka oqo au sa yalodei kina, ena vuku ni iVakabula, au na rawa ni vinaka cake sara ni mataka” (“Dau Nanumi Koya Tikoga,” Ensign, Fepe. 2018, 5).

3 Nifai 18:36–37; 19:6–22

Vakasaqara na isolisoli ni Yalo Tabu o ira na tisaipeli i Jisu Karisito.

Vakasamataka e dua na masu o cavuta wale tikoga oqo. Na cava e vakavulica vei iko na nomu masu me baleta nomu gagadre titobu? Ni oti nodra tiko vata kei na iVakabula ena dua na siga o ira na lewevuqa era “sa masulaka na ka era sa gadreva sara vakalevu”—na isolisoli ni Yalo Tabu (3 Nifai 19:9). Ni ko wilika na tikina oqo, vakasamataka vakatitobu na nomu gagadre me baleta na veitokani ni Yalo Tabu. Na cava o vulica me baleta na vakasaqara na veitokani ni Yalo Tabu?

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

3 Nifai 17

Ni ko wilika vakamatavuvale na wase ni ivola oqo, tovolea mo cegu vakalekaleka vagauna ka sureti ira na nomu matavuvale me ra raitayaloyalotaka ni ra sotava sara tikoga na veika oqo. Me ivakaraitaki, o na taroga beka na taro me vaka “Na veika rarawa cava o na kauta mai vua na iVakabula mo vakabulai?” “Na cava o na vinakata me masulaka o Koya ena vukumu?” se “Na nomu daulomani cava o na vinakata me vakalougatataka o Koya?” Na wiliki ni iwase oqo ena vakauqeti iko talega mo masulaki ira na lewe ni nomu matavuvale, vakayadudua, me vakataki Jisu.

3 Nifai 18:1–12

Na cava na kena ibalebale meda “vakasinaiti” ni da vakayagataka na sakaramede, ka da na sotava vakacava beka? Na cava eda vulica mai na tikina e 5–7 me baleta na vuna a solia kina vei keda ko Jisu na cakacaka vakalotu ni sakaramede?

3 Nifai 18:17–21

Na cava e da vulica mai na veitikina oqo me baleta na inaki eso ni masu? Eda na vakatorocaketaka vakacava na kaukauwa vakayalo ni noda masu, vakatamata yadua ka vakamatavuvale?

3 Nifai 18:25; 19:1–3

Na cava e sa sotava na noda matavuvale ena vuku ni kosipeli ka da gadreva mera sotava talega o ira kece era tiko wavoliti keda? Eda na muria vakacava na nodra ivakaraitaki na tamata ena veitikina oqo ka “cakacaka vakaukauwa sara” (3 Nifai 19:3) me kauti ira mai na tani vei Karisito, mera na “tara ka raica” talega (3 Nifai 18:25) na ka eda sa kunea ena kosipeli?

Me baleta na vakasama tale eso ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleti Ira na Lalai.

Vakavinakataki ni Vuli Yadudua

Me tuberi iko na Yalotabu ena nomu vuli-ka. Na Yalo Tabu ena rawa ni tuberi iko yani ki na veika e gadrevi mo vulica ena veisiga yadua. Mo dau vakavakarau ki na Nona veivakauqeti, kevaka sara mada ga e vaka me vakatura mo wilika e dua na ulutaga duidui se vulica ena dua na sala duidui mai na kena o dau cakava. Me ivakaraitaki, ni o wilika me baleta na sakaramede e na 3 Nifai 18, na Yalo ena rawa ni vakauqeti iko mo taura vakalevu na gauna ena ulutaga o ya mai na kena o a tuvanaka.

Era Sa Raica ni Tadola ko Lomalagi, mai vei Walter Rane