Sa masu vata kei ira na Nifaiti o Jisu

Na Nona Masu na Karisito, mai vei Derek Hegsted

19–25 ni Okotova

3 Nifai 27–4 Nifai

“Sa Sega Beka ni Dua na Matatamata Mamarau Cake”

A vakarota na Turaga vei ira na Nona tisaipeli me ra vola na veika era sa sotava (raica na 3 Nifai 27: 23–24). Ni o vulica, vola na veika vakayalo o sa sotava.

Vola na Veika o Uqeti Kina

Na ivakavuvuli i Jisu Karisito era sega walega ni dua na vakasama totoka mera vakasamataki vakatitobu. Era levu cake sara mai na kena o ya—sa kedra inaki mera veisautaka na noda bula. Na iVola i Nifai 4 me vakarautaka e dua na ivakaraitaki vakurabui oqo, me ivakaraitaki sara ga vakamatailalai ni kosipeli ni iVakabula e rawa ni veisautaka na tamata. Ni oti na veiqaravi vakalekaleka nei Jisu, sa mai oti kina na veisenijiuri ni veileti ena kedra maliwa na Nifaiti kei na Leimanaiti. E rua na veimatanitu e kilai kina na veileti kei na viavialevu sa yaco mera “sa duavata ga, era sa luvei Karisito” (4 Nifai 1:17), ka sa tekivu me ra “taukena vata na ka kecega ena kedra maliwa” (4 Nifai 1:3). Ni “sa tiko e lomadra na tamata … na loloma ni Kalou,” ka “sa sega beka ni dua na matatamata mamarau cake ena kedra maliwa na tamata kecega sa bulia na liga ni Kalou” (4 Nifai 1:15–16). Oqo na sala a veisautaka kina na ivakavuvuli ni iVakabula na nodra bula na Nifaiti kei na Leimanaiti. Era sa veisautaki iko tiko vakacava?

ivakatakilakila ni vuli ni tamata yadua

Vakasama eso ni Vuli iVolanikalou ni Tamata Yadua

3 Nifai 27:1–12

Na Lotu i Jisu Karisito sa vakatokai ena Yacana.

Me vaka e ratou sa tauyavutaka na tisaipeli ni iVakabula na Nona Lotu ena vanua taucoko, a sa tarogi kina e dua na ka, vei ira eso, e rairai vaka e dua na tikina lailai—na cava me yaca ni Lotu? (raica 3 Nifai 27: 1–3). Na cava o sa vulica me baleta na bibi ni yaca oqo mai na isaunitaro ni iVakabula ena 3 Nifai 27:4–12? Ena 1838 a vakatakila mai na Turaga na yaca ni Nona Lotu nikua (raica na VV 115:4). Vakasamataka vakatitobu na vosa yadua ena yaca o ya. Ena vukei keda vakacava na veivosa yadua me da kila kina o cei o keda, na veika eda vakabauta, kei na sala meda vakaitovo kina?

Raica talega na Russell. M. Nelson, “Na Yaca Dodonu ni Lotu,” Ensign se Liaona, Nove. 2018, 87 – 80; M. Russell Ballard, “Na Bibi ni Dua na Yaca,” Ensign se Liaona, Nove. 2011, 79–82.

3 Nifai 28:1–11

Niu vakasavasavataka tiko noqu gagadre, au sa na yaco me tisaipeli yalodina vakalevu cake.

Na cava o na kaya kevaka a taroga na iVakabula, ni a tarogi iratou na nona tisaipeli, “Na cava na ka dou sa gadreva mai vei au?” (3 Nifai 28:1). Nanuma na ka oqo ni ko sa wilika na veika e sotavi vei ira na tisaipeli ni iVakabula ena 3 Nifai 28: 1–11. Na cava o vulica me baleta na gagadre ni lomadra na tisaipeli mai na isau ni Nona taro? A vakatavulica o Peresitedi Dallin H Oaks: “Na noda rawata na keda icavacava tawamudu, eda na gadreva ka cakacakataka kina na itovo vinaka e vinakati meda tamata tawamudu kina. … Eda na gadreva me da vakataki [Jisu Karisito]” (“Gagadre,” Ensign se Liaona, May 2011, 44–45). Na cava o rawa ni cakava me ivalavala dodonu cake kina na gagadre ni yalomu? (Me baleta na ikuri ni ivakamacala me baleta na “veisau ki na yagodratou” na tolu na tisaipeli, raica na 3 Nifai 28:37 kei na “Tamata Vakadewataki,” iDusidusi ni iVolanikalou, scriptures.ChurchofJesusChrist.org.)

4 Nifai 1:1–18

Na saumaki mai vei Jisu Karisito kei na Nona kosipeli e veimuataki ki na duavata kei na marau.

E rawa beka ni o raitayalotaka ena vakacava tu beka meda bula voli ena veiyabaki ka tarava mai na nona veisiko na iVakabula? Era a maroroya tiko vakacava na tamata na vakacegu vakalou oqo me dua na gauna balavu sara—voleka ni 200 na yabaki? Ni ko vulica na 4 Nifai 1:1–18, sa rawa mo makataka se vola na nodra digidigi na tamata me rawa ni ra sotava kina na veivakalougatataki ni bula oqo.

Vakasamataka vakatitobu na cava o rawa ni cakava me vukea na nomu matavuvale, tabanalevu, se itikotiko raraba mera bula, vakalevu cake ena duavata kei na marau, me vaka a yaco vei ira na tamata ena 4 Nifai . Na ivakavuvuli cava i Jisu Karisito e rawa mo bulataka kina vakataucoko me rawa ni rawati kina na inaki oqo? Na cava o rawa ni cakava mo vukei ira na tamata mera kila vinaka ka bulataka na veivakavuvuli oqo?

4 Nifai 1:19–49

Na ivalavala ca e veimuataki ki na veisei kei na rarawa.

E ka ni rarawa, na koro o Saioni e vakamacalataki tiko ena 4 Nifai (raica talega na Mosese 7:18) sa mai vuki tani. Ni o wilika na 4 Nifai 1:19 – 49, vakaraica na ivakarau kei na itovo ka vakavuna na koro oqo me kasura. O sa raica beka e dua na ivakatakilakila ni ivakarau se itovo oqo ena nomu bula?

Raica talega na “Wase 18: Qarauna na Yaloviavialevu,” Nodra iVakavuvuli na Peresitedi ni Lotu: Ezra Taft Benson (2014), 229–40.

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

3 Nifai 27:13–21

Na tikina oqo e rawa ni vukei na lewe ni matavuvale mera kila vakavinaka cake na ibalebale ni Nona kaya na iVakabula ni sa “noqu kosipeli.” Ni oti na wiliki kei na veivosakitaki ni veitikina oqo, sa rawa mo na kerei ira na lewe ni matavuvale yadua me ra tukuna vakalekaleka na kosipeli ena dua ga na yatuvosa.

3 Nifai 27:23–26

Sa toso vinaka tiko beka na noda vola na veika eda sa “raica ka rogoca”—oi keda yadudua se vakamatavuvale? Na cava na vuna e bibi kina meda vola toka na veika vakayalo eda sotava?

3 Nifai 27:30–31

Ni gadrevi mera vukei na lewe ni matavuvale mera kila vinaka na reki e tukuna tiko na iVakabula ena veitikina oqo, sa rawa mo dou qito vakamatavuvale o ya mera vuni na lewe ni matavuvale ka me dua me vakasaqarai ira. Oqo ena veimuataki ki na dua na veivosaki me baleta na vuna e bibi kina me ra kune kece na lewe ni matavuvale me “sega ni dua vei ira sa yali.” Eda na vukei ira vakacava noda matavuvale mera tudei tu vakaukauwa ena kosipeli se lesu mai kevaka era a lako tu?

3 Nifai 28:17–18, 36–40

Na cava eda rawa ni vulica mai na ivakaraitaki nei Momani ena gauna a sega tu ni kila na veika kece me baleta na veisau ka a yaco vei iratou na tolu na tisaipeli ni Nifaiti? Na cava e rawa ni da cakava ena gauna eda sega ni kila vakavinaka kina e dua na ivakavuvuli ni kosipeli? A vakavulica o Peresitedi Dieter F. Uchtdorf: “Na Kalou e kauwaitaki iko. Ena vakarogoca o Koya, ka na sauma o Koya na nomuni taro yadudua. Na isau ni nomu masu ena yaco mai ena Nona sala kei na Nona gauna ga, ia, ena gadrevi mo dau rogoca na domona” (“Na Kena Ciqomi e Dua na iVakadinadina ni Rarama kei na Dina,” Ensign se Liaona, Nove. 2014, 21).

4 Nifai 1:15

Me vakalailaitaki kina na veileti ena nomu vuvale, sa rawa vei ira na lewe ni matavuvale mera lalawataka mera veilomani vakaiira vakalevu cake ena macawa oqo. Ni sa oti na macawa, raicalesu na nomudou toso vata ka veivosakitaka na kena sa vakayaco vinaka na loloma cecere ena nomu matavuvale.

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Vuli ni Tamata Yadudua

Vakasaqara na ivakatakila e veisiga Na ivakatakila e dau yaco mai ena “vosa ena vosa” (2 Nifai 28:30). Ni ko vakasamataka vakatitobu na tikina ko vulica tiko, ena rawa ni yaco vei iko na vakasama kei na vakanananu ena siga taucoko. Kakua ni vakasamataka na vulici ni kosipeli me dua na ka mo “vakarau kina ni gauna” ia, me vaka ga e dua na ka o sa dauvakayacora tiko mai (raica na Veivakavulici ena iVakarau ni Vakabula, 12).

Sa veivosaki tiko o Jisu vata kei iratou na tolu na tisaipeli Nifaiti

Na Karisito vata kei na Tolu na Tisaipeli ni Nifai, mai vei Gary L. Kapp