Sa rairai O Karisito vei ira na Nifaiti

Na Droini nei Karisito sa rairai vei ira na Nifai mai vei Andrew Bosley

12–18 ni Okotova

3 Nifai 20–26

“Ko ni na Gone ni Veiyalayalati”

Ni vosa tiko baleta na ivolanikalou, a vakayagataka o Jisu na vosa na vakasaqara (raica 3 Nifai 20:11; 23:1, 5). Ni ko wilika na 3 Nifai 20 – 26, na cava o na vakasaqara?

Vola na Veika o Uqeti Kina

Ni da rogoca ena nodra vakayagataka na tamata na vosa qo me vakataka na mataqali i Isireli, o na vakila me vaka era tukuna tiko vei iko? Na Nifaiti kei na Leimanaiti era kawa dina sara ni Isireli—tekivu sara mada ga na kedrai talanoa mai Jerusalemi—ia vei ira eso, o Jerusalemi e vaka tu “e dua na vanua yawa eda sega ni kila” (Ilamani 16:20). Io, era sa “dua na taba ni vunikau ni Isireli,”, ia era sa “yali mai na vuna” (Alama 26: 36; raica talega na 1 Nifai 15:12). Ia ena gauna e a rairai na iVakabula vei ira, e vinakata me ra kila ni ra sa sega ni yali mai vei Koya. “Dou sa lewe ni mataqali i Isireli,” e kaya o koya, “Ia dou sa tamata ni veiyalayalati” (3 Nifai 20:25). Ena rawa kaya vakaoqo o Koya vei iko nikua, vei ira kece era sa papitaiso ka veiyalayalati vata kei Koya e lewena talega na mataqali i Isireli, “ni veiyalayalati,” se vanua cava o kawa mai kina se vanua o vakaitikotiko kina. Se me dua tale na kena vosavosataki e tukuna o Jisu vei ira na mataqali i Isireli, koya sa tukuni kemuni tiko. Na ivakaro me vakalougatataki ”na veimataqali kecega e vuravura” e nomuni (3 Nifai 20:27). Na veisureti mo “yadra tale, ka daramaka na nomu kaukauwa” e nomuni (3 Nifai 20:36). Kei na nona yalayala talei, “Ena sega ni takali mai vei iko na noqu loloma, kei na noqu veiyalayalati ni noqu sautu me yavalati,” e nomuni (3 Nifai 22:10).

ivakatakilakila ni vuli yadua

Vakasama eso ni Vuli iVolanikalou Yadua

3 Nifai 20–22

Ena iotioti ni gauna, ena vakayacora e dua na cakacaka levu ka talei na Kalou.

Na iVakabula e solia vei ira na lewevuqa na veiyalayala vakasakiti eso ka parofisaitaki me baleta na veisiga ni mataka na nona tamata ni veiyalayalati—ka ra oka kina o iko. Me vaka e tukuna o Peresitedi Russell M. Nelson: “Eda tu ena kedra maliwa na tamata ni veiyalayalati ni Turaga. Na noda galala meda vakaitavi yadua ena kena vakataucokotaki ni yalayala oqo. Dua na gauna talei meda bula!” (“The Gathering of Scattered Israel,” Ensign se Liaona, Nove. 2006, 79).

Vakaraica eso na parofisai me baleta na iotioti ni gauna ena nona vosa na iVakabula ena 3 Nifai 20–22. Na parofisai cava beka o ni sa taleitaki sara vei iko? Na cava o rawa ni cakava mo ni sa qai vakavotukanataka na parofisai e tiko ena wase oqo?

Raica na 3 Nifai 21:1–7 e vakaraitaki kina na kena yaco mai na iVola i Momani (“na veika oqo“ ena tikina 2 kei na 3) sai koya e dua na ivakatakilakila ni yalayala ni Kalou ni sa tekivu oti me vakayacori. Na cava soti na yalayala oqo, kei na sala e veivuke ka veivakayacori kina na iVola i Momani?

Raica talega Russell M. Nelson, “Nuinui nei Isireli” (e vuravura raraba na Lotu baleti ira na itabagone, 3 ni June, 2018), broadcasts.ChurchofJesusChrist.org.

3 Nifai 20:10–12; 23; 26: 1–12

E vinakata na iVakabula vei au meu vakasaqara na nodra vosa na parofita.

Na vosa nei Jisu kei na nona ivalavala ena veiwase oqo e vakaraitaka na vei ka e vakila me baleta na ivolanikalou. Na cava o vulica me baleta na ivolanikalou e tiko ena 3 Nifai 20:10–12; 23; kei na 26: 1–12? Na cava so o raica ena veitikina oqo ka vakauqeti kemuni mo ni “vakasaqara vagumatua na veika kece oqo”? (3 Nifai 23:1).

3 Nifai 22; 24

Sa yalololoma na Kalou vei ira era sa lesu tale yani Vua.

Ena 3 Nifai 22 kei na 24, na iVakabula e vakayataka eso na vosa mai na vosa nei Malakai kei Aisea, ka sinai tu kina na iyaloyalo matata kei na veivakatauvatani—yavu vatu duiroka, qilaiso ena bukawaqa, siliva vakasavasavataki, na katuba ni lomalagi. Ena vinaka me ra cakava e dua na ituvatuva vei ira. Na cava e vakavulica vei iko me baleta na veimaliwai ni Kalou kei ira na nona tamata? Me kena ivakaraitaki, 3 Nifai 22:4–8 vakatauvatana na Kalou me dua na tagane vakawati kei ira na nona tamata na marama watina. Nomu wilika na iyaloyalo oqo ena rawa ni uqeti iko mo vakasamataka na nomu veimaliwai vata kei na Turaga. E vakavotukana vakacava na yalayala ena nomu bula? (raica na vakabibi 3 Nifai 22:7–8, 10–17; 24:10–12, 17–18).

3 Nifai 25:5–6

Na yaloqu me vuki vei ira na noqu qase e liu.

Na yalayala ni nona lesu tale mai o Ilaijia era sa nanamaki tu kina o ira na Jiu e vuravura raraba ena veisenitiuri sa oti. Era sa kila tu na Yalododonu Edaidai na nona sa lesu mai o Ilaija, ka rairai vei Josefa Simici ena Valetabu e Kirtland ena 1836 (raica VV 110: 13–16). Na cakacaka me vagolea na lomadra kivei ira na qase—na cakacaka ni valetabu kei na tuva kawa—e se cici makawa tiko mai. Na veika cava o sa sotava ka vukei iko mo vukica na yalomu vei ira na nomu qase e liu?

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

3 Nifai 22:2

Ni o wilika oti na tikina oqo, o na rawa beka ni cakava e dua na vale laca ka talanoataka vakacaca na Lotu e vaka e dua na vale laca ena tu mai e lekutu. Na cava e rawa ni kena ibalebale “vakabalavutaka na [kena] dali” ka “vakaukauwataka na [kena] iteki”? Eda sureti ira vakacava eso mera mai “vakaruru” ena loma ni Lotu? (raica na vidio “Veikidavaki” ena ComeUntoChrist.org).

3 Nifai 23:6–13

Kevaka e mai vakadikeva na iVakabula na ivola tukutuku eda maroroya tu vakavuvale, na taro cava beka ena taroga o Koya vei keda? E tiko beka eso na veika bibi se na veika vakayalo e dodonu meda vola? Oqo beka e dua na gauna vinaka me buli se vakuri e dua na ivola itukutuku ni matavuvale ka veivosakitaki vata na veika me okati kina. Era na marautaka na ukuukutaka nomu ivola itukutuku kei na itaba se droini o ira na tabagone se ira na lalai ena leweni nomu matavuvale . Na cava na vuna e bibi kina me volai tukutukutaki na veika vakayalo vakamatavuvale?

3 Nifai 24:7–18

Eda sa sotava vakacava na veivakalougatataki ena kena saumi ni ikatini e yalataki tu ena veitikina oqo? iTukutuku nei David A. Bednar “Na Katuba ni Lomalagi” (Ensign se Liaona, Nove. 2013, 17–20) e rawa ni vukei na lewe ni matavuvale ka raica na veivakalougatataki oqo.

3 Nifai 25:5–6

Ko na vukei ira vakacava na lewe ni nomu matavuvale mera vagolea na lomadra kivei ira na nodra qase? E rairai mo lesia vei dua na lewe ni nomu matavuvale me vulica e dua na nomu qase e liu ka wasea ki vei ratou na vo ni matavuvale na veika era sa vulica (raica na FamilySearch.org). Se o rawa ni cakacaka vata me laurai e dua na nomu qase mai liu era gadreva tu na cakacaka vakalotu ena valetabu ka tuvana e dua na ilakolako ki valetabu me ra lai qaravi na cakacaka vakalotu oqori.

Na ikuri ni tukutuku ni vakavulici ni gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakatorocaketaki Noda Veivakavulici

Bulataka na nomu ivakadinadina. “Mo veivakavulici ga mai na nomu bula,” e vakavulica o Elder Neal A. Maxwell. “Nomu ivakarau ena nanumi tikoga … mai na dua na dina ena lesoni” (“Ia a Few Days” [address to Church Educational System religious educators, Sepi. 10, 1982], 2). Kevaka o gadreva mo vakavulica e dua na ivakavuvuli ni kosipeli, mo saga ena nomu igu taucoko mo bulataka na ivakavuvuli o ya.

O Jisu sa wilika na kedra itukutuku na Nifai vei Nifai

Kauta mai na itukutuku, mai vei Gary L. Kapp