“21–27 ni Sepiteba. 3 Nifai 12–16: ‘Koi Au na Lawa, kei na Rarama,’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)

“21–27 ni Sepiteba. 3 Nifai 12–16,” Lako Mai, Mo Muri Au—Me Baleti Ira na Tamata Yadua kei na Matavuvale: 2019

iVakatakilakila

Vakaraitaki iratou na iApositolo Le Tinikarua o Jisu

iKatolu ni Nifai: Na Le Tinikarua Ka’u Sa Digitaka, mai vei Gary L. Kapp

21–27 ni Sepiteba

3 Nifai 12–16

“Koi Au na Lawa, kei na Rarama”

Era tiko e vuqa na ivakavuvuli me kunei ena 3 Nifai 12–16. Eso era sa makataki toka ena ituvatuva oqo, ia ko na raica eso tale. Me vakavulici iko o Tamada Vakalomalagi mai na Yalona, ena veika o gadreva ena gauna sara ga qo.

Vola na Veika o Uqeti Kina

Me vakataki ira na tisaipeli nei Jisu era a soqoni vata ena ulunivanua mai Kalili, o ira na tamata era a soqoni vata ena valetabu mai Vanuasautu era bula voli ena ruku ni lawa i Mosese. Era a muria baleta ni dusia na yalodra vei Karisito (raica na Jekope 4:5), ia oqo sa tu ena kedra maliwa o Karisito, ka tukuna e dua na lawa cecere cake. Ia o ira mada ga era sega ni bulataka na lawa i Mosese ena rawa ni ra vakadinadinataka ni ivakarau sa virikotora o Jisu vei ira na Nona tisaipeli e dua na lawa cecere cake. “Au gadreva mo ni vinaka sara,” a kaya o koya (3 Nifai 12:48). Kevaka e vakavuna nomu yalolailai oqo, nanuma tiko ni kaya talega o Jisu, “io sa kalougata ko ira sa yalomalumalumu ka lako mai vei au, ni sa nodra na matanitu vakalomalagi” (3 Nifai 12:3). Na lawa cecere qo e veisureti tu—e dua tale na sala ni kena tukuni “lako mai vei au, ka mo dou vakabulai” (3 Nifai 12:20). Me vaka na lawa i Mosese, e dusimaki keda kina na lawa oqo vua na Karisito—o Koya duadua ga e rawa ni vakabulai keda ka vakataucokotaki keda. “Raica,” sa kaya ko Koya, “koi Au na lawa kei na rarama. Mo ni muri au ka vosota me yacova na ivakataotioti, mo ni bula kina” (3 Nifai 15:9).

iVakatakilakila

ivakatakilakila ni vuli yadua

Vakasama eso ni Vuli iVolanikalou Yadua

3 Nifai 12–14

Nona ivakavuvuli na iVakabula e vakaraitaka vei au na ivakarau meu tisaipeli dina kina.

E levu tu na dina, vosa ni ivakasala, kei na ivakasala ni qaqarauni ena 3 Nifai 12–14. Oqo e dua na sala me da vulica ka vakayacora na veika e vakavuvulitaka na iVakabula ena veitikina oqo, ka raica kevaka e rawa ni o vakalekalekataka na veika e vakavulica na veitikina oqo ena dua na iyatuvosa ka tekivu ena “O ira na tisaipeli dina i Jisu Karisito …” kena ivakaraitaki na ivakaleka ni 3 Nifai 14:1–5 me “na tisaipeli dina i Jisu Karisito e sega ni daulelewa.” O na gadreva beka mo digitaka e dua na tikina mai na iwase eso oqo ka vakaibalebale vakavinaka cake vei iko ka cavuqaqataka se lavetaka ka biuta ena dua na vanua mo dau raica wasoma kina. Vakasamataka vakatitobu na ivakarau mo vakayagataka kina na veika o sa vulica ena nomu sasaga mo tisaipeli vinaka cake i Jisu Karisito.

Raica talega na Maciu 5–7; Luke 6:20–49.

3 Nifai 12:1–2; 15:23–24; 16:1–6

Sa kalougata ko ira era vakabauta ni ra sega ni raica.

Ni vakatauvatani ki na iwiliwili taucoko ni Luve ni Kalou, e vica wale sara era sa raica na iVakabula ka rogoca na domona, me vakataki ira na tamata mai Vanuasautu. E vuqa vei keda sa vakataki ira na tamata e vakamacalataki tiko ena 3 Nifai 12:2; 15:23; kei na 16:4–6.. Na cava sa yalataki tu vei ira na tamata vakaoqo ena veitikina oqo? Sa mai yaco vakacava na inaki oqo ki na nomu bula?

Raica talega na Joni 20:26–29; 2 Nifai 26:12–13; Alama 32:16–18.

3 Nifai 12:21–30; 13:1–8, 16–18; 14:21–23.

E sega ni rauta ga na ivalavala dodonu; na yaloqu e dodonu talega me savasava.

E dua na ulutaga e rawa ni o raica ena veiwase oqo, na nona veisureti na iVakabula me bulataki e dua na lawa cecere—me da buladodonu sega walega ena noda ivalavala e taudaku ia e yaloda talega. Vakaraica na ulutaga oqo ni vosa tiko na iVakabula me baleta na veileti (3 Nifai 12:21–26), bula tawasavasava (3 Nifai 12:27–30), masu (3 Nifai 13:5–8), kei na lolo (3 Nifai 13:16–18). Na ivakaraitaki cava tale eso e rawa ni o raica? Na cava o rawa ni cakava mo vakasavasavataka na gagadre ni yalomu ka sega ni vakanamata ena ivalavala walega e taudaku?

3 Nifai 14:7–11

Kevaka au na vakasaqara na “veika vinaka” mai vei Tamada Vakalomalagi, au na rawata.

E kaya o Peresitedi Russell M. Nelson: “E vinakata dina beka na Kalou me vosa vei iko? Io! … Io, e levu sara na ka e vinakata na Tamada Vakalomalagi mo kila” (“e dua Na iVakatakila me Baleta na Lotu, Na iVakatakila me Baleta na Noda Bula,” Ensign se Liaona, me 2018, 95). Ni o wilika na veisureti ni iVakabula ena 3 Nifai 14:7–11 me ra taro, vakasaqaqara, ka tukituki, vakananuma vakatitobu na cava na “veika vinaka” e na rairai vinakata o Koya mo kerea. Na ikuri ni ivolanikalou eso oqo e rawa ni vukei iko mo kila na sala mo kerekere, vakasaqaqara, ka tukituki. Era rawa talega ni veivuke me vakamacalataka na vuna e sega ni saumi kina eso na masu ena ivakarau o namaka: Aisea 55:8–9; Ilamani 10:5; Moronai 7:26–27, 33, 37; kei na Vunau kei na Veiyalayalati 9:7–9.

iVakatakilakila

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

3 Nifai 12:48

E vukei keda vakacava na itukutuku nei Elder Jeffrey R. Holland “O Koya Mo Dou Qai Vinaka Sara—Vakaoti” (Ensign se Liaona, Nove. 2017, 40–42) me da kila na vosa ni iVakabula ena tikina oqo? E rawa talega mo ni kunea na veivuke ena Moronai 10:32–33.

3 Nifai 12:9, 38–42; 14:3–5, 12

E yaga vakacava ki na veimaliwai vakamatavuvale na veitikina oqo? De rawa beka mo dou vakadavora vata vakamatavuvale eso na takete mo dou bulataka ena yalodina na ivakavuvuli eso oqo.

3 Nifai 13:19–21

Na veitikina oqo e rawa ni vakatekivuna e dua na veivosaki me baleta na veika e vakamareqeta na nomu matavuvale. E tiko beka eso na iyau e vuravura ka tarova tiko nomu kumuna cake na iyau vakalomalagi? O rawa ni vaqaqacotaka na tikina oqo ena nomu liutaka nomu matavuvale ena vaqara iyau mo kunea na veika ena nomu lomanivale ka na vakananuma vei kemudou vakamatavuvale na veika e tawamudu na kena yaga.

3 Nifai 14:7–11

Era na marautaka beka na gone sobu e dua na qito, ka vakauqeti mai na 3 Nifai 14:8–9, era kerea e dua na ka, qai ciqomi e dua na ka e duatani sara ga. Na cava e vinakata na iVakabula me da kila me baleta na Tamada mai Lomalagi ena Nona wasea na ivakaraitaki oqo?

3 Nifai 14:15–20

Na “vuanikau vinaka” cava beka ena vukei keda me da kila ni o Josefa Simici, se na Peresitedi ni Lotu ena gauna oqo, e parofita dina?

3 Nifai 14:24–27

Vakasamataka na sala eso mo vukea kina nomu matavuvale me ra raitayaloyalotaka na vosa vakaibalebale ena veitikina oqo. E rawa ni ra droinitaka na lewe ni matavuvale na iyaloyalo, vakatasuasua, se tara eso na ka ena yavu kaukauwa se na yavu nuku.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakatorocaketaki Noda Veivakavulici

Vakayagataka na lesoni vakaraitaki. A vakavulica na iVakabula na dina bibi eso ena nona cavuta na veika kilai levu eso. Sa rawa mo cakava e dua na ka e tautauvata ni ratou wilika nomu matavuvale na 3 Nifai 12–16. Me kena ivakaraitaki, ni ko wilika na wase 12, e rawa ni o vakaraitaka eso na masima, e dua na kadrala, kei na kote. Oqo tale ga ena veimuataki ki na dua na itaviqaravi ni railesu vinaka. Ni ko sa wilika oti na iwase oqo, vakaraitaka tale na iyaya oqori, ka tarogi ira na lewe ni matavuvale se cava a vakavulica na iVakabula me baleta yadua.