Era vakadinadinataka na Nifaiti na siga ka sega na kena bogi

Dua na Siga, Dua na Bogi, ka Dua na Siga, mai vei Jorge Cocco

7–13 ni Sepiteba

3 Nifai 1–7

“Dou Laveta Cake na Ulumudou ka Vakacegu”

Era vakadinadinataka na Nifaiti na ivakatakilakila veivakurabuitaki, ia ni toso na gauna era sa guilecava na veika era sa sotava (raica na 3 Nifai 2:1). Ni o vola na veika e uqeti kina nomu vakasama ena vukea mo nanuma na veika vakayalo o a sotava ena nomu vulica tiko na 3 Nifai 1–7.

Vola na Veika o Uqeti Kina

Ena so na sala, sa dua dina na gauna taleitaki na noda vakabauti Jisu Karisito. Sa vakayacori na parofisai—e a vakaraitaka na ivakatakilakila lelevu kei na cakacaka mana ena kedra maliwa na tamata ni sa na vakarau sucu na iVakabula. Ena yasana kadua, sa dua talega na gauna ni nanamaki vei ira na tamata vakabauta, baleta e dina ni levu na cakacaka mana, era tukuna tikoga na tawavakabauta “ni sa sivi na gauna” me sucu mai kina na iVakabula (3 Nifai 1:5). Era qai “vakavuna e dua na yavavala levu ena vanua taucoko” na tamata oqo (3 Nifai 1:7) ka ra sa virikotora e dua na siga me ra vakamatei kina o ira kece na tamata vakabauta kevaka e sega ni yaco mai na ivakatakilakila a parofisaitaka o Samuela na Leimani—e dua na bogi ka sega kina na butobuto.

Ena ituvaki veivakatovolei oqo, “a masu vakaukauwa vua na nona Kalou ena vukudra na nona tamata” na parofita o Nifai (3 Nifai 1:11). Na nona vosa na Turaga e veivakauqeti vei ira kecega era sotava na veivakacacani se na vakatitiqa ka ra gadreva me ra kila ni rarama ena ulabaleta na butobuto: “Mo laveta cake na ulumu ka marau; … Au na vakayacora taucoko sara na veika au a vakarota me ra tukuna na noqu parofita tabu” (3 Nifai 1:13).

ivakatakilakila ni vuli yadua

Vakasama eso ni Vuli iVolanikalou Yadua

3 Nifai 1:4–21; 5:1–3

Ena vakayacora na Turaga na Nona vosa kecega

Na cava o nanuma ni o na vakila kevaka o iko e dua vei ira na tamata vakabauta ena gauna e vakamacalataki ena 3 Nifai 1–7? Ena vakacava beka nomu vakasama, kevaka o waraka tiko na bogi ena sega ni butobuto ka na tukuna nona sucu na iVakabula, ni o sa kila tiko ni o na vakamatei kevaka ena sega ni yaco mai? Ni o wilika na 3 Nifai 1:4–21 kei na 5:1–3, vakaraica na veika era a cakava o Nifai kei na so tale na tamata vakabauta me ra maroroya tiko kina nodra vakabauta ena veigauna dredre oqori. A vakalougatataki ira vakacava na Turaga? Na cava o sa vulica e rawa ni veivuke ni o kunea ni o waraka tiko na veivakalougatataki e yalataka na Turaga?

3 Nifai 1:22; 2:1–3

Niu guilecava na veika vakayalo au sotava e vakavuna noqu rawai rawarawa ena veitemaki nei Setani.

O na nanuma beka ni nomu vakadinadinataka e dua na cakamana me vaka na bogi sega ni buto ena tu vata kei iko ena dua na gauna balavu ka kelea na nomu ivakadinadina. Ia na vakanananu ni ivakatakilakila kei na veivakurabuitaki era a vakadinadinataka na Nifaiti e vaka me seyavu yani ni toso na gauna. Na cava e vakavuna nodra guilecava, kei na veika e basika ni sa guilecavi? (raica na 3 Nifai 1:22; 2:1–3).

Na cava o sa cakava tiko mo nanuma ka vakavouya kina na nomu ivakadinadina ni dina vakayalo? Me kena ivakaraitaki, vakasamataka na sala e rawa ni vukei iko kina na veika vakayalo o sotava. Mo wasea vakacava vei ira era voleka duadua vei iko na nomu ivakadinadina me vukea nodra vakabauta?

Raica talega na Alama 5:6; Henry B. Eyring, “Mo Nanuma, Nanuma,” Ensign se Liaona, Nove. 2007, 66–69; Neil L. Andersen, “Na Vakabauta e Sega ni Ka Vakacalaka, ia Sa Ka ni Digidigi,” Ensign se Liaona, Nove. 2015, 65–68.

3 Nifai 2:11–12; 3:1–26; 5:24–26

E vaqaqacotaki ira na nona Yalododonu na Turaga mai na veika rerevaki vakayalo.

Ena noda gauna, eda dau sega ni sotava na ilawalawa daubutako ka vakasaurarataki keda me da biuta na noda itikotiko ka soqoni vata ena dua na vanua. Ia eda sotava na veika rerevaki vakayalo, ka tu ena veika era a sotava na Nifaiti na lesoni e rawa ni vukei keda. Vaqara na veilesoni oqo ni ko wilika na 3 Nifai 2:11–12 kei na 3:1–26.

Eda wilika ena 3 Nifai 5:24–26 na nodra vakasoqoni vata na nona tamata na Turaga ena iotioti ni gauna. Na cava era vakavulica na veitikina oqo me baleta na sala sa vakasoqoni ira tiko kina na Nona tamata nikua na Turaga?

Raica talega “Lotu ni iTabagone ni Vuravura Raraba: iTukutuku mai vei Peresitedi Russell M. Nelson kei Sister Wendy Nelson,” 3 ni June, 2018, ChurchofJesusChrist.org; “Isireli—Na nodra vakasoqoni na Isireli,” iDusidusi Vakaivolanikalou, scriptures.ChurchofJesusChrist.org.

3 Nifai 5:12–26; 7:15–26

O au e dua na tisaipeli i Jisu Karisito.

Na cava o nanuma ni ibalebale mo dua na tisaipeli i Jisu Karisito? (raica na VV 41: 5). Ena 3 Nifai 5:12–26, a tarova vakalailai o Momani nona vakalekalekataka na kedra itukutuku na Nifai ka kaya ni dua o koya na tisaipeli i Jisu Karisito. Oti o ya, ena 3 Nifai 7:15–26, e vakamacalataka o koya na nona veiqaravi e dua tale na tisaipeli— na parofita o Nifai. Na cava o raica ena rua na malanivosa oqo ka na vukei iko mo kila vakavinaka na kena ibalebale dina mo tisaipeli i Karisito?

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

3 ni Nifai 3:13–14, 25–26

Na cava era a cakava na Nifaiti me ra taqomaki ira kina mai vei ira na meca era sotava? Na cava eda sa cakava tiko me yaco na noda itikotiko me dua na vanua ni veimaroroi kei na veitaqomaki mai na butobuto ni vuravura?

3 Nifai 2:1–3; 6:15–17

Me vukea na nomu matavuvale me vulica na ivakarau e rawa ni temaki keda kina o Setani, droinitaka e dua na yago, ka ni wilika nomu matavuvale na 3 Nifai 2:1–3 kei na 6:15–17, makataka na veitiki ni yago e tukuni. Me vaka na veitikina oqo, na cava soti eso na sala e temaki keda kina o Setani me da guilecava na Kalou ka vuki ki na ivalavala ca?

3 Nifai 4:7–12, 30–33

Na cava era a cakava na Nifaiti ni ra sa raica nodra lako mai na daubutako i Ketianitoni? Na cava e rawa ni vulica noda matavuvale mai vei ira na Nifaiti ena gauna eda sotava kina na dredre? Na cava eda vulica mai na nodra vosa na Nifaiti ni oti nona vukei ira na Turaga ena nodra gauna ni dredre?

3 Nifai 5:13; Vunau kei na Veiyalayalati 41:5

Wilika 3 Nifai 5:13 kei na Vunau kei na Veiyalayalati 41: 5, ka veivosakitaka na kena ibalebale me dua na tisaipeli i Karisito. Ena rawa beka ni ra veivosakitaka na lewe ni matavuvale eso na gauna era raica kina nodra itovo vakatisaipeli eso tale vei ira. Kevaka era tiko na gone lalai, o na cakava beka e dua na itokaniyaca ka kaya, “O au e dua na tisaipeli i Jisu Karisito,” ka me ra dara na itokaniyaca ena gauna kece ga o raica kina ni ra vakamuria na iVakabula.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au — Baleta na Lalai.

Vakatorocaketaki Noda Veivakavulici

Vukei ira na nomu vuvale me ra vakatauvatana na ivolanikalou vei ira. E kaya ko Nifai, “au sa vakatautauvatataka vei keimami na ivolanikalou, me rawa ni yaga vei keimami ka me keimami vuli kina” (1 Nifai 19:23). Me vukea na nomu matavuvale me vakatauvatana na ivolanikalou vei ira, o rawa ni sureti ira mera vakasamataka vakatitobu na veika era na cakava ke ra a tiko maliwai ira na tamata vakabauta era vakamacalataki ena 3 Nifai 1:4–9. (Raica na Veivakavulici ena iVakarau ni iVakabula, 21.)

Era vakadinadinataka na Nifaiti na siga ka sega na kena bogi

Dua na Siga, Dua na bogi, ka Dua na Siga, mai vei Walter Rane