“31 ni Okosita–6 ni Sepiteba Ilamani 13-16: ‘iTukutuku Rekitaki Dina’” Lako Mai, Mo Muri Au—Me Baleta na Tamata Yadua kei na Matavuvale: iVola i Momani 2020 (2020)
“31 ni Okosita–6 ni Sepiteba,” Lako Mai, Mo Muri Au—Me Baleta na Tamata Yadua kei na Matavuvale: 2020
O Samuela na Leimani ena Bai ni Koro, mai vei Arnold Friberg
31 ni Okosita–6 ni Sepiteba
Ilamani 13–16.
“iTukutuku Rekitaki Dina”
Ni o vola na nomu nanuma ena macawa oqo, vakasamataka na kena rawa ni yaco na ivakavuvuli ena Ilamani 13–16. me tara cake ka vaqaqacotaka na veika tale eso o sa vulica tiko ena ivolanikalou.
Vola na Veika o Uqeti Kina
Ena imatai ni gauna a saga kina o Samuela na Lemanaiti me wasea na “itukutuku rekitaki” mai Saraemala (Ilamani 13:7), a sega ni ciqomi ka vakasavi tani mai vei ira na Nifaiti yalo kaukauwa. O na kaya beka ni ra sa tara tiko e dua na lalaga tawacurumi rawa e lomadra me tarovi na kena ciqomi na itukutuku nei Samuela. E kila vinaka tu o Samuela na bibi ni nona itukutuku a tukuna ka vakaraitaka na vakabauta ena nona muria na ivakaro ni Kalou “me lako yani ka parofisaitaka” (Ilamani 13:3). Me vaka ga a cakava o Samuela, eda sa sotava kina na lalaga ni da “caramaka na nona sala na Turaga” (Ilamani 14:9) ka saga meda muri ira na Nona parofita. Ia me vakataki Samuela, eda vakadinadinataki Jisu Karisito talega, “o koya ena lako vakaidina mai”, ka sureta na tamata kecega mera “vakabauta na yacana” (Ilamani 13:6; 14:13). Era na sega ni vakarorogo na tamata kecega, ka so era na gugumatua sara mera saqati keda. Ia o ira era vakabauta na itukutuku oqo ena vakabauti Karisito era na raica ni sa dina na “itukutuku rekitaki” (Ilamani 16:14).
Vakasama eso ni Vuli iVolanikalou ni Tamata Yadua
E dau solia na Turaga na ivakaro mai vei ira na Nona parofita.
Ena ivolanikalou, era sa dau vakatauvatani na parofita vei ira na dauyadra ena dua na bai ni koro se na vale cecere ka veivakasalataki ena veika rerevaki (raica na Aisea 62:6; Isikeli 33:1–7).
A vakavulica o Peresitedi M. Russell Ballard: “Mai na veitabayabaki sa oti era sa vakayacora na nodra itavi na parofita ni ra sa vakarota na tamata ena veika rerevaki sa wavoliti ira tu. Sa nodra ilesilesi na iApositolo ni Turaga mera wanonova, vakarota, ka vukei ira era sa vakasaqara tiko na isau ni taro ki na veitaro ni bula” (“Na Kalou sa Veiliutaki Voli,” Ensign se Liaona, Nove. 2015, 25).
Ni ko vulica ka tugana na Ilamani 13, sa rawa mo makataka e vuqa na ivakaro a solia o Samuela. Me kena ivakaraitaki, na cava sa vakavulica o koya me baleta na veivutuni? me baleta na yalomalumalumu kei na iyau? Ena rawa vakacava me yaco talega vei iko na ivakaro oqo? Na ivakaro cava era sa solia wale tikoga oqo na parofita ni gauna oqo, kei na cava o nanuma mo cakava me baleta na ivakaro oqori?
Na parofita e dusimaki keda vei Jisu Karisito.
Sa dau loloma veivueti na Turaga vei ira sa veivutuni.
Taumada, a talai yani o Samuela vei ira na Nifaiti me laki tukuna na itukutuku rekitaki ni Nona lako mai na iVakabula (raica na Ilamani 13:7). Baleta ni ra a sega ni ciqomi koya, a lesu tale ka veivakaroti ni na yaco mai na lewa ni Kalou. Ia na veivakaroti oqori e yaco tale tikoga kina na veisureti veivueti mera veivutuni; ka rawa mo raica na veisureti taucoko oqo ena Ilamani 13–15 (vakabibi ena Ilamani 13:6, 11; 14:15–19; 15:7–8). E yaga vakacava vei kemuni na veisureti oqo? Na cava o sa vulica mai na veitikina oqo me baleta na veivutuni? Ena gauna cava o sa bau sotava kina na loloma veivueti ni Kalou ni ko sa veivutuni?
Na ivakatakilakila kei na veika veivakurabuitaki e rawa ni vaqaqacotaka na nodra vakabauta o ira era sa sega ni vakaukauwataka na yalodra.
Ena Ilamani 14, e vakamacalataka kina o Samuela na vuna e vakarautaka kina na Turaga na ivakatakilakila ni nona sucu kei na mate na iVakabula: “Ka kena inaki mo ni vakabauta kina na yacana” (Ilamani 14:12). Ni ko vulica na Ilamani 14, raica na ivakatakilakila ni nona sucu na iVakabula ena tikina 1–8 kei na ivakatakilakila ni nona mate ena tikina 20 –28. Na cava na vuna o nanuma kina ni ivakatakilakila oqo sa rawa ni da vakaraitaka kina na sucu kei na mate i Jisu Karisito?
O rawa ni vakasamataka e dua na ivakatakilakila e solia na Turaga me vukei kemuni mo ni vakabauti Koya? Me kena ivakaraitaki, era sa parofisaitaka tu mai na parofita na ivakatakilakila ka na rairai tiko mai ni bera na iKarua ni Lesumai ni iVakabula (raica na “iVakatakilakila ni Gauna,” Guide to the Scriptures, scriptures.ChurchofJesusChrist.org). Sa dua beka vei ira na ivakatakilakila oqo sa yaco ena noda gauna oqo? Eso tale na ivakatakilakila e veimuataki ki na vakabauti Jisu Karisito e yaco vakalevu ki na tamata yadua ka sega ni ukutaki. Taura e dua na gauna mo vakasamataka vakatitobu na sala sa vueti kina na nomu bula e Ligana.
Na ivakaro cava sa soli mai me baleta na ivakatakilakila ena Ilamani 16:13–23? O na rawa vakacava ni levea na itovo ni nodra bula na tamata era tukuni tiko ena veitikina oqo?
Raica talega na Alama 30:43–52; Ronald A. Rasband, “Sa Lewa Vakalou,” Ensign se Liaona, Nove. 2017, 55–57.
Niu muria na ivakasala ni parofita ena kauti au vakavoleka vua na Turaga.
A vakavulica o Elder Neil L. Andersen: “Au sa raica niu vulica ena masumasu na nona vosa na parofita ni Kalou kau vakatudonutaka vakamatau, ena vosota, na lomaqu me ka vakayalo ki na nona ivakavuvuli veiuqeti, ena yaco na noqu vakabauta na Turaga o Jisu Karisito me na tubu tikoga. Kevaka eda sa digitaka meda biuta vakatikitiki na nona ivakasala ka vakadeitaka ni da sa vuku cake, ni sa rarawa kecega na noda vakabauta ka vakabuwawataka na noda rai tawamudu” (“Na Parofita ni Kalou,” Ensign se Liaona, Me 2018, 26 – 27). E sa vakadeitaka vakacava na nodra vosa kei na ivalavala na Nifaiti ena Ilamani 16 na veika e vakavulica o Elder Andersen? Na nomu yalayala cava o nanuma e dodonu mo cakava me baleti ira na parofita ni Turaga kei na nodra itukutuku?
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Ilamani 13:3–4
Na cava a vakauqeta na nomu matavuvale baleta na isau ni taro nei Samuela ki na ivakaro ni Turaga ena Ilamani 13:3–4? Ena gauna ni nomudou vuli vakamatavuvale ena macawa oqo, sa rawa mo vakauqeti nomu lewe ni matavuvale me ra wasea na veivakauqeti e “lako mai ki na [yalodra].”
Ilamani 13:38
Na vakasama baleta ni rawa ni kune na marau “ena cakava na ivalavala ca” sa matau tu ena noda gauna oqo. Ena sala cava beka sa yaco kina vei keda na marau dina ni da bulataka na kosipeli?
Ilamani 15:3
E yaco vakacava na veivakadodonutaki ni Kalou me vakaraitaka Nona loloma kivei keda? Sureti ira na lewe ni matavuvale mera kerea ena yalomalumalumu vua na Turaga na cava e rawa ni ra cakava me ra vakavinakataka cake.
Ilamani 15:5–8
Na cava eda vulica baleta na saumaki vou maivei ira na Lemanaiti e vakamacalataki tiko ena veitikina oqo? Eda na muria vakacava na nodra ivakaraitaki?
Ilamani 16:1–3
Era na marautaka beka na nomu matavuvale me ratou dramataka na italanoa i Samuela na Leimanaiti? Ni wiliki oti na itukutuku, me ra veivukevuke na lewe ni vuvale ena tucake tu ena dua na idabedabe ka wilika eso na parofisai nei Samuela kei iratou na vo ni matavuvale me ratou vanataka vakalasulasu na nodratou dakaititi se viritaka na vatu. Oqo ena rawa ni vukea nomu matavuvale mera kila vakavinaka na ka a sotava o Samuela kei ira na Nifai. Sa rawa talega vei ira na gonelalai mera marautaka nodra droinitaka na iyaloyalo ni italanoa. Eda na vakataki Samuela vakacava meda wasea na kosipeli vei ira na tamata se cava ga na noda rere?
Me baleta na ikuri ni vakasama baleta na nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.
Vakatorocaketaki ni Vuli ni Tamata Yadudua
Vakaraica na ivakarau. Na ivakarau sai koya e dua na ituvatuva se na ivakaraitaki tudei e rawa ni vakayagataki me idusidusi me baleta na kena rawati e dua na cakacaka. Ena ivolanikalou, eda raica kina na ivakarau e vakaraitaka na sala a vakayacora kina na Turaga na nona cakacaka, me vaka Nona talai ira yani na Nona tamata me ra vunauci ira na tamata.
© The Book of Mormon for Young Readers, O Samuela na Lemanaiti, mai vei Briana Shawcroft