E masu tiko o Nifai ena dua na vale cecere ena were

Na Droini nei Nifai ena vale cecere ena were mai vei Jerry Thompson

24–30 ni Okosita

Ilamani 7–12

“Nanuma tiko na Turaga”

O Nifai, Liai, kei ira na tani a “vuqa na nodra ivakatakila ena veisiga” (Ilamani 11:23). Na wasoma ni vakatakila e sega ni baleti ira ga na parofita—sa vakarautaki tale tu ga vei iko. Vola na nomu nanuma e rawa me vukei iko mo ciqoma tale tikoga kina na ivakatakila.

Vola na Veika o Uqeti Kina

O Ilamani na tamai Nifai, a vakauqeti ira na luvena tagane me ra “nanuma, ka nanuma”: e vinakati ira me ra nanuma tiko na nodra qase e liu, nanuma na nodra vosa na parofita, ka bibi duadua mera nanuma tiko “na noda iVakabula, sai koya na Karisito” (raica na Ilamani 5:5–14). Sa matata vinaka tiko ni nanuma vinaka tiko o Nifai, baleta ni sai koya oqo na itukutuku vata ga a tukuna ena vuqa na yabaki e muri “ni guce ena vunautaka” (Ilamani 10:4) vei ira na tamata. “O sa guilecava rawa vakacava na nomu Kalou?“(Ilamani 7:20), a taroga. Na sasaga kece sara nei Nifai—na nona vunautaka, masu, vakayacora na cakacaka mana, ka masulaka na Kalou me baleta e dua na dausiga—era a sasaga kece me vukei ira na tamata mera vuki vua na Kalou ka nanumi koya. Ena vuqa na sala, na guilecava na Kalou e dua na leqa levu cake sara mai na kena sega ni kilai o Koya, ka sa rawarawa ni guilecavi o Koya ni sa rawai e “na veika wale ni vuravura oqo” ka buwawa tu ena ivalavala ca (Ilamani 7:21; raica tale ga na Ilamani 12:2). Ia, me vaka e vakaraitaka na cakacaka vakalotu nei Nifai, e sega saraga ni bera mo nanuma ka “lesu tale … vua na Turaga na nomu Kalou” (Ilamani 7:17).

ivakatakilakila ni vuli yadua

Vakasama eso ni Vuli iVolanikalou Yadua

Ilamani 7–11

Era sa vakatakila na parofita na inaki ni Kalou.

E vakamacalataki tiko ena iVola i Momani e vuqa na parofita, ia Ilamani 7–11 e dua na vanua vinaka meda vulica na cava na parofita, se cava ena cakava, kei na sala medame ciqoma kina na nona vosa. Ni o wilika na iwase oqo, raicamatua sara vakavinaka na cakacaka, vakasama, kei na nona veimaliwai o Nifai vata kei na Turaga. E vukei iko vakacava na veiqaravi vakalotu nei Nifai mo kila vakavinaka kina na itavi ni parofita ena noda gauna oqo? Oqo e vica na ivakaraitaki. Na cava tale o na kunea?

Ilamani 7:17–22O ira na parofita era vunautaka na veivutuni ka ra veivakasalataki baleta na isau ni ivalavala ca.

Ilamani 7:29; 9:21 – 36:O ira na parofita era kila ena ivakatakila mai vua na Kalou na cava era gadreva me ra rogoca.

Ilamani 10:7Sa soli vei ira na parofita na kaukauwa me ra vauca e vuravura vakakina mai lomalagi (raica talega na Maciu 16:19; VV 132: 46).

Ilamani 10:4–7, 11–12:

E tarai keda vakacava na tikina oqo me baleta na noda parofita bula? Na cava e sa vakavulica oti vei keda wale tikoga oqo? Na cava o sa cakava tiko mo rogoca ka muria na nona ivakasala?

Ilamani, 9–10

E veivuke na ivakatakilakila kei na caka mana ia e sega ni rauta me tarai cake kina na vakabauta tudei.

Kevaka e rauta me veisautaka na yalodra e dua na tamata na vei ivakatakilakila se na cakacaka mana, a qai rawa kece vei ira na Nifaiti mera sa veisautaki ena ivakatakilakila veivakurabuitaki a solia o Nifai ena Ilamani 9. Ia, a lasika cake mai “e dua na tawase ena kedra maliwa na tamata” (Ilamani 10:1) baleta ni levu vei ira “sa vakaukauwataka tiko ga na lomadra” (Ilamani 10:15). Era vuki vakacava na tamata caka ca ena ivakatakilakila kei na cakamana? (raica na Ilamani 10:12–15; raica talega na 3 Nifai 2:1–2). Na cava e rerevaki kina na kena vakayacori na yavu ni dua na ivakadinadina ena ivakatakilakila? (raica na “ivakatakilakila,” Gospel Topics, topics.ChurchofJesusChrist.org).

Ilamani 10:2–4

Na vakasama vakatitobu ena sureta na ivakatakila.

Kevaka o sa bau vakila na vakalolomataki, lomaleqa, se veilecayaki, o rawa ni vulica e dua na lesoni bibi mai na ivakaraitaki nei Nifai ena Ilamani 10:2–4. Na cava a cakava ni vaka me sa “biu”? (tikina 3).

E vakavulica o Peresitedi Henry B. Eyring, “Ni da tugana eda sureta tiko na ivakatakila mai vua na Yalotabu. Vei au, niu tugana, sa ikoya na kena vakasamataka ka masulaka ni oti au wilika ka vulica vakamalua sara na ivolanikalou” (“Veiqaravi ena Yalotabu,” Ensign se Liaona, Nove. 2010, 60). O na tauyavutaka rawa vakacava e dua na itovo ni vakasama vakatitobu? Me baleta e dua na sala me ra dau vakasamataka vakatitobu na vosa ni Kalou, raica na itukutuku nei Baraca Devin G. Durrant “Na Yalo ni Dau Nanuma Voli Ga” (Ensign se Liaona, Nove. 2015, 112–15).

Raica talega Vosa Vakaibalebale 4:26; Luke 2:19; 1 Nifai 11:1; 2 Nifai 4:15–16; 3 Nifai 17:3; Moronai 10:3; VV 88:62.

Ilamani 12

Na Turaga e vinakata meu nanumi Koya.

Ena Ilamani 12, e a vakalekalekataka o Momani na itukutuku, a vakamacalataka kina eso na lesoni e rawa ni da vulica mai na itukutuku i Nifai, ena wase e liu. Vakasamataka mo vakayagataka na nona ivakalekaleka me dua na madigi mo vakadikeva mada kina na yalomu. Sa rawa mada ga mo tuva na veika e kaya o Momani a vakavuna mera guilecava kina na Turaga o ira na tamata. Na cava sa vukei iko mo nanumi Koya kina? Na cava so na veisau o vakauqeti kina me yavutaki kina na veika o sa vulica?

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Ilamani 7–9

Na cava eda raica e tautauvata kei na veika e cakava o Nifai kei na veika era cakava na parofita nikua? E cava e vakavulica na noda parofita ena gauna nikua? Rairai o rawa ni o digitaka eso na ivakasala sa solia mai na parofita ka veivosakitaka vaka matavuvale na vei sala eso dou rawa muria vinaka kina.

Ilamani 10:4–5, 11–12

E vakaraitaka vakacava o Nifai na nona vakasaqara na lewa ni Turaga mai nona vakasaqara na nona? E rawa vakacava ni da vakamuria na Nona ivakaraitaki? Na cava eso na sala eda rawa ni vakasaqara vakavinaka cake kina na lewa ni Turaga vaka matavuvale?

Ilamani 11:1–16

Na cava na nona gagadre o Nifai na cava a qai cakava kina o koya? Na cava eda sa vulica me baleta na masu ena ivakaraitaki nei Nifai?

Ilamani 11:17–23

Na cava eda vulica me baleta na taci Nifai, Liai, ena Ilamani 11:17–23? O cei eda kila e bulataka tu na bula dodonu ka sega ni ciqoma e vuqa na veivakacaucautaki?

Ilamani 12:1–6

E rawa beka mo vakasamataka e dua na lesoni se vakaraitaki e rawa ni o vakayagataka me vukea na nomu matavuvale mera kila vakavinaka na kena ibalebale ni “sega ni dei”? Me kena ivakaraitaki, o na sureta e dua na lewe ni matavuvale me tovolea me tuva matau e dua na ka ena delani uluna. Mo qai sureti ira na lewe ni matavuvale me ra vakasaqara ena Ilamani 12:1–6 na vuna eda sega ni dei tiko ena noda muria tiko na Turaga na tamata. Ena rawa vakacava meda tudei tiko vakayalo?

Me ikuri ni vakasama ni kena vakavulici na luvedra, raica na ituvatuva ena macawa oqo ena Mo Lako Mai, Mo Muri Au—Me Baleta na Lalai.

Vakatorocaketaki Noda Veivakavulici

Railesu Oqo e dua na vakasama me ra vukei kina na lewe ni matavuvale ka vakasamataka na ivolanikalou era sa vulica tiko: Digitaka e dua na tikina o raica ni vakaibalebale vakalevu, ka vakaraitaka tu ga ena nomu vuvale me rawa ki na lewe ni matavuvale mera raica wasoma. Sureti ira na lewe ni matavuvale me ra veivukevuke ena kena digitaki e dua na ivolanikalou me vakaraitaki, ka me veivosakitaki ni ra sa soqoni vata mai na matavuvale, me vaka ena gauna ni kana se na masu vakamatavuvale.

Sa kilai rawa ni o Sianitumu a laba

© Na iVola i Momani me baleta na itabatamata gone, O Sianitumu —Sa Kilai ni a Laba, maivei Briana Shawcroft; me kakua ni lavetaki