“3–9 ni Okosita. Alama 43–52: ‘Tudei ena Vakabauta na Karisito,’” Lako Mai, Mo Muri Au—Me Baleta na Tamata Yadua kei na Matavuvale: iVola i Momani 2020 (2020)
“3–9 ni Okosita. Alama 43–52,” Lako Mai, Mo Muri Au—Me Baleta na Tamata Yadua kei na Matavuvale: 2020
Me Baleta na Veivakalougatataki ni Bula Galala, mai vei Scott M. Snow
3–9 ni Okosita
Alama 43–52
“Tudei ena Vakabauta na Karisito”
E kena rairai ni veika a yaco e tukuni tiko ena Alama 43–52 e sega ni yaga vakabibi vei kemuni. Ia, me vaka ena ivolanikalou kece, sa vakarautaka tu na Turaga e dua na itukutuku me nomu. Vasaqara ena masumasu.
Vola na Veika o Uqeti Kina
Ena noda wilika na vosa oqo ena itekivu ni Alama wase 43—“Ia oqo meu lesuva tale mada na itukutuku ni nodra ivalu na Nifaiti kei na Leimanaiti”—eda kurabuitaka na vuna a mai okata kina o Momani na itukutuku ni veivaluvaluti oqo ni sa lailai sara toka na vanua me volavola kina ena peleti (raica Na Vosa i Momani 1:5). E dina ni da sa vakaivotavota talega ena ivalu ena iotioti ni gauna oqo, ia sa yaga sara na nona vosa e uabaleta yani na kena vakamacalataki na ituvatuva kei na veivakaleqai ni ivalu. Na nona vosa sa vakarautaki keda talega ki na ivalu “meda vala tiko” (Sere ni Lotu Vakavalagi, naba 250), na ivalu eda sa valuta tiko kina ena veisiga na veika butobuto. E ka dina sara na ivalu oqo, na kena vatuka ena tara na noda bula tawamudu. Me vakataki ira na Nifaiti, eda sa “vakauqeti ena dua na inaki vinaka cake,” o ya na “Noda Kalou, na noda Lotu, na noda galala, kei na noda tiko sautu, na noda [matavuvale].” E vakatoka oqo o Moronai me “nodra inaki na Lotu Vakarisito,” na inaki vata ga eda sa valu tiko kina nikua (Alama 43:45; 46:12, 16).
Vakasama eso ni Vuli iVolanikalou ni Tamata Yadua
Na veivaluvaluti era tukuni tiko ena iVola i Momani e vakavulica vei au na noqu vala tiko kei na veika butobuto.
Na nomu wilika na nodrau veivaluvaluti na Nifaiti kei na Leimanaiti e rawa ni vakaibalebale vakalevu cake vei iko kevaka o vakaraica na kena ivakatautauvata ki na nomu ivalu vakayalo. Ni o wilika na Alama 43–52, raica na ka era a cakava na Nifaiti ka yaco kina mera gugumatua (se bula luluqa kina). Mo qai vakasamataka vagumatua na sala o rawa ni vakayagataka kina na veika o sa vulica me na vukei iko mo qaqa ena nomu ivalu vakayalo. Ni ko vulica na veitikina me vakaoqo, vola na nomu nanuma baleta na sala mo na muria kina na nodra ivakaraitaki na Nifaiti:
-
Alama 43:19. Era sa tuvakarau na Nifaiti kei na nodra iyaragi. (Au sa rawa ni vakarautaki au ena iyaragi vakayalo.)
-
Alama 43:23–24. Era sa vakasaqara na veidusimaki ni parofita.
Raica talega na sala era a saga kina na dauvakacaca ni Leimanaiti kei na Nifaiti mera vakadrukai ira kina na Nifaiti. Na veika oqo e rawa ni ko qaqarauni kina ena sala ena valuti iko mai kina o vu-ni-meca. Ni o vulica, vola na sala vata vakaoqo ena rawa ni valuti iko mai kina o Setani:
-
Alama 43:8. Sa segata sara o Saraemana me vakacudrui ira na nona tamata me rawa ni lewai ira. (Ena gauna au sa cudruvi ira kina na tamata, au sa solia na kaukauwa vei Setani me lewai au.)
-
Alama 43:29 Era a vinakata na Leimanaiti me ra vakabobulataki ira na Nifaiti.
Na iTataqomaki ni Dua na Koro Levu o Nifaiti, mai vei Minerva K. Teichert
Niu sasagataka tiko meu yalodina vakataki Moronai, au sa rawa ni vakataka na iVakabula.
O dau diva beka mo vakataka vakalevu cake na iVakabula ka vakaluluqataka na kaukauwa nei vu-ni-meca ena nomu bula? E dua na kena sala o ya mo muria na veivakauqeti e tiko ena Alama 48:17 mo “tautauvata kei Moronai.” Raicamatua na itovo kei na ivakarau nei Moronai era tukuni tiko ena Alama 43 52 ka vakabibi ena 46:11–28 kei na 48:7–17. Na cava e vakurabuitaki iko me baleta na “tamata qaqa” oqo? E rawa vakacava ki na nona ivakarau kei na ivalavala vaka o ya me vakamalumalumutaka na kaukauwa ni tevoro ena nomu bula? Vakasamataka vakatitobu na veika o sa vakauqeti kina mo cakava mo muria kina na ivakaraitaki nei Moronai, ka yaco mo vakataka cake na iVakabula.
Sa na dau veitemaki ka lawakitaki keda vakalalai o Setani.
E kila tu o Setani ni vuqa vei keda eda sega ni tu vakarau meda vakayacora na ivalavala ca lelevu se vakabauta na lasu lelevu. O koya gona, sa dau vakayagataka kina o koya na lasu kei na veitemaki e dreve me kilai me liutaki keda ki na ivalavala ca lalai—ena kena levu e nanuma o koya ni da na ciqoma. Ena tomana tiko oqo o koya me yacova ni da sa lako sese yawa sara mai na veitaqomaki ni bula dodonu.
Sa rawa mo raica na ivakarau oqo ena veika a sotava ko Amalikaia me temaki ko Leonitai, e tiko ena Alama 47. Ni ko vulica, vakasamataka vakatitobu na sala e saga tiko o Setani me lawakitaki iko kina, me vaka e vakamacalataka eke o Elder Robert D. Hales:
“A vakauqeti Leonitai o Amalikaia na dauvere me ‘lako sobu mai’ me sotavi koya ena buca. Ia ena gauna sa biuta mai kina ko Leonitai na ulunivanua, sa qai vagagai ‘tiko vakamalua’ me yacova ni sa mate, ka bale mate kina na nona mataivalu ena ligai Amalikaia (raica na Alama 47). Ena veiba kei na veibeitaki, eso na tamata era bacani keda meda biuta na vanua cecere. Na vanua cecere sai koya na vanua e tiko kina na rarama. … Sai koya na yavu taqomaki” (“Na Yaloqaqa Vakarisito: Na iSau ni Bula Vakatisaipeli,” Ensign se Liaona, Nove. 2008, 74).
Raica talega na 2 Nifai 26: 22; 28: 21–22.
Na duavata e kauta mai na veitaqomaki.
Ena veika sa yaco era volai tiko ena itekivu ni Alama 50, sa vaka me sa sega ni ra qaqa rawa na Leimanaiti maivei ira na Nifaiti. Na nodra iyaragi, bai, kei na cakacaka lomavata na Nifaiti sa vaka mera sa sega ni vakadrukai rawa kina (raica na Alama 49: 28–30 kei na 50: 17–20). Ia sa vuqa sara na nodra koro lelevu era sa kaba rawa na Leimanaiti — oka kina na kena a vakabaitaka tu o Moronai (raica na Alama 51:26–27). E yaco vakacava na ka oqo? Vakaraica na isau ni taro ni ko wilika na veiwase oqo (raica vakabibi na Alama 51:1–12). Vakasamataka vakatitobu na veika o sa vakaroti kina kei na nomu matavuvale mai na itukutuku oqo.
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou vata kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Alama 45:2–8
Ni wiliki vata na tikina eso oqo ena rawa me vakauqeti ira nomu matavuvale me ra veivosaki yadudua kei ira na lewe ni matavuvale, me vakataki Alama vei Ilamani.
Alama 46:12–22
A veivakauqeti na yavu ni bula galala vei ira na Nifaiti me ra na muria na ivakaro ni Kalou ka taqomaka na nodra vakabauta. Na cava e vakauqeti keda meda vakayacora vakakina? De rairai na nomu matavuvale e rawa ni vakavuna na nomu yavu ni bula galala — e dua na kuila se drotini kei na veivosa se iyaloyalo me vakananuma vei iko mo muria na ivakaro ni Kalou ena veisiga yadua.
Alama 48:7–9; 49:1–9; 50:1–6
Ena nomudou wilika vakamatavuvale na nodra viribai na Nifaiti, sa rawa me veivosakitaki na kena viribaiti vakacava na nomu itikotiko mai vua na vu-ni-meca. Sa rawa mera tara na gone ena marau na bai ena iyaya me vaka na idabedabe kei na itutuvi, se mera droinitaka na veika era raitayalotaka era a viribai kina na Nifaiti.
Alama 51:1–12
Na cava era vakavulica na veitikina oqo ena ka ena rawa ni yaco ena loma ni noda matavuvale ni yaco tiko kina na veileti? E rawa vakacava me da vakalevutaka na noda duavata?
Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.
Vakatorocaketaki na Vuli ni Tamata Yadudua
Taroga na taro eso ni o vuli tiko. Ena nomu vulica na ivolanikalou, tarogi iko mada ena taro me vukei iko mo vakasamataka vakatitobu na itagede o sa bulataka tiko mai na veika o sa wilika.
Na Yavu ni Bula Galala, mai vei Larry Conrad Winborg