“3–9 ni Okosita. Alama 43–52: ‘Tudei Tu ena Vakabauti Karisito,’” Lako Mai, Mo Muri Au—Baleta na Lalai: iVola i Momani 2020 (2020)
“3–9 ni Okosita. Alama 43–52,” Lako Mai, Mo Muri Au—Baleta na Lalai: 2020
Me Baleta na Veivakalougatataki ni Bula Galala, mai vei Scott M. Snow
3–9 ni Okosita
Alama 43–52
“Tudei Tu ena Vakabauti Karisito”
Ni o tuvalaka na itaviqaravi, sa rawa mo raica na vakasama oqo mai na vakatutu ni nodra vakavulici na gone lalai kei na gone qase cake.
Vola na Veika o Uqeti Kina
Sureta na Veiwasei
Kerei ira na gone mera wasea na ka era nanuma me baleta eso na tamata kei na nodra italanoa ena Alama 43–52, me vakataki Kavetani Moronai se na drotini ni bula galala. Me vukea na nodra nanuma, vakaraitaka na iyaloyalo eso mai na iTalanoa ni iVola i Momani, se iVola Yaloyalo Vakosipeli, se Lako Mai, Mo Muri Au—Me Baleta na Tamata Yadua kei na Matavuvale.
Vakavulica na iVunau: Gone Sobu
Alama 43:17–21; 48:7–8; 49:1–5; 50:1–6
Au rawa ni kunea na veitaqomaki vakayalo ena kosipeli.
Me ra taqomaki na Nifaiti mai vei ira na Leimanaiti, a vakarautaki ira na nona tamata o Moronai ena iyaragi kei na bai ni ivalu. Sa vakavulici keda na nona sasaga ena iwalewale me da taqomaki kina vakayalo.
iTaviqaravi e Rawa ni Caka
-
Tukuna vakalailai vei ira na gone na ivalu ena kedra maliwa na Nifaiti kei na Leimanaiti (raica na Alama 43), ka vakadreta ni ra daramaka na Nifaiti na iyaragi me taqomaki ira. E rawa ni o vakayagataka na “Wase 31: Vakadrukai Saraemana o Kavetani Moronai” (iTalanoa ni iVola i Momani, 85–88, se na vidio veisemati ena ChurchofJesusChrist.org). Wilika na Alama 43:19, ka sureti ira na gone me ra dusia na veitiki ni yagodra ni ra rogoca tu ena ivolanikalou.
-
Vakamacalataka me vaka ga era a valu tu vakayago na Nifaiti, eda sa valu vakayalo tiko vata kei Setani, ka sa sega ni vinakati keda me da muria na ivunau ni Kalou. Droinitaka e dua na gone ena vava ni volavola, ka vukei ira na gone ni vakasamataka na veika e taqomaki keda vakayalo me vaka sa taqomaka na yagoda na iyaragi (me ivakaraitaki, na masu, wili ivolanikalou, se talairawarawa ki na ivunau). Ena veigauna e tukuni kina e dua na ka, droinitaka e dua na tiki ni iyaragi vua na gone ena papa ni volavola.
Taqomaki ni dua na Koro ni Nifaiti, mai vei Minerva K. Teichert
Alama 46:11–16; 48:11–13, 16–17
Sa rawa niu yalodina me vakataki Kavetani Moronai.
Sa dua na ivakaraitaki levu ni vakabauta, yaloqaqa, kei na veiqaravi o Moronai. Vakasamataka na iwalewale o rawa ni vakauqeti ira kina na gone me ra muria na nona ivakaraitaki.
iTaviqaravi e Rawa ni Caka
-
Vakaraitaka na iyaloyalo i Moronai ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale. Tukuna vei ira na gone na drotini ni bula galala kei na veika a volai tu kina, ena vakayagataki ni malanivosa eso mai na Alama 46:11–16. Sa rawa ni o vakatauvatana na “Wase 32: Kavetani Moronai kei na Drotini ni Bula Galala” (iTalanoa ni iVola i Momani, 89–90, se na vidio veisemati ena ChurchofJesusChrist.org). Vukei ira na gone ni tukuni na italanoa ena kena levu ga e rawa. Dusimaka ni a vakayagataka o Moronai na drotini ni bula galala me vukei ira na Nifaiti ni nanuma tiko na veika e bibi vei ira.
-
Vukei ira na gone ni bulia e dua na drotini ni bula galala me baleti ira se na nomu kalasi. Tekivu ni vukei ira me ra vakasamataka na veika era vakabauta se na veika e vinakata vei ira na Tamada Vakalomalagi me ra nanuma. Me ra droinitaka na iyaloyalo ni veika oqo ena dua na tiki ni pepa levu, se rawa ni o kauta mai na iyaloyalo eso mera vakabira ki na pepa.
-
Kerei ira na gone me ra tukuna vei iko eso na tamata era vinakata mera vakataka kei na vuna era vinakata mera vakataki koya kina. Qai wasea vei ira na vosa eso mai na Alama 48:11–13 e vakamacalataki Moronai, ka sureti ira me ra vakilakila o cei e vakamacalataki tiko ena veivosa oqo. Vakaraitaka na iyaloyalo kei Moronai, ka veivosakitaka na sala eso eda rawa ni vakataki koya kina.
Vakavulica na iVunau: Gone Qase Cake
Alama 43:17–21; 48:7–8; 49:1–5; 50:1–6
Au rawa ni kunea na veitaqomaki vakayalo ena kosipeli.
Sa vuqa na veika rerevaki vakayalo e vuravura, ia sa levu na ka era rawa ni vulica na gone mai vei ira na Nifaiti ena iwalewale mera taqomaki ira kina.
iTaviqaravi e Rawa ni Caka
-
Sureti ira yadua na gone me ra wilika lo na veitikina oqo e vakamacalataka na sala era a vakavakarau kina na Nifaiti ena ivalu kei ira na Leimanaiti: Alama 43:19; 48:8; 49:1–5; kei na 50:2–4. Kerei ira na gone me ra wasea na veika era sa vulica (veivuke kevaka e gadrevi). Vakamacalataka ni da sa valu vakayalo tiko kei Setani, ka sa dodonu meda taqomaki keda vakayalo, me vaka ga era a taqomaki ira vakayago na Nifaiti mai vei ira na Leimanaiti. Na mataqali iyaragi se bai ni tataqomaki vakayalo cava eda rawa ni tara meda taqomaki keda kina ena noda ivalu vakayalo?
-
Vukei ira na gone ni cakava e dua na isasabai mai na dua na tiki ni pepa levu se kateni, ka kerei ira me ra vola kina na veika e dau taqomaki keda vakayalo. Solia ki na gone yadua e dua na tiki ni pepa, ka sureti ira me ra vola e dua na ka ca e rawa ni temaki keda kina o Setani meda cakava (me vakataka na lasu, butako, se valavala tawadodonu). Kerei ira mera qilia na nodra pepa vaka na polo ka virika na isasabai me vakaraitaka na sala e rawa ni taqomaki keda kina na kosipeli mai vei Setani (raica talega na Efeso 6:16).
Alama 46:11–16; 48:11–13, 16–17
Sa rawa niu yalodina me vakataki Kavetani Moronai.
Sa dua na tisaipeli yalodina ka qaqa i Jisu Karisito o Moronai, ka a vakauqeti ira na Nifaiti me ra bulataka na kosipeli (raica na Alama 48: 17). Na cava e rawa ni ra vulica na gone ena nomu kalasi mai na nona ivakaraitaki?
iTaviqaravi e Rawa ni Caka
-
Wilika vata na Alama 46:11–16. Na cava a vinakata o Moronai mera nanuma tu na Nifaiti? (raica na tikina 12). A vukei ira vakacava o koya mera nanuma tiko na veika oqo? Kerei ira na gone me ra tuva eso na ka e vinakata vei keda na Tamada Vakalomalagi meda nanuma. Me ra qai cakava na gone na nodra dui “drotini ni bula galala” vata na malanivosa se iyaloyalo eso ena vukei ira ni nanuma na veika oqo.
-
Kerea e dua na gone me wilika na Alama 48:17. Me vukei ira na gone ni kila vakamatata na vuna eda sa sureti meda vakataki Moronai kina, sureti ira me ra vulica na Alama 48:11–13, 16. Kerei ira mera raica na vosa kei na malanivosa eso e vukei keda ni kila vakamatata na vuna e sa dua kina na tisaipeli qaqa i Jisu Karisito o Moronai. Ni ra wasea tu na veika era raica, vakauqeti ira me ra vakasamataka na ka eso era rawa ni cakava mera vakataki Moronai vakalevu cake.
Sa temaki ka vakacalai keda o Setani ena veika lalai eso.
Sa gadrevi mera kila na gone ni na tovolea o Setani me temaki keda ena cala lalai eso me rawa ni muataki keda ki na cala levu sara.
iTaviqaravi e Rawa ni Caka
-
Wilika vata na veitikina digitaki mai na Alama 47:4–19, ka vakamacalataka vei ira na gone na iwalewale a ra-wa kina o Amalikaia na mataivalu i Leonitai, dina ga ni sa “dei tu ena nodra vakasama” na lewe ni mataivalu ni ra na sega ni vakasaurarataki mera ravuti ira na Nifaiti. Na cava beka ena yaco kevaka a tukuna vei Leonitai o Amalikaia na ka a navuca me kitaka mai na ivakatekivu? Na cava e vakatavulica vei keda na veitikina oqo ena sasaga i Setani me vakacalai keda?
-
Vakaraitaka na iyaloyalo ni dua na vale ka vakamareqeti kei na dua na vale sa vakawaleni tu, se vakaraitaka na iyaloyalo ni dua na were bulabula kei na dua na were e tubua tu. Me ra qai veivosakitaka na gone na ka era raica ena iyaloyalo kei na sala e rawa ni yaco kina nikua na veisau eso oqo. Na cava e rawa ni a cakava na itaukei ni vale se were me tarova kina na ka oqo? Vakamacalataka ni sa rawa ni vakacalai malua na tamata kevaka era sega ni vorata na veitemaki i Setani ena vakayacori ni cala lalai (me vaka na veidabui se na saravi ni iyaloyalo vakasisila) ka vakakina na cala levu sara. Na cava na ka ca eso e sa gadrevi meda vorata ni vakayacora ena noda bula?
Vakauqeta na Vuli e Vale
Kerea na gone yadua me tukuna e dua na ka e a rogoca se vakila nikua ka vinakata me wasea ki na dua na lewe ni matavuvale. Vakauqeti ira mera vakamuria na nodra ituvatuva.
Vakatorocaketaki Noda Veivakavulici
Vukea mera yalodei tu na gone. Ena rairai ni sega ni matau ki na so na gone na vulici ni kosipeli vakaira. E dua na sala ni tara cake nodra yalodei mera vakacaucautaki ni ra vakaitavi ena kalasi.