coqa na ua lelevu ena vatu

17–23 ni Okosita

Ilamani 1–6

“Na Uluvatu ni Noda Dauveivueti”

Na itaviqaravi eso ena ituvatuva oqo e sa nakiti me vakacaudreva na vakasama kei na veivakauqeti ena yalomu kei na nomu vakasama. Na vakasama vinaka duadua e dau yaco mai ni ko tugana ena masumasu na ivolanikalou kei na nodra gagadre na gone o vakavulica.

Vola na Veika o Uqeti Kina

ivakatakilakila ni veiwasei

Sureta na Veiwasei

Me ra tokoni na gone ena vulici ni kosipeli e vale, sureta e so vei ira me wasea na veika era sa vulica ena macawa oqo. Vakamacalataka na iwalewale o vulica kina na kosipeli e vale, ka veivosakitaka na sala eso era na gone rawa ni vukei ira kina na nodra matavuvale me vuli mai na iVola i Momani.

ivakatakilakila ni veivakavulici

Vakavulica na iVunau: Gone Sobu

Ilamani 5:12

Au rawa ni tara na noqu yavu vei Jisu Karisito.

A vakavulica na luvena o Nifai kei Liai o Ilamani me rau tara na nodrau bula ena uluvatu ni noda Dauveivueti. Tugana na sala o na cakava vakakina vei ira na gone o vakavulica.

iTaviqaravi e Rawa ni Caka

• Vakaraitaka na iyaloyalo ni dua na valetabu se dua tale na vale, ka vakamacalataka ni ra gadreva na vale na yavu kaukauwa me ra kakua kina ni kasere ena cagi kei na cagi tataba. Me vakatakarakarataki oqo, sureti ira na gone me ra tovolea ni tosoya e dua na vatu ena nodra uvuca. Wilika na matai ni vica na yatuvosa ni Ilamani 5:12, ka kerei ira na gone me ra laveta na ligadra ni ra rogoca o cei sara na “vatu” sa dodonu me noda yavu.

• Sureti ira na gone me ra veimoiaki ni ko wilika na Ilamani 5:12. Me ivakaraitaki, sa rawa ni ra yalova na ligadra ni o wilika na “cagi tataba kaukauwa” ni tevoro ka duri tu ena dua na vanua ni o wilika na “uluvatu ni noda Dauveivueti.”

• Sureti ira na gone me ra vukei iko ni tara e dua na vale ena vakayagataki ni buloko se iyaya tale eso. Tekivu ena tuvai ni dua na “yavu dei,” ka tukuna vei ira na sala e sa dodonu me yavu tu ni noda bula o Jisu Karisito. Kerei ira na gone me ra wasea na veika era rawa ni cakava ni muri Jisu Karisito, ka me ra qai vakuria e dua na buloko ki na yavu ni vale ena ka yadua era wasea.

• Sureti ira na gone me ra rokataka na tabana ni itaviqaravi, ka vukei ira ni kotiva tani. Na cava eda rawa ni cakava me tara cake kina na noda bula ena yavu i Jisu Karisito? Wasea eso na sala o sa tara cake kina na nomu bula kivua na iVakabula ka sa vakalougatataka na nomu bula na kena caka vakakina.

Ilamani 5:21–52

Sa dau vakasolokakana na Yalo Tabu ena domo malua, lailai.

Na ivakamacala ena Ilamani 5:29–30, 45–47 ena domo era a rogoca na Leimanaiti e sa tautauvata kei na ivakarau eda dau vakamacalataka ena sala e vosa kina na Yalo Tabu. Sa rawa ni o vakayagataka na veitikina oqo me vukei ira na gone ni kila na domo ni Yalotabu.

iTaviqaravi e Rawa ni Caka

• Wasea na itukutuku i Nifai kei Liai ena valeniveivesu. O na rairai vakayagataka na “Wase 37: Nifai kei Liai ena Valeniveivesu” (iTalanoa ni iVola i Momani, 99–102, se na kena vidio ena ChurchofJesusChrist.org). Ni ko tukuna tiko na domo era a rogoca na Leimanaiti, vosa ena domo malumu. Tokaruataka vakavica na italanoa, ka sureti ira na gone mera vakasolokakana vata kei iko. Tukuna vei ira na gone baleta na gauna eso e sa vakasolokakana kina vei iko na Yalotabu ka vaqaqacotaka na nomu ivakadinadina.

• Wilika na Ilamani 5:30, ka lagata vata kei ira na gone e dua na sere baleta na Yalo Tabu, me vaka na “The Still Small Voice” (Children’s Songbook, 106–7). Dusia na veivosa ena tikina ni ivolanikalou kei na sere e vakamacalataka na sala e vosa kina vei keda na Yalo Tabu (raica talega na Ilamani 5:45–47). Vakayagataki Ilamani 5:29 kei na veika o sa sotava mo wasea vata kei ira na gone e vica na ivakaraitaki ni ka vinaka e rawa ni vakauqeta na Yalo Tabu meda kitaka.

ivakatakilakila ni veivakavulici

Vakavulica na ivunau: Gone Qase Cake

Ilamani 1–6

Niu sa yalomalua, ena vakalougatataki au na Tamada Vakalomalagi.

Sa umani tu ena iVola i Momani e vuqa na ivakaraitaki rerevaki ni qaciqacia kei na veivakalougatataki ni yalomalua, ka basika e vica na ivakaraitaki oqo ena Ilamani 1–6. Ni ko vulica na veiwase oqo, tugana na sala o rawa ni vakayagataka kina na ivakaraitaki eso oqo mo vakavulici ira kina na gone ena nomu kalasi.

iTaviqaravi e Rawa ni Caka

• Me ra qai vukei iko na gone ni vola ena vava ni volavola na ituvaki oqo ni “ivakacawiri ni qaciqacia.” Wilika vata na Ilamani 3:24, 33–34 kei na 4:11–15, ka sureti ira na gone me ra dusia na tiki eso ni ivakacawiri e vakamacalataka na veitikina oqo.

• Vola na vosa Yalomalumalumu kei na Yaloqaciqacia ena vava ni volavola. Vola e vica na ivakaraitaki ni ivakarau yalomalumalumu se yaloqaciqacia ena tiki ni pepa eso, ka sureti ira na gone me ra veivukevuke ni digitaka e dua na pepa ka biuta tikiva na vosa ena vava ni volavola e vakamacalataka na ivakarau oya. Na cava eso na sala eda rawa ni digitaka kina meda yalomalumalumu?

na ivakacawiri ni qaciqacia

Na ”ivakacawiri ni qaciqacia.”

Ilamani 5:5–14

Au na tara na noqu yavu vei Jisu Karisito.

Ilamani 5:12 e umani tu kina na ivakatakilakila kaukauwa eso ni kena tara cake na noda yavu vei Jisu Karisito. E rawa vakacava ni o vakayagataka na veivakatakilakila oqo mo vakaraitaka kina na ivakavuvuli oqo vei ira na gone? Na kena vakayacori ena vukea nodra vakarautaki na gone ki na veitemaki kei na veivakatovolei era na sotava.

iTaviqaravi e Rawa ni Caka

• Kauta mai ki na kalasi e vica na mataqali yaya e rawa ni matataka na yavu malumalumu se kaukauwa (me vaka na vauvau polo se dua na vatu rabaraba se taile). Sureti ira na gone me ra tara e dua na vale ena vakayagataki ni buloko se iyaya duatani ena veiyavu duidui eso. Na cava e vakavuna me kaukauwa cake kina eso na yavu mai vei ira tale eso? Wilika vata na Ilamani 5:12, ka tarogi ira na gone se cava na vuna era nanuma kina ni sa “yavu dei” o Jisu Karisito ki na noda bula. E rawa vakacava ni da tara na noda bula ki Vua? Sureti ira mera vaqara na Ilamani 3:27–29, 35 kei na Yavu ni Vakabauta 1:4 me kunei kina na vakasama eso.

• Sureti ira na gone me ra dikeva na Ilamani 5:5–14 ka wilika se vakatakilai vakavica na vosa “nanuma.” Na cava e vakavulici ira kina na luvena o Ilamani mera dau nanuma? E rawa vakacava ni vukei keda na nanumi ni veika oqo meda biuti Jisu Karisito me yavu ni noda bula?

Ilamani 5:20–52

Na veivutuni sa sosomitaka na butobuto vakayalo ena rarama.

Era a wavoliti tu ena butobuto dina sara na Leimanaiti ka lako ki vale ni veivesu me vakamatei Nifai kei Liai. Ni da caka cala, eda sa tiko ena butobuto vakayalo. Ilamani 5:20–52 e vakavulica vei keda na sala e rawa ni laveti kina na noda “o butobuto” vakayalo (tikina e 41).

iTaviqaravi e Rawa ni Caka

• Me na vakabutobutotaki sara na rumu ni kalasi; qai wilika se vakalekalekataka na italanoa ena Ilamani 5:20–40 ena vakayagataki ni cina livaliva lailai. Ena vaevei tu na ka era bau vakila na Leimanaiti ni ra tiko buto? Sureti ira na gone mera vakarorogo ki na ka a vakavulici ira na tamata o Aminatapi mera kitaka me rawa ni laveti kina na butobuto, qai wilika na tikina 41. Qai waqaca na cina, ka wilika vata na tikina e 42–48. Na cava e vakavulica vei keda na veitikina oqo me baleta na veivakalougatataki e kauta mai ki na noda bula na veivutuni?

• Sureti ira na gone me ra raitayaloyalotaka ni ra vakavulica tiko e dua na gone lailai me baleta na Yalo Tabu. E rawa vakacava ni ra vakayagataka na Ilamani 5:29–33, 44–47 mera vakavulica na ivakarau ni kena dau vakilai na domo ni Yalotabu kei na ka eso e tukuna vei keda na Yalo Tabu? E sa vakauqeti iko vakacava na Yalo Tabu mo veivutuni? Sureti ira na gone me ra wasea na veika era sotava ena nodra a vakila na vakacegu kei na veivakacegui ni Yalo Tabu.

ivakatakilakila ni vuli

Vakauqeta na Vuli e Vale

Sureti ira na gone me ra taroga na lewe ni matavuvale ena sala era sa tara kina na nodra bula vei Jisu Karisito. Se rawa ni ra wasea ki na nodra matavuvale na sala era sa navuca me tara cake kina na nodra bula ki Vua.

Vakatorocaketaki Noda Veivakavulici

Vakadinadinataki Jisu Karisito Sa nomu e dua na madigi tabu mo vukea na vaqaqacotaki ni nodra ivakadinadina bula na gone ena nomu kalasi. Vukei ira me ra vakila na loloma i Jisu kivei ira, ka wasea wasoma na nomu ivakadinadina me baleti Koya.

tabana ni itaviqaravi: au na tara na noqu yavu vei Jisu Karisito