Jisu kei Meri

Yalewa, Ko sa Tagi Ena Vuku ni Cava? mai vei Mark R. Pugh

27 ni Julai–2 ni Okosita.

Alama 39–42

“Na iTuvatuva Cecere ni Bula Marau”

Ni oti na nomu vulica ena masumasu na Alama 39–42, tuva na itaviqaravi eso me vukea nodra vuli na gone. Ko na rairai raica na vakasama eso mai na veitaviqaravi oqo e rawa ni moici ki na yabaki ni bula cavaga.

Vola na Veika o Uqeti Kina

ivakatakilakila ni veiwasei

Sureta na Veiwasei

Sureta na gone yadua me tucake ka wasea e dua na ka me baleta na kosipeli e se qai vulica wale tikoga e vale se e valenilotu.

ivakatakilakila ni veivakavulici

Vakavulica na iVunau: Gone Sobu

Alama 39:1, 10–11

Sa rawa niu dua na ivakaraitaki vinaka.

A vakayaloqaqataki Korianitoni o Alama me vuli mai na nodratou ivakaraitaki vinaka na tacina ka vakaroti Korianitoni me kakua ni ivakaraitaki ca vei ira na tani.

iTaviqaravi e Rawa ni Caka

• Vakamacalataka ni rau veitacini o Sipiloni kei Korianitoni ka ni sa dua na ivakaraitaki vinaka o Sipiloni kivei Korianitoni. Sureti ira na gone me ra tokaruataka vata kei iko na taro oqo: “Raica e sega beka ni dusia tiko ko koya e dua na ivakaraitaki vinaka vei iko?” (Alama 39:1). Kerei ira na gone me ra veitalanoataka e dua ka sa ivakaraitaki vinaka vei ira.

• Cakava e dua na qito se lagata e dua na sere era na muri se vakatotomuri iko kina na gone, vaka na “Do as I’m Doing” (Children’s Songbook, 276). Me ra qai veivukevuke na gone me iliuliu se ivakaraitaki. Tarogi ira na gone se sala cava era na rawa ni ivakaraitaki vinaka kina kivua e dua.

• Vakaraitaka na iyaloyalo kei Jisu ni cakava tiko na veika vinaka, ka vakamacalataka ni sa noda ivakaraitaki vinaka sara o Koya. Vakamacalataka ni sa rawa me da ivakaraitaki vinaka, me vakataki Jisu. Sureti ira na gone me ra droinitaka na kedra iyaloyalo ni ra vakaraitaki vinaka tu.

Alama 39:9, 13.

Sa rawa ni vukei au na Tamada Vakalomalagi kei Jisu Karisito ni vakadodonutaka na noqu cala.

E dina ga ni sega ni gadrevi me ra veivutuni na gonelalai, na talanoataki i Korianitoni sa rawa ni vukei ira ni tekivu kila vakamatata na ibalebale ni veivutuni.

iTaviqaravi e Rawa ni Caka

• Me kua ni vakamatailalaitaki na ituvaki ni nona ivalavala ca, vakamacalataka ni a digidigi cala o Korianitoni. Na cava eda rawa ni kaya me vukei koya? Wilika vei ira na gone na ka a tukuna o Alama, na tamai Korianitoni, kivua: “Mo veivutuni ka biuta tani sara na nomu ivalavala ca” (Alama 39: 9). Tukuna vei ira ni sa ibalebale ni “veivutuni” me da kerea vua na Tamada Vakalomalagi kei Jisu Karisito me vosoti keda ka vukei keda ni vakadodonutaka na noda cala ka qai saga meda na vakataki Rau cake.

• Solia e dua na ka bibi ki na gone me taura tu ni o tukuna tiko na italanoa baleta e dua ka caka cala ka lomaca kina. Tukuna vei ira na gone ni ka bibi oya e sa vakataka na vakanananu ca ena rairai tiko vei keda ni da caka cala. Kauta tani na ka bibi mai vua na gone ena nomu vakadinadinataka ni sa rawa ni kauta tani na Tamada Vakalomalagi kei Jisu Karisito na vakanananu ca ka bibi, ka vukei keda ni vakadodonutaka na noda caka cala ni da veivutuni. Lagata vata e dua na sere ni veivutuni, vaka na “Repentance”(Children’s Songbook, 98).

Alama 40:23

Au na tucake tale.

Vukei ira na gone ni kakavaki ki na siga era na tucake tale kina kei ira na nodra daulomani.

iTaviqaravi e Rawa ni Caka

• Ni ko wilika tu i cake na Alama 40:23, mera qai vakayagataka na gone na tabana ni itaviqaravi ena macawa oqo me vukei ira ni raitayaloyalotaka na ka e vakavuvulitaka tiko na tikina oqo. Sureta na gone yadua me vakayagataka na tabana ni itaviqaravi me vakavulica e dua tale na gone me baleta na tucake tale.

• Vakaraitaka na iyaloyalo ni iVakabula sa tucake tale, ka vakavulici ira na gone ena dua na sere ni Tucaketale, me vaka “Did Jesus Really Live Again?” or “Sa Tucake” (Children’s Songbook, 64; Sere ni Lotu, na. 114). Cegu vagauna mo vakamacalataka na ibalebale kei na bibi ni vosa kei na malanivosa eso.

• Tarogi ira na gone ke sa mate e dua era kila. Wasea na nomu ivakadinadina ni dua na siga ena tucake tale o ko ya kei na tamata kecega ena vuku i Jisu Karisito. Kevaka e gadrevi, vakayagataka na tabana ni itaviqaravi ena macawa oqo mo vakamacalataka na ibalebale ni tucake tale.

  Meri kei Jisu

  O Meri kei na Turaga sa Tucaketale, mai vei Harry Anderson

ivakatakilakila ni veivakavulici

Vakavulica na iVunau: Gone Qase Cake

Alama 39:1, 10–11

Sa rawa niu dua na ivakaraitaki vinaka.

Na ivakasala i Alama kivei Korianitoni e rawa ni vukei ira na gone ni kila vakamatata na kena muri ka ivakaraitaki vinaka voli.

iTaviqaravi e Rawa ni Caka

• Vakamacalataka ni a vakayacora o Korianitoni na luvei Alama e dua na valavala ca bibi ni sa dodonu me a vunautaka voli na kosipeli. Wilika kei ira na gone na iotioti ni veimama ni Alama 39:11 ka kerei ira me ra rogoca na sala a rawai ira kina na Soramaiti na ivalavala ca i Korianitoni. Vukei ira na gone ni vakasamataki ira na tamata ka rairai vakayarayarataki tu ena veika era cakava. E rawa vakacava me ra ivakaraitaki vinaka vei ira na tamata oqo?

• Wilika vata na Alma 39:1. A yaco vakacava me dua na ivakaraitaki vinaka o Sipiloni na taci Korianitoni? Kerei ira na gone me ra raica na ikuri ni isau ni taro oqo ena Alama 38:2–4. Tukuna eso na ivakaraitaki vinaka ena nomu bula, ka sureti ira na gone me ra vakayacora vakakina. Vakaraitaka na vidio “Lessons I Learned as a Boy” (ChurchofJesusChrist.org), ka tarogi ira na gone se a vakaraitaki vinaka vakacava na gone tagane qase.

• Kauta mai e dua na cina livaliva se iyaloyalo ni matanisiga, ka vakatauvatana na rarama ki na kaukauwa ni dua na ivakaraitaki yalododonu. Me vaka ga e rawa ni vukei keda na rarama ni cina livaliva se na matanisiga meda raica na sala eda gadreva ni muria, sa vakaraitaka vei keda na ivakaraitaki yalododonu na ka meda cakava me rawa ni muri kina na Tamada Vakalomalagi. Wasea e dua na ka o sotava a vukei iko kina na ivakaraitaki vinaka ni dua na tamata. Na cava era rawa ni cakava na gone mera ivakaraitaki vinaka kina vei ira na tani? Vakadinadinataka ni sa noda ivakaraitaki vinaka sara o Jisu Karisito.

Alama 39:9–13

Au rawa ni veivutuni niu caka cala.

Me vakataki keda kece, era vakacalai ka caka cala na gone o vakatavulica. E rawa vakacava ni o vakauqeti ira me ra “biuta laivi na [nodra] ivalavala ca” ka veivutuni? (Alama 39:9).

iTaviqaravi e Rawa ni Caka

• Kerei ira na gone me ra wasea e dua na gauna era a mavoa kina. Na cava era cakava me vukea na wali ni nodra mavoa? Vakamacalataka ni sa vakamavoataka na yaloda na ivalavala ca, ia sa rawa ni vakacegui keda na iVakabula ni da veivutuni.

• Kerei ira na gone me ra raica na malanivosa “veivutuni ka biuta tani sara na nomu ivalavala ca” ena Alama 39:9, ka vukei ira ni kila vakamatata na ibalebale ni “veivutuni” kei na “biuta tani”. Vakadinadinataka ni sa rawati na veivutuni ena vuku i Jisu Karisito kei na Nona Veisorovaki. Wilika vata na Alama 39:10–14 me raici na veika tale eso eda rawa ni cakava ena vukea meda veivutuni ka levea na ivalavala ca.

Alama 40:6–7, 11–14, 21–23

Ni oti na mate, sa gole na yaloda ki na vuravura ni yalo me yacova na Tucaketale kei na Veilewai.

Sa matau tu me vakasamataki na ka e yaco vei keda ni oti noda mate. Sa rawa ni vukei ira na gone na vosa i Alama ni raica na isau ni taro veivakauqeti eso.

iTaviqaravi e Rawa ni Caka

• Vola na mate, vuravura ni yalo, tucake tale, kei na veilewai ena so na tiki ni pepa, ka vakabira ena vava ni volavola ena kena ituvatuva veitarataravi. Vukei ira na gone ni kila vakamatata na ibalebale ni veivosa oqo. Wilika kei ira na gone na Alama 40:6–7, 11–14, kei na 21–23, ka kerei ira me ra biuta na vosa ena vava ni volavola ena ituvatuva ni kedra yaco.

• Vola ena vava ni volavola eso na taro e rawa ni saumi ena Alama 40:6–7, 11–14, kei na 21–23, ka sureti ira na gone me ra vakasotara vata na taro yadua ki na veitikina e sauma tu. Me ivakaraitaki, “Ena vakaevei tu na yagoqu niu sa tucake tale?” e rawa ni saumi ena Alama 40:23. Kevaka e ganita, vakamacalataka na vosa dredre eso vei ira na gone ni ra wiliwili tiko. Vakauqeti ira na gone me ra wasea na vuna era vakavinavinakataka kina na ituvatuva ni Tamada Vakalomalagi.

ivakatakilakila ni vuli

Vakauqeta na Vuli e Vale

Vakauqeti ira na gone me ra vakavinavinakataka e dua na lewe ni matavuvale ka sa ivakaraitaki vinaka tu vei ira ka qai vakasamataka e dua na sala era rawa ni vakaraitaki vinaka kina ena macawa oqo.

Vakatorocaketaki Noda Veivakavulici

Okata na wakilakila. “Era vuli vakavinaka cake e levu na gone (kei na qase) ni vakayagataki e vica na wakilakila. Raica na sala eso me vukei kina na gone mera vakayagataka na nodra wakilakila ni rai, rorogo, kei na tatara ni ra vuli” (Veituberi ena iVakarau ni iVakabula, 25).

tabana ni itaviqaravi: Au na tucake tale