iTaba mai vei Joshua Dennis

20–26 ni Jiulai

Alama 36–38

“Dou Rai vua na Kalou ka Bula”

Ni o vulica ena masumasu na Alama 36–38, ena basika mai vei iko na veivakauqeti me baleti ira na gone o vakavulica. Vola na veivakauqeti oqo; era rawa ni vakacaudreva na vakasama eso me baleta na itaviqaravi ni vuli.

Vola na Veika o Uqeti Kina

Sureta na Veiwasei

Sureti ira taucoko na gone mera wasea e dua na ka a vakatavulica vei ira na nodra itubutubu. Tarogi ira kevaka era kila na cava a vakavulica o Alama vei ira na luvena tagane.

Vakavulica na iVunau: Gone Sobu

Alama 36:6, 20, 24

Na veivutuni e kauta mai vei au na reki.

Nodra vakavulici na gone ena reki ni veivutuni ni ra se gone sa rawa ni vakauqeti ira me ra veivutuni ni ra sa qase cake.

iTaviqaravi e Rawa ni Caka

• Wilika na Alama 36:20 vei ira na gone, ka kerei ira mera vakarorogo ki na ka a vakila o Alama. Sureti ira me ra tukuna eso na ka e kauta mai vei ira na reki. Vakaraitaka e dua na iyaloyalo ni iVakabula, ka vakamacalataka ni a vakila o Alama na reki baleta ni sa vosota o Jisu Karisito na nona ivalavala ca.

• Solia ki na gone yadua e dua na tiki ni pepa e tiko kina ena dua na yasana e dua na mata mamarau kei na yasana kadua e dua na mata rarawa. Kerei ira me ra vakarorogo ni ko wilika na Alama 36:6 ka digitaka na mata cava me ra taura cake. Vakamacalataka ni a veivutuni ka vakila na reki o Alama baleta ni sa vosoti koya o Jisu Karisito mai na digidigi cala. Kerei ira na gone mera vakarorogo ni ko wilika na Alama 36:24 me baleta na digidigi vinaka e a cakava emuri ka taura cake na mata dodonu.

• Lagati vata e dua na sere baleti Jisu Karisito, vaka na “He Sent His Son” (Children’s Songbook, 34–35). Wasea na nomu ivakadinadina ni a lako mai ki vuravura o Jisu me vakabulai keda mai na ivalavala ca ka kauta mai vei keda na reki.

Alama 37:6–7

“Ena dau rawa na veika lelevu mai na veika lalai ka rawarawa.”

O rawa vakacava ni vakavulici ira na gone me ra vakila ni sa dau vakayagataka na Turaga na veika lalai se rawarawa me vakataucokotaka kina na Nona cakacaka?

iTaviqaravi e Rawa ni Caka

• Wilika Alama 37:6–7, ka sureti ira na gone me ra lolou sobu ena veigauna kece ni o wilika na vosa “veika lalai.” Vakaraitaka vei ira e vica na ka lalai ka rawa ni vakayaco ka lelevu se tosoya na ka lelevu, vaka na batiri se dua na ki ni motoka. Na ka levu cava soti e yaco se toso ena vuku ni veika lalai oqo? Vukei ira na gone ni vakasamataka eso na veika lalai se rawarawa e vinakata na Kalou meda cakava. Na ka levu cava soti e rawa ni yaco ena vuku ni ivunau lalai se rawarawa oqo?

• Vakaraitaka e dua se rua na iyaloyalo ni veika lalai e soqoni ki na veika lelevu, vaka e dua na yame ni co kei na rara, se turu ni uca kei na drano. Vakadinadinataka ni veika lalai, rawarawa sara e rawa ni vakayaco veisau levu ki na noda bula kei na nodra bula na tani. Vakauqeti ira na gone me ra tukuna na veika rawarawa, vinaka eso era cakava ena veisiga, se wasea na nomu ivakaraitaki. Sureti ira na gone mera digitaka e dua na ka rawarawa, vinaka era rawa ni cakava ena macawa oqo ka droinitaka e dua na kedra iyaloyalo ni ra cakava tiko. Sureti ira ni kauta na nodra droini i vale ka wasea tu ki na nodra matavuvale.

Alama 37:38–47

Sa rawa ni vukei keda na ivolanikalou ena veisiga.

Dina ga ni sega ni wiliwili rawa e vuqa na gone lalai, sa rawa ni o vukei ira ni rawata e dua na ivakadinadina ena kaukauwa ni ivolanikalou me dusimaka na nodra bula ni veisiga.

iTaviqaravi e Rawa ni Caka

• Vakaraitaka e dua na iyaloyalo ni Liaona (vaka na iVola Yaloyalo va-Kosipeli, na. 68), se sureti ira na gone mera droinitaka e dua ni ra wasea na ka era nanuma tu kina (raica na 1 Nifai 16:10, 28–29). Taura cake na ivolanikalou, ka kerei ira na gone me ra wasea na sala cava era sa vaka kina na Liaona na ivolanikalou. Vakayagataka na Alama 37:38–47 kei na tabana ni itaviqaravi ena macawa oqo mo vakuria ki na veivosaki oqo.

• Lagata vata e dua na sere me baleta na vulici ni ivolanikalou, vaka na “Search, Ponder, and Pray” se “Niu Qara Nai Volatabu” (Children’s Songbook, 109; Sere ni Lotu, no. 169). Na veivakalougatataki cava soti ni vuli ivolanikalou e tukuni tiko ena sere?

  

  E vakavulica vei keda na ivolanikalou na sala me da muria kina na Kalou.

Vakavulica na ivunau: Gone Qase Cake

Alama 36

Au rawa ni “sucu vua na Kalou” niu muri Jisu ka veivutunitaka na noqu ivalavala ca.

“Saumaki … e sa dua na veisau ena keda ituvaki saraga. E sa dua dina na veisau matalia ka sa vakatoka kina na Turaga kei ira na Nona parofita me dua na sucu tale” (“Saumaki,” Gospel Topics, topics.ChurchofJesusChrist.org).

iTaviqaravi e Rawa ni Caka

• Railesuva kei ira na gone na italanoa ni saumaki i Alama Lailai ena Alama 36:6–21. Vola ena tiki ni pepa na vosa kei na malanivosa eso mai na veitikina oqo e vakamacalataka na ka a vakila o Alama, ka biuti ira ena vava ni volavola. Kerei ira na gone me ra tuva na veitiki ni pepa ki na rua na iwasewase: na veika a vakila o Alama ni bera ni nanuma na ka a vakavulica o tamana me baleta na iVakabula kei na veika a vakila ni sa nanuma oti. Wilika vata na Alama 36:17–20, ka vakadinadinataka vei ira na gone ni sa vosoti keda o Jisu Karisito ni da veivutuni.

• Vola ena vava ni volavola Sucu vua na Kalou kei na veidusidusi ni ivolanikalou oqo: 1 Joni 4:7; Mosaia 5:7; 27:25–26; Alama 5:14; 22:15. Vukei ira na gone ni wilika na veitikina ka vakaraica na malanivosa e vakamacalataka na cava e kena ibalebaletaki meda sucu vua na Kalou. E valavala vakacava e dua na tamata ni sa sucu oti vua na Kalou? Eda na vakaraitaka vakacava ni da sa mai sucu vua na Kalou?

Alama 37:6–9, 38–47

“Ena dau rawa na veika lelevu mai na veika lalai ka rawarawa.”

Vukei ira na gone o vakavulica ni raica na kena rawa ni vakalougatataki ira vakalevu na wiliki ni ivolanikalou ena dua mada ga na gauna lekaleka e veisiga.

iTaviqaravi e Rawa ni Caka

• Droinitaka se vakatakarakarataka e dua na vokete. E vica na turu ni wai ena taura me vakatawana na vokete? Vukei ira na gone ni vakila ni sa na gadrevi e vuqa na turu lalai e gadrevi me vakatawani kina na vokete. E semati vakacava oqo ki na Alama 37:6–7? E tautauvata vakacava na vakuri tiko ni turu ni wai lalai ki na vokete mai na wiliki ni ivolanikalou?

• Sureti ira na gone me ra rai ki na Alama 37:6–9 ena veivakalougatataki e basika mai na “itukutuku,” se na ivolanikalou eso. Cakava va-kalasi e dua na ituvatuva ni ka era kunea. Sa vakalougatataka vakacava na noda bula na wili ivolanikalou? Wasea na nomu ivakadinadina ni ivolanikalou, ka vakauqeti ira na gone me ra kitaka vakakina.

• Vakaraitaka se vakatakarakarataka e dua na iyaloyalo ni Liaona (vaka na iVola ni Yaloyalo va-Kosipeli, na. 68), ka kerei ira na gone me ra railesuva na ka era nanuma baleta na Liaona mai 1 Nifai 16:10, 28. Vukei ira na gone ni wilika na Alama 37:38–42. E cakacaka vakacava na Liaona? E tautauvata vakacava oqo ki na sala e cakacaka kina na ivolanikalou? Wilika vata na tikina 43–47 me vukea na saumi ni taro oqo. Sureti ira na gone me ra vakacavara na tabana ni itaviqaravi vaka na tiki ni itaviqaravi oqo.

Vakauqeta na Vuli e Vale

Vakauqeti ira na gone ni wasea e dua na vuna era vakavinavinakataka kina na ivolanikalou ka qai sureti ira na lewe ni nodra matavuvale mera cakava vakakina.

Vakatorocaketaki Noda Veivakavulici

Vukei ira na gone me ra yaco ni dauvuli vinaka sara. Na inaki ni nomu vakavulici ira na gone e sega walega ni kena mai wasei vei ira na dina. Sa dodonu talega mo vukei ira ni yaco me ra bula rawati ira ena vakasaqarai ni dina. Me kena ivakaraitaki, ni sega mada ni o tukuna tu vei ira na gone na dina eso e kune ena italanoa ni saumaki i Alama, sa rawa mo tuva na itaviqaravi eso e rawa kina ni ra dikeva vakataki ira na dina ena italanoa.