13–19 ni Jiulai

Alama 32–35

“Tea na Vosa Oqo e Lomamuni”

Vakananumi ira tu na gone o vakavulica ni o vulica ena masumasu na Alama 32–35. Ni ko vakayacora, ena basika na nanuma kei na vakasama me baleta na sala mo vakavulici ira kina. Vola ka cakacakataka na veivakauqeti oqo.

Vola na Veika o Uqeti Kina

Sureta na Veiwasei

Biuta na yaca ni gone yadua ena dua na itawatawa. Kerea e dua me tomika e dua na yaca, ka sureti koya me wasea e dua na ka e sa vulica mai na iVola i Momani wale tikoga oqo. Tomana me yacova ni sa vakaitavi kece na tamata, ia kakua ni vakaukauwataka e dua me veiwasei.

Vakavulica na iVunau: Gone Sobu

Alama 32:28–43

Au rawa ni vukea me tubu noqu vakabauti Jisu Karisito.

Era sa yaya matau na sorenikau, vunikau, kei na vuanikau ka rawa ni vukei ira na gone ni kila vakamatata na ivakavuvuli dei vaka na vakabauta kei na ivakadinadina. Tugana na sala o rawa ni vakayagataka kina na ivakaraitaki i Alama mo vakavulici ira na gone.

iTaviqaravi e Rawa ni Caka

• Vakalekalekataka na Alama 32:28–43; o na rairai vakayagataka na “Wase 29: Sa Vakavulica o Alama na Vakabauta kei na Vosa ni Kalou” (iTalanoa ni iVola i Momani,81, se na kena vidio ena ChurchofJesusChrist.org). Vakaraitaka na iyaloyalo ni vunikau ena kedra ivakatagedegede duidui eso ni tubu, ka kerei ira na gone me ra vukei iko ni biuta na iyaloyalo ena kedra ituvatuva dodonu (raica na iyaloyalo era tiko ena tabana ni itaviqaravi ena macawa oqo). Vakamacalataka ni da bulataka tu na kosipeli, sa tubu na noda ivakadinadina—e tekivu vakalailai vaka na sorenikau ia sa rawa ni yaco me ka levu vaka na vunikau.

• Vakaraitaka vei ira na gone e dua na sorenikau, ka wilika vei ira na imatai ni vica na yatuvosa ena Alama 32:28. Tukuna vei ira na gone ni sa vaka na sorenikau na vosa ni Kalou. Taroga na iwalewale eda vukea me tubu kina na sorenikau. Me ra qai vakalecava na gone ni tea tu e dua na sorenikau, vakasuasuataka, ka vukea me tubu. Dusimaka ni da sega ni rawa ni raica na sorenikau ni oti noda tea, ia eda kila ni sa tiko ekea ka tubu tiko; eda sega ni rawa talega ni raica na Tamada Vakalomalagi kei Jisu Karisito, ia eda kila ni Rau sa ka dina ka Rau lomani keda. Vukei ira na gone ni vakasamataka na veika era rawa ni cakava me vukea na tubu ni nodra vakabauti Jisu Karisito.

• Droinitaka e dua na vunikau ena vava ni volavola, ka me ra qai vakuria na gone e dua na drauna se vuanikau ena veigauna kece era vakasamataka e dua na ka e rawa ni ra cakava me vukea na tubu ni nodra vakabauti Jisu Karisito. Sureti ira me ra cakava eso na imoimoi rawarawa me matataka na veika era vakasamataka.

Alama 33:2–11; 34:17–27

Sa rogoci au na Tamada Vakalomalagi niu masu.

Era masu ga vakadua ena macawa na Soramaiti, ka vakayagataka na vosa vataga ena veigauna (raica na Alama 31:22–23). E vakavuvulitaka o Alama kei Amuleki ni rawa ni da masu ena dua ga na gauna me baleta na noda gagadre vakayalo se vakayago cavaga.

iTaviqaravi e Rawa ni Caka

• Wilika na veimalanivosa o sa digitaka mai na Alama 33:4–11 e vakamacalataka na vanua eso eda rawa ni masu kina, ka vukei ira na gone ni vakasamataka na vanua eso era rawa ni masu kina. Qai sureti ira mera droinitaka na kedra iyaloyalo ni masu tu ena veivanua oya. Vakadinadinataka ni sa rawa mera masu ena dua ga na vanua, kevaka mada ga era masuta lo tiko.

• Digitaka na veimalanivosa mai na Alama 34:17–27 e vakamacalataka na veika e rawa ni da masulaka, ka wilika vei ira na gone. Vukei ira mera vakasamataka na veika era rawa ni kaya vua na Tamada Vakalomalagi ni ra masu tu, ka sureti ira me ra droinitaka na iyaloyalo ni veika oqo. Vakadinadinataka ni rawa ni ra vosa kivua na Tamada Vakalomalagi me baleta na ka cavaga era vakasamataka se vakila tiko. Wasea e dua na ka o sotava ka a rogoca kina na Tamada Vakalomalagi na nomu masu.

• Lagata e dua na sere ka vakavulica vei ira na gone me baleta na masu, vakataka na “A Child’s Prayer” se “We Bow Our Heads” (Children’s Songbook, 12–13, 25). Vukei ira ni siqema na ka e vakavulica tiko na sere me baleta na masu.

Vakavulica na ivunau: Gone Qase Cake

Alama 32:1–16, 27–28

Kevaka au sa yalomalumalumu, sa rawa ni vakavulici au na Turaga.

Rau a rawaka o Alama kei Amuleki ni vakavulici ira na Soramaiti ka sa yalomalumalumu ka vakarau tu me rogoca na vosa ni Kalou. Navuca na sala o rawa ni vakauqeti ira kina na gone ni digitaka mera yalomalumalumu.

iTaviqaravi e Rawa ni Caka

• Tarogi ira na gone na cava era nanuma ni vulica ena macawa sa oti me baleti ira na Soramaiti (raica na Alama 31:8–24). Vakananumi ira ni dua na vuna a lomaleqataki ira kina o Alama oya na nodra dokadoka (raica na Alama 31:24–28). Wilika vata na Alama 32:1–5, ka kerei ira na gone mera tukuna vakalekaleka na ka a yaco vei ira na Soramaiti ka dravudravua tu. Qai sureti ira na gone mera wilika na tikina e 12–13 mera kila na vuna a vakila kina o Alama ni nodra vakasavi tani mai na nodra vale ni masumasu (se valenilotu) e sa dua na ka vinaka kivei ira na Soramaiti oqo. Na cava soti na veivakalougatataki e vu mai na yalomalumalumu?

• Vukei ira na gone ni raica e dua na ivakamacala ni yalomalumalumu se yaloraramusumusu ena iDusidusi ki na iVolanikalou se dua na ivolanivosa. Na ivakatakilakila cava tale eso me baleta na ibalebale ni veivosa oqo era rawa ni raica ena Alama 32:13–16? Sureti ira me ra vakasamataka na sala eso me ra vakacavara kina e dua na yatuvosa me vaka na “Au sa yalomalumalumu tu niu .”

Alama 32:26–43

Sa tubu na noqu ivakadinadina i Jisu Karisito niu vakabulabulataka.

Vukei ira na gone o vakavulica ni dikeva na ka era rawa ni cakava mera “tea” na vosa ni Kalou e lomadra.

iTaviqaravi e Rawa ni Caka

• Vakaraitaka e dua na yaya kaukauwa, tudei (vaka na vatu) me matataka e dua na yalo kaukauwa se dokadoka kei na dua na ka malumu (vaka na qele) me matataka e dua na yalo malumu se yalomalumalumu. Me ra qai vakila na gone na yaya ruarua. Qai vakaraitaka vei ira na gone e dua na sorenikau me matataka na vosa ni Kalou. Sureti ira ni tovolea mera biliga na sorenikau ki na yaya kaukauwa kei na yaya malumu. Wilika vata na Alama 32:27–28, ka veivosakitaka na cava e sa ibalebale ni “soli bula” (tikina e 27) ki na vosa ni Kalou e lomada.

• Ni ko wilika vata na Alama 32:26–43, cegu vagauna ka sureti ira na gone me ra droinitaka na iyaloyalo ni sorenikau se itei e vakamacalataki tiko—me ivakaraitaki, e dua na sorenikau kei na sorenitei (tikina e 28), e dua na itei tubu voli (tikina e 30), kei na dua na itei matua vakavuana (tikina e 37). Vakauqeti ira mera vakayacana na nodra iyaloyalo ki na vosa eso mai na Alama 32. E tautauvata vakacava na vakabulabulataki ni dua na sorenikau mai na vakabulabulataki ni noda ivakadinadina baleti Jisu Karisito? Eda dau vakabulabulataka vakacava na noda ivakadinadina? Sureti ira na gone me ra vakasamataka lo na sala e sa tubu tiko kina na nodra ivakadinadina kei na cava era na cakava me ra vakabulabulataka.

Alama 33:2–11; 34:17–27

Sa rogoci au na Tamada Vakalomalagi niu masu.

Era a veilaroi tu na Soramaiti me baleta na masu, ka so eda se raica tu edaidai. A vakatavulica o Alama kei Amuleki na dina qaqa me ulabaleti kina na veilaroi oqo.

iTaviqaravi e Rawa ni Caka

• Vukei ira na gone ni vaqara na Alama 33:2–11 ena vosa kei na malanivosa bibi eso e semati ki na masu e dau tokaruataki tu. Na cava e vakavulica vei keda na vosa kei na malanivosa eso oqo me baleta na masu?

• Vukei ira na gone ni cakava e dua na ituvatuva ni tuvaki eso era rawa kina ni masu, oka kina o ira ka tukuni tiko ena Alama 33:4–10 kei na 34:17–27 vakakina na veituvaki ena nodra bula. Sureti ira na gone me ra vakasamataka se wasea na veika era sotava ni ra masu ka vakila ni sa sauma na Kalou na nodra masu.

Vakauqeta na Vuli e Vale

Kevaka e rawa, solia ki na gone yadua na sorenikau me kauta i vale ka tea me vakananumi ira ena kena tubu na nodra ivakadinadina baleti Jisu Karisito. Vakauqeti ira me ra tukuna ki na nodra matavuvale na ka era sa vulica ena cakacakataki ni nodra vakabauti Jisu Karisito.

Vakatorocaketaki Noda Veivakavulici

Vakadinadinataka na veivakalougatataki yalataki. Ni ko sureti ira na gone me ra bulataka e dua na ivakavuvuli ni kosipeli, tukuna vei ira baleta na yalayala ni Kalou eso kivei ira ka bulataka na ivakavuvuli o ya (raica na Veituberi ena iVakarau ni iVakabula,35).