Anitai-Nifai-Liai sa Buluta na Nodra iYaragi ni Valu, mai vei Jody Livingston

29 Jiune–5 Jiulai

Alama 23–29

Era “Sega ni Qai Lutu Laivi”

Vulica ena masumasu na Alama 23–29, vaqara na veivakauqeti me baleta na veika era gadreva na gone kei na sala mera vukei kina.

Vola na Veika o Uqeti Kina

Sureta na Veiwasei

Droinitaka e dua na mata mamarau ena dua na tiki ni pepa, ka vakatarai ira na gone yadua me ra taura. Me vaka ni ra taura tu na pepa, sureti ira mera tukuna e dua na ka era sa vulica mai na iVola i Momani e vakamarautaki ira.

Vakavulica na iVunau: Gone Sobu

Alama 24:6–24

Au sa vakalougatataki niu maroroya na noqu yalayala.

Na cava o vulica ena nomu vulica na Alama 24:6–24 e rawa ni vukea na gone me ra kila vakamatata na bibi ni kena maroroi e dua na yalayala ni bula dodonu?

iTaviqaravi e Rawa ni Caka

• Wilika eso na veitikina se malanivosa mai na Alama 24:6–24, me vakavulici ira na gone me baleta ira na Anitai-Nifai-Liai, na yalayala era a cakava, kei na ivakarau ni nodra maroroya na yalayala. E rawa talega mo vakayagataka na iyaloyalo ena ituvatuva ena macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale se “Wase 26: Ko Ira na Tamata i Amoni” (iTalanoa ena iVola i Momani, 73–74, se na kena vidio ena ChurchofJesusChrist.org).

• Vakamacalataka na sala era maroroya kina na Anitai-Nifai-Liai na nodra yalayala ena buluti ni nodra iyaragi. Sureti ira na gone me ra droinitaka e dua na iseleiwau ka qai vakalecava tu ni kelia e dua na qara ka buluta na nodra iseleiwau. Vukei ira na gone ni vakasamataka na yalayala era sa cakava. Cava na vuna e bibi kina na maroroi ni yalayala? Vakamacalataka ni gauna eda sa papitaiso kina, eda sa caka yalayala kei na Kalou ka sa caka yalayala o Koya kivei keda. Oqo e sa vakatokai na veiyalayalati. Vakadinadinataka ni da sa vakalougatataki ni da maroroya na noda yalayala vata kei na Kalou.

Alama 26; 29

Sa kauta mai vei au na kosipeli na reki, kau sa rawa ni wasea na reki oqo vei ira na tani.

O Amoni, ka veivuke ni vakavulica na kosipeli vei ira na Anitai-Nifai-Liai, a reki vakalevu mai na vunautaki ni kosipeli. O Alama, ka a vakavulica talega na kosipeli ki na vuqa na tamata, a reki talega vakakina. Sa rawa ni da sotava na reki vakatautauvata ni da wasea na noda ivakadinadina vei ira na tani.

iTaviqaravi e Rawa ni Caka

• Digitaka e vica na malanivosa mai na Alama 26 se29 e tukuna tiko na reki, ka wilika vei ira na gone (raica, me ivakaraitaki, Alama 26:11, 13 se Alama 29:13–14). Sureti ira na gone mera tucake ena gauna yadua era rogoca kina na vosa “reki” se “rekitaki.” Vukei ira na gone mera kila vakamatata ni sa vakavuna na marau i Alama kei Amoni na wasei ni kosipeli. Wasea e dua na ka a kauta mai kina vei iko na reki na wasei ni kosipeli.

• Sureti ira na gone me ra droinitaka na iyaloyalo eso ni veika e vakamarautaki ira. Sureti ira yadua na gone mera solia na nodra droini ki na dua tale na itokani ka vakamacalataka. Dusimaka ni gauna e vakamarautaki keda kina e dua na ka—me vaka na kosipeli—sa tubu na noda reki ni da wasea.

• Solia ki na gone e dua na ilavelave ni iVola i Momani, ka me qai vakatovotovo ni wasea tiko kei na dua tale na lewe ni kalasi. Vakauqeti ira na gone me ra vakamacalataka na nodra nanuma me baleta na iVola i Momani. Cava na vuna eda wasea kina na iVola i Momani vei ira na tani?

Alama 27:20–30

Au rawa ni vukei ira na noqu itokani mera bulataka na kosipeli.

A taqomaki ira na Anitai-Nifai-Liai na Nifaiti mai na nodra meca ka vukei ira ni maroroya na veiyalayalati era sa cakava kivua na Turaga.

iTaviqaravi e Rawa ni Caka

• Tukuna vei ira na gone na kedra italanoa na Anitai-Nifai-Liai ni caka yalayala tu me ra kakua tale ni vala (raica Alama 27:20–30). Vakamacalataka ni mai na nodra yalayala na Anitai-Nifai-Liai, sa sega ni rawa kina me ra taqomaki ira mai na nodra meca. Wilika na Alama 27:23, ka vakamacalataka ni a digitaka na nodra itokani na Nifaiti me taqomaki ira na Anitai-Nifai-Liai me rawa ni ra maroroya na nodra yalayala. E rawa vakacava ni da vukei ira na noda itokani mera maroroya na nodra yalayala? Tukuna e dua na gauna a vukei iko kina e dua na itokani mo maroroya na nomu yalayala kei na Kalou.

• Vakatasuasuataka vata kei ira na gone na ituvaki eso e rawa ni ra, ena sala vinaka, vukea tale eso ni digitaka na dodonu. Me ivakaraitaki, na cava eda rawa ni kaya ki na dua na itokani ka via lasu se veivakacalai tu?

Vakavulica na iVunau: Gone Qase Cake

Alama 24

Na veiyalayalati e yalayala au cakava kei na Kalou ka sa cakava o Koya vata kei au.

Era sa buluta na nodra iyaragi na Anitai-Nifai-Liai ka yalataka mera kakua tale ni veivakamatei. Vakakina, sa rawa vei ira na gone o vakavulica mera maroroya na nodra veiyalayalati.

iTaviqaravi e Rawa ni Caka

• Solia na vatu lalai vei ira kece na gone, ka sureti ira me ra vola na vosa veiyalayalati ena nodra vatu. Vakamacalataka ni veiyalayalati e sa dua na yalayala mai vua na Tamada Vakalomalagi kei ira na Luvena. E vakaukauwataki keda vakacava na noda veiyalayalati se “tudei tu” me vaka e dua na vatu? (Alama 24:19). Wilika vata na Alama 24:16–25 mo vulica na veiyalayalati cava era a cakava na tamata i Amoni kei na sala era rokova kina na nodra veiyalayalati. Sureti ira na gone me ra kauta ki vale na vatu me ivakananumi ni kena maroroi na nodra veiyalayalati.

• Wilika kei ira na gone na Alama 24:16–19, ka veivosakitaka na cava era cakava na Anitai-Nifai-Liai me ivakaraitaki vua na Kalou ni ra sa veivutuni. Na cava era veiyalayalatitaka me kakua ni caka? Vakamacalataka ni veiyalayalati eda cakava e sa “dua na ivakadinadina kivua na Kalou” ni da sa via muria na ivunau ni Kalou (tikina e 18). Na veiyalayalati cava soti era sa cakava na gone?

• Sureti ira na gone me ra droinitaka na iyaloyalo ni nodra iyaragi na Anitai-Nifai-Liai. Qai sureti ira mera vola, ena daku ni iyaragi, e dua na ka era nanuma mera na veisautaka me rawa ni ra muri Jisu Karisito vakataucoko sara. Me ra qai vakalecava ni ra sa buluta na nodra iyaragi ka cakava e dua na ituvatuva mera cakacakataka na ka era sa vola.

Alama 24:7–10; 26:23–34; 27:27–30

Baleta ni sa dauloloma na Tamada Vakalomalagi, sa rawa meda veivutuni ka veisau.

Era sa vulica wale tikoga oqo na gone baleti Alama, Amoni kei ira na Anitai-Nifai-Liai. O na vakayagataka vakacava na veitukutuku oqo mo vakaraitaka ni sa yalololoma na Tamada Vakalomalagi kivei ira sa veivutuni vakaidina?

iTaviqaravi e Rawa ni Caka

• Vola ena vava ni volavola ni Bera kei ni Oti. Kerea e vica na gone me wilika na veitikina oqo me ra kila se a vakacava tu o ira na Leimanaiti ni bera ni vakavulici ira o Amoni kei ira na tacina: Alama 17:14–15; 26:23–24. Kerei ira na vo ni gone me ra wilika na veitikina oqo me ra kila na sala era a veisau kina na Leimanaiti: Alama 26:31–34; 27:27–30. Sureti ira na gone mera vola ena ruku ni ulutaga na veika era raica. Qai sureti ira mera dikeva, ena Alama 24:7–10, na sala era a mai veisau kina vakataucoko na Leimanaiti oqo. Wasea na nomu ivakadinadina me baleta na kaukauwa ni Kalou me vosoti keda ka vukei keda meda veivutuni ka veisau.

• Sureti ira na gone mera wilika vata na Alama 26: 21–22, ena qarai ni veivakalougatataki e basika vei ira ka veivutuni. Sureti ira na gone me ra vakamacalataka eso na veivakalougatataki oqo ena nodra vosa.

Alama 26; 29

Sa kauta mai vei au na kosipeli na reki, kau sa rawa ni wasea na reki oqo vei ira na tani.

E sa sinai tu na veiwase oqo ena ivakaraitaki ni reki e basika mai na bulataki kei na wasei ni kosipeli. E rawa vakacava ni o vakayagataka na Alama 26 kei na 29 mo vakauqeti ira kina na gone mera qara na reki oqo?

iTaviqaravi e Rawa ni Caka

• Vukei ira na gone ni raica na vosa “reki” kei na “rekitaki” ena Alama 26 kei na 29. Wilika vata eso na tikina era sa raica, ka veivosakitaka na veika era vakavulica na veitikina oqo me baleta na reki. Na cava a vakavu reki vei Amoni kei Alama? Wasea e dua na ka a sotavi o a vakila kina na reki mai na bulataki se wasei ni kosipeli, se sureti ira na gone me ra wasea na veika era dui sotakaya.

• Sureta e rua na gone me rau veiraici ka raica o cei e rawa ni cakava na kena isa me matadredredre vakailiu. Na cava na sala eso eda rawa ni vakatetea kina na reki vei ira na tani? E vakatetea vakacava na reki na wasei ni kosipeli? Vukei ira na gone ni vakasamataka na sala eso era rawa ni wasea kina na reki ni kosipeli ki na nodra itokani kei na matavuvale.

Vakauqeta na Vuli e Vale

Sureti ira na gone me ra maroroya na nodra yalayala me vakataki ira na Anitai-Nifai-Liai.

Vakatorocaketaki Noda Veivakavulici

Vulica e dua na ivolanikalou. Digitaka e dua na malanivosa ni ivolanikalou se tikina lekaleka o nanuma ena rawa ni vukei ira na gone ena nomu kalasi, ka vukei ira mera cavuqaqataka. E rawa talega ni veivuke na iyaloyalo kei na imoimoi ni liga eso.