“29 ni June–5 ni Julai. Alama 23–29: Era ‘Sega ni Qai Lutu Laivi,’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)
“29 ni June–5 ni Julai. Alama 23-29,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
Anitai-Nifai-Liai Buluta na Nodra iYaragi ni Valu, o Jody Livingston
29 ni June–5 ni Julai
Alama 23–29
Era “Sega ni Qai Lutu Laivi”
Ni ko vulica na Alama 23–29, na itukutuku cava o kunea ena vukumu kei na nomu matavuvale? Na cava e rawa ni o vulica ena nomu kalasi ena Lotu?
Vola na Veika o Uqeti Kina
O dau vakasamataka beka ena so na gauna se rawa ni veisau dina na tamata? E rairai o dau leqataka beka se rawa ni o ulabaleta na digidigi cala o sa cakava se na itovo ca o sa vakaitovotaki iko kina, se so tale beka na lomaleqa vata oqori baleti ira o dau lomana. Ke sa vakakina, ena vukei iko na kedra italanoa na Anitai-Nifai-Liai. O ira oqo era kedra meca bubuluitaki na Nifaiti. Ni ratou nanuma o Amoni kei iratou na tacina me ratou vunautaka vei ira na kosipeli, era a “dredrevaki iratou ena dredre ni veivakalialiai” o ira na Nifaiti. E iwali vinaka cake me ra vakamatei na Leimanaiti mai na nodra saumakitaki mai. (Raica na Alama 26:23–25.)
Ia era a veiau na Leimanaiti—mai na nona kaukauwa ni veisaumakitaki na Turaga. Ena dua na gauna era a kilai kina me “mata tamata kila, yalokaukauwa ka itovo vakarerevaki” (Alama 17:14), era sa yaco me “kilai tani ena nodra yalodina vua na Kalou” (Alama 27: 27). Na ka dina, era sa “sega ni lutu tani tale” (Alama 23:6).
E rairai tu beka nomu itovonibula lasu mo biuta tani se na “iyaragi ni vakaduiduile” mo vakadavora (Alama 23:7). Se o gadreva ga mo gugumatua cake ena nomu ivakadinadina ka vakalailai sobu nomu rawa ni lutu tani. Se cava ga na veisau o gadreva, Alama 23–29 e rawa ni o nuitaka kina, ni ena kaukauwa ni isoro nei Jisu Karisito, ena rawa kina na veisau.
Vakasama eso ni Vuli iVolanikalou Yadua
Ni ra ciqoma na kosipeli na luve ni Kalou, ena tarava mai na veivakalougatataki cecere.
Ena nona vakarota na nodra tui na Leimanaiti me “kakua na vakalatilati ki na vunautaki ni vosa ni Kalou” mai vei ira na nona tamata (raica na Alama 23:1–5), sa dolava kina na katuba ni veivakalougatataki cecere vei ira. Ni o wilika na Alama 23–29, vakaraica na veivakalougatataki oqo. Mo vakadeitaka vakacava ni “sega na vakalatilati” ki na vosa ni Kalou ena nomu bula se na nomu matavuvale?
Noqu saumaki mai vei Jisu Karisito kei na Nona kosipeli sa veisautaka na noqu bula.
E vaka ena kena irairai ni ra na sega ni rawa ni saumaki mai o ira na Leimanaiti era a sikovi mai vei Amoni kei iratou na wekana—era a tao tu ena nodra ivakarau na nodra qase kei na nodra caka cala o ira. Ia e vuqa vei ira era a ciqoma na kosipeli i Jisu Karisito ka vakayacora na veisau bibi sara ena nodra bula. Me ivakatakilakila ni ra sa saumaki, era a vakatokai ira o ira na Leimanaiti oqo me ra Anitai-Nifai-Liai. (Na ibalebale ni “Anitai” eke e sega ni tautauvata kei na “anitai (meca)” ena “meca i Karisito.”)
Ni vakasamataki tiko na nodra saumaki mai na Leimanaiti e rawa ni uqeti iko mo vakasamataka vakatitobu na nomu saumaki “vua na Turaga” (Alama 23:6). E dua na sala me vulici kina na iwase eso oqo me ra raica na sala e veisautaka kina na nodra bula na nodra veisau na Anitai-Nifai-Liai. Na veitikina e tarava e rawa ni o tekivu kina.
Ni o vakasamataka vakatitobu na nodra veisau na Anitai-Nifai-Liai, vakasamataka na kena sa veisautaki iko tiko na nomu saumaki vua na Karisito. Na cava beka o nanuma ni se vo tiko mo veisautaka me rawa ni levu cake kina na kaukauwa ni kosipeli ki na nomu bula?
Sa dau loloma na Kalou.
E rawa ni duidui vakalailai na ivalavala ca me ra ulabaleta o Amoni kei ira na Anitai Nifai Liai mai na veika kecega ena nomu bula, eda sa vakararavi kecega ki na loloma veivueti ni Kalou. Na cava o raica ena Alama 24:7–19 kei na 26:17–22 ka na vukea mo kila Nona loloma veivueti? Ni o wilika tiko, o na nanuma beka na veika oqo: na sala eso o sureti kina mo veivutuni, na veika o kila me baleta na veivutuni, nomu sa tovolea mo levea na ivalavala ca tale, kei na veivakalougatataki sa yaco mai vei iko ena nomu veivutuni. Ni ko wilika na veitikina oqo ena ivakarau oqo, na cava o vulica me baleta na loloma veivueti ni Kalou ena nomu bula?
Ena kauta mai na reki na qarava na Turaga.
E dina ni duidui na veika erau a sotava, ia e tautauvata na veika erau a tukuna o Amoni kei Alama ni rau a sotava ena nodrau veiqaravi ni kaulotu. Vakasamataka mo wilika na Alama 26 kei na 29 ka veidutaitaka. Na cava o raica e tautauvata? Na vosa kei na malanivosa cava soti e tokaruataki? Na cava o rawa ni vulica mai vei Amoni kei Alama me baleta na sala me kunei kina na reki dina e dina ni tu na bolebole? (Mo raicalesu na bolebole e a sotava o Alama, raica na ulutaga ni wase ni Alama 5–16. Me ra railesuva na nodrau bolebole o Amoni kei ira na wekana, raica na ulutaga ni wase ni Alama 17–28.)
Na cava na ivau sila kei na lololo?
Ena gauna ni tatamusuki, era dau vesuvesu vata na sila ka vakatokai na ivau sila ka biu ki na veivale, ka dau vakatokai na lololo. A wasea o Elder David A. Bednar e dua na ivakavakadewa ni ivakatakarakara ena Alama 26:5: “Na ivau sila ena vakasama oqo e matataki ira na lewenilotu papitaiso vou. Na lololo sai koya na valetabu” (“Taura ena Doka e Dua na Yaca kei na iTutu,” Ensign se Liaona, me 2009, 97). Vakasamataka na cava e vakavulica vei iko na ivakatautauvata ena Alama 26:5–7 vakavulica vei iko na bibi ni veiyalayalati ni valetabu.
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Alama 24:6–19
Na cava era buluta kina “vakatitobu e lomaniqele” na Anitai-Nifai-Liai na nodra iyaragi? (Alama 24:16). Era na taleitaka beka na lewe ni matavuvale me ra vola ena veitiki ni pepa na veika era na vinakata me ra ulableta se biuta laivi. Rawa ni ra qai kelia e dua na qara ka buluta na tiki ni pepa.
Alama 24:7–12
Na vulici ni veitikina oqo ena rawa ni vukea nomu matavuvale me ra kila vakavinaka na totoka ni isolisoli ni veivutuni. Na cava era cakava na Anitai-Nifai-Liai me ra veivutunitaka na nodra ivalavala ca? A vukei ira vakacava na Turaga me ra veivutuni? Na cava eda rawa ni vulica mai na ivakaraitaki oqo?
Alama 24:20–27
Na cava eda sa raica ka vakadinadinataka na dina ni itukutuku nei Momani:“Eda sa raica eke, ni sa vuqa sara na sala sa vakarautaka na Turaga me ra vakabulai kina na nona tamata”? (Alama 24:27).
Alama 26:2
Ena sauma vakacava na taro nei Amoni ena Alama 26: 2na nomu matavuvale? E rawa beka ni o vola na nodra isaunitaro ena dua na tiki ni pepa levu ka vakaliliga ena dua na vanua me rawa ni ra raica kece kina. Vakayaloqaqataki ira na lewe ni matavuvale me ra vakuria ni ra nanuma rawa eso tale na veivakalougatataki “sa solia vei keda” na Kalou.
Alama 29:9
Erau a iyaya ni cakacaka vakacava ena liga ni Kalou o Amoni kei Alama? Vakasamataka mo raica eso na iyaya ni cakacaka se iyaya lalai tale eso ena nomudou vale ka veivosakitaka na veivuke era dau solia ki na nomudou matavuvale. E vukea vakacava oqo noda kila na sala me da “iyaya ni cakacaka kina e ligana na Kalou”?
Baleta eso tale na vakasama ni nodra vakavulici na gone, raica na ituvatuva ena macawna oqo ena Lako Mai, Mo Muri Au—Baleti Ira na Lalai.
Vakatorocaketaki Noda Veivakavulici
Vakayagataka na iwalewale duidui eso. Ni o vakaduiduitaka na iwalewale ni vuli ivolanikalou vakamatavuvale ena rawa ni ra taleitaka tiko ga kina na lewe ni matavuvale ka vakaitavi tiko. Me kena ivakaraitaki, ni wilika oti e dua na tikina e dua na lewe ni matavuvale. e rawa me kerei ira tale eso na lewe ni matavuvale mera tukuna ena nodra vosa na ka e se qai wilika oti.
iYaloyalo ni nodra buluta nodra iyaragi na Anitai-Nifai-Liai mai vei Dan Burr