All Things Denote There Is a God (Alma and Korihor), mai vei Walter Rane

6–12 ni Julai

Alama 30–31

“Na Savasava ni Vosa ni Kalou”

E vakadinadinataka o Alama na “mana” ni vosa ni Kalou (Alama 31:5). Ni ko wilika na Alama 30–31, vola na veika e uqeti kina na lomamu ni o vakila na mana ni vosa ni Kalou vei iko.

Vola na Veika o Uqeti Kina

Na itukutuku e tiko ena Alama 30–31 e vakaraitaka vakamatata na mana ni vosa — ena ca kei na vinaka. Na “veicavilaki” kei na “vosa viavialevu” ni dua na ivakavuvuli na yacana o Korio e voleka me vakavuna na “nodra rusa e vuqa na yago kei na yalo” (Alama 30:31, 47). Sa vakakina, na nona ivakavuvuli e dua na ise mai vei ira na Nifai ka yacana ko Soramu a vakavuna na “levu ni nodra cala” ka ra “vakatanitaka vakavuqa na sala ni Turaga” e levu na tamata (Alama 31:9, 11).

Me kena veibasai, ni ko Alama sa vakabauta tudei ni vosa ni Kalou e “kaukauwa sara na vosa ni Kalou ki na nodra vakanananu na tamata ka mucu na iselewau, se dua tale na ka” (Alama 31:5)—oka kina na vosa nei Korio kei Soramu. Na vosa nei Alama e vakamacalataka na dina tawamudu ka vakayagataka na kaukauwa mai lomalagi me vagalui Korio (raica Alama 30:39–50), ka sureta na veivakalougatataki mai lomalagi vei ira era lakovata kei koya me kauti ira lesu mai na Soramaiti ki na dina (raica Alama 31: 31–38). Oqo na ivakaraitaki yaga vakalevu vei ira na tisaipeli i Karisito nikua, ni sa “levu na vosa viavialevu” ka “levu na caka cala” ena nodra vakasama na tamata (Alama 30:31; 31:9). Ia eda rawa ni kunea na dina ena noda vakabauta, me vakataki Alama, “na savasava ni vosa ni Kalou” (Alama 31:5).

Vakasama eso ni Vuli iVolanikalou Yadua

Alama 30:6, 12.

Na cava na meca i Karisito?

E vakatokai ena Alama 30:6, o Korio na “Meca i Karisito.” Na meca i Karisito “e dua e dau matavulotaki Karisito ia na ka dina ni saqati Karisito (1 Joni 2:18–22; 4:3–6; 2 Joni 1:7). Ena vakasama rabailevu e dua na tamata se dua na ka e lasutaki me kosipeli dina se ituvatuva ni veivakabulai ka vakaduri e matanalevu se cakavuni me saqati Karisito” (Bible Dictionary, “Antichrist”).

Na veika cava soti e “lasutaki tu [me] kosipeli dina” o raica ena vuravura nikua? Me kena ivakaraitaki, o Sisita Julie B. Beck, na Peresitedi Raraba e liu ni iSoqosoqo ni Veivukei, e vakavuvulitaka, “Na ivunau se ivakavuvuli cava ga eda rogoca mai vuravura ka veimecaki kei na matavuvale sa veimecaki talega kei Karisito” (“Teaching the Doctrine of the Family,” Ensign, Maji 2011, 15).

Korihor Confronts Alma, mai vei Robert T. Barrett

Alama 30:6–60

Na iVola i Momani ena rawa ni vukei au meu vorata nodra veivakayarayarataki o ira era tovolea me ra veretaki au.

Ni o wilika na Alama 30: 6–31, ena rogo matalia beka na ivakavuvuli nei Korio. Oqori e baleta, me vaka e vakavulica o Peresitedi Ezra Taft Benson, e vakatakila ka na vaqaqacotaki keda na iVola i Momani mai na “na inaki ca, iwalewale, kei na ivakavuvuli ni tevoro ena noda gauna oqo. Na mataqali vukitani e tiko ena iVola i Momani sa tautauvata ki na kena e yacovi keda tiko nikua. Ena nona kilaka tawayalani taumada na Kalou, e cakava na iVola i Momani me rawa ni da raica kina na cala ka kila na ivakarau me da valuta kina na vakasama lasu vakavuli, politiki, vakalotu, kei na ivolatabu ni noda gauna.”(Nodra iVakavuvuli na Peresitedi ni Lotu: Ezra Taft Benson, [2014], 132).

Vakasamataka mo ni vakarautaka e dua na lisi ni ivakavuvuli lasu nei Korio ena Alama 30: 6–31. Na cava so na ka ena yaco ni vakabauti na ivakavuvuli eso oqo? Me vakaoqo, na cava na vua ni kena vakabauti “ni sa mate ga e dua na tamata sa yaco sara ga e kea”? (Alama 30:18). Na ivunau lasu cava beka e vakavulica o Korio e tautauvata kei na ivunau lasu o sa raica e vuravura nikua?

Nomu wilika na nodrau veivosaki o Korio kei Alama ena rawa ni vukea nomu vakarautaki iko ni ra tovolea eso me ra veretaki iko. E rawa ni veivuke me vulici na Alama 30:29–60 me kilai na sala a veretaki kina o Korio (raica vakabibi na tikina e 52–53). Na cava o rawa ni vulica mai na nona sauma o Alama na ivakavuvuli nei Korio? (raica Alama 30:31–35).

Alama 31

E tu ena vosa ni Kalou na kaukauwa me tuberi ira na tamata ki na buladodonu.

Na leqa ni nodra tawase na Soramaiti mai vei ira na Nifai ena kena irairai beka vei ira eso ni gadrevi e dua na kena iwali vakapolitiki se vakaivalu (raica Alama 31: 1–4). Ia ko Alama sa vulica me dau vakabauta na “savasava ni vosa ni Kalou” (Alama 31: 5). Na cava o sa vulica mai na Alama 31: 5 me baleta na kaukauwa ni vosa ni Kalou? O sa raica beka vakacava na nodra “tuberi na tamata me ra caka dodonu” mai na vosa ni Kalou? (Alama 31:5). Vakasamataka na ivakarau e rawa ni o “tovolea” (mo vakayagataka se vakatovolea) kina na vosa ni Kalou mo vukea e dua o dau lomana.

Mo kila vakavinaka cake na iwalewale ni nona vueti ira tale eso o Alama, e rawa mo veidutaitaka na nona ivakarau ni bula, nanuma, kei na cakacaka vata kei ira na Soramaiti, me vaka e vakamacalataki ena Alama 31. E dua na ituvatuva me vakaoqo ena rawa ni veivuke. Na cava na duidui o raica? Na cava o nanuma e rawa mo vakataki Alama vakalevu cake kina?

Soromaiti	Alama
Soromaiti Vakabauta ni o ira ena taudaku ni nodra isoqosoqo era na vakarusai ki eli (Alama 31:17).	Alama Vakabauta ni o ira na Soramaiti era nona “wekana” ka ra sa “ka talei” (Alama 31:35).
Soromaiti Vagolea na yalodra ena iyau (Alama 31:24, 28).	Alama Gadreva me kauta mai na yalo vei Jisu Karisito (Alama 31:34).
Soromaiti	Alama

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Alama 30:44

Vakasamataka me wili ka veivosakitaki vata na Alama 30: 44 ni ko ni taubale e tautuba se sarava na iyaloyalo ni nona ibulibuli na Kalou. E rawa ni ra wasea na lewe ni matavuvale na veika era raica ka vakadinadinataka na Kalou. E vukei keda vakacava na veika oqo—se so tale na veika eda sa sotava oti—me da kila ni tiko dina na Kalou?

Alama 30:56–60

Na cava eda sa vulica mai na Alama 30:56–60 baleta nona ivakarau na tevoro vei ira era muri koya? Na cava e rawa ni da cakava me da taqomaka kina na noda vuvale mai na nona veivakayarayarataki?

Alama 31:20–38

Ni oti na wiliki ni Alama 31:20–38 kei na nomu matavuvale, e rawa mo ni veivosakitaka na taro eso oqo: E duatani vakacava na masu nei Alama mai na nodra masu na Soramaiti? Me da vakatotomuria beka vakacava ena noda masu yadua kei na masu vakamatavuvale na ivakaraitaki nei Alama?

O ira na gone sobu e rawa ni ra biuta e dua na vatu ena ruku ni nodra ilokoloko me dau vakananuma tiko vei ira na masu e veimataka kei na bogi. Era na rekitaka tale beka ga me ukuukutaki nodra vatu.

Alama 31:23.

Na cava eda sa cakava tiko ena veisiga yadua ena noda vuvale me da vuli ka veivosakitaka na Kalou?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au— Baleta na Lalai.

Vakavinakataki ni Vuli Yadudua

Vakarautaka na vanua e vakavolivoliti iko. “Na veika e tiko wavoliti keda ena rawa ni vakaimawe vakalevu ena noda rawata me da vulica ka vakila na dina” (Veivakavulici ena iVakarau ni Vakabula, 15). Saga mo vaqara e dua na vanua o na rawa ni vakila kina na veivakauqeti ni Yalo Tabu ni o vulica na ivolanikalou. Na sereivakatagi kei na iyaloyalo e rawa ni sureta na Yalo.

The Rameumptom, mai vei Del Parson