Na Veika Kece sa Vakaraitaka ni Dua na Kalou (Alama kei Korio), mai vei Walter Rane

6–12 ni Jiulai

Alama 30–31

“Na Vakasakiti ni Vosa ni Kalou”

Vulica na Alama 30–31 qai vakasamataki tu na gone o vakavulica. Ni ko tugana na nodra kaukauwa kei na gagadre, ena vukei iko na Yalo Tabu ni kila na sala me ra vakavulici kina.

Vola na Veika o Uqeti Kina

Sureta na Veiwasei

Sureti ira na gone me ra wasea na isau ni taro ki na veitaro oqo: Na gauna cava me da masu kina? Na cava eda kaya ni da masu? E dua e rawa ni wasea na ivakarau ni nodra dau masu na Soramaiti se ivakarau ni masu i Alama?

Vakavulica na iVunau: Gone Sobu

Alama 30:44

Sa vakadinadinataka na Kalou na veika kece.

A dusia na veika mai lomalagi kei vuravura o Alama me vakadinadinataka ni bula tiko na Kalou ka sa liutaka na vuravura taucoko. Na cava soti o rawa ni vukei ira na gone ni raica wavoliti ira e vakadinadinataka na Kalou?

iTaviqaravi e Rawa ni Caka

• Wilika vei ira na gone na Alama 30:44, ka kerei ira me ra rogoca na veika e kaya o Alama ena vukei keda ni kila ni sa ka dina na Kalou. Vakaraitaka na iyaloyalo eso ni veika oqo, ka kerei ira na gone me ra dusia na iyaloyalo ni o wiliki ira ena tikina. Sureti ira na gone me ra droinitaka eso na ka e vukei ira ni vakadinata na Kalou.

• Kevaka e rawa, wavoki e tautuba kei ira na gone se kerei ira mera duri tu ena dua na katuba leka ni o wilika na Alama 30:44. Kerei ira mera dusia na ka eso era raica e vukei ira ni kila ni sa ka dina na Kalou. Sa rawa ni veivuke talega na tabana ni itaviqaravi ena macawa oqo.

• Kerei ira na gone me ra dabe wavoki ka lagata vata e dua na sere ni veibuli ni Kalou, vaka na “My Heavenly Father Loves Me” (Children’s Songbook, 228–29). Ni ra lagasere tu na gone, sureti ira me ra solia wavoki e dua na iyaya me vaka na polo. Ni cegu na ivakatagi, kerea na gone e taura tu na iyaya me wasea e dua na ka a bulia na Tamada Vakalomalagi e sa vakavinavinakataka o koya.

Alama 31:5.

Sa kaukauwa sara na vosa ni Kalou.

Ni ra vakasamataka na gone na kaukauwa, era na rairai nanumi ira na tamata qaqa, ranadi, se tui eso. Sa rawa ni o vukei ira mera kila vakamatata ni sa kaukauwa sara na vosa ni Kalou mai na “veika kecega” (Alama 31:5).

iTaviqaravi e Rawa ni Caka

• Droinitaka na iseleiwau ena papa ni volavola. Wilika vei ira na gone na Alama 31:5 , ka sureti ira me ra rogoca na ka e tukuna o Alama ni sa kaukauwa cake mai na iseleiwau. Wasea na ka o sotava ena gauna a vakayarayarataki iko kina vakaukauwa na vosa ni Kalou.

• Lagata vata e dua na sere me baleta na ivolanikalou, vaka na “Scripture Power” (music.ChurchofJesusChrist.org), ka kerei ira na gone me ra rogoca na sala e vukei keda kina na ivolanikalou. Tokaruataka vakavica na malanivosa “Na vosa ni Kalou e sa kaukauwa cake mai …”, ka kerei ira na gone mera vukei iko ni vakacavara na qaqana.

Alama 31:8–35

Sa rogoca na noqu masu na Tamada Vakalomalagi.

A yalorarawa o Alama ni raica na ivakarau ni nodra masu na Soramaiti (raica na Alama 31:24)—era sa sega ni vakabauti Jisu Karisito ka ra dau kaya na masu vataga ena vanua era rawa ni raici ira kina na tamata kecega (Alama 31:13–14). Ia sa masu o Alama ena yalomalumalumu ka vakaraitaka ni vakabauti Karisito.

iTaviqaravi e Rawa ni Caka

• Vakamacalataka vakalekaleka vei ira na gone na italanoa i Alama kei ira na Soramaiti ni vakayagataki na veitikina mai na Alama 31:8–35. E rawa talega ni o vakayagataka na “Wase 28: Ira na Soramaiti kei na Rameumitomi” (iTalanoa ni iVola i Momani, 78–80, se na kena vidio ena ChurchofJesusChrist.org). Dusia na duidui eso ena nodra masu na Soramaiti, kei na masu i Alama. Sureti ira na gone mera raitayaloyalotaka ni ra sotava e dua na gone ni Soramaiti. Na cava era na kaya me vakavulici koya ena ivakarau ni masu?

• Vukei ira na gone mera vakatakila na veika era kaya na Soramaiti ena nodra masu (raica na Alama 31:15–18) ni ra vukei iko ni tara e dua na vale Rameumitomi cere ena buloko se vatu. Vakamacalataka ni oqo e sega ni ivalavala ni noda masu. Tarogi ira na gone ena ivalavala ni noda masu, ka mera qai vagalalataka e dua na buloko se vatu ena veika yadua era tukuna.

Vakavulica na iVunau: Gone Qase Cake

Alama 30

Sa vakaroti au na iVola i Momani mai na ivakavuvuli lasu.

Sa vakamacalataki na ivakavuvuli lasu i Korio ena iVola i Momani me vukei keda ni vakila ka vakatikitikitaka na ivakavuvuli vataga ena noda gauna.

iTaviqaravi e Rawa ni Caka

• Vakaraitaka eso na iyaya (vaka na ilavo se kakana) kei na iyaya ni vakatatalo vakatautauvata ni veika oqo. Koya evei era na rairai vinakata na gone? Vukei ira na gone ni vaqara na Alama 30:12–18 ena lasu se ivakavuvuli lasu a vakatavulica o Korio me baleta na Kalou.

• Vukei ira na gone ni vakatakila na lasu eso a vakatavulica o Korio ka volai ira ena veitiki ni pepa me biu ena vava ni volavola (raica na Alama 30:12–18, 24). Kerei ira na gone mera vaqara na Alama 30:32–35, ena raici ni sala eso a sauma kina o Alama na itukutuku lasu i Korio. Tarogi ira na gone ena iwalewale era rawa ni kila kina ni sa dina na veika e vakavulica o Alama.

  

  Torovi Alama o Korio, mai vei Robert T. Barrett

Alama 31:5.

Sa kaukauwa sara na vosa ni Kalou mai na veika kecega.

Na gauna cava o a vakila kina na kaukauwa ni vosa ni Kalou? Navuca na sala e rawa ni vakauqeti ira kina na gone o vakavulica na veika o donuya.

iTaviqaravi e Rawa ni Caka

• Sureti ira na gone me ra vakasamataka e dua na ka se dua na tamata kaukauwa, se vakaraitaka na iyaloyalo ni vica na ka kaukauwa. Na cava e vakavuna me kaukauwa na veika oqo? Wilika vata na Alama 31:5 ka tarogi ira na gone na cava era nanuma ni ibalebale ni tikina oqo. E sa kaukauwa cake vakacava na vosa ni Kalou mai na iseleiwau? Na kaukauwa cava e tiko kina me kitaka?

• Veitaratara rawa kei na vica na gone, ka kerei ira mera vakasamataka e dua na ka era sotava me ra wasea ki na kalasi ni a vukei ira na ivolanikalou se vosa ni dua na iliuliu ni Lotu mera caka vinaka. Cava na vuna na vosa ni Kalou e vakavuna nodra vinakata mera caka vinaka?

• Lagata vata kei ira na gone e dua na sere baleta na vosa ni Kalou, vaka na “Search, Ponder, and Pray” se “Follow the Prophet” (Children’s Songbook, 109, 110–11). Era rawa talega ni lagata na “Scripture Power” (music.ChurchofJesusChrist.org).

Alama 31:8–35

Au rawa ni yalomalua.

Ena cala taucoko era a vakayacora na Soramaiti, sai koya na qaciqacia e a vakavuna me rarawa sara kina o Alama. Oqo sa rawa ni dua na madigi mo vakavulici ira kina na gone ena bibi ni yalomalumalumu.

iTaviqaravi e Rawa ni Caka

• Vukei ira na gone ni kila vakamatata na duidui ni qaciqacia kei na yalomalumalumu (raica na “Qaciqacia” kei na “Yalomalua, Yalomalumalumu” ena iDusidusi ki na iVolanikalou). Kerei ira na gone me ra veivukevuke ena wiliki ni Alama 31:24–28. Se wilika vata na “Wase 28: O ira na Soramaiti kei na Rameumitomi” (iTalanoa ni iVola i Momani, 78–90). Ni ra wiliwili tu, kerei ira me ra siqema na ivakarau ni nodra vakaraitaka na Soramaiti ni ra sa yalodokadoka. A vakaraitaka vakacava o Alama ni sa yalomalua? (Raica na Alama 31:30–33).

• Vidai ira na gone vakaiwasewase, ka kerea na wase yadua me navuca e dua na isau ni taro ki na veitaro vakaoqo: Na cava era guta kina na lomadra na Soramaiti? (raica na Alama 31:24, 28) Na cava eso na ka vakavuravura era vagolea kina na lomadra na tamata nikua? Cava na vuna e rairai nanuma kina na tamata ni ra sa vinaka cake vei ira na tani? Ni sa wasea na wase yadua na isau ni taro, mera qai droinitaka ena vava ni volavola na tiki ni dua na vale Rameumitomi cere. Qai kerei ira me ra bokoca na veitiki ni vale cere ena veigauna era vakasamataka e dua na sala era rawa ni vakakaraitaka kina na yalomalumalumu.

Vakauqeta na Vuli e Vale

Sureti ira na gone ni vakavulica nodra matavuvale ena ka era sa vulica me baleta na kaukauwa ni vosa ni Kalou edaidai.

Vakatorocaketaki Noda Veivakavulici

Vukei ira na gone me vuli mai na ivolanikalou. Era na rairai sega ni wiliwili rawa na gone sobu, ia o se rawa tikoga ni vakaitavitaki ira ena vulici ni ivolanikalou. Me ivakaraitaki, rawa ni o wilika e dua na yatuvosa ka sureti ira me ra tucake se laveta na ligadra ni ra rogoca e dua na vosa se malanivosa vakatabakidua. Qai vukei ira ni kila vakamatata na vosa se malanivosa. (Raica na Veivakavulici ena iVakarau ni iVakabula, 20–21.)