Droini mai vei Joshua Dennis

20–26 ni Julai

Alama 36–38

“Rai Yani Vua na Kalou mo Bula Kina”

“Ena nomu marautaka tiko na kila ka vakosipeli, ko na via vakayacora na ka ko sa vulica” (Vunautaka na Noqu Kosipeli [2004], 19). Vola na nomu nanuma kei na vakasama me baleta na ivakarau mo vakayagataka kina na dina ni o vulica tiko.

Vola na Veika o Uqeti Kina

Ni sa raica ko Alama na caka ca vakavolivoliti koya, a sa vakila na “bikai,” “rarawa levu,” kei na “yaluma” (Alama 8:14). “Na caka ca ena kedra maliwa na tamata oqo,” e kaya o koya vei ira na Soramaiti, e “vakamosia na yaloqu” (Alama 31:30). A vakila e dua na ka vata oqo ni sa lesu mai na kaulotu vei ira na Soramaiti—sa raica rawa kina ni “sa tekivu me kaukauwa mai na yalodra na tamata, ka sa tekivu me ra cudruvaka ni sa tukuni vakadodonu vei ira na vosa”, ka vakavuna me “rarawa vakalevu sara” kina na lomana (Alama 35:15). Na cava a cakava o Alama me baleta na veika a raica ka vakila? E sega ni dau yaco me yalolailai se dau vakadonui koya me baleta na ituvaki ni vuravura. Ia, “sa vakarota me ra vakasoqoni vata mai na luvena tagane” ka vakavulica vei ira na “ka sa dodonu” (Alama 35: 16). A vakavulica vei ira ni “sa sega ni rawa me dua tale na sala me rawa kina na veivakabulai, ena vukui Karisito duadua ga. … Raica, sai koya na vosa ni dina kei na yalododonu” (Alama 38:9).

Vakasama eso ni Vuli iVolanikalou ni Tamata Yadua

Alama 36

Au rawa ni sucu va-Kalou me vaka au sa yalomalumalumu ka veivutuni.

E vica wale na sotava na veika cecere me vaka na saumaki nei Alama. Ia era tu na ivakavuvuli ena veika a sotava ni sa rawa kece meda vulica ka bulataka tiko, baleta ni tamata kece me ra “sucu vou vua na Kalou” (Alama 36: 23). Ni o wilika na Alama 36, vakaraica na ivakavuvuli e rawa ni o vakayagataka. Me kena ivakaraitaki, na cava na nona nanuma e dua ka sa sucu vou vua na Kalou me baleta na ivalavala ca? me baleti Jisu Karisito? Sa rawa talega mo raica kina na veisau o namaka mo raica mai na nodra vakabauta kei na ivalavala e dua na tamata sa sucu vou vua na Kalou.

Raica talega na Mosaia 5:7; 27: 25 – 26; Alama 5:14; 22:15; Ilamani 3:35; “Saumaki Mai,” Gospel Topics, topics.ChurchofJesusChrist.org.

Alama 36

Sa mai sorovaka o Jisu Karisito na ivalavala ca kei vuravura.

O na raica beka eso na tokaruataki ni itukutuku nei Alama me baleta na nona saumaki mai ena iwase oqo. Oya baleta ni ko Alama 36 sai koya e dua na ivakaraitaki cecere ni dua na serekali vaka-Iperiu e vakatokai na chiasmus, o ya era tuvai na vosa se na vakasama ena dua na ivakarau, me kauti keda ki na dua na vakasama bibi, ka tokaruataki ena kena wiliki vakasukasuka mai. Ena Alama 36, na vakasama ena tikina 3 e tokaruataki tiko ena tikina 27, na vakasama ena tikina 5 e tokaruataki tiko ena tikina 26, kei na na vuqa tale. Na iusutu ni vakasama sai koya na ka bibi duadua ni itukutuku ena chiasmus. Raica kevaka sa rawa mo raica na iusutu ni vakasama ena tikina 17–18. Raica na sala ni kena rawati me “tauri na vakasama oqo” ni a tara na yaloi Alama ka veisautaka na nona bula. E sa vakayaco-ka vakacava vei iko na dina oqo? Na vakasama cava tale eso o sa raica e tokaruataki tiko ena itukutuku oqo?

E vakauqeti iko vakacava na itukutuku oqo ni veivutuni kei na veivosoti mo muria kina na ivakaraitaki nei Alama ka gole vua na iVakabula?

Me baleta na ikuri ni ivakamacala me baleta na chiasmus, raica Na ivola ni Mormon Student Manual (iVolavakarau ni iVakarau ni Vuli ni Lotu [2009], 232–33).

Alama 37

Era sa maroroi na ivolanikalou “me baleta na inaki vuku.”

O sa bau vakasamataka tiko ni sa dua na cakamana ka veivakalougatataki cecere me tiko kei keda na ivolanikalou nikua? Na Kalou sa “lesi [keda] [meda] maroroya vinaka na veika oqo, ni sa ka tabu” (Alama 37:14). Ni o wilika na Alama 37, raica na veivakalougatataki e yaco mai ni sa tu vei keda na ivolanikalou. O sa bau sotava na veivakalougatataki oqo? Eda na vakayagataka vakacava na ivolanikalou me vukea me “vakaraitaka [na Kalou] na nona kaukauwa vei ira na veitabatamata mai muri”? (Alama 37:18).

Ena Alama 37: 38 – 47, sa vakatauvatana kina o Alama “na vosa i Karisito” ki na Liaona. Ni ko vakasamataka vakatitobu na ivakatautauvata oqo, vakasamataka na sala eso o sa sotava oti kina na cakamana kei na kaukauwa ni ivakavuvuli i Karisito “ena veisiga yadua” (Alama 37: 40).

Raica talega na D. Todd Christofferson, “Na Veivakalougatataki ni iVolanikalou,” Ensign se Liaona, Me 2010, 32–35.

E vakavulica vei keda na ivolanikalou na sala meda muria kina na Kalou.

Alama 37:6–7

“Ena dau rawa na veika lelevu mai na veika lalai ka rawarawa.”

Ena vuqa na gauna eda nanuma ni noda leqa e sa rui ka levu qai dredre eda nanuma ni kena iwali e levu qai dredre talega. Ia sa dau yaco ena veigauna, e digitaka kina na Turaga me vakayagataka na “veika lalai ka rawarawa” (Alama 37:6) me vakayacori kina na Nona cakacaka ka vakalougatataka na nodra bula na luvena. Ni ko wilika na Alama 37:6–7, vakananuma vakatitobu ka vola na sala eso o sa raica kina na ivakavuvuli oqo sa cakacaka ena nomu bula. Na cava soti eso na ka lalai ka rawarawa sa dau vakayagataka na Turaga me vakalougatataki iko ka vakayacora rawa kina na Nona cakacaka?

Raica talega na Alama 37:41–46; Dallin H. Oaks, “Na Veika Lalai ka Rawarawa,” Ensign se Liaona, Me 2018, 89 – 92.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Alama 36:5–26

E dina ga ni sa matalia na gauna nei Alama, na nona saumaki mai e vakaraitaka e vica na ivakavuvuli e ganita taucoko me noda. Sureti ira na lewe ni matavuvale yadua me digitaka e dua na tikina mai na Alama 36: 5 – 26 e vakavulica na “sucu vou vua na Kalou.” Na cava eda sa vulica mai na veitikina oqo? De rawa mera wasea na lewe ni matavuvale na sala era sa bulataka kina na ivakavuvuli e vakamacalataka tiko o Alama.

Alama 36:18–21, 24

Eda na vakayagataka vakacava na veitikina oqo me vukea e dua me raica ni veivutuni e sa dua na ka marautaki, ka sega ni ka rerevaki? Ena rawa vakacava me uqeti keda na veivutuni meda wasea na kosipeli vei ira na tamata?

Alama 37:6–7, 38–46

Na cava soti eso na “veika lalai ka rawarawa” (Alama 37: 6) e kauta mai na veika lelevu ena noda bula? Ena sala cava sa yaco na vosa i Karisito me vaka na Liaona? E rawa vakacava meda veivukei vakai keda meda vulica vagumatua sara na ivolanikalou?

Alama 37:35

Na cava na vuna meda vuku sara ka vulica meda muria na ivakaro “ni [da sa] cauravou tiko”?

Alama 38:12

Eratou kila beka na nomu matavuvale na cava na varele ni ose? Sa rawa mo vakaraitaka vei ratou e dua na kena iyaloyalo ka veitalanoataka na kena vakayagataki me vakamanoataka na manumanu. Na cava na kenai ibalebale “mo lewa [na nomu] gagadre”? Ena vukei iko vakacava na nomu lewa vinaka na nomu gagadre ka mo na “vakasinaiti kina ena loloma”?

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Vuli ni Tamata Yadudua

Vola na Veivakauqeti Vakayalo. Ni ko vola na veivakauqeti vakayalo, o sa vakaraitaka tiko vua na Turaga ni bibi vei iko na Nona veidusimaki, ka na vakalougatataki iko ena vuqa tale na ivakatakila. Ni o vulica, vola na nomu vakanananu. (Raica na Veivakavulici ena iVakarau ni iVakabula, 12, 30.)

Basika mai na Agilosi vei Alama kei ira na Luvei Mosaia Tagane, mai vei Clark Kelley Price