“27 ni Julai–2 ni Okosita Alma 39–42: ‘Na iTuvatuva Cecere ni Marau,’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)
“27 ni Julai–2 ni Okosita Alma 39–42,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
Yalewa, Ko Sa Tagi Ena Vuku ni Cava?mai vei Mark R. Pugh
27 ni Julai–2 ni Okosita.
Alama 39–42
“Na iTuvatuva Cecere ni Marau”
Ni o vulica tiko na Alama 39–42, na Yalo Tabu e rawa ni vakaraitaka vei iko na veika e yaco tiko ena nomu bula.
Vola na Veika o Uqeti Kina
Ni cakava e dua na cala bibi e dua eda dau lomana, e rawa ni dredre me da kila na ivakarau me da sotava kina. E dua na vuna sa rui talei kina na Alama 39–42 baleta ni vakatakila na ivakarau a—sotava kina o Alama, e dua na tisaipeli i Karisito, ka tu ena dua na gauna na ivalavala ca bibi me veivutunitaka—na ituvaki vakaoya. Sa kitaka ko Korianitoni na luvei Alama na ivalavala ca ni veiyacovi, ka nuitaka o Alama, me vaka a dau vakayacora ena vuqa na gauna, na mana ni ivunau dina me vakauqeta na veivutuni (raica na Alama 4:19; 31: 5). Ena wase oqo, eda raica na yalodoudou nei Alama me vunauca na ivalavala ca kei na nona kauwaitaki Korianitoni ka lomana . Ka me kena ilutua, eda vakila na yalodei nei Alama ni “na lako vakaidina mai [na iVakabula] me bokoca na ivalavala ca ni vuravura; io sa lako mai me tukuna na itukutuku rekitaki ni veivakabulai” vei ira era veivutuni (Alama 39:15). Na nona qai lesu tale ko Korianitoni ki na cakacaka ni kaulotu (raica na Alama 49:30) ena solia vei keda na inuinui ni veivosoti kei na veivueti ni da sa “vakaleqa[i]” (Alama 42: 29) me baleta na noda ivalavala ca, se na nodra ivalavala ca o ira eda lomana.
Vakasama eso ni Vuli iVolanikalou Yadua
Na Ivalavala ca ni veidauci e sa ka vakasisila e mata ni Turaga.
Me vakadeitaka vua na luvena na bibi ni ivalavala ca ni veiyacovi, a vakavuvulitaka o Alama ni “veika oqo sa ka vakasisila ena mata ni Turaga” (Alma 39:5). Na cava e bibi kina vei iko na bula savasava? Na cava e bibi kina vua na Turaga? Na ivakamacala oqo mai vei Elder Jeffrey R. Holland ena rawa ni veivuke:
“E matata ni dua na Nona kauwai levu duadua me baleta na bula oqo na ivakarau e tadu mai kina ki vuravura e dua kei na ivakarau e biuta kina. O koya sa virikotora kina ko Koya na iyalayala kaukauwa sara ena veika oqo.
“… iKarua, na gagano vakatamata e maroroi tu me baleti rau e dua na veiwatini baleta ni oqori na ivakatakarakara cecere ni duavata e taucoko, na veivakataucokotaki kei na vakaduavatataki e vakavuna ka lewa na Kalou. A nakiti na vakamau me kena ibalebale na nodrau vakaduavatataki taucoko e dua na tagane kei na yalewa. … Oqo e dua na veivakaduavatataki ka vaqo na kena taucoko eda vakayagataka kina na vosa vauca me vakadewataka na kena yalayala tawamudu” (“Personal Purity,” Ensign, Nove. 1998, 76).
Vakasamataka na ivakasala a solia o Alama vei Korianitoni ena Alama 39:8–15. Sa vukei iko vakacava mo kila vakalevu cake na bibi ni lawa ni tiko savasava kei na sala me da ulabaleta kina na veitemaki? E vakaraitaka talega na ivakavuvuli nei Alama na nona tuvakarau na Turaga me vosoti keda ni da sa veivutuni ka sa tu vei keda kece na inuinui. Ni ko wilika na Alama 39–42 ena macawa oqo, vakaraica na ivakadinadina ni nona loloma cecere na Kalou. Sa vakalougatataki iko vakacava na loloma ni Kalou?
Raica talega na “Tiko Savasava,” Me iSakisaki ni iTabagone, 35–37.
Au na tucaketale ka tu ena mata ni Kalou meu lewai.
Ni sa raica ko Alama ni tu na lomatarotaro nei Korianitoni me baleta na Tucaketale, a vakavulici koya me baleta na ka ena yaco ni da sa mate. Na dina cava soti a vakavulica o Alama ena wase 40–41 ena vukei Korianitoni—kei na tamata kecega e ivalavala ca—me kila? E rawa ni o tauyavutaka na veika o vulica ena nomu raica na ulutaga e vosa kina o Alama (me vaka na vuravura ni yalo, na tucake tale, kei na veivakalesuimai) ka qai vola na veika e vakavulica o Alama me baleti ira yadua. Ena vukei iko vakacava na nomu nanuma tiko na dina oqo ni ko temaki se vakasaqara tiko na veivosoti?
Au rawa ni vaqara ena vakabauta na isau ni noqu taro ni kosipeli.
Ena so na gauna eda na nanuma beka ni kila na isau ni taro kece sara ni kosipeli na parofita. Ia raica ena wase 40, e vica vata nona taro o Alama e sega tu ni saumi me baleta na bula ni oti na mate. Na cava a cakava o koya me kunea na kena isau? Na cava e cakava ni sega vua na isau ni taro? Vakasamataka na sala e rawa ni vukei iko kina na ivakaraitaki nei Alama ena taro vakosipeli e tu vei iko.
Na masu sai koya e dua na sala e rawa ni da kunea kina na isau ni taro ni kosipeli.
Na Veisorovaki i Jisu Karisito e rawa kina na ituvatuva ni veivakabulai.
E vakabauta o Korianitoni ni sega ni dodonu na itotogi ni ivalavala ca (raica na Alama 42:1). Ia e vakavulica o Alama ni dua na sala meda dro bula kina mai na “itutu ni veivakararawataki” e biuti keda tu kina na ivalavala ca: na veivutuni kei na vakabauta na Veisorovaki i Jisu Karisito, sai koya na loloma kei na bula dodonu (raica na Alama42:15). Ni o wilika na Alama 42, vakaraica na ivakarau o na rawata kina na loloma cecere ena vuku ni nona Veisorovaki na iVakabula ka sega kina ni “butakoci na lewa dodonu” (tikina 25). Na dina cava soti o raica ena iwase oqo e vukei iko mo vakila Nona loloma veivueti?
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Alama 39:1–9
Ena yaga beka ki na nomu matavuvale e dua na veivosaki baleta na lawa ni tiko savasava? Ke vakakina, vakasamataka mo vakayagataka na ivurevure eso oqo me vaka na gagadre ni nomu matavuvale: Alama 39:1–9; “Tiko Savasava,” Me iSakisaki ni iTabagone, 35–37; “Bula Savasava,” Gospel Topics, topics.ChurchofJesusChrist.org; overcomingpornography.org; kei na vidio “What Should I Do When I See Pornography?” kei na “I Choose to Be Pure” (ChurchofJesusChrist.org). Vakasamataka vakatitobu na sala e rawa ni o vukea kina nomu matavuvale mera kila vakavinaka na veivakalougatataki ni bula savasava kei na veivinakati ena bula vakawati (me kena ivakaraitaki, raica na vidio “How to Talk to Your Kids about Intimacy” ena ChurchofJesusChrist.org).
Alama 39:9–15
Na cava e rawa ni da vulica mai na veitikina oqo ena sala me da dro tani kina mai na ivalavala ca?
Alama 42:4
E rawa ni o qitora e dua na qito me ra kabuwacara tu ena rumu na tikinipepa ka volai tu kina na itovonibula Vakarisito se ivakavuvuli ni kosipeli. E rawa mo raica e vica na tiki ni pepa e rawa ni ra kumuna na lewe ni matavuvale ena dua na gauna, qai veivosakitaki na ivakarau e rawa ni vukei keda kina na veika e volai tu ena pepa me da vaka na Kalou. E tautauvata vakacava kei na gauna e soli ena qito na “gauna e soli” vei keda e vuravura? Me da na vakayagataka vakacava na “gauna ni vakatovolei” e vuravura me da vakataka vakalevu cake kina na iVakabula?
Alama 42:12–15, 22–24
Rairai o rawa ni vakaraitaka na kedrau isema na lewa dodonu kei na loloma veivueti ena nomu vakayagataka e dua na droini ni ivakarau rawarawa me veivosakitaki kina na taro vaqo: Na cava e yaco ena ivakarau ena gauna eda ivalavala ca kina? Na cava e gadreva na lewa dodonu me tautauvata kina na ivakarau? E sotava vakacava na iVakabula na veika e vakarota na lewa dodonu me rawa kina na loloma cecere?
Me baleta eso tale na vakasama me ra vakavulici kina na gone, raica na ituvatuva ena macawa oqo ena Lako Mai, Mo Muri Au—Baleti Ira na Lalai.
Vakatorocaketaki Noda Veivakavulici
Vakanamata ki na ivakavuvuli ena vakalougatataki ira nomu vuvale. Ni o vulica ena masumasu na vosa ni Kalou, tarogi iko, “Na cava au kunea eke ena rawa ni vakaibalebale vakabibi ki na noqu vuvale?” Vakasaqara na veidusimaki ni Yalo ni o vakasamataka vakatitobu na sala mo vukea kina nomu matavuvale me raica na dina oqo.
Qo Na Luvequ Tagane, mai vei Elspeth Caitlin Young