rua na udolu na cauravou yaloqaqa

Two Thousand Young Warriors, mai vei Arnold Friberg

10–16 ni Okosita

Alama 53–63

“Maroroi tu Mai ena Nona Kaukauwa Veivakurabuitaki”

Na itukutuku e tiko ena Alama 53 – 63 e rawa ni vukei iko mo raica na isau ni kena bulataki na dina ni kosipeli kei na kedra vakanadakui. Ni ko wilika na Alama 53 – 63, vola na veivakauqeti ka vakasamataka na sala mo bulataka kina na dina o sa vulica.

Vola na Veika o Uqeti Kina

Ni vakatauvatani kei na nodra mataivalu na Leimanaiti, ena sega sara ga ni dua na ka e rawata na “mataivalu lailai” nei Ilamani (Alama 56:33) ka lewena e 2,000 na cauravou ni Nifaiti. Sa ra lewe lailai mada, era se “gone kecega,” ka ra se “sega mada ni bau vala vakadua” (Alama 56: 46–47). Ena so na sala, e vaka me matalia na kedra ituvaki vei keda eso eda dau nanuma ni da lewe lailai ka na vakadrukai ena noda ivalu ni gauna oqo vata kei Setani kei na veika ca ni vuravura.

Ia eso na ka era vinaka cake kina na mataivalu nei Ilamani vei ira na Leimanaiti ka sega ni baleta na iiwiliwili se na kila vakaivalu. Era a digitaki Ilamani, e dua na parofita, me liutaki ira (Alama 53:19); “era sa vakavulici mai vei ira na tinadra, ni kevaka era sega ni vakatitiqa, ena vakabulai ira na Kalou” (Alama 56: 47); ka sa “vuabale sara ga nodra vakabauta na veika era sa vakavulici kina.” Na vuana, era a taqomaki kina ena “kaukauwa mana ni Kalou” (Alama 57:26). E dina ga era sa mavoa kece sara ena ivalu, “sa sega ni dua vei ira na tamata e mate” (Alama 57: 25). Ni da vakamavoataki vakayalo ena veika ni bula, eda na vakayaloqaqataki—na nodra itukutuku na mataivalu i Ilamani oya ni sa “dua tiko na Kalou dau lewa dodonu, ia ko cei tale e sega ni vakatitiqataka ni ra na sega ni maroroi ena nona kaukauwa vakasakiti” (Alama 57:26).

ivakatakilakila ni vuli yadua

Vakasama eso ni Vuli iVolanikalou Yadua

Alama 53: 10–22; 56:43–48, 55–56; 57:20–27; 58: 39–40

Niu cakacakataka na noqu vakabauta na Kalou, ena vakalougatataki au o Koya ena nona kaukauwa vakasakiti.

Na italanoa veivakurabuitaki me vaka nodra qaqa na sotia gone nei Ilamani ena dredre beka me vakamacalataki baleta ni dredre toka me vakabauti. Ia, e dua na vuna era tu kina ena ivolanikalou na mataqali italanoa vakaoqori me vakaraitaka vei keda ni gauna eda vakabauta kina, e rawa ni cakamana ena noda bula na Kalou. Ni o wilika me baleti ira na cauravou yaloqaqa ena veitikina oqo, vakaraica na ivakatakilakila ni nodra cakacakataka nodra vakabauta na Kalou, na cava a vakaukauwataka na nodra vakabauta, kei na cava e yaco rawa kina na cakacaka mana: Alama 53:10–22; 56:43–48, 55–56; 57:20–27; kei na 58:39– 40. Na ituvatuva oqo e vakatura e dua na sala e rawa ni o vola kina na veika o raica rawa.

Nodra itovo ni bula na cauravou yaloqaqa nei Ilamani:
Na cava era vakavulici kina:
Na cava era cakava:
Na veivakalougatataki era ciqoma:

Ni oti na nomu vulica na veitikina oqo, na cava beka o vakauqeti mo cakava mo cakacakataka kina nomu vakabauta?

E cavuta o Ilamani na nodra itavi na tina ena kena vaqaqacotaki na nodra vakabauta o ira na sotia qaqa (raica Alama 56:47–48; 57:20–27). A cava na nodra itavi na lewe ni matavuvale kei ira na tamata ena kena tarai cake na nomu vakabauta? Na cava o rawa ni cakava mo vaqaqacotaka kina na nodra vakabauta na nomu matavuvale kei ira na itokani?

cauravou yaloqaqa vata kei tinadra

They Did Not Doubt, mai vei Joseph Brickey

Alama 58:1–12, 31–37; 61

Au rawa ni digitaka meu vakasamataka na veika vinaka duadua baleti ira na tani ka sega ni vakacudrui.

A tu vei Ilamani kei Paorani na iulubale vinaka me rau cudru kina. A sega ni veirauti na veitokoni e ciqoma tiko o Ilamani ki na nona mataivalu, ka beitaki vakailasu mai vei Moronai o Paorani ni sega ni solia tiko na veitokoni oqori (raica na Alama 58:4–9, 31–32; 60). Na cava e uqeti iko me baleta na nodra imoimoi ena Alama 58:1–12, 31–37 kei Alama 61? O na rawa ni vakamuria vakacava na nodrau ivakaraitaki ena mataqali gauna vata vaka oya?

A vakatavulica o Elder David A. Bednar: “ena so na sala kei na so na gauna, e dua ena Lotu oqo ena cakava se tukuna eso na ka e rawa ni vakatokai me veivakacudrui. Na mataqali ka vaqori ena yaco vakaidina vei keda yadua—ka na sega dina ni yaco ga vakadua. … O iko kei au e sega ni rawa ni daru tarova nodra inaki se na nodra itovo na tamata tale eso. Ia, eda lewa na ka eda na cakava. Yalovinaka ka nanuma ni iko kei au daru itini ka vakalougatataki tu ena galala ni digidigi, ka rawa ni daru digitaka me daru kakua ni vakacudrui” (“Ka Sega na Ka me Vakatarabetaki Ira,” Ensign se Liaona, Nove. 2006, 91).

Raica talega na Ai Vola ni Vakaibalebale 16:32; Moronai 7:45; David A. Bednar, “Yalomalua ka Yalomalumalumu,” Ensign se Liaona, Me 2018, 30–33

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Alama 53:10–17

Era yalataka na Anitai-Nifai-Liai me ra kakua ni vakadave dra. Na cava na veiyalayalati eda sa cakava vata kei na Kalou? Na cava eda wilika ena Alama 53:10–17 e vakauqeti keda me da na yalodina tikoga ki na noda veiyalayalati?

Alama 53:20–21

Ena rawa beka vakacava me da vakataki ira na cauravou nei Ilamani? E rawa ni veivuke noda veivosakitaka na ibalebale ni so na malanivosa oqo ena veitikina oqo; me vaka, na cava na kena ibalebale me da “gumatua … ena igu kei na cakacaka”? Na cava na kena ibalebale meda “lako vakadodonu e mata ni [Kalou]”?

Alama 58:9–11, 33, 37

Ena gauna ni leqa lelevu, eda vuki beka vua na Tamada Vakalomalagi, me vakataki ira na sotia i Nifai? A sauma vakacava na nodra masu? E sa sauma beka mai vakacava na noda masu?

Alama 61:2, 19

Na cava eda vulica mai vei Paorani me baleta na ivakarau me da na sauma kina noda beitaki vakailasu?

Alama 62:39–41

Oqo e dua na lesoni me na vukea na nomu matavuvale mera kila vakavinaka ni rawa ni da digitaka me “yalo kaukauwa” se “vakamalumalumutaki” ena gauna ni noda vakatovolei: Biuta e dua na pateta droka kei na dua na yaloka droka ena dua na kuro wai buebue. Erau matataki keda na pateta kei na yaloka droka, ka matataka na veivakatovolei eda sotava na wai. Ni sa buta na pateta kei na yaloka, e rawa ni o veivosakitaka eso na veivakatovolei e sotava nomu matavuvale. Na cava soti eso na sala duidui me sotavi kina na veivakatovolei vakaoqo? Me vaka na Alama 62:41, ena vakayacoka vakacava vei keda na ivakarau eda sotava kina na veivakatovolei? Ni rau sa buta vinaka na pateta kei na yaloka, musuka na pateta ka voroka na yaloka me vakaraitaka ni “veivakatovolei” e vakamalumutaka na pateta ka vakaukauwataka na yaloka. Na cava eda rawa ni cakava vakamatavuvale me vakadeitaka ni vakamalumutaki keda ka kauti keda vakavoleka mai vua na Kalou na noda vakatovolei?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Mo Lako Mai, Mo Muri Au— Baleti Ira na Lalai.

Vakatorocaketaki Noda Veivakavulici

Vakatara me ra vakaraitaka na nodra dau bulibuli ka na gone. “Ni o sureta na gone me bulia e dua na ka e semati ki na dua na ivakavuvuli ni kosipeli, o sa vukei ira me ra kila vakavinaka cake na ivakavuvuli, ka solia vua e dua na vatuka ni ka e vulica. … Vakatara me ra bulia, droini, rokataka, vola ka tauyavutaka” (Veivakavulici ena iVakarau ni iVakabula, 25).

rua na udolu na cauravou yaloqaqa

It’s True, Sir, All Present and Accounted For, mai vei Clark Kelley Price