rua na udolu na bati tagane

Rua na Udolu na Bati Gone, mai vei Arnold Friberg

10–16 ni Okosita

Alama 53–63

“Maroroi Tu ena Nona Kaukauwa Veivakurabuitaki”

Ni o wilika na Alama 53–63, vakasamataka na sala o na rawa ni vakabulabulataka kina na italanoa ena veiwase oqo kivei ira na gone ka vukei ira ni vulica na ivakavuvuli ni kosipeli era vakatavulica na italanoa.

Vola na Veika o Uqeti Kina

ivakatakilakila ni veiwasei

Sureta na Veiwasei

Me ra vakarautaki na gone ni vuli mai na Alama 53–63, sureti ira mera wasea na ka era nanuma baleti ira na Anitai-Nifai-Liai (raica na Alama 23–24). Me veivuke, vakaraitaka e dua na iyaloyalo o a vakayagataka mo vakavulica na italanoa, se vakananumi ira ena dua na itaviqaravi era cakava ena kalasi.

ivakatakilakila ni veivakavulici

Vakavulica na iVunau: Gone Sobu

Alama 53:20–21; 56:27, 47–48.

Au rawa ni yalodina tu vua na Kalou me vakataki ira na bati tagane.

Sa rawa ni dua na ivakaraitaki levu o ira na bati tagane (kena ibalebale “gone”) i Ilamani kivei ira na gone ena nomu kalasi. Vakauqeti ira na gone me ra tovolea ni vakataki ira.

iTaviqaravi e Rawa ni Caka

• Sureta e dua na gone me taura cake na iyaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale ni o vakalekalekataka na italanoa ni bati tagane i Ilamani. Ko na vakayagataka talega na “Wase 34: Ilamani kei na 2,000 na Bati Gone” (iTalanoa ni iVola i Momani, 93–94, se na kena vidio ena ChurchofJesusChrist.org). Me ra qai wasea na gone na ka era kila ka vinakata me baleta na italanoa ni 2,000 na bati tagane.

• Sureta e dua na goneyalewa kei na gonetagane me matataki ira na tina kei na tama ni bati tagane. Ni ko wilika na Alama 56:27 kei na 47–48, solia vei ira na gone na iyaya eso mera taura e matataka na sala a vukei ira kina na bati na tama kei na tina, me vaka na taga kakana me matataka na “ivotavota” era a vakauta na tama kei na ivolanikalou me matataka na nodra ivakavuvuli na tina. Kerei ira na gone me ra wasea na veika e vakarautaka na nodra itubutubu vei ira se vakavulici ira.

• Wilika na Alama 53:20–21, ka vukei ira na gone ni kila vakamatata na ibalebale ni vosa vakataka na doudou, yaloqaqa, kaukauwa, kei na dina. Vakamacalataka na sala era a vakaraitaka kina na bati tagane na veivalavala oqo. Cakava eso na itokaniyaca rawarawa vei ira na gone e tukuna, “Niu sa , au sa vaka e dua na bati tagane!” Vukei ira na gone ni vakalewena na vanua lala ena dua na ivalavala era digitaka mai na Alama 53: 20–21.

• Sureti ira na gone me ra vakacavara na tabana ni itaviqaravi ena macawa oqo. Vukei ira ni vakasamataka na sala eso era rawa ni vakataka kina na mataivalu i Ilamani. Lagata vata na “We’ll Bring the World His Truth” (Children’s Songbook, 172–73).

Alama 58:32–41

Niu lomaleqa tu, sa rawa niu vakararavi vua na Kalou.

Ni sa sotava o koya kei na nona mataivalu na gauna dredre eso, sa vakararavi o Ilamani vua na Turaga. Na cava era rawa ni vulica mai na nona ivakaraitaki na gone o vakatavulica?

iTaviqaravi e Rawa ni Caka

• Droinitaka e dua na mata damele ena vava ni volavola, ka veivosakitaka na sala a lomaleqa tu kina o Ilamani baleta ni sega ni veirauti na kakana ki na nona mataivalu se veirauti na tamata me vala tiko (raica Alama 58:32–41). Kerei ira na gone me ra wasea na gauna eso era a lomaleqa kina. Wilika na Alama 58:37 (se vukea e dua na gone me wilika), ka vukei ira na gone ni veisautaka na mata ena vava ni volavola ki na dua na mata e matadredredre me vakaraitaka na ka a vakila o Ilamani ena nona vakararavi vua na Kalou. Na cava eda rawa ni cakava ni da sa lomaleqa tu? Lagata vata na “Smiles” (Children’s Songbook, 267).

• Vola ena so na tiki ni pepa e vica na ka era na rairai lomaleqataka na gone. Me ra qai veivukevuke na gone ni digitaki e dua na pepa mo wilika, ka sureti ira na gone me ra wasea na sala e rawa ni vukei ira kina na Kalou ena veilomaleqa yadua oqo. Wasea e dua na ka o sotava e a vukei iko kina na Kalou ni o lomaleqa tu.

ivakatakilakila ni veivakavulici

Vakavulica na ivunau: Gone Qase Cake

Alama 56:45–48; 57:21, 25–27; 58:39–40

Au rawa ni yalodina tu vua na Kalou me vakataki ira na bati tagane.

Na dina cava so mai na italanoa ni bati tagane (kena ibalebale “gone”) i Ilamani e rawa ni vukei ira na gone ena bolebole eso era sotava tu?

iTaviqaravi e Rawa ni Caka

• Kerei ira na gone me ra wasea na ka era kila me baleti ira na bati tagane. Sa rawa ni o vakayagataka talega na “Wase 34: Ilamani kei na 2,000 na Bati Tagane” (iTalanoa ni iVola i Momani, 93–94, se na kena vidio ena ChurchofJesusChrist.org). Me ra qai wasea na gone na ka era taleitaka baleti ira na bati.

• Wilika vata na Alama 56:45–48; 57:21, 25–27; kei na 58:39–40. Sureti ira na gone me ra vaqara na vosa kei na malanivosa mai na veitikina oqo e vakamacalataki ira na bati tagane. Na cava na ibalebale ni vosa kei malanivosa eso oqo? E rawa vakacava ni da vakataki ira na bati tagane?

• Wilika na Alama 56:46–48 vei ira na gone, ka sureti ira mera rogoca na ka a vakatavulica vei ira na luvedra na tina ni bati tagane me baleta na vakabauta. E vukei ira tiko na luvedra vakacava na itubutubu nikua me tiko na nodra vakabauta? Cava na vuna e bibi kina vei ira na gone mera muria “vakadodonu saraga” na ivakavuvuli yalodina ni nodra itubutubu kei ira na iliuliu ni Lotu? (Alama 57:21).

vakavulica tiko na luvena tagane o tina

Sorenikau ni Vakabauta, mai vei Jay Ward

Alama 53:10–17; 56:27

Au rawa ni maroroya na noqu veiyalayalati.

Era a caka veiyalayalati na bati tagane kei na nodra itubutubu ka ra vakataucokotaka vakaidina. Sa rawa ni o vakayagataka na itukutuku oqo mo vakavulici ira kina na gone ena bibi ni veiyalayalati.

iTaviqaravi e Rawa ni Caka

• Wasea me tolu na ilawalawa gone: dua me matataki Ilamani, dua tale me matataki ira na tamata i Amoni, kei na ikatolu me matataka na luvedra tagane na tamata i Amoni. Wilika vata na Alama 53:10–17, ka raica mera wasea na ilawalawa na tamata era matataka na sala era a maroroi veiyalayalati kina. Wasea na nomu ivakadinadina ni sa vakalougatataki keda na Tamada Vakalomalagi ni da maroroya na noda veiyalayalati.

• Vola ena vava ni volavola na malanivosa eso mai na Mosaia 18:8–10 se Vunau kei na Veiyalayalati 20:37 e vakamacalataka na veika eda veiyalayalati ni cakava ena gauna eda papitaiso kina. Vola talega na malanivosa eso era sega ni semati ki na veiyalayalati. Kerei ira na gone mera toqa wavoki na veika eda veiyalayalati ni cakava (mera vakayagataka na ivolanikalou ke gadrevi). Eda sa vakalougatataki vakacava ni da maroroya na noda veiyalayalati? Vakauqeti ira na gone me ra vola na ka era sa veiyalayalatitaka kei na Kalou ni cakava ka vakatakila na ka era sa vola ena vanua era rawa ni raica wasoma kina.

• Sureta e dua na gone me wilika na Alama 56:27. E vukei ira vakacava na luvedra na tama ni sega ni voroka na nodra veiyalayalati mera kakua ni vala? O cei sa tokoni keda ena maroroi ni noda veiyalayalati?

Alama 61:3–14

Sa rawa niu digitaka meu kakua ni cudru.

A beitaki Paorani vakailasu o Moronai, ia ni sega ni cudru tu, a kaya o Paorani, “Au … rekitaka ga na dina kei na dodonu ni yalomu” (Alama 61: 9).

iTaviqaravi e Rawa ni Caka

• Sureti ira na gone me ra vakasamataka e dua na gauna era a beitaki kina ni cakava e dua na ka era sega ni cakava. Tukuna vei ira na kena yaco na ka oqo vei Paorani (raica na Alama 60–61). E rawa ni o vakayagataka na “Wase 35: Kavetani Moronai kei Paorani” (iTalanoa ni iVola i Momani, 95–97, se na kena vidio ena ChurchofJesusChrist.org). Me vulici na nona iwalewale o Paorani, ni veivukevuke ni wilika na tikina eso mai na Alama 61:3–14. Na cava e cakava o Paorani ni sa beitaki koya o Moronai? Na cava eda vulica rawa me baleta na veivutuni mai na ivakaraitaki i Paorani? E rawa vakacava ni da vakataki koya?

• Vola ena vava ni volavola Na cava sa dodonu meu cakava ni dua e cudruvi au? Sureti ira na gone me ra veivukevuke ni vola na isau ni taro eso ena vava ni volavola. Ena rawa ni sauma li vakacava o Paorani na taro oqo? Kerei ira na gone me ra vola na veisau ni taro oqo ena dua na ivola kivei ira era na rawa ni wilika ni dua e sa cudruvi ira.

ivakatakilakila ni vuli

Vakauqeta na Vuli e Vale

Vakauqeti ira na gone me ra wasea ki na nodra matavuvale e dua na sala era vinakata ni vakataki ira kina na bati tagane. Sa rawa talega ni ra vakavinavinakataki ira na nodra itubutubu ni vakavulici ira me vaka era cakava na tina ni bati tagane.

Vakatorocaketaki Noda Veivakavulici

Vakaitavitaki ira na gone ena veivosakitaki ni kosipeli. Na veisau ni tuvaki ni kalasi sa rawa talega ni vukea na nodra vakaitavitaki vinaka cake na gone ena veivosakitaki ni kospeli. Me ivakaraitaki, sa rawa ni o sureti ira vagauna na gone me ra dabe wavoki ena buturara ka sega ena nodra idabedabe.

tabana ni itaviqaravi: au rawa ni yalodina kivua na Kalou