Ko Nifai ni masu tiko ena vale cecere ni were

Na ivakaraitaki i Nifai ena vale cecere ni were mai vei Jerry Thompson

24–30 ni Okosita

Ilamani 7–12

“Nanuma na Turaga”

Ni ko wilika na Ilamani 7–12, vakasamataka vakatitobu na sala ena rawa ni vakalougatataki ira kina na gone o vakavulica na italanoa kei na ivakavuvuli ena wase oqo. Na vakasama eso ena ituvatuva oqo e rawa ni tokona na veivakauqeti o ciqoma.

Vola na Veika o Uqeti Kina

ivakatakilakila ni veiwasei

Sureta na Veiwasei

Tarogi ira na gone na cava era kila me baleta na parofita o Nifai, na luvei Ilamani (raica na Ilamani 7–12). Kevaka e gadrevi, vakamacalataka na kedrau duidui na parofita oqo ka yacana o Nifai kei na parofita o Nifai ena itekivu ni iVola i Momani.

ivakatakilakila ni veivakavulici

Vakavulica na iVunau: Gone Sobu

Ilamani 7:20

Na Turaga e vinakati au meu nanumi Koya.

A vakananuma o Nifai na vuna era sa vuki tani mai kina Vua na Kalou ka guilecavi Koya na nona tamata. O na vukei ira vakacava na gone mera vulica na sala era na rawa kina ni nanumi Tamada Vakalomalagi kei Jisu?

iTaviqaravi e Rawa ni Caka

• Wasea vei ira na gone e dua na gauna o a guilecava kina e dua na ka bibi. Tarogi ira kevaka era a sa bau guilecava e dua na ka. Wilika vei ira na Ilamani 7:20, ka vakamacalataka ni ra a digitaka na Nifaiti me ra guilecava na Kalou. Na parofita o Nifai e a vinakati ira mera nanuma na Kalou. Kauta mai eso na iyaloyalo ena dua na kato ka matataka na veisala e rawa ni ra nanumi Tamada Vakalomalagi kei Jisu kina o ira na gone. Mera veivukevuke na gone mera digitaka e dua na iyaloyalo ka wasea na sala eda rawa kina ni nanuma na Kalou ena veisiga.

• Vukei ira na gone me ra vakacavara na tabana ni itaviqaravi ni macawa oqo.

Ilamani 8:13–23

O ira na parofita era vakadinadinataki Jisu Karisito.

O Nifai e a vakadinadinataka ni na lako mai ko Jisu Karisito, ka a sureti ira na nona tamata me ra veivutuni ka muri Koya. Vakayagataka na veiwase oqo me vakavulici ira na gone ni o ira na parofita era vakadinadinataki Jisu Karisito.

iTaviqaravi e Rawa ni Caka

• Vakaraitaka e dua na iyaloyalo i Jisu Karisito, ka tukuna vei ira na gone ni o ira na parofita me vakataki Nifai era sureti keda meda muri Jisu. Wilika na veivosa oqo me baleti ira na parofita mai na Ilamani 8:22: “Era a vakadinadinataka na nona lako mai na Karisito, ka ra namaka ka rekitaka na nona siga.” Wasea vei ira na gone e dua na ka sa kaya na noda parofita bula me baleta na iVakabula.

• Lagata vata e dua na sere baleti ira na parofita, me vaka na “Vakamuria na Parofita” (iVolanisere ni Gonelalai, 58). Digia e dua na tamo ni vosa bibi mai na sere, ka vola e dua na vosa mai na malanivosa ena vica vata na mawe ni yava pepa yadua. Tuvana na mawe ni yava ena fuloa me mua tiko yani ki na iyaloyalo ni iVakabula. Sureti ira na gone me ra muria na sala ni mawe ni yava, ka vukei ira mera wilika na veivosa.

Ilamani 10:11–12

Au na muria na Tamada Vakalomalagi.

Na ivakaraitaki ni talairawarawa nei Nifai ena rawa ni vakauqeti ira na gone o vakatavulica mera talairawarawa vua na Turaga.

iTaviqaravi e Rawa ni Caka

• Wilika na Ilamani 10:2, 11–12, ka vukei ira na gone mera kila ni o Nifai e a talairawarawa vua na Kalou. Sureti ira na gone me ra matanataka na veika e a cakava o Nifai. Me kena ivakaraitaki, kerei ira me ra lako yani ki na dua na yasa ni rumu (me vaka era sa gole tiko ki vale), tu vakadua, vuki, ka lako yani ki na yasa kadua ni rumu (me vaka era sa lesu tiko me ra vakavulici ira na tamata). Vukei ira mera raica ni a vinakata o Nifai me talairawarawa vua na Turaga dina ga me a vakayacora kina e dua na ka dredre.

• Vukei ira na gone me ra kila ni so na gauna dau vinakata na Tamada Vakalomalagi meda cakava e dua na ka e duidui mai na ka eda via cakava, ia eda rawa ni talairawarawa kivua me vakataki Nifai. Wasea na itukutuku me vaka na “So na gauna au vinakata meu cudru, ia e vinakata na Tamada Vakalomalagi meu … ,” laivi ira na gone mera vakacavara na iyatuvosa. Vakayaloqaqataki ira na gone mera nanuma tiko mera tu vakadua ka vakasamataka na veika e vinakata na Tamada Vakalomalagi mera cakava ka cakava sara.

ivakatakilakila ni veivakavulici

Vakavulica na iVunau: Gone Qase Cake

Ilamani 7–11

Au na maroroi vakayalo ni’u muria na parofita.

O Peresitedi James E. Faust a vakatavulica: “Na noda maroroi e tu ena kena rogoci na ka e kaya [na Peresitedi ni Lotu] ka vakamuri na nona ivakasala” (“Continuous Revelation,” Ensign, Nove. 1989, 10).

iTaviqaravi e Rawa ni Caka

• Sureti ira na gone mera vola ena papa ni volavola na veika e dau cakava e dua na parofita (raica na “Parofita,” iDusidusi ki na iVolanikalou, scriptures.ChurchofJesusChrist.org). Vukei ira mera vakasaqara na Ilamani 7:1–2, 27–29; 8:22–23; kei na 10:3–4, 6–7 mera raica na veika eso a cakava o Nifai ena nodra lisi. Na gauna cava eda raica kina na noda parofita nikua ni kitaka na veika oqo? Wasea na nomu ivakadinadina me baleta na parofita bula. Me vakatakila na bibi ni parofita, vakaraitaka na imatai ni miniti ni vidio na “Watchman on the Tower” (ChurchofJesusChrist.org).

• Wilika vata na Ilamani 11:3–7 (se railesuva na “Chapter 39: Nephi Receives Great Power,” Book of Mormon Stories, 108–10, se na kena vidio ena ChurchofJesusChrist.org). Kerei ira na gone mera vakarogoca na veika a yaco vei ira na tamata era sega ni vakarorogo vua na parofita. Na cava e rawa ni yaco ni da sega ni vakarorogo vua na parofita? Eda vakalougatataki vakacava ni da muri Koya? Wasea e dua na ka e vakavulica na noda parofita, ka vakauqeti ira na gone mera muria na nona ivakavuvuli.

Ilamani 7:20–21

Na Turaga e vinakati au meu nanumi Koya.

Era na sotava na gone o vakavulica na veivakataotaki ka na rawa ni vakavuna na nodra guilecavi Tamada Vakalomalagi kei Jisu Karisito. O na vakauqeti ira vakacava na gone me ra solia na gauna ki na veika vakayalo?

iTaviqaravi e Rawa ni Caka

• Wilika vata na Ilamani 7:20–21, ka tarogi ira na gone na cava era nanuma ni kena ibalebale me guilecava na Kalou. Vakamacalataka ni vosa na guilecava e kena ibalebale talega “me vakawalena” se “sega ni kauwaitaka.” Vakaraitaka e dua na iyaloyalo ni iVakabula, ka sureti ira na gone mera droinitaka na veika e rawa ni ra vakayagataka vakasivia kina na gauna ka na rawa ni vakavuna na nodra guilecava na Turaga. Biuta na nodra droini ena mata ni iyaloyalo kei Jisu. Kerei ira na gone me ra vakasamataka na veika era rawa ni cakava e veisiga mera nanumi Tamada Vakalomalagi kei Jisu kina. Ni ra wasea na nodra vakasama, kauta tani na droini yadudua me yacova ni sa vakatakilai na iyaloyalo ni iVakabula.

• Sureti ira na gone mera vakacavara na tabana ni itaviqaravi ni macawa oqo.

Ilamani 10

Ni’u vakasamataka vakatitobu na vosa ni Kalou, au na rawa ni ciqoma na ivakatakila.

Era kila beka na gone o vakavulica na kena ibalebale me vakasamataki vakatitobu? Vukei ira me ra kila ni o Nifai a vakalougatataki ena ivakatakila ni a vakasamataka vakatitobu o koya na veika a vakaraitaka vua na Turaga.

iTaviqaravi e Rawa ni Caka

• Vukei ira na gone me ra kila na cava e kena ibalebale mera vakasamataka vakatitobu (raica na “Vakananuma,” iDusidusi ki na iVolanikalou, scriptures.ChurchofJesusChrist.org). Sureti ira mera vakasamataka tale eso na vosa me vakamacalataka na cava na ibalebale ni vakananuma . Qai kerei ira mera wilika na Ilamani 10:1–3 ka vakaisosomitaka na vosa na vakananuma vata kei na vosa era sa nanuma rawa. Na cava e a yaco ni a vakananuma voli na ivolanikalou o Nifai? (raica na Ilamani 10:3–7). Wasea e dua na gauna o a ciqoma kina na ivakatakila ni o vakasamataka tiko e dua na ivolanikalou se dua na ivakatakila ni gauna oqo se dua na ka sotavi vakayalo.

• Solia na gauna mera wilika na Ilamani 10, se wilika vata kei ira na gone, ka vakayaloqaqataki ira me ra vakaraica e dua na tikina era gadreva mera vakananuma ena loma ni macawa tarava. Sureti ira me ra vola na tikina era sa digitaka ena dua na pepa se kadi ka biuta ena dua na vanua me na vakananumi ira kina mera dau vakananuma na tikina o ya ena loma ni macawa ka tarava. Ena kalasi e tarava, solia na gauna mera wasea na veika era sa vulica ni ra vakananuma tiko na tikina oya.

ivakatakilakila ni vuli

Vakauqeta na Vuli e Vale

Vakauqeti ira na gone me ra wasea vata kei ira na nodra matavuvale na veika era sa tuvanaka mera cakava mera nanuma tiko kina na Tamada Vakalomalagi kei Jisu Karisito ena veisiga. Era rawa talega ni sureti ira na nodra matavuvale me tokoni ira ena nodra takete.

Vakatorocaketaki Noda Veivakavulici

Cakava na veisureti e rokova na galala ni digidigi. Ni ko sa sureti ira na gone mera cakacakataka na veika o sa vakavulici ira kina, vakasamataka na sala eso me rokova na nodra galala ni digidigi ni ra bulataka na veika era sa vulica. Me kena ivakaraitaki, ni oti e dua na lesoni me baleta na iVakabula, mo taroga, “Na cava o na cakava mo nanuma kina na iVakabula ena macawa oqo?”

na tabana ni itaviqaravi: Na Turaga e vinakata meu dau nanumi Koya