“17–23 ni Okosita. Ilamani 1–6: ‘Na Uluvatu ni Noda Dauveivueti’” Lako Mai, Mo Muri Au—Me Baleta na Tamata Yadua kei na Matavuvale: iVola i Momani 2020 (2020)

“17–23 ni Okosita. Ilamani 1–6,” Lako Mai, Mo Muri Au—Me Baleta na Tamata Yadua kei na Matavuvale: 2020

iVakatakilakila

caroba na ua lelevu ena vatu

17–23 ni Okosita

Ilamani 1–6

“Na Uluvatu ni Noda Dauveivueti”

Na ivakavuvuli e tiko ena ituvatuva oqo e rawa ni dusimaka na nomu vulica na Ilamani 1–6, ia me kakua ni yalani iko. Ena dusimaki kemuni na Yalo Tabu ki na dina o gadreva mo na vulica.

Vola na Veika o Uqeti Kina

E volai ena iVola i Ilamani na qaqa kei na leqa lelevu ena kedra maliwa na Nifaiti kei na Leimanaiti. E tekivu ena “dua na dredre levu ena kedra maliwa na tamata i Nifaiti” (Ilamani 1:1), kei na veika dredre sa yaco tikoga mai ena gauna taucoko ni itukutuku. Eke eda wilika na veika vakapolitiki ivadi ca, na ilawalawa daubutako, nodra cati na parofita, kei na dokadoka kei na tawa vakabauta ena vanua taucoko. Ia eda sa raica talega e dua na ivakaraitaki me vakataki Nifai kei Liai kei “na wase levu cake ni tamata yalomalumalumu,” ka ra sega walega ni vakabulai ia era sa tubu cake vakayalo (Ilamani 3:34). Era a cakava li vakacava? Era a kaukauwa tikoga vakacava ena gauna sa tekivu malumalumu ka kasura mai na nodra matanitu? Na sala vata ga e rawa kivei keda meda kaukauwa tiko ena gauna ni “cagi kaukauwa” e vakaliwava mai na tevoro me “dreti [keda] sobu”—ena noda tara cake na noda bula “ena uluvatu ni noda Dauveivueti, o koya na Karisito, na luve ni Kalou, … sai koya na yavudei ia kevaka sa tara cake na tamata ena yavu oqo, ena sega sara ni bale rawa” (Ilamani 5:12).

iVakatakilakila

ivakatakilakila ni vuli ni tamata yadua

Vakasama eso ni Vuli iVolanikalou ni Tamata Yadua

Ilamani 1–6

Na viavialevu ena tawasei au mai na Yalo Tabu kei na kaukauwa ni Turaga.

Ni o wilika na 1–6 ni Ilamani—kei na taucoko ni iVola i Momani—o na raica beka e dua na ivakarau ena nodra itovo na Nifaiti: Ena gauna era sa ivalavala dodonu kina na Nifaiti, sa vakalougatataki ira kina na Kalou ka ra tiko sautu. Ni oti e dua na gauna, era sa viavialevu ka daucaka ca, ka ra digidigi e veimuataki yani ki na veivakarusai kei na rarawa. Era sa qai yalomalumalumu ka vakauqeti mera veivutuni, ka vakalougatataki ira tale kina na Kalou. Na ivakarau oqo sa tokaruataki vakaikoya sara vakavuqa ni eso na tamata era vakatoka “na cowiri ni viavialevu.”

Mo raica na ivakaraitaki ni cowiri oqo ni ko sa wiliwili. Sa rawa sara mada ga mo makataka na ivakaraitaki ni o sa kunea. Oqo e so na taro me vukei iko mo kila vakavinaka na ivakarau oqo ka raica na sala e rawa ni yaga kina vei iko:

Na ivakadinadina cava ni viavialevu o sa raica ena kedra maliwa na Nifai? (raica, me kena ivakaraitaki, Ilamani 3:33–34; 4:11–13). O sa raica beka na ivakaraitaki vata oqo ni viavialevu vei iko?
Na cava soti na isau ni viavialevu kei na caka ca? (raica na Ilamani 4:23–26). Na cava soti na isau ni yalomalumalumu kei na veivutuni? (raica na Ilamani 3:27–30, 35; 4:14–16).
Na cava e vinakata o Ilamani vei iratou na luvena tagane me ratou nanuma? (raica na Ilamani 5:4–12). Ena rawa vakacava ni ko nanuma tiko na dina oqo me vukea nomu gole tani mai na viavialevu?

Raica talega na Dieter F. Uchtdorf, “Na Viavialevu kei na Matabete,” Ensign se Liaona, Nove. 2010, 55–58.

Ilamani 3:24–35

Au rawa ni vakatabui niu solia na yaloqu vua na Kalou.

Ena Ilamani 3, e tukuna kina o Momani e dua na gauna a sautu ka vakalougatataki sara kina na Lotu ka ra kurabui sara ga kina na iliuliu (raica na tikina 24–32). Sa yaco sara kina me so era sa viavialevu, ka so sa “tubu ka kaukauwa cake tikoga na nodra yalomalumalumu, … ka sa vakasavasavataki ka vakatabui na yalodra” (Ilamani 3:35). Raica ena tikina e 34–35 na veika era a vakayacora na tamata yalomalua mera bula vakacerecerei kina. Era na vukei iko vakacava na veika oqo mo ni vakasavasavataki vakalevu cake kina? E rawa ni veivuke ena noda kila ni iDusidusi ki na iVolanikalou (scriptures.ChurchofJesusChrist.org) e vakamacalataka ni ibalebale ni vakatabui sai koya “na iwalewale ni kena yaco me da galala mai na ivalavala ca, meda savasava, kilikili ka vakalou mai na Veisorovaki i Jisu Karisito.” Na cava e vakauqeti iko mo cakava mo vakamurimuria kina na nodra ivakaraitaki na tisaipeli oqo? Na cava o sa cakava tiko mo solia kina na yalomu vua na Kalou?

Ilamani 5:14–52

Sa vaqaqacotaki na noqu vakabauta mai na “levu ni kena ivakadinadina [au sa] ciqoma.”

A kaya ena dua na gauna o Elder Jeffrey R. Holland vei ira era sasaga dredre tiko ena nodra vakabauta: “Sa na levu cake na nomu vakabauta mai na kena o nanuma ni tiko vei kemuni baleta na iVola i Momani e vakatoka ‘na levu ni kena ivakadinadina’ [Ilamani 5:50]. … Na vua ni bulataka na kosipeli sa vakadinadinataki tu ena nodra bula na Yalododonu Edaidai ena veivanua kecega” (“Turaga, Au sa Vakabauta,” Ensign se Liaona, Me 2013, 94). Ni o wilika na veitikina oqo, vakasamataka eso na ivakadinadina sa solia vei iko na Turaga. Me kena ivakaraitaki, e rairai o se bera mada ga ni rogoca dina na domo ni Turaga, ia o sa vakila beka na “vakasolokakana” mai vua na Yalo Tabu “sa laubasikata sara na yalodra”? (Ilamani 5:30; raica talega na VV 88:66). E rairai o sa butobuto beka, tagi kina vua na Kalou me levu cake nomu vakabauta, ka sa “vakasinaiti ena reki e rui lagilagi ka sega ni tukuni rawa” (Ilamani 5:40–47). Na veika cava tale eso o sa sotava sa vaqaqacotaka na nomu vakabauti Karisito kei na nona kosipeli?

iVakatakilakila

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou vata kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Ilamani 3:27–30

Me vaka e a vakalekalekataka na parofita o Momani na ivola tukutuku tabu, e dau vakayagataka na malanivosa “eda sa raica” me vakabibitaki kina na dina bibi. Na cava e a vinakata me da raica ena Ilamani 3:27–30? Ena macawa oqo ni nomu vuli, mo cegu mada ena so na gauna me ra kerei na lewe ni matavuvale sala mera vakacavara kina na malanivosa “Ia eda sa raica” me baleta na veika era sa wilika. Na dina cava soti beka era via vakabibitaka?

Ilamani 5:6–7

A rairai vei Peresitedi George A. Smith, ena tadra na tukana sa mate o George A. Smith, ka taroga, “Au via kila se cava o sa bau cakava me baleta na yacaqu.” A sauma lesu o Peresitedi Smith,“Au sega ni cakava e dua na ka ena yacamu ka me vakamaduataki iko” (ena Nodra iVakavuvuli na Peresitedi ni Lotu: George Albert Smith [2011], xxvi). Ni wiliki oti na Ilamani 5:6–7, sa rawa mo vosa vei iratou nomu lewe ni matavuvale me baleta na nanuma ka rokova na yaca eda kauta voli kina, oka kina na yaca ni iVakabula.

Ilamani 5:12

Me vukea na nomu matavuvale ka raitayalotaka na cava na ibalebale ni “dua na yavu dei,” e rairai o rawa mo tara vata kina e dua na vale ka lailai ka biuta toka ena veimataqali yavu. Qai rawa mo bulia e dua na “cava kaukauwa” ena nomu sipereitaka kina na wai ka vakayagataka e dua na iri ni cagi se draya ni ulu me ra vakavuna na cagi. Na cava a yaco ki na vale ni vakatikori ena yavu duidui? Sa yaco vakacava o Jisu Karisito me vaka e “dua na yavu dei” ena noda bula?

Ilamani 5:29–33

Na gauna cava eso eda sa kila vinaka kina na domo ni Kalou ki na noda bula?

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au — Me Baleta na Lalai.

Vakatorocaketaki ni Vuli ni Tamata Yadudua

Mo dau vosoti iko vakataki iko. Na yavu ni vakabauta e tara cake vakayadudua na tikina yadua. Kevaka o raica ni so na ivunau e dredre tiko me kilai ena gauna oqo, vosota toka. Nuitaka ni na yaco mai na kila ka me vaka ni o tara na nomu yavu vei Jisu Karisito ena nomu vakabauta kei na vuli vagumatua.