sorenikau e ligana na gone

13–19 ni Julai

Alama 32–35

“Tea na Vosa Oqo e Lomamuni”

Vola na veivakauqeti vakayalo o ciqoma ena nomu vulica na Alama 32–35. Na cava o vakauqeti mo cakava ena veika o sa vulica?

Vola na Veika o Uqeti Kina

O ira na Soramaiti, na masu e dua na ka e baleti ira ga, dua tu ga na kena ivakarau ka dau yaco vakadua e veimacawa. Sai koya mo tu ena vanua e rawa ni ra raici iko kece kina na tamata ka tokaruataka na veimalanivosa sega na betena, me ra lomavinaka ga kina. E rairai qai ca vakalevu cake kina, ni lailai nodra vakabauti Jisu Karisito na Soromaiti—era cakitaka na Nona bula—ka ra vakacacani ira na dravudravua (raica na Alama 31: 9–25). Na kena veibasai, erau vakavulica vakadoudou o Alama kei Amuleki ni masu e baleta vakalevu cake na veika e vakila na yaloda mai na veika e rairai e matana votu. Ia kevaka e sega ni veimuataki ki na yalololoma vei ira era vakaleqai tu, sa “tawayaga, ka sa sega na kena yaga vei kemuni” (Alama 34:28). E bibi duadua, ni dua na ivakaraitaki ni vakabauti Jisu Karisito, o koya e solia tu na veisereki ena vuku ni nona “isoro tawayalani ka tawamudu” (Alama 34:10). Na vakabauta vakaoqo, e vakamacalataka o Alama, e vua ni yalomalua kei na “gadreva [me da] vakabauta” (Alama 32:27). E tubu vakamalua, me vaka e dua na vunikau, ka gadreva tikoga me vakani. Ni o wilika na Alama 32–35, ko na vakananuma beka na nomu vakabauta kei na masu; o bau vakila beka ni curu malua mai e dua na ivakarau ni vakasama vaka-Soromaiti? Mo vakabulabulataka vakacava nomu vakabauti Jisu Karisito me rawa ni yaco me “rawata kina na bula tawamudu”? (Alama 32:41).

ivakatakilakila ni vuli yadua

Vakasama eso ni Vuli iVolanikalou Yadua

Alama 32:1–16

E rawa niu digitaka meu yalomalumalumu.

E raica o Alama ni o ira na Soromaiti dravudravua era sa yalomalumalumu ka ra sa “vakavakarau tu me ra rogoca na vosa” (Alama 32:6). Ni ko wilika na Alama 32:1–16, vakasamataka mada na sala o vakavakarau kina mo rogoca na vosa ni Kalou.

Na cava o sotava sa vakayalomalumalumutaki iko? Na cava o sa vakayacora mo yalomalumalumu vakalevu cake kina? Na tikina eso oqo e rawa ni vakavulici iko ena ivakarau mo digitaka kina na yalomalumalumu ka sega ni vakasaurarataki mo yalomalumalumu. Me kena ivakaraitaki, na cava na kena duidui ni ra “sa dravudravua ena iyau vakavuravura” ka ra sa “yalomalumalumu”? (tikina e 3). Na cava na kena ibalebale me ra “vakayalomalumalutaki ira vakataki ira ena vuku ni vosa”?(tikina e 14).

Raica talega na “Humility,” ena Gospel Topics, topics.ChurchofJesusChrist.org..

Alama 32: 17–43; 33–34

Au cakacakataka noqu vakabauti Jisu Karisito ena noqu tea ka susuga na Nona vosa e yaloqu.

Na cava na vuna o nanuma ni cavuta kina o Alama na tei sorenikau me sauma nodra taro na Soromaiti baleta na sokalou? Na cava na kawa ka tukuna tiko o Alama? (raica na Alama 32:28; 33:22–23). Ni ko wilika na Alama 32: 17–43, mo raica na vosa kei na malanivosa e vukei iko mo kila na iwalewale me ra cakacakataki kina na vakabauti Jisu Karisito kei na Nona vosa. Na cava o sa vulica se cava na vakabauta kei na cava e sega? Oti o ya, ni o wilika na wase 33–34, vakasaqara na isau ni nodra taro na Soramaiti, “Me [da tea] vakacava na sorenikau?” (Alama 33:1).

Oqo e dua tale na sala me vulici kina na Alama 32–34: Droinitaka na iyaloyalo eso e matataka na duidui itabagauna ni kena tubu e dua na sorenikau. Qai vakabira ena iyaloyalo yadua na veimalanivosa mai na Alama 32:28–43 sa vukei iko mo kila na ivakarau mo tea ka susuga kina na ivunau e yalomu.

Raica talega na Maciu 13:3–8, 18–23; Iperiu 11; Neil L. Andersen, “Na Vakabauta e Sega ni Ka Vakacalaka, Ia e Digitaki,” Ensign se Liaona, Nove. 2015, 65–68; “Vakabauti Jisu Karisito,” Gospel Topics, topics.ChurchofJesusChrist.org.

Alama 33:2–11; 34: 17–29

Au rawa ni qarava na Kalou ena masu, gauna cava ga kei na vanua cava ga.

Na ibalebale ni nodrau ivakasala o Alama kei Amuleki baleta na sokalou me vakadodonutaki kina na cala ni nodra vakasama na Soromaiti (raica na Alama 31:13–23). Ia na dina e rau vakavulica e rawa ni vukei keda kece me da kila na masu ka sokalou vakavinaka cake. Ena rawa beka ni o cakava e dua na ituvatuva ni dina me baleta na masu o kunea ena Alama 33:2–11 kei na 34:17–29. Me tarava na ituvatuva o ya, vola e dua na ituvatuva ni so na vakasama cala baleta na masu ka vakadodonutaka na dina eso oqo (raica na Alama 31: 12– 23). Ena laki tara vakacava na ivakarau ni nomu masu kei na sokalou na veika o vulica mai na veitikina oqo?

Alama 33:3–17

O cei o Sinosi kei Sinoki?

Ko Sinosi kei Sinoki e rau parofita ni gauna makawa ka rau a vakadinadinataki Jisu Karisito ena gauna ni Veiyalayalati Makawa, ia e sega ni kunei ena Veiyalayalati Makawa na nodrau ivakavuvuli. Era a kunea na nodrau ivakavuvuli na parofita oqo o ira na Nifaiti, baleta beka ni ra a tu talega ena peleti parasa a rawata o Nifai mai vei Lepani. Era tukuni talega ena 1 Nifai 19:10–12; Jekope 5:1; kei na Ilamani 8:19–20.

Alama 34:30-41

“Na bula oqo sa koya na gauna … me vakarau sota kei na Kalou.”

Ni ko wilika na Alama 34:30–41, vakasamataka na sala e rawa ni o “vakavinakataka [kina] na [nomu] gauna ena bula oqo” (tikina 33). E rawa vakacava ni vukea nomu vakarau mo sota kei na Kalou na veivutuni kei na vosota vakadede? E tiko beka eso na veisau o gadreva mo cakava o qai lokuyarataka tiko? Raica mo cakava e dua na veivakauqeti vakayalo o ciqoma.

Raica talega na Alama 12:24; Larry R. Lawrence, “Na Cava Tale sa Vo Vei Au?” Ensign se Liaona, Nove. 2015, 33–35.

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Alama 32:9–11; 33:2–11; 34:38–39

Ena vakacava beka kevaka e vakatarai vei keda me da qai sokalou ga ka masu ena Sigatabu? Ni o ni wilika vata na veitikina oqo, e rawa ni ra veivosakitaka na lewe ni matavuvale na sala e rawa ni ra sokalou kina e veisiga kei na vuna era vakavinavinakataka kina ni rawa.

Alama 32:28–43

E dua na iyaloyalo ni dua na vunikau e salavata kei na ituvatuva oqo; e rawa ni o vakayagataka me vakamacalataka na vosa nei Alama ena veitikina oqo. Se e rawa ni o dou taubale vakamatavuvale ka raica mai na kau ena duidui ni itababula ka wilika na tikina eso mai na Alama 32 qai vakatauvatana e dua na kau e bula tiko kei na noda vakabauta. E rawa beka ni ra tea na lewe ni matavuvale yadua e dua na sorenikau ka veivosakitaka na veika eda rawa ni cakava me vukea na kena tubu. Ena veimacawa sa roro mai e rawa ni o raica na nomu sorenitei ka veivakananumi vakai kemuni me da vakabulabulataka tikoga noda vakadinadinataki Jisu Karisito.

Alama 33:2–11; 34: 17–29

Na cava era vakatura na veitikina oqo me baleta na sala e rawa ni da vakavinakataka kina na noda masu yadua kei na masu vakamatavuvale?

Alama 34:31

Na veika cava soti eda sa sotava sa vakaraitaka vei keda ni gauna ga eda veivutuni kina, sa tekivu “ena gauna vata ga” me da sotava na veivakalougatataki ni ituvatuva ni veivakabulai?

Alama 34:33–35

E kila beka nomu matavuvale na ibalebale ni lokuyara? E rawa beka ni dua e wasea na ivakaraitaki ni lokuyara kei na kena revurevu ca. Na cava na kena ibalebale me da “lokuyarataka [noda] siga ni veivutuni”?

Me baleta eso tale na vakasama ni nodra vakavulici na gone, raica na ituvatuva ni macawa oqo ena Lako Mai, Mo Muri Au—Baleta na Lalai.

Vakatorocaketaki Noda Veivakavulici

Droinitaka na iyaloyalo. Mo laivi ira beka na lewe ni matavuvale me ra droini ni ra vuli tiko mai na ivolanikalou. Me kena ivakaraitaki, era na marautaka beka me ra droinitaka e dua na sorenikau ni tubu tiko me laki dua na vunikau ena nodra vulica na Alama 32.

na vuanikau e vuna

“Ena vuku ni nomuni gugumatua kei na vakabauta kei na vosota, na vosa ka vakabulabulataka, … raica, qai yaco na gauna mo ni na betia na vuana ko ya, na ka sa taleitaki duadua” (Alama 32:42).