“22–28 ni Jiune. Alama 17–22: ‘Au na Qisi Kemudou Mo Dou iYaya ni Cakacaka,’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)
“22–28 ni Jiune. Alama 17–22,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
Amoni kei Tui Lamonai, mai vei Scott M. Snow
22–28 ni Jiune.
Alama 17–22
“Au na Qisi Kemudou Mo Dou iYaya ni Cakacaka”
Ni o wilika na Alama 17–22, vola na veivakauqeti e yacovi iko ka qai cakacakataka sara. Ni o cakava vakakina ena vakaraitaka vua na Turaga na nomu lomasoli mo ciqoma na ivakatakila ni tamata yadua.
Vola na Veika o Vakauqeti Kina
Vakasamataka nai ulubale kece sara era na solia na tamata ni ra sega ni wasea rawa na kosipeli: “e sega ni veirauti na noqu kila” se “au sega ni kila se ra na makutu na rogoca” se “Vakacava kevaka au na vakacudrui ira?” Ena rawa beka ni o raica ni via tautauvata beka na nomu nanuma ena so na gauna. E a tiko e dua tale na vuna ka ra sega ni via wasea kina na kosipeli kei ira na Lemanaiti o ira na Nifaiti: era a tamata “yalo kaukauwa ka itovo vakarerevaki; na mata tamata dau rekitaka me labati ira na Nifaiti” (Alama 17:14; raica talega na Alama 26:23–25). Ia o ratou na luvei Mosaia e kaukauwa cake na inaki eratou vakila ni dodonu me ratou na wasea na kosipeli kei ira na Lemanaiti: “Era sa gadreva me tukuni yani na veivakabulai vei ira na tamata kecega, ka ni ra sega ni vinakata me rusa e dua na yalo ni tamata” (Mosaia 28:3). Na loloma e vakauqeti Amoni kei iratou na tacina ena rawa ni vakauqeti iko talega mo wasea kei ira na nomu vuvale, itokani, kei ira nomu veikilai na kosipeli—o ira sara madaga era na rairai beka me ra na sega ni ciqoma.
Vakasama eso ni Vuli iVolanikalou Yadua
Niu vaqaqacotaka na noqu vakabauta, au na rawa ni wasea vakavinaka cake na kosipeli.
O sa bau sota tale kei ira na itokani makawa ka vakila na veika a vakila o Alama—na reki vakalevu sara ni ra sa dina tikoga ena vakabauta? (see Alama 17:1–2). Na cava o vulica mai vei iratou na luvei Mosaia me baleta na nomu rawa ni maroroya na nomu vakabauta kei na yalayala ki na kosipeli me kaukauwa tikoga? Ni o vakasamataka vakatitobu na kaukauwa vakayalo e tiko vei iratou na luvei Mosaia, na cava o vakauqeti kina mo cakava?
E a vukea vakacava na nodratou vakavakarau vakayalo na luvei Mosaia na nodratou cakacaka kei ira na Lemanaiti? Ena rawa beka ni o vakayagataka na madigi oqo mo vakadikeva kina na nomu sasaga mo vakavulica na kosipeli “era sa vakatavuvuli ena kaukauwa ni Kalou” (Alama 17:3).
Au rawa ni dua na iyaya ni cakacaka ena liga ni Kalou me kauta mai vei ira na Luvena na veivakabulai.
E kaya o Peresitedi Thomas S. Monson, “Au dau vinakata tu ga me kila na Turaga kevaka e gadreva o Koya e dua na cakacaka me vakayacori, o Tom Monson ena vakayacora na cakacaka oya vei Koya” (“On the Lord’s Errand: The Life of Thomas S. Monson,” vidio, ChurchofJesusChrist.org). Ni o wilika na Alama 17:6–12, vakasaqara na veika eratou vakayacora na luvei Mosaia me rawa ni ratou iyaya ni cakacaka ena liga ni Kalou. Ena rawa beka vakacava mo iyaya ni cakacaka ena liga ni Kalou me vakalougatataki ira kina na tani? Na cava o vulica mai na nodratou ivakaraitaki ka sa solia vei iko na yaloqaqa mo cakava na veika e gadreva na Turaga mo cakava?
Raica talega na Dallin H. Oaks, “Wasea na Kosipeli Vakalesui Mai,”,” Ensign se Liaona, Nove. 2016, 57–60.
Au rawa ni vukei ira na tani me ra vakavakarau me ciqoma na kosipeli.
E nodra iliuliu na “mata tamata kila, yalo kaukauwa ka itovo vakarerevaki” o Lamonai (Alama 17:14), ia, e a uabaleta na veiyabaki ni itovo vakavanua ni nodra qase ka ciqoma na kosipeli i Jisu Karisito. Ni o wilika na veivosaki i Amoni kei Lamonai, vakaraica na veika e a vakayacora o Amoni ka rawa kina ni a veivuke vei Lamonai me rawa ni ciqoma kina na nona itukutuku. Kevaka e yaco mai vei iko na vakasama eso me baleta na sala e rawa ni o wasea kina na kosipeli kei ira na tani, vola na veivakauqeti oqori.
Ena rawa talega ni veivuke mo makataka se vola na dina eso e a vakatavulica o Amoni vei Lamonai (raica na Alama 18:24–39) kei na dina eso a vakavulica o Eroni vei tamai Lamonai (raica na Alama 22:1–16). Na cava era vakatura vei iko na veitikina oqo me baleta na dina eso o rawa ni wasea kei ira na tani me vukei ira me ra vakasaqara e dua na ivakadinadina ni kosipeli?
Minerva K. Teichert (1888–1976), O Amoni e Vakabula na Qele ni Sipi ni Tui, 1935-1945, iboro waiwai ena papa masonite, 35 x 48 na idi. Brigham Young University Museum of Art
Na noqu ivakadinadina e rawa ni veivakayarayarataki vakayawa sara.
E dina ni itukutuku eso ni saumaki mai eda wilika ena ivolanikalou e vakavuqa dau okata na veika lelevu e yaco, ia ena lomadonu ni veika oqori eda dau raica kina eso na tamata yadua ka tu vei ira na yaloqaqa me vosa cake mai ka wasea na nodra ivakadinadina vei ira na tani. E dua na sala me vulici kina na veika e yaco ena Alama 18–22 sai koya mo vakasaqara na veivakayavalati-yawa ni dua na tamata ka wasea tiko nona ivakadinadina. Ena rawa beka ni o vola na veika o kunea ena dua na ituvatuva me vakaoqo:
|
E wase na kosipli o Amoni vei , o koya a qai wasea na kosipeli vei , ka qai kena macala na . |
E sa dodo tu na liga ni Turaga ki vei au niu veivutuni.
Ni sa cava na itukutuku ni nona saumaki mai o Lamonai, e a vakatavulica o Momani e dua na tiki bibi ni itovo ni Turaga. Na cava e vakatura na Alama 19:36 vei iko me baleta na itovo ni Turaga? Na gauna cava o sa bau vakila kina ni sa dodo tu vei iko na liga ni Turaga? E rawa ni o vukei ira vakacava o lomana me ra vakila na Nona loloma veivueti?
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Alama 17–19
Ena rawa vakacava ni o vakayacora me bula ena nomu vuvale na itukutuku ni veiwase oqo? E rawa ni dou vakatasuasuataka na italanoa ni nona taqomaka tiko na sipi o Amoni se na italanoa kei Apisi ena nona soqoni ira vata mai na lewe vuqa me ra vakadinadinataka na kaukauwa ni Kalou. Ena rawa beka ni ra droinitaka na lewe ni vuvale na iyaloyalo e so ni veitikina duidui ena italanoa ka vakayagataka na iyaloyalo oqori me tukuna na italanoa. Na cava ena rawa ni cakava nomu vuvale me vakamuria na ivakaraitaki nei Amoni kei Apisi?
Alama 18:24–39
Ena rawa beka ni ra wilika vata na nomu lewe ni vuvale na Alama 18:24–39 ka raica na dina e so a vakavulica o Amoni vei Lamonai. Na cava beka na vuna e vakatavulici Lamonai taumada kina na veika dina oqo o Amoni? Na cava e bibi kina vei keda me dua na noda ivakadinadina me baleta na veika oqo?
Alama 20:8–15
Na cava eda rawa ni vulica mai na veika a qai tukuna vei tamana o Lamonai? Eda rawa ni vakamuria vakacava na ivakaraitaki i Lamonai ena noda tutaka na veika dina ka dodonu? (Me baleta eso na ivakaraitaki, raica na vidio na “Bolea mo Tu Duadua” ena ChurchofJesusChrist.org.)
Alama 22:15–18
Rai lesuva na Alama 20:23 mo raica na veika a lomasoli me solia tani na tamai Lamonai me rawa ni vakabulai kina. Qai rai lesuva na Alama 22:15 ka raica na veika a lomasoli me solia tani me rawa ni ciqoma kina na reki ni kosipeli. Na cava a lomasoli taka me solia tani me rawa kina ni kila na Kalou? (raica na tikina 18). Ena rawa beka ni ra vola yadua na nomu lewe ni vuvale e dua na ituvatuva me solia tani e dua na ka me rawa ni ra kila vinaka cake kina na Kalou.
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Raica mai ka bulataka na ivakavuvuli. E dina ni na sega beka ni veiganiti vei iko na ivakamatailalai ni talanoa ena ivolanikalou, na ivakavuvuli ena itukutuku eso oqo vakavuqa e na dau yaga. Ni o wilika na veika me baleti Amoni kei Eroni, na ivakavuvuli ni wasei ni kosipeli cava so o kunea?
E mata cake mai na watina na Tui o Lamonai, ka vakalagilagi Jisu. Io, Jisu Mo ni Vakacerecerei, mai vei Walter Rane