“1–7 ni Jiune. Alama 5–7: ‘Ko ni sa Vakila li na Veisau Levu Oqo e Lomamuni?’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2020 (2020)
“1–7 ni Jiune. Alama 5–7,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
Ko Ni Sega ni Guilecavi, mai vei Jon McNaughton
1–7 ni Jiune
Alama 5–7
“Ko Ni Sa Vakila Li na Veisau Levu Oqo e Lomamuni?”
Alama 5–7 e rawa ni vukei iko mo vakasamataka vakatitobu na tomani tiko ni nomu saumaki vei Jisu Karisito. Ni o wiliwili, vola na veika e vakavulici iko kina na Yalo.
Vola na Veika o Vakauqeti Kina
E a sega ni kila o Alama ni veisele vakavuniwai ni uto e yaco tu nikua, ka rawa ni veisosomitaka na uto vinaka kei na kena e tauvimate. Ia, e a kila o koya e dua tale na mataqali “veisau ni lomamuni” mana (Alama 5:26)—e dua ka solia kina vei keda na iVakabula e dua na bula vakayalo vou, me vaka na “sucu tale” (raica na Alama 5:14, 49). E a raica rawa o Alama ni veisau ni lomada oqo sai koya na ka e gadreva tu e vuqa vei ira na Nifaiti. Eso era vutuniyau ka so era dravudravua, eso era qaciqacia ka so tale era yalomalumalumu, eso era veibeitaki ka so era sotava na dredre ni veibeitaki (raica na Alama 4:6–15). Ia, era a gadreva kece me ra lako mai vei Jisu Karisito me ra vakabulai—me vakai keda kece. Kevaka eda sasaga tiko meda ulabaleta na qaciqacia se vosota tiko na dredre, na itukutuku nei Alama e tautauvata tikoga: “Lako mai ka kakua ni rere” (Alama 7:15). Laiva me veisautaka na iVakabula na yalo sa kaukauwa, ivalavala ca, se mavoa ki na dua e yalomalumalumu, savasava, ka vou.
Vakasama eso ni Vuli iVolanikalou Yadua
E dodonu meu sotava—ka vakila tikoga—e dua na yalo veisau levu.
Na taro titobu a taroga o Alama vei ira na tamata e Saraemala, ka kune ena Alama 5:14–33, ena rawa ni vukei iko mo liaca na yalomu ka kila vinaka nai balebale dina ni “veisau levu e lomamu” ena nomu bula taucoko. E a vakamacalataka o Peresitedi M. Russell Ballard na kena bibi na taro eso vakaoqo: “Au gadreva meu dau tarogi au vakawasoma na taro oqo, ‘Sa vakacava tiko beka oi au?’ E sa vaka na vakayacori ni dua na nomu veivakatarogi vuni.vakataki iko … Me idusidusi voli vei au donuya na railesu vuni oqo, au vinakata meu wilika ka vakasamataka vagumatua na veivosa kauwai e kune ena ikalima ni wase ni Alama” (“Lesu ka Ciqoma,” Ensign se Liaona, Me 2017, 64).
Navuca mo wilika na taro i Alama me vakaga o vakatarogi iko tikoga vakataki iko ka dikeva tiko na lomamu. O na vinakata beka mo vola na nomu nanuma ki na taro eso oqo. Na cava o vakauqeti kina mo cakava ena macala ni veivakatarogi oqo?
Raica talega na Dale G. Renlund, “Maroroi ni Yalo sa Veivutuni,” Ensign se Liaona, Nove. 2009, 97–99.
Na tisaipeli yadua i Karisito e dodonu me vakila na “veisau levu ni loma[na].”
Au na rawata na noqu ivakadinadina ni iVakabula kei na Nona kosipeli mai na Yalo Tabu.
E wasea na ivakadinadina mana o Alama me baleta na iVakabula kei na Nona kosipeli, ka vakamacalataka talega na nona rawata na ivakadinadina oya. Ena nona ivakadinadina, a sega ni tukuna o koya me baleta na veika a sotava ni raica ka rogoca e dua na agilosi (raica na Mosaia 27:10–17) ia a vakamacalataka ga na isau e qai sauma me kila kina vakataki koya na dina. Na cava o vulica mai na Alama 5:44–51 me baleta na sala a mai kila kina o Alama na dina? Ena rawa vakacava ni o vakamuria na nona ivakaraitaki ena nomu sasaga mo rawata se vaqaqacotaka kina na nomu ivakadinadina? Na cava o vulica me baleta na iVakabula mai na ivakavuvuli i Alama ena Alama 5:33–35, 48–50, kei na 57–60?
Na talairawarawa gumatua ena vukei au meu tikoga ena “sala sa basika ki na matanitu ni Kalou.”
Era a sega ni sotava tiko na tamata mai Kitioni na dredre vata ga era sotava tiko na tamata mai Saraemala, sa veivuke kina na Yalo vei Alama me raica na nodra gagadre ka vakavulici ira ena sala duidui (raica na Alama 7:17, 26). Sa rawa beka ni o raica eso na duidui mai na itukutuku nei Alama e Saraemala (raica na Alama 5) kei Kitioni. Me ivakaraitaki, a raica rawa o Alama ni ra sa tiko ena “sala sa basika ki na matanitu ni Kalou” (Alama 7:19). Ena nona vunauci ira tiko, a vakatavulica o Alama e vuqa na ka me baleta na nodra rawa ni tikoga ena sala oya (raica na Alama 7). Na ivakasala cava a solia o koya vei ira? Na cava o rawa ni cakava ki na nomu bula oqo?
Na iVakabula e a taura vei Koya na noqu ivalavala ca, mosi, kei na vakararawataki.
O sa bau vakila ni sega ni dua e kila vakavinaka tu na nomu sasaga kei na dredre? Kevaka e vakakina, na dina e vakatavulici ena Alama 7:7–16 ena rawa ni veivuke. E vakadinadinataka o Elder David A. Bednar: “Ia, na Luve ni Kalou ena raica ka kila vinaka tu, ni a sa vakila ka sotava oti na icolacola yadua. Baleta na Nona solibula tawa vakaicavacava ka tawamudu (raica na Alama 34:14), sa tu Vua na dodonu ka na rawa ni solia na Nona loloma ka dodoka na ligana dauloloma” (“Colata na Nodra iColacola ena Loloma,” Ensign se Liaona, Me 2014, 90).
Ni o wilika na Alama 7:7–16, vakasamataka vakatitobu na veika e sa vakavulica vei keda na veitikina oqo meda kila vakavinaka na inaki ni Nona solibula na iVakabula. Eda na yacova vakacava na Nona kaukauwa ena noda bula? Navuca mo vola na veika o nanuma.
Raica talega na Aisea 53:3–5.
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Alama 5:6–13
Na cava e vinakata kina o Alama me ra nanuma tiko na nona tamata na loloma ni Turaga vei ira na nodra qase? Na italanoa cava so mai na nomu tuva kawa e vakavulici iko me baleta na Nona loloma? Ena rawa beka ni o sikova yani na familysearch.org/myfamily mo vola kina na italanoa eso oqori.
Alama 5:14–33
Era na rawa ni kila na lewe ni nomu vuvale na ibalebale ni dau vakavakarau—se sega ni dau vakavakarau—ki na dua na ilakolako ni keba, veitarogi e koronivuli, se veivakatarogi ni dua na cakacaka. Na cava eso na veika eratou sa qai sotava oti ga ka rawa ni ratou wasea me vakaraitaka kina na bibi ni dau vakavakarau? E rawa ni sureti ira na lewe ni vuvale me ra railesuva na Alama 5:14–33 ka raica mai na veitaro a taroga o Alama me vakarautaki ira na nona tamata me ra sotava na Kalou. De rawa beka ni digia yadua na taro o ira na lewe ni vuvale ka wasea na sala cava ena rawa ni vukei keda kina meda sotava na Kalou. Ena rawa talega ni liligi wavokita tu na loma ni vale eso na taro nei Alama me rawa ni ra dau vakasamataka vakatitobu na lewe ni vuvale.
Alama 6:4–6
Na cava eso na inaki eda dau soqoni vata kina na Yalododonu? Eda na rawa ni cakava vakacava me na vuavuai vinaka ka veivukei vakalevu na noda gauna ena lotu vei keda kei ira na tani?
Alama 7:9–16
Na cava eda vulica ena veitikina oqo e vukei keda meda “kakua ni rere” (Alama 7:15) ena gauna eda gadreva kina meda veivutuni ka veisau? Na cava e vakatavulica vei keda na veitikina oqo me baleta na noda vuki yani vua na iVakabula ena gauna eda gadreva kina na veivuke? Na cava tale eso na ka eda sa cakava meda ciqoma kina na Nona veivuke? E sa vukei keda vakacava o Koya?
Alama 7:23
Ocei eda kila e ivakaraitaki vinaka ni itovo se ivakarau e tiko ena tikina oqo? Na cava e bibi kina meda tauyavutaka na ivakarau se itovo oqo?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Taroga na taro ka na vakauqeti ira na lewe ni vuvale me ra cakacakataka. Vakasamataka na taro eso e vakavuna me vakasamataka vakatitobu na nomu vuvale na sala e rawa kina me ra bulataka vakalevu cake na kosipeli. “E sega soti ni dau taro ni veitalanoa; e dau vakayagataki vakalevu me baleta na noda vakanananu titobu ni tamata yadua” (Veivakavulici ena iVakarau ni iVakabula, 31).
Noda Dautataro, mai vei Jay Bryant Ward