Ko ni Sega ni Guilecavi, mai vei Jon McNaughton

1–7 ni June.

Alama 5–7

“Ko ni sa Vakila Li na Veisau Levu Oqo e Lomamuni?”

Vakasamataka ena masumasu na ivakavuvuli ena Alama 5–7 o nanuma ni yaga vakavinaka sara vei ira na gone o vakavulica.

Vola na Veika o Uqeti Kina

Sureta na Veiwasei

Sureti ira na gone me ra wasea na veika era sa nanuma ni vulica me baleti Alama Lailai ena vica na macawa sa oti. Vakamacalataka ni oti nona saumaki mai o Alama, a vakavulica vei ira na gone na veika bibi baleta na kosipeli. Me ra wasea na gone na veika era kila baleta na veika a vakavulica.

Vakavulica na iVunau: Gone Sobu

Alama 5:44–48

Au na rawata na noqu ivakadinadina mai na Yalo Tabu.

O ira na gone o vakavulica era na tara cake vakataki ira na nodra ivakadinadina kaukauwa, ena gauna sara mada ga era se gone kina.

iTaviqaravi e Rawa ni Caka

• Vakayagataka e dua na iyaloyalo kei Alama Lailai (raica na Kato ni iYaloyalo Vakosipeli, naba 77) me railesuvi na italanoa ni nona sikovi koya mai na agilosi (raica na Mosaia 27). Qai kerei ira na gone me ra vakamacalataka na cava na ivakadinadina, ka vukei ira kevaka e gadrevi. Vakamacalataka ni a cakacakataka o Alama me rawata e dua na ivakadinadina ni oti nona sikovi koya na agilosi. Wilika vakamalua na Alma 5:46 me vakavica, ka sureti ira na gone me ra vakarogoca na veika a cakava o Alama kei na sala a kila kina na dina. (O na gadreva beka mo vakamacalataka ni lolo e kena ibalebale me kua na kana kei na gunu.)

• Vakaraitaka na iyaloyalo ni veika era dau tubucake vakamalua ka gadrevi me qarauni tiko e veigauna, me vaka e dua na kau tei se luve ni manumanu. Kerei ira na gone mera wasea na ivakarau eda qarauna kina na veika oqo ka vukea nodra tubu. Vakananuma vei ira ni sa dodonu talega me da qarauna tiko na noda ivakadinadina.

• Vakayagataka e dua na baluni se bera ni uvu me matataka na ivakadinadina ka uvuca ena veigauna kece o wasea kina e dua na ka ena vukea na tubu ni ivakadinadina. Vesuka na baluni ka solia wavoki, ka kerei ira na gone me ra wasea e dua na ka e rawa ni ra cakava me vukea na kena tubu na nodra ivakadinadina. Sureti ira na gone me ra droinitaki ira ni ra cakava tiko na ka e rawa ni vaqaqacotaka nodra ivakadinadina.

Ni da ciqoma na kosipeli, e vaka ni da tekivuna e dua na bula vou.

Alama 7:10–13

Na iVakabula e colata na noqu ivalavala ca, na mosi, kei na rarawa.

Na dina eso ena Alama 7:10–13 e rawa ni vukea nodra kila na gone ni kauwaitaki ira o Jisu Karisito ka rawa ni vukei ira.

iTaviqaravi e Rawa ni Caka

• Vakaraitaka vei ira na gone e dua na iyaloyalo kei Jisu. Vakamacalataka ni kila o koya na cava na mosi, na rarawa, se na rere. Wilika eso na vosa ena Alama 7:11–13 e vakamacalataka na veika a sotava na iVakabula, ka vakamacalataka na vosa eso era na sega beka ni kila na gone. Dusia ni rawa ni vukei keda o Jisu ka vakacegui keda ni da rarawa. Wasea na ivakarau sa vukei keda ka vakacegui keda kina na iVakabula.

• Kerei ira na gone me ra wasea na veigauna eso era a tauvimate se ra mosi se ra sotava e dua tale na leqa ka a vakavuna nodra rarawa. Wasea na nomu ivakadinadina ni sa sotava talega na iVakabula na veika oqori ka kila na ivakarau me vukei keda kina.

Alama 7:19–20

E sa dodonu na salatu lesu vei Tamada Vakalomalagi kei Jisu Karisito.

O na vakayagataka vakacava na ivakamacala i Alama ena salatu lesu vei Tamada Vakalomalagi me vukei ira na gone ni vulica me ra dau digidigi vinaka?

iTaviqaravi e Rawa ni Caka

• Wilika na Alama 7:19 vei ira na gone, ka vakamacalataka ni da digitaka na vinaka, eda sa tu kina ena salatu ka na kauti keda lesu vei Tamada Vakalomalagi. Solia vei ira na gone eso na digidigi se ivalavala (me vaka na yaloca vei ira na lewe ni matavuvale se nomu qaravi ira). Kerei ira me ra tukuna vei iko kevaka e vinaka na digidigi yadua ka na kauti keda lesu vua na Kalou se kevaka e ca ka na kauti keda tani mai Vua.

• Wilika na Alama 7:20 ka vukei ira na gone me ra kila na vosa eso ena veitikina oqo ka vakamacalataka na salatu lesu vua na Kalou. Droinitaka ena papa e dua na salatu dodonu mai vei keda ki vei Tamada Vakalomalagi. Qai droinitaka e dua na sala veiveveyaki yaco koso ka na kauti keda tani mai vua na Kalou. Sureti ira na gone me ra vakamurimuria na salatu ruarua ena nodra iqaqalo. Na salatu cava e vinaka cake? Vukei ira me ra vakasamataka na digidigi vinaka ka na vukea me ra tiko ga ena salatu dodonu.

Vakavulica na iVunau: Gone Qase Cake

Alama 5:12–14, 27–28, 57; 7:14–24

Sa dodonu meu sucu tale ka qai muria na salatu e lesu tale vua na Kalou.

Mo vukei ira vakacava na gone me ra kila na ibalebale ni sucu vou tale?

iTaviqaravi e Rawa ni Caka

• Vakaraitaka vei ira na gone na iyaloyalo ni dua na gonelailai, ka sureti ira me ra tukuna se dau vakacava na gonelailai ena gauna se qai sucu mai kina. Sureta e dua na gone me wilika na Alama 5:14 Me vukei ira na gone ni kila na ibalebale ni noda “sucu… vakayalo vua na Kalou,” kerei ira me ra vakasamataka se a vakacava tu o Alama Lailai ni se bera ni saumaki mai. A qai vakaevei e muri o koya? (Raica na Mosaia 27:23–32 kei na Alama 36:12–24.) Vakamacalataka ni gauna eda vakabauti Jisu Karisito kina ka bulataka na Nona kosipeli, e vaka ni da sa tekivuna e dua na bula vou, me vaka e dua na gonelailai.

• Wilika vata na Alama 7:19, ka vakamacalataka ni gauna eda sa sucu tale kina, sa dodonu me da muria “na sala sa basika ki na matanitu ni Kalou.” Vunia wavoki ena loma ni rumu na pepa ka volai tu kina na idusidusi vakaivolanikalou eso oqo: Alama 5:12–13, 27–28, 57; 7:14–16, 23–24. Sureti ira na gone me ra vaqara na pepa, raica na ivolanikalou, ka wasea na veika e vakavuvulitaka na ivolanikalou yadua me da cakava me da lesu tale kina ki na iserau ni Kalou.

Alama 5:14, 44–48

Au na rawata na noqu ivakadinadina mai na Yalo Tabu.

A sikovi Alama e dua na agilosi, ia a “vakatakila vua [na nona ivakadinadina] na Yalo Tabu” (Alama 5:46).

iTaviqaravi e Rawa ni Caka

• Wilika vata kei ira na gone na Alama 5:44–46. Na cava a cakava o Alama me rawata kina na nona ivakadinadina ni kosipeli? Solia vei ira yadua na gone e dua na tikinipepa ka sureti ira me ra tuva me ra cakava e dua na ka ena macawa oqo me vaqaqacotaka nodra ivakadinadina.

• Solia wavoki e dua na iloilo me ra qai raica kina na gone na kedra iyaloyalo ni o wilika na Alama 5:14. Na cava na kena ibalebale me da ucuya na iVakabula ena keda irairai? Wasea na gauna eso a tukuna se cakava kina e dua na tamata e dua na ka e a vakananuma vei iko baleta na iVakabula, ka kerei ira na gone me ra cakava vakakina.

Alama 7:10–13

Na iVakabula e colata na noqu ivalavala ca, na mosi, kei na rarawa.

Ni o vulica na Alama 7, vakananuma na ivakarau mo tara kina nodra vakabauti Jisu Karisito na gone me rawa kina ni ra gole Vua ena nodra vakatovolei.

iTaviqaravi e Rawa ni Caka

• Sureti ira na gone me ra wilika na Alama 7:11–13, ka vaqara na veika a sotava o Jisu Karisito. Era na rairai lomasoli me ra wasea na veika era sotava ni ra vakila tu na mosi, tauvimate, se na veivakararawataki. Me vaka na veitikina eso oqo, na cava na vuna sa tuvakarau kina na iVakabula me sotava na veika kece oqo? (Vakamacalataka ni “vukei” e kena ibalebale “me veivuke.”)

• Tukuna vei ira na gone me baleta na tauvimate, na mavoa, se so tale na veika rarawa o sa sotava, ka taroga kevaka era sa vakila e dua na ka e tautauvata. Wilika vata na Alama 7:11–13, ka dusia na veika a mai sotava o Jisu ena vukuda. Vukei ira na gone me ra vakasamataka na gauna a sotava kina na iVakabula na veika oqo, me vaka ena gauna a vakatovolei kina o Koya (raica na Maciu 4:1–11) se ena gauna a rarawa voli kina mai Kecisemani. Ena vukei keda vakacava meda kila ni sa kila vakavinaka tu o Jisu na dredre eso eda sotakaya? Wasea na nomu ivakadinadina me baleta na kaukauwa i Jisu me veivakacegui, veivuke, ka vakabulai keda.

Vakauqeta na Vuli e Vale

Sureti ira na gone me ra vakaliliga e dua na iyaloyalo kei Jisu ena dua na vanua me ra dau raica wasoma kina me vakananuma vei ira na veika era sa vulica me baleti Koya nikua.

Vakatorocaketaki Noda Veivakavulici

Mo qasenivuli va-Karisito vinaka cake. Ni o qasenivuli, sa ka bibi mo vakananuma na sala e rawa ni vakalevutaki cake kina nomu kaukauwa mo vukea nodra tara cake na gone nodra vakabauta na Tamada Vakalomalagi kei Jisu Karisito. Vakasamataka mo vakayagataka na taro ni dikevi koya vakaikoya ena tabana 37 ena Veivakavulici ena iVakarau ni iVakabula.