Vakatavulici ni Vunau Dina, mai vei Michael T. Malm

8–14 ni June

Alama 8–12

Ena Lako Mai ko Jisu Karisito Me Sereki Ira na Nona Tamata

Ni o wilika na veika erau vakavuvulitaka o Alama kei Amuleki vei ira mai Amonaia, na cava e vaka ni tautauvata kei ira na gone o vakavulica?

Vola na Veika o Uqeti Kina

Sureta na Veiwasei

Sureti ira na gone me ra vakamacalataka na ka era dau cakava na daukaulotu ka tukuna vei iko e dua na ka baleta e dua era kila e kaulotu tiko. Na cava era dau vakavulica vei ira na tamata o ira na daukaulotu? Vukei ira na gone me ra raica ni rau daukaulotu o Alama kei Amuleki ka rau a wasea na kosipeli vei ira na kai Amonaia.

Vakavulica na iVunau: Gone Sobu

Alama 8

Sa rawa niu wasea na kosipeli.

A lakova na vanua taucoko o Alama me vunautaka na kosipeli, ka vunau o Amuleki ena nona koro vei ira nona itokani kei na wekana. O na vukei ira vakacava na gone me ra muria nodrau ivakaraitaki ka wasea na kosipeli vei ira na tani?

iTaviqaravi e Rawa ni Caka

• Wilika vata na imatai ni veimama ni “Chapter 22: Alma’s Mission to Ammonihah” (Book of Mormon Stories, 58–63; raica talega na kena vidio ena ChurchofJesusChrist.org). Sureti ira na gone me ra veitauri liga veisasa ka vaka ni o ira o Amuleki kei Alama, ka rau a vakavulica vata na kosipeli, ni ra lagata e dua na sere baleta na cakacaka ni kaulotu, me vaka na “I Want to Be a Missionary Now” (Children’s Songbook, 168).

• Vukei ira na gone me ra tokaruataka vakavica e dua na dina vakosipeli, me vaka “Na iVola i Momani e Vakadinadinataki Karisito” se “Au Kila ni Lomani Au ko Jisu.” Qai sureti ira yadua na gone me ra vakatovolea me ra wasea na dina oqo vua tale e dua ena kalasi. Me tiki ni itaviqaravi oqo, e rawa ni o vukei ira na gone oqo me ra vakaotia na itaviqaravi ni macawa oqo.

• Kerei ira na gone me ra tukuna vei iko baleta e dua na ka era a wasea vua e dua na lewe ni matavuvale se dua na itokani—me vaka na vakatatalo se na loli. Vukei ira me ra tuva eso na ka bibi e rawa ni da wasea kei ira tale eso baleti Jisu Karisito. Vakamacalataka me vaka ni sa rui ka bibi sara na kosipeli, a lako o Alama me wasea vei ira na tamata ena vuqa tale na veikoro lelevu me rawa ni ra kila na sala me ra marau kina.

Alama 8:18–22

E rawa niu dua na itokani vinaka.

Nona veiqaravi o Amuleki vei Alama e ivakaraitaki vinaka vei ira na gone ena ivakarau e rawa ni ra lomani ira ka qaravi ira kina na tani.

iTaviqaravi e Rawa ni Caka

• Sureta e dua na gone me vaka ni o koya o Amuleki kei na dua tale na gone me vaka ni o koya o Alama ni o tukuna na italanoa ena Alama 8:18–22. Me ra qai veivuke na gone ena talanoataki ni italanoa, ka sureti ira eso tale na gone me ra Alama kei Amuleki. A itokani vinaka vakacava nei Alama o Amuleki? Kerei ira na gone me ra tukuna na sala a itokani kina vei ira e dua. Na cava beka era a vakila ena veika era sotava? Na cava na vuna e vinakata kina na Kalou me da itokani vinaka vei ira tale eso?

• Raica se droinitaka e dua na iyaloyalo me matataka na veitokani (me vaka nodrau veimokomoko e rua se dua na uto), ka qai kotiva me tiki ni pasela. Ena daku ni tikina yadua vola e dua na ka erau a cakava o Alama kei Amuleki me rau veitokani vinaka se na veika eda rawa ni cakava me da itokani vinaka. Sureti ira na gone me ra veivukevuke me ra digitaka e dua na tikina ka vakasotara ki na pasela ni o wilika na ka e volai tu e dakuna. Vukei ira me ra vakasamataka na tamata e rawa ni nodra itokani. Vakadinadinataka ni o Jisu Karisito na itokani cecere duadua e rawa ni noda.

E rawa ni da itokani vinaka vei ira tale eso.

Alama 11:43–44

Ni oti na mate, au na tucaketale.

E vakavulica vei ira mai Amonaia o Amuleki me baleta na Tucaketale. Ena rawa vakacava ni o vukei ira na gone o vakavulica me ra kila na ibalebale ni tucaketale?

iTaviqaravi e Rawa ni Caka

• Vakayagataka na ligamu me matataka na yalo, kei na dua na qaniliga me matataka na yago. Kauta tani na ligamu mai na qaniliga me vakaraitaka vei ira na gone ni na veitawasei na yaloda kei na yagoda ena gauna eda mate kina. Qai biuta tale na ligamu ki na loma ni qaniliga me vakaraitaka ni na vakaduavatataki tale na yaloda kei na yagoda ena Tucake tale. Me ra veivukevuke na gone ena nodra dara ka luvata na qaniliga ni o wilika na Alama 11:43 vei ira. Vakaraitaka na iyaloyalo i Meri kei Jisu Karisito sa Tucake Tale mai na Mate (Kato ni iYaloyalo Vakosipeli, naba 59), ka vakadinadinataka ni o Jisu Karisito sa rawata vei keda kece na tucake tale.

• Sureti ira na gone me ra droinitaka na iyaloyalo kei nodra itokani se lewe ni matavuvale, oka kina na isema ni matavuvale. Ni ra wasea na gone na nodra droini, dusi ira yadua na itokani kei na lewe ni matavuvale era droinitaka ka vakamacalataka ni na vakaturi cake tale o koya. Vakadinadinataka ni baleti Jisu sa rawa kina vei keda me da tiko vata me tawamudu kei na noda matavuvale.

Vakavulica na iVunau: Gone Qase Cake

Alama 8:10

Sa rawa niu wasea na kosipeli.

Erau wasea o Alama kei Amuleki na kosipeli, ena gauna sara mada ga a sega kina ni rawarawa. Ena vakauqeti ira beka vakacava na gone o vakavulica na nodrau yaloqaqa kei na vakabauta?

iTaviqaravi e Rawa ni Caka

• Ena nomu vosa ga, vakalekalekataka na veika a yaco ena Alama 8–10. Digitaka e vica na ivakavuvuli mai na veika a yaco oqo ka rawa ni vukei ira na gone me ra wasea na kosipeli, me vaka na vosota vakadede (raica na Alama 8:8–13), vakadinadinataki Karisito (raica na Alama 9:26–27), kei na vakaitokani (raica na Alama 10:7–11). Sureti ira na gone me ra wilika na veitikina digitaki ka tukuna na veika era sa vulica me baleta na wasei ni kosipeli. Cava na vuna sa rui bibi kina me da tukuna vei ira tale eso na kosipeli?

• Sureti ira na gone me ra wasea na veika era sotava ena nodra wasea na kosipeli vua e dua, se wasea na veika o sa sotava. Sureti ira na gone me ra vakarogoca na sala eso e rawa ni ra vakarau kina me ra wasea na kosipeli ni ra lagata e dua na sere baleta na cakacaka ni kaulotu, me vaka na “We’ll Bring the World His Truth” (Children’s Songbook, 172). Cava na vuna e vinakata kina na Tamada Vakalomalagi me da wasea na kosipeli? Vukei ira na gone me ra tuva na sala me ra wasea kina na kosipeli vei ira nodra itokani, me vaka nodra solia vei ira e dua na iVola i Momani se sureti ira ki na dua na itaviqaravi ni Lotu. Solia vei ira na gauna me ra matanataka na ka era na tukuna se cakava ena veigauna vakaoqo.

Alama 11–12

Na ituvatuva ni Kalou e sa ituvatuva ni veisereki.

O na vakayagataka vakacava na Alama 11–12 me ra “[kila] kina na [gone] na ituvatuva ni veisereki”? (Alama 12:30).

iTaviqaravi e Rawa ni Caka

• Vola ena papa ni volavola eso na ivakavuvuli e semati ki na veivueti era kunei ena Alama 11–12, me vaka na Lutu i Atama, na Veisorovaki i Jisu Karisito, na veivutuni, mate, tucake tale, kei na veilewai. Wilika e vica na tikina mai na Alama 11 se 12 e vakavulica na ivakavuvuli eso, ka solia na gauna vei ira na gone me ra droinitaka e dua na iyaloyalo me matataka na ivakavuvuli yadua. Na cava na itavi ni iVakabula ena ituvatuva oqo? Qai sureti ira na gone me ra vakayagataka na kedra iyaloyalo me ra matanataka nodra vakavulica e dua na itokani baleta na ituvatuva ni Kalou.

Alama 12:10

Kevaka au sega ni vakaukauwataka na yaloqu, au na rawa ni ciqoma e levu cake na vosa ni Kalou.

Ena gauna me vulici kina na dina vakayalo, na ituvaki ni yaloda e tautauvata sara ga na kena bibi kei na kaukauwa ni noda vakasama.

iTaviqaravi e Rawa ni Caka

• Wilika vata na Alama 12:10, ka veivosakitaka na cava na ibalebale ni “vakaukauwataka” na yaloda. Na cava na vuna ena dredre vakalevu cake kina noda vuli mai vua na Kalou ena yalo kaukauwa?

• Mo vakamacalataka na ivakavuvuli oqo, vakaraitaka vei ira na gone e dua na sipaji kei na dua na vatu ka taroga vei ira se o cei ena curuma vinaka cake na wai Me da vakaraitaka vakacava vua na Turaga ni da vinakata me malumu na yaloda me vaka na sipaji?

Vakauqeta na Vuli e Vale

Sureti ira na gone me ra vaqara na madigi me ra wasea na kosipeli se me ra vukea e dua tale ena macawa oqo.

Vakatorocaketaki Noda Veivakavulici

Wasea na nomu ivakadinadina ki na kalasi. Na ivakadinadina e rawa ni rawarawa sara me vaka “Au kila ni sa lomani keda yadua na Tamada Vakalomalagi” se “Au vakila na vinaka ni lomaqu niu vulica na veika e baleti Jisu Karisito.” (Raica talega na Veivakavulici ena iVakarau ni iVakabula, 11.)