Vosa tiko vei Tui Lamonai o Amoni

Amoni kei Lamonai na Tui, mai vei Scott M. Snow

22–28 ni June.

Alama 17–22

“Au na Qisi Kemudou Mo Dou iYaya ni Cakacaka”

Me vaka ga na nona sotava o Lamonai kei ira tale eso ena italanoa oqo na veika vakayalo e vakayaco veisau ena bula, e rawa talega ni ra sotava na gone o vakavulica na veika vakayalo ena ivolanikalou ka na vakayarayarataka tu na nodra bula ena veiyabaki sa bera mai. Nanuma tiko oqo ni o vakasamataka na veika mo vakavulica vei ira.

Vola na Veika o Uqeti Kina

ivakatakilakila ni veiwasei

Sureta na Veiwasei

Vakaraitaka na iyaloyalo ni dua na ka a yaco ena Alama 17–22 (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Kerea vei ira na gone me ra tukuna vei iko na veika era raica ena iyaloyalo.

ivakatakilakila ni veivakavulici

Vakavulica na iVunau: Gone Sobu

Alama 17–9

E rawa niu wasea na kosipeli vei ira tale eso.

Ena uqeta vakacava na nomu kalasi na nodra ivakaraitaki na luvei Mosaia me ra wasea na nodra ivakadinadina vei ira tale eso?

iTaviqaravi e Rawa ni Caka

• Vukei ira na gone me ra matanataka na italanoa i Amoni ena Alama 17–19. E rawa talega ni o goleva na “Chapter 23: Alma’s Mission to Ammonihah” (Book of Mormon Stories, 64-68, se na kena vidio ena ChurchofJesusChrist.org). Kevaka o nanuma ni ra na marautaka na gone, kauta mai na isulu kei na iyaya ni vakatasuasua rawarawa. Tukuna vei ira na gone na ka o vulica mai na italanoa, ka sureti ira me ra kitaka vakakina.

• Vakaraitaka e dua na iyaya ni ivakatagi se iyaya ni cakacaka, ka tukuna vei ira na gone e dau vakayagataki ena cava. Na iyaya cava tale era kila na gone? Sureti ira me ra vaka ni ra vakayagataka tiko e dua na iyaya ni cakacaka. Vakamacalataka me vaka ga ni da dau vakayagataka na iyaya eso ni cakacaka me qaravi kina na ka me caka, e rawa ni vakayagataki keda na Tamada Vakalomalagi me da cakava na Nona cakacaka. Wilika na Alama 17:11, ka vakamacalataka ni o Amoni kei iratou na tacina eratou a nona iyaya ni cakacaka na Tamada Vakalomalagi ena nodra vukei na Leimanaiti me ra vulica na kosipeli.

• Sureti ira na gone me ra cici ena vanua ga era tu kina ka vaka me ra tukituki ena veikatuba ni vale ni o tukuna tiko na italanoa kei Apisi ena nona tukuna vei ira na tamata baleta na kaukauwa ni Kalou (raica na Alama 19:16–34). Vukei ira na gone me ra vakasamataka na sala eso e rawa ni ra vakataki Apisi kina ka wasea na kosipeli vei ira na tani.

• Sureti ira na gone me ra droinitaka e dua na kedra iyaloyalo ni ra wasea tiko na kosipeli vua e dua. Vukei ira me ra vakasamataka eso na ka era rawa ni wasea. Lagata vata e dua na sere baleta na wasei ni kosipeli, me vaka na “I Want to Be a Missionary Now” (Children’s Songbook, 168). Solia vei ira e dua na madigi me ra wasea nodra nanuma ena veika a vakavuvulitaka o Amoni.

Alama 17:21-25; 20:9-27

Au rawa ni vukei ira na tani me ra lako mai vei Karisito ena noqu vakaraitaka vei ira na noqu loloma.

Na loloma kei na veiqaravi i Amoni a vakamalumalumutaka na yaloi Tui Lamonai kei na tamana. Na cava e rawa ni ra vulica na gone mai na veitukutuku oqo?

iTaviqaravi e Rawa ni Caka

• Vakalekalekataka na Alama 17:21–25 vei ira na gone, ka vakabibitaka ni a vinakata o Amoni me qaravi Lamonai. Sureti ira na gone me ra wasea na gauna eso era qarava kina e dua. Vakananuma vei ira na gone ni nona veiqaravi cecere o Amoni a vukea nona vinakata na Tui o Lamonai me vulica na kosipeli (raica na Alama 18:15–23). Sureti ira na gone me ra vakasamataka e dua e rawa ni ra qarava nikua, ka veivosakitaka na ivakarau e rawa ni ra qarava kina na tamata oya.

• Tukuna vei ira na gone na itukutuku ena Alama 20:8–27. E rawa ni o vakayagataka na “Chapter 24: Ammon Meets King Lamoni’s Father” (Book of Mormon Stories, 69-70, se na kena vidio ena ChurchofJesusChrist.org). Kerei ira na gone me ra vakasamataka na ivukivuki duidui e rawa ni ra cakava ena veigauna o cavuta kina na Amoni, Lamonai, se tamai Lamonai. Dusimaka ni dua na vuna e veisau kina na yaloi Lamonai baleta ni sa rui lomani Lamonai o Amoni. Sureti ira na gone me ra droinitaka na iyaloyalo ni dua na ka e rawa ni ra cakava me ra vakaraitaka kina nodra lomana e dua.

ivakatakilakila ni veivakavulici

Vakavulica na iVunau: Gone Sobu

Alama 17:1–4

E tubu na noqu ivakadinadina niu wilika na ivolanikalou, masu, ka lolo.

Era a tubu kaukauwa ena kosipeli na luvei Mosaia ka yaco me ra daukaulotu qaqa baleta ni ra dau vulica vagumatua na ivolanikalou, masumasu, ka lolo. Na veika vata oqo e rawa talega ni vukei ira na gone o vakavulica.

iTaviqaravi e Rawa ni Caka

• Kauta mai ki na kalasi na iyaya eso me matataka na ivolanikalou, na masu, kei na lolo, me vaka e dua na ivola ni ivolanikalou, na kena iyaloyalo e dua e masu tiko, kei na dua na iyaloyalo ni kakana, ka vakamacalataka se cava e matataki ena iyaya yadua. Wilika na Alama 17:1–4, ka taroga vei ira na gone se a vukei ira vakacava na luvei Mosaia na veika oqo. Ena vukei keda vakacava na wili ivolanikalou, na masu, kei na lolo me da toro voleka yani vua na Tamada Vakalomalagi?

• Vakayagataka na ituvatuva vakaiulutaga ni Children’s Songbook me vukei ira na gone me ra kunea na sere baleta na vuli ivolanikalou kei na masu. Lagata vata eso na sere oqo, ka vukei ira na gone me ra raica na sere cava e vakavulica ni na vakalougatataki keda na noda cakava na veika oqo.

Alma 17–18; 22:1–3

Au rawa ni vukei ira na tani me ra lako mai vei Karisito ena noqu vakaraitaka vei ira noqu loloma.

Nona gadreva o Amoni me dauveiqaravi i Lamonai a yaco kina na madigi me vakavulici Lamonai ena gauna sa tadola kina na yalona ka vakarau me ciqoma na kosipeli.

iTaviqaravi e Rawa ni Caka

• Vukei ira na gone me ra wilika na tikina eso mai na Alama 17:21–39 ka tukuna na itukutuku ni nona veiqaravi o Amoni vei Tui Lamonai. Sureti ira me ra droinitaka na kedra iyaloyalo na tamata kei na veika a yaco ena italanoa me ra qai talanoataka ena nodra vosa ga. Vukei ira na gone me ra raica na sala a vakayarayarataka kina na tui na nona veiqaravi o Amoni (raica na Alama 18:9–23). Na cava eda vulica rawa mai na italanoa oqo baleta na ivakarau me da vukei ira kina na tani me ra taleitaka ni vulica vakalevu na kosipeli?

  Vakabula o Amoni na nona sipi na tui

  Minerva K. Teichert (1888-1976), Vakabula o Amoni na Qele ni sipi ni Tui, 1935-1945, waiwai ena mesanaiti, 35 x 48 na idi. Univeisiti ni Cakacakaniliga na Brigham Young, 1969.

• Wilika na Alama 22:1–3, ka kerei ira na gone me ra rogoca na ivakarau e tara kina na yaloi tamai Tui Lamonai na ivakaraitaki vinaka i Amoni. Kerei ira me ra vakasamataka e dua era kila e gadreva tu me kila na kosipeli. Vakatura vei ira na gone ni nodra loloma kei na ivakaraitaki vinaka e rawa ni vukea na tamata oqo me raica na cecere ni kosipeli Vukei ira na gone me ra vakasamataka eso na sala me ra ivakaraitaki vinaka kina ka lomani ira na tamata era vakasamataka.

• Sureti ira na daukaulotu se dua se qai lesu wale mai ena kaulotu me wasea na italanoa kei Amoni ena Alama 17–18. Kerei ira me ra wasea na veika era vulica me baleta na cakacaka ni kaulotu mai vei Amoni kei na itavi ni veiqaravi ena nodra sasaga. Veivosakitaka vata kei ira na gone na sala eso e rawa ni ra muria kina na ivakaraitaki i Amoni.

• Vola vata vakalasi ena papa ni volavola na veika e rawa ni ra cakava na gone me ra qaravi ira kina na lewe ni nodra matavuvale. Ena vakalougatataka vakacava na matavuvale taucoko na ivalavala eso ni veiqaravi oqo?

Alama 18:24–43; 19:16–34

E rawa niu wasea na kosipeli vei ira tale eso.

O na rawa ni vakayagataka vakacava na italanoa eso ena veitikina oqo me vakauqeti ira na gone me ra daukaulotu me vakataki Amoni kei Apisi?

iTaviqaravi e Rawa ni Caka

• Vakaraitaka na iyaloyalo ni veika e matataka na dina a wasea o Amoni vei Tui Lamonai ka kunei ena Alama 18:24–40 (raica na tabana ni itaviqaravi ni macawa oqo). Sureti ira na gone me ra vaka ni ra daukaulotu ka veiwaseitaka vakai ira na ka era kila baleta na dina eso oqo.

• Wilika vata kei ira na gone na italanoa kei Apisi (raica na Alama 19:16–20, 28–29). Sureti ira na gone me ra veivukevuke me ra vakataki Apisi ena nodra tukituki ena katuba ni vale ni vuli ka vakadinadinataka na veika a yaco ena Alama 19:1–17. E rawa vakacava ni da vakataki Apisi ka vakadinadinataka na dina eda kila?

ivakatakilakila ni vuli

Vakauqeta na Vuli e Vale

Sureti ira na gone me ra masulaka vata kei na nodra matavuvale e dua na takete me ra wasea na kosipeli kivua e dua.

Vakatorocaketaki Noda Veivakavulici

Vakamuria na veisureti me caka. Ni o sureti ira na gone me ra cakava na ka era sa vulica tiko, taumuria na veisureti oya ena kalasi ka tarava. Oqo e vakaraitaka vei ira na gone ni o kauwaitaka na ivakarau e sa vakalougatataka tiko kina na nodra bula na kosipeli. Ni ra wasea na veika era sotava, era na vaqaqacotaki ka ra na veivukei vakai ira ni bulataka na kosipeli (raica na Veivakavulici ena iVakarau ni iVakabula, 35).

tabana ni itaviqaravi: Au rawa ni wasea na kosipeli vei ira na tani