Rau curu mai tuba ena valeniveivesu o Alama kei Amuleki.

iVakaraitaki ni nodrau sa sereki mai valeniveivesu o Alama kei Amuleki mai vei Andrew Bosley

Jiune 15–21

Alama 13–16

“Curuma Yani na Vakacegu ni Turaga”

E lekaleka wale nomu gauna kei ira na nomu lewe ni kalasi ena veimacawa. O na vakalougatataka vakalevu na nodra bula kevaka e rawa ni o uqeti ira tikoga me ra tomana nodra vuli mai na iVola i Momani ena taudaku ni kalasi—vakauasivi ena nodra matavuvale.

Vola na Veika o Uqeti Kina

ivakatakilakila ni veiwasei

Sureta na Veiwasei

Solia vei ira na gone na madigi me ra wasea na veika era sa kila rawa tiko baleta na italanoa ena Alama 13–16. Me vukei ira, vakaraitaka na iyaloyalo eso me vaka ena Lako Mai, Mo Muri Au—Baleta na Tamata Yadua kei na Matavuvale se “Chapter 22: Alma’s Mission to Ammonihah” (Book of Mormon Stories, 58–63).

ivakatakilakila ni veivakavulici

Vakavulica na iVunau: Gone Sobu

Alama 13:1–2; 6, 16

E vukei au na matabete meu lako mai vei Karisito.

Vakananuma vakatitobu ena masumasu na veika era gadreva me ra kila na gone ena nomu kalasi mai na veika a vakavulica o Alama baleta na matabete ena vetikina oqo.

iTaviqaravi e Rawa ni Caka

• Kerei ira na gone me ra tokaruataka vata kei iko e dua na ivakamacala rawarawa ni matabete, me vaka “na matabete na kaukauwa ni Kalou.”

• Cega na ivolanikalou ki na Alama 13:2, ka tukuna vei ira na gone ni kacivi ira na matabete na Kalou me ra “kila kina na tamata na ivalavala … me ra rai yani kina vua na Luvena.” Me vakaraitaka na ivakarau era vakayacora kina na matabete oqo, vakaraitaka na iyaloyalo ni ivakarau era veiqaravi kina na matabete (raica na Kato ni iYaloyalo Vakosipeli, naba 38–41, 103–9), qai wasea na italanoa ni ivakarau e dau veiqaravi kina ko Jisu (raica na Maciu 26:26–28; Marika 5:22–24, 35–43).

• Cereka na Alama 13:6, ka vakamacalataka ni o ira na matabete era “vakavulica na ivunau ni [Kalou] vei ira na luve ni tamata.” Vukei ira na gone me ra vakasamataki ira era taura tu na matabete ka ra kila. Era vakavulica vakacava na ivunau? Sureti ira na gone me ra droinitaka e dua na iyaloyalo ni dua na matabete era kila ni vakavulica tiko e dua ena ivunau ni Kalou.

cauravou ena teveli ni sakaramede

Na cakacaka vakalotu ni matabete e vukei keda me da rai vei Jisu Karisito me da sereki.

Alama 14:18–29

Ena vaqaqacotaki au na Tamada Vakalomalagi me vaka na noqu vakabauta.

Na italanoa ni nodrau sereki mai valeniveivesu o Alama kei Amuleki e rawa ni uqeti ira na gone me ra gole vua na Turaga ni ra gadreva na veivuke.

iTaviqaravi e Rawa ni Caka

• Vakaraitaka na kedrau iyaloyalo o Alama kei Amuleki ena tabana ni itaviqaravi ena macawa oqo ni o tukuna na italanoa ena Alama 14:18–29. E rawa talega ni o goleva na “Chapter 22: Alma’s Mission to Ammonihah” (Book of Mormon Stories, 58–63, se na kena vidio ena ChurchofJesusChrist.org). Me ra veivukevuke na gone ena nodra vakayagataka na iyaloyalo me ra tukuna kina na italanoa. Vakabibitaka ni rau a vakaukauwataki o Alama kei Amuleki me rau dro mai valeniveivesu “me vaka na [nodrau] vakabauti Karisito” (Alama 14:26).

• Vukei ira na gone me ra vakatayaloyalotaka na ivakarau ni yalodrau o Alama kei Amuleki ni rau tiko e valeniveivesu, ka sureti ira me ra matanataka na ivakarau ni yalo oqori (raica na tikina 22). Vakamacalataka ni a kerekere vua na Turaga o Alama me vukei (raica na tikina 26). Vakadinadinataka ni na vakaukauwataki keda na Kalou ni da masu ena vakabauta.

• Vakayagataka na tabana ni itaviqaravi ena macawa oqo me vakavulici kina vei ira na gone na sala e dau veivakaukauwataki kina na Kalou vei ira era vakabauta. Ni ra rokataka tiko na gone na tabana ni itaviqaravi, tukuna e dua na gauna a vakaukauwataki iko kina na Kalou.

Alama 16:1–8

Au sa vakalougatataki niu muria na parofita.

A kila o Soramu, na nodra turaganivalu liu na Nifai, ni o Alama na parofita ni Kalou ka kerea kina nona veidusimaki. Ena vuku ni ka oqo, a qaqa kina o Soramu.

iTaviqaravi e Rawa ni Caka

• Ena nomu vosa ga, wasea na italanoa ena Alama 16:1–8. Vakadeitaka baleta ni ra a muria na parofita o Alama o Soramu kei ira na mataivalu ni Nifai, a rawa kina me ra vakabulai ira na nodra itokani era a tauri tu vakavesu mai vei ira na Leimani o ira na Nifai. Wasea e dua na gauna o a vakalougatataki kina baleta ni o a muria na parofita.

• Vakaraitaka e dua na kena iyaloyalo na Peresitedi ni Lotu, ka wasea e vica na ka sa vakavulica me da cakava. Vukei ira na gone me ra vakasamataka na sala e rawa ni ra muri Jisu kina ena nodra cakava na veika era vakavulica vei keda na Nona parofita.

• Vakaraitaka na kedra iyaloyalo na parofita (raica na Kato ni iYaloyalo Vakosipeli, naba 6–9, 14, 18, 26–27) ni o lagata vata kei ira na gone e dua na sere baleta na parofita, me vaka na “Follow the Prophet” (Children’s Songbook, 110–11). Vakadeitaka na qaqa ni sere e vakavulica na vuna me da muria kina na parofita.

ivakatakilakila ni veivakavulici

Vakavulica na iVunau: Gone Qase Cake

Alama 13: 1–19

E vukei au na matabete meu lako mai vei Karisito.

Ni o wilika na Alama 13:1–19, na cava o raica e vakatitobutaka nomu rokova na matabete? Na cava o uqeti kina mo wasea vata kei ira na itabagone o vakavulica? E rawa ni veivuke na vakasama eso oqo.

iTaviqaravi e Rawa ni Caka

• Wilika vata kei ira na gone na Alama 13:10 kei na 13, ka vaqara na ivakarau ni bula e dodonu me tu vua e dua na matabete. Kerei ira me ra vakasamataka e dua era kila ni ra ivakaraitaki vinaka ni ivakarau ni bula oqo.

• Vukei ira na gone me ra tuva na cakacaka vakalotu eda ciqoma mai na matabete (raica na “Cakacaka Vakalotu” ena Tudei ena Vakabauta, 109–10). Kerea e dua me wilika na Alama 13:16. E vukei keda vakacava na cakacaka vakalotu oqo me da “rai yani vei [isu Karisito] me bokoci noda ivalavala ca”?

• Tarogi ira na gone kevaka era kila se kau mai vei na yaca ni Matabete i Melikiseteki. Vukei ira me ra kunea na kena isau ena Alama 13:14–19 kei na Vunau kei na Veiyalayalati 107:1–4. Na cava eda vulica mai vei Melikiseteki baleta na ivakarau me vakayagataki kina na matabete?

Alama 14:18–29

Ena vaqaqacotaki au na Tamada Vakalomalagi me vaka na noqu vakabauta.

Erau a curu tu e valeniveivesu o Alama kei Amuleki ena vica vata na siga ni se bera ni qai sereki rau na Turaga. Na italanoa oqo e rawa ni vukei ira na gone me ra vulica ni na sega beka ni totolo se rawarawa na iwali ni nodra vakatovolei, ia na Turaga ena vakaukauwataki ira “me vaka na nodra vakabauta” (Alama 14:26).

iTaviqaravi e Rawa ni Caka

• Vola na taro ena papa me vukei ira na gone me ra vaqara na veika matailalai mai na Alama 14:18–29, me vaka na Na cava era a cakava na turaganilewa vei Alama kei Amuleki e valeniveivesu? se Erau a vakaraitaka vakacava na nodrau vakabauti Jisu Karisito? Solia vei ira yadua na gone e dua na tikina se rua me ra wilika, ka vaqara kina na isau ni taro.

• Sureti ira na gone me ra droinitaka na iyaloyalo ni veika a yaco ena Alama 14:18–29, me ra qai vakayagataka nodra iyaloyalo me ra tukuna kina na italanoa. E rawa vakacava ni da vakataki rau o Alama kei Amuleki?

• Wasea e dua na gauna o a vakaraitaka kina nomu vakabauta na Turaga qai solia o Koya vei iko na igu mo ulabaleta se vosota rawa kina e dua na veivakatovolei. Vakayaloqaqataki ira na gone me ra wasea na veika vata oqo era sa sotava.

Alama 15:3–12

Na kosipeli e rawa ni veisautaka na yalo.

Taumada a vorati rau vakaukauwa sara o Alama kei Amuleki o Sisoromi, ia a tara na yalona na nodrau ivakadinadina ka uqeti koya me veivutuni. Ni o vulica na tikina eso oqo, vakasamataka na sala e rawa ni uqeti ira kina na gone o vakavulica na veika a sotava o Sisoromi.

iTaviqaravi e Rawa ni Caka

• Railesuva vata kei ira na gone na veika era a vulica ena macawa sa oti baleti Sisoromi. Wilika vata na Alama 15:3–12 mo kila na sala a veisau kina.

• Sureti ira na gone me ra raitayaloyalotaka ni ra a sotavi Sisoromi ni se bera ni veisau. Na cava era na kaya me vukei koya me vakabauta na kosipeli? E rawa ni ra vakatauvatana na veika era na kaya ki na veika erau a vakavulici Sisoromi kina o Alama kei Amuleki (raica na Alama 11:40–46; 15:6–11). Na cava na vuna ena vukea kina nona vinakata e dua me veisau nona kila na dina oqo?

ivakatakilakila ni vuli

Vakayaloqaqataka na Vuli e Vale

Sureti ira na gone me ra vakasamataka e dua na ka e rawa ni ra cakava ena macawa oqo me vakaraitaka nodra vakabauta na Turaga. Vakayaloqaqataki ira me ra wasea nodra ituvatuva kei na veika era sa sotava ki na nodra matavuvale.

Vakatorocaketaki Noda Veivakavulici

Vulica mo vakila na ivakatakila. “Sa dau yaco mai na ivakatakila ena ‘vosa ena vosa’ (2 Nifai 28:30sega ni taucoko ena dua ga na gauna. … “Ni ko vakasamataka vakatitobu na ivakarau me vakalougatataki ira kina nomu kalasi na ivakavuvuli ni kosipeli o vakatavulica tiko, ena votu mai ena nomu bula ni veisiga na vakasama kei na veivakauqeti—ni ko gole ki cakacaka, cakava na cakacaka e vale, se veimaliwai kei ira na matavuvale kei na itokani” (Veivakavulici ena iVakarau ni iVakabula, 12).

tabana ni itaviqaravi: Erau vakabauta o Alama kei Amuleki