Rau taubale tani mai na vale ni veivesu o Alama kei Amuleki

Na droini ni nodrau sereki mai vale ni veivesu o Alama kei Amuleki, mai vei Andrew Bosley

Jiune 15–21

Alama 13–16

“Curu Ki na iVakavakacegu ni Turaga”

Na veivakauqeti o ciqoma ni o vakasamataka vakatitobu na vakamareqeti ni volanikalou. E rawa ni o vakaraitaka ni o vakamareqeta ena nomu katona ka cakacakataka sara.

Vola na Veika o Uqeti Kina

Ena vuqa na sala, e sa vinaka sara na bula vei Amuleki kei Sisoromi mai Amonaia. E “tamata rogo levu vei ira era kilai koya,” o Amuleki ka “vuqa na wekana kei na itokani” ka “sa rawata vakalevu na iyau” (Alama 10:4). Ia e “dua vei ira na kena dau” o Sisoromi vei ira na daunilawa ka rekitaka nona “dau taurivaki sara vakalevu” (Alama 10:31). E yaco yani ki Amonaia o Alama kei na veisureti vakalou ni veivutuni ka “curu ki na ivakavakacegu ni Turaga” (Alama 13:16). Kivei Amuleki, Sisoromi, kei ira tale eso, na ciqomi ni veisureti oqo e gadrevi kina na solibula ka qai mani vakavuna na kena sotava eso na veivakatovolei dredre sara ka voleka ni sega ni taqei rawa.

Ia e dina ni sega ni yaco ga ekea na italanoa. Ena Alama 13–16, eda vulica na veika ena rawa ni qai yaco vei ira era “vakabauta li na kaukauwa i Karisito sa yaco kina na veivakabulai” (Alama 15:6). E na so na gauna ena yaco na veisereki, ka so na gauna ena yaco na veivakabulai—ka so na gauna e sega ni rawarawa na bula. Ia e veigauna kece, e “kauti ira cake na Turaga [na Nona tamata] vei koya, ena lagilagi” (Alama 14:11). E veigauna kece, e dau “solia vei rau na Turaga na kaukauwa, me vaka na nodra vakabauti Karisito” (Alama 14:28). Ka veigauna kecega, na “vakabauta na Turaga” ena solia vei keda meda “na nuitaka ni ko ni na rawata kina na bula tawamudu” (Alama 13:29). Ni o wilika na veiwase ni vola oqo, e rawa ni o vakacegui ena yalayala eso oqo, ka o na rawa ni qai kila ni veika e vakaibalebaletaka o Alama ena nona tukuna na “vakavakacegu ni Turaga.”

ivakatakilakila ni vuli yadua

Vakasama eso ni Vuli iVolanikalou Yadua

Alama 13:1–19

Na cakacaka vakalotu ni matabete e rawa ni vukei au meu ciqoma na veivueti mai vei Jisu Karisito.

Ena rawa ni o nanuma na veika oqori ena Alama 12, e vakatavulica o Alama na ituvatuva ni veivueti ni Kalou (raica na Alama 12:24–27). Ena wase 13, e tukuni ira na bete era lumuti mai vua na Kalou “me ra vakavulici na tamata ena veika oqo” (Alama 13:1). Na vosa nei Alama e vakaraitaka mai na veidina kaukauwa baleta na matabete. Ena rawa beka ni o vakatovolea mo raica e dua madaga na dina ena tikina yadua ena Alama 13:1–9. Oqo eso na vakasama mo rawa ni tekivu kina:

Tikina 1:Na matabete e vakatokai talega me “vaka na ivakarau ni Luve ni Kalou” (raica talega na VV 107:1-4).

Tikina 2:E vakatabui ira na bete na Kalou me vukei ira na tamata me ra raica na Luvena me ra vakabulai.

Tikina 3:Era vakarautaki tu na matabete me baleta na nodra itavi “mai na vakatekivu kei vuravura.”

Na cava tale o kunea? Na cava na nomu rai baleta na matabete ni o vakasamataka vakatitobu na dina eso oqo? E sa vukei iko vakacava na cakacaka vakalotu ni matabete mo raici Karisito ka vakabulai?

E vinaka me da kila ni vuqa vei ira na tamata mai Amonaia era dau vakamuri Neori (raica na Alama 14:18; 15:15). Era sa vakatabui vakacava na veitaravi ni bete i Neori (raica na Alama 1:3-6) ka duatani beka mai vakacava vei ira na bete era vakatabui ena “iVakarau ni Luve ni Kalou” (VV 107:3), ka vakamacalataka o Alama? (raica na Alama 13:1–9).

Raica talega na Dale G. Renlund, “Na Matabete kei na Nona Mana ni iSoro na iVakabula,” Liaona, se Liaona, Nove. 2017, 64–67.

era tiko ena teveli ni sakarameda na cauravou

Na cakacaka vakalotu ni matabete e vukei keda meda raici Jisu Karisito meda vakabulai.

Alama 13:3

Sai ira beka ga na matabete era sa “kacivi ka vakarautaki mai na tauyavutaki ni vuravura”?

Na veivakavulici nei Alama ena Alama 13:3 e vakatabakidua vei ira na matabete. Ia, na ivakavuvuli e vakatavulica o koya—ni ra ciqoma na tamata yadua na ilesilesi ka vakarau me vakayacora me “tekivu mai na tauyavutaki ni vuravura”—e baleti keda kece. E tukuna o Peresitedi Spencer W. Kimball: “Era vuravura ni se bera ni lako mai eke, e soli na ilesilesi vei ira na marama yalodina ka ra lumuti taumada na turaga yalodina mera vakayacora eso na ilesilesi vakamatabete. E dina ni da sega ni rawa ni nanuma na kena vakamatailalai, e sega ni veisautaka na veika oqo na dina ni lagilagi ni veika eda sa vakadonuya tu” (Nodra iVakavuvuli na Peresitedi ni Lotu: Spencer W. Kimball [2006], 215–16; raica talega na VV 138:55–56).

Alama 14

Ena so na gauna e vakatara na Kalou me ra vakalolomataki na yalododonu.

E tukuni enaAlama 14 na nodra vakararawataki na tamata yalododonu ka vakamatei sara madaga me baleta na nodra vakabauta. E rawa ni o vakataroga tu, me vaka e vuqa na tamata, na cava e dau yaco kina vei ira na tamata era saga tiko me ra bulataka na bula dodonu na veika ca. Ena sega beka ni o kunea na isaunitaro ki na veitaro dredre ena Alama 14, ia e levu na ka e tu meda vulica mai na sala erau sauma tiko kina o Alama kei Amuleki ena veika rau sotava. Na cava e vakavulica vei iko na nodrau vosa kei na ivalavala me baleta na vuna e dau vakatara na Turaga me ra vakararawataki na tamata yalododonu? Na cava o sa vulica mai vei rau ena veivakacacani erau sotava?

Raica talega na Maciu 5:43–44; Marika 14:55–65; Roma 8:35–39; 1 Pita 4:12–14; Vunau kei na Veiyalayalati 122:5–9.

Alama 15:16, 18

Na bula vakatisaipeli e gadrevi kina na solibula.

E vinaka mo dou tuva talega na veika e solibulataka o Amuleki me ciqoma kina na kosipeli (raica na Alama 10:4–5; 15:16) ka vakatautauvatataka ki na veika e qai rawata (raica na Alama 15:18; 16:13–15; 34:8). Na cava o sa gadreva mo solibulataka me rawa ni o yaco mo tisaipeli yalodina?

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Alama 13

Ena rairai vinaka beka mo dou raica vakamatavuvale na veigauna e basika mai na vosa na “vakavakacegu” ena Alama 13. Na vosa kei na vakasama cava so e sala vata kaya mai? E vukei keda vakacava na veika oqo meda kila na ibalebale ni “vakavakacegu ni Turaga”? Na cava na kena duidui mai na vakacegu vakayago?

Alama 13:10–12

Me vukea na nomu vuvale mo raitayalotaka na veika e vakatavulica na tikina eso oqo, e rawa beka ni o savata eso na ka—me vaka na isulu vulavula. Na cava eda vakila nida duka tu? Na cava eda vakila ena gauna eda sa savasava tale kina? E tautauvata vakacava na veika eda vakila oqo ki na veika eda vakila ena gauna eda valavala ca kina ka veivutuni ka qai vakasavasavataki ena Veisorovaki ni Vakabula?

Alama 15:1–12

Na cava eda vulica mai na veika e sotava o Sisoromi me baleta na kaukauwa ni Turaga ena kena rawa ni vaqaqacotaki keda ka vakabulai keda, ena gauna talega eda vakayacora kina na cala? Na itavi cava e vakayacora na matabete ena kena ciqomi na Nona veivaqaqacotaki kei na veivakabulai?

Alama 16:1–10

Ni o wilika oti na veitikina oqo, o na via wilika talega na Alama 9:4. Na cava eda vulica ni vakatautauvatataki na veika e vakila o Soramu ni rogoca na vosa ni parofita kei na veika era vakila na tamata e Amonaia? Na cava eda cakava meda yalodina ki na vosa ni noda parofita bula?

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakatorocaketaki Noda Veivakavulici

Dau tuvakarau e veigauna. Na gauna ni veivakatavulici e dau takali totolo yani, o koya me da vakayagataka ni ra yaco mai. E dua na gauna vakadomobula e vuravura, e kena ivakaraitaki, e rawa ni dua na madigi ni wasei ni vakavuvuli ena Alama 14 me baleta na i naki e dau vakatara ena so na gauna na nodra vakararawataki na yalododonu. (Raica na Veivakavulici ena iVakarau ni iVakabula, 16.)

Alama kei Amuleki e vale ni veivesu

Alama kei Amuleki e Valeniveivesu, mai vei Gary L. Kapp.