Vakavulica tiko na Vunau Dina, mai vei Michael T. Malm

8–14 ni Jiune.

Alama 8–12

Ena Lako Mai ko Jisu Karisito Me Sereki Ira na Nona Tamata

Na vulici ni ivolanikalou e sureta na ivakatakila. Ni o wilika na Alama 8–12, vola na veivakauqeti ni Yalo ni vakatavulici iko o Koya mai na itukutuku nei Alama kei Amuleki.

Vola na Veika o Vakauqeti Kina

Na cakacaka ni Kalou ena sega ni druka. Ia na noda sasaga meda veivuke ena Nona cakacaka esa na vaka e druka ena so na gauna—ena sega beka, ni da raica vakatotolo na kena macala eda nuitaka. Ena so na gauna eda na vakila beka vakalailai na veika a sotava o Alama ena gauna a vunautaka kina na kosipeli mai Amonaia—cati, kasiviti, ka cemuri tani. Ia ena gauna a vakaroti koya kina e dua na agilosi me lesu ka tovolea tale, a “lesu kusarawa” ena yaloqaqa o Alama (Alama 8:18), ka a vakarautaka vua na sala na Kalou. E sega walega ni vakarautaka o Koya vei Alama na kakana me kania kei na vanua me tiko kina, ia a vakarautaki Amuleki talega, o koya a yaco me itokani vaka cakacaka, ka dua e tutaka na kosipeli, ka itokani yalodina. Ni da sotava na veika e veivakayalolailaitaki kei na druka ni da veiqaravi ena matanitu ni Turaga, eda rawa ni vakananuma na nona tokoni Alama ka liutaki koya na Kalou, ka rawa ni da nuitaka ni na tokoni keda ka liutaki keda talega na Kalou, ena gauna sara madaga ni veituvaki dredre.

Vakasama eso ni Vuli iVolanikalou Yadua

Alama 8

Na noqu sasaga meu wasea na kosipeli ena gadrevi kina na gugumatua kei na vosota vakadede.

E dina ena cata beka e dua na nomu ivakadinadina ni kosipeli, ia e sega ni kena i balebale mo yalolailai kina—ena sega ni guce na Turaga vua na tamata oya, ka na dusimaki iko o Koya mo kila na veika mo cakava. Me vakai Alama, a vakaroti koya e dua na agilosi me lesu ki Amonaia me vunautaka na kosipeli e dina ga ni ra a sa cati koya oti na tamata e kea (raica na Alama 8:14–16). Na cava o vulica mai na ivakaraitaki nei Alama ena wasei ni kosipeli, veitalia na dredre kei na veisaqasaqa? Na tikina cava so ena Alama 8 e vakalevutaka na nomu gagadre mo wasea na kosipeli?

Raica talega na 3 Nifai 18:30–32; Jeffrey R. Holland, “Na iSau—kei na Veivakalougatataki—ni Bula Vakatisaipeli,” Ensign se Liaona, Me 2014, 6–9.

Alama 9:18–25; 10:16–23

Na Kalou e dau lewai ira na luvena me vaka na rarama kei na kila e tu vei ira.

Ni da wilika na veika era cakava na Nifaiti mai Amonaia vei ira na italai ni Turaga, e rawarawa ni guilecavi ni ra a daubulataka tu ena dua na gauna na kosipeli, “ni sa daulomani ira sara na Turaga” (Alama 9:20). E dina sara, ni tiki ni tukutuku nei Alama vei ira na tamata e Amonaia oya baleta ni ra a vakaukauwataka na yalodra, dina ga ni ra a sa vakalougatataki vakavuqa, ia sa ca sara kina vakalevu na kedra ituvaki mai vei ira na Lemanaiti, o ira era ivalavala ca ga ena dela ni lecaika. Na cava e vakavulica vei keda na veibasai oqo me baleta na sala e lewai ira kina na Luvena na Kalou?

Ni o wilika baleta na veivakalougatataki cecere a solia na Kalou vei ira na tamata i Nifai (raica na Alama 9:19–23), vakasamataka vakatitobu na veivakalougatataki cecere eso sa solia vei iko ko Koya. Na cava o sa cakava tiko mo dina tikoga ki na veivakalougatataki eso oqo? Na veisau cava eso o vakila e gadrevi mo cakava?

Raica talega na Vunau kei na Veiyalayalati 82:3.

Alama 11–12

Na ituvatuva ni Kalou e ituvatuva ni veivueti.

Era a vakayagataka na parofita ena iVola i Momani e vuqa na yaca me vakamacalataka na ituvatuva ni Kalou me baleti ira na Luvena, me vaka na ituvatuva ni veivakabulai se na ituvatuva ni marau. Ena Alama 11–12, erau vakatoka kina o Alama kei Amuleki me ituvatuva ni veisereki. Ni o wilika na wase ni vola eso oqo, vakasamataka vakatitobu na cava e vakayagataki kina na vosa na “veisereki” me vakamacalataka na ituvatuva. E rawa talega ni o vola e dua na ivakaleka ni ka rau a vakatavulica o Alama kei Amuleki me baleta na veitikina ena ituvatuva eso oqo.

Na Lutu:

Na Dauveivueti:

Veivutuni:

Mate:

Tucaketale:

Veilewai:

Raica na veika e yaco vei ira na tamata era a rogoca na vosa nei Amuleki (raica na Alama 11:46). Na cava o nanuma ni vakavuna me veivakayarayarataki sara vakaukauwa na ivakavuvuli eso oqo? E sa vakayarayarataka vakacava na nomu bula?

Raica talega na D. Todd Christofferson, “Na Tucake Tale nei Jisu Karisito,” Ensign se Liaona, Me 2014, 111–14.

Alama 12:8–18

Kevaka au na sega ni vakaukauwataka na yaloqu, au na rawa ni ciqoma vakalevu cake na vosa ni Kalou.

Eso beka era na vakananuma na cava e sega ni vakaraitaka kina na veika kece vei keda na Tamada Vakalomalagi. Ena Alama 12:9–14, e a vakamacalataka o Alama e dua na inaki e dau sega ni vakaraitaki kina vei keda na veika vuni ni Kalou. Na veitaro oqo e rawa ni vukei iko mo vakasamataka vakatitobu na veika a vakatavulica o koya:

• Na cava e kena ibalebale meda vakaukauwataka na lomada? O sa bau vakila beka na veika oqo vei iko?

• Na cava beka e tarova kina na Turaga na Nona vosa mai vei ira era sa vakaukauwataka na lomadra?

• O sa vakila vakacava na yalayala ni ciqomi “na iwase levu ni vosa”? (Alama 12:10). E a vakacava beka na veika o sotava oya?

• Na cava o rawa ni cakava mo vakadeitaka ni vosa ni Kalou e “kunei vei [iko]”? (Alama 12:13). Kevaka e tiko e lomamu na vosa ni Kalou, na cava na kena vatuka vei iko ena nomu “vosa,” “cakacaka,” kei na “vakanananu”? (Alama 12:14).

Me ivakaraitaki ni vakavuvuli eso oqo, vakatautauvatataki Amuleki vei ira na tamata mai Amonaia. E vakaraitaka vakacava na veika a sotava o Amuleki (raica na Alama 10:1–11) na ka e vakatavulica tiko o Alama ena tikina eso oqo?

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Alama 8:10–18

Na cava eda rawa ni vulica mai vei Alama me baleta na talairawarawa “kusarawa” vua na Turaga (tikina 18) ena gauna sara madaga e dredre kina? Me vakabibitaki vei ira na gone lalai na ivakavuvuli oqo, e rawa ni dou qitora e dua na qito oya mo solia na ivakaro ni veika me vakayacori ka qai raica na totolo ni nodratou na rawata oqori na lewe ni nomu vuvale. Me vaka oqo, e rawa ni o raica se ocei ena rawa ni lobika vakatotolo e dua na tiki ni isulu.

Alama 10:1–12

Na cava eda rawa ni vulica mai na veika a sotava o Amuleki ena veitikina oqo? E veilauti beka vakacava na nona ivakadinadina vei ira era vakarorogo tiko? Sureti ira na nomu lewe ni matavuvale me ra tuvatuva-ka taka edua na ka me ra cakava ena macawa oqo ka yavutaki mai na veika e vulici mai na ivakaraitaki nei Amuleki.

Alama 10:22–23

Na cava eda vulica mai na veitikina oqo me baleta na veivakayarayarataki e rawa ni vakayacora e dua na ilawalawa tamata yalododonu ena dua na koro ni ivalavala ca?

Alama 11:34–37

Na cava na duidui ni Nona vakabulai keda ena noda ivalavala ca kei na vakabulai keda mai na noda ivalavala ca o Jisu Karisito? (raica na Ilamani 5:10; raica talega na 1 Joni 1:9–10). Me vakaraitaka na veika e a vakatavulica o Amuleki, o na wasea beka na italanoa ena itekivu ni tukutuku nei Elder Allen D. Haynie, “Nanumi Koya Eda sa Dauvakanuinui Kina” (Ensign se Liaona, Nove. 2015, 121–23). E vakabulai keda vakacava mai na noda ivalavala ca o Jisu Karisito?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

Vulica na nodra vosa na parofita kei na iapositolo edaidai. Wilika na cava era vakatavuvulitaka na parofita kei na iapositolo e muri oqo baleta na dina e kunei ena ivolanikalou. Me vaka beka oqo, e rawa ni o digia e dua na iulutaga ena Alama 8–12 ka vakasaqara nai ulutaga oqori ena koniferedi raraba se qai oti ga oqo (raica na Veivakavulici ena iVakarau ni iVakabula, 21).

Droini kei Alama ni kana vata tiko kei Amuleki mai vei Dan Burr