Sa Vunau Tiko o Alama Lailai, mai vei Gary L. Kapp

25–31 ni Me.

Mosaia 29–Alama 4

“Era sa Tudei ka Sega ni Yavalati Rawa”

E rawa ni ra vulica e levu na ka ena nomu kalasi na gone o vakavulica, ia ena levu cake tale na ka era vulica kevaka era tara cake e dua na itovo ni vuli ivolanikalou e vale. Vakasamataka na ivakarau o rawa ni vakayaloqaqataka ka tokona kina na vuli kosipeli e vale.

Vola na Veika o Uqeti Kina

Sureta na Veiwasei

Sureti ira na gone me ra dabe wavoki ena fuloa, vaqiqica na polo ki na dua vei ira. Kerea na gone oya me wasea e dua na ka se qai vulica wale toka ga me baleta na kosipeli e vale se ena Lalai. Qai sureta na gone oya me vaqiqica na polo vua e dua tale. Me caka tikoga me yacova ni ra sa vakaitavi kece na gone ena veiwasei.

Vakavulica na iVunau: Gone Sobu

Alama 1:2–9, 26–30

Niu lewena na Lotu, sa dodonu meu lomani ira ka qaravi ira na tani.

O na sega beka ni gadreva mo tukuna vei ira na gone e levu na ka me baleta na ivakavuvuli nei Neori, ia ena yaga beka vei ira me ra kila ena Lotu eda veiqaravi baleta ni da lomani ira na tani, sega ni baleta ni da vinakata me da vutuniyau se kilailevu.

iTaviqaravi e Rawa ni Caka

• Wasea vei ira na gone, ena vosa rawarawa, na kedrau italanoa o Alama kei Neori (raica na Alama 1; “Chapter 20: Alma and Nehor,” Book of Mormon Stories, 54–55, se na kena vidio ena ChurchofJesusChrist.org). Vakabibitaka ni dina ga ni ra a ivalavala kaukauwa vei ira na lewe ni Lotu o Neori kei ira nona ilawalawa, era a yalovinaka ka dauloloma tu ga na lewe ni Lotu.

• Wilika na Alama 1:30 vei ira na gone, ka vukei ira me ra kila ni ra a wasea vei ira na tamata ena Lotu na veika e tu vei ira, vei ira era leqa tu. Vukei ira na gone me ra vakasamataka na veika e rawa ni ra wasea kei ira na tamata era rawa ni veiwasei kina. Sureti ira na gone me ra droinitaka na iyaloyalo ni veika era sa tuva.

• Lagata vata e dua na sere baleta na loloma kei na veiqaravi, me vaka na “Kindness Begins with Me” (Children’s Songbook, 145), ka vukei ira na gone me ra vakasamataka na ivukivuki me salavata kei na sere.

Alama 2:28–30

Ena sauma na Kalou na noqu masu.

Ni sa vakila o Alama kei ira na Nifaiti “na rere” (Alama 2:23), era a masuta na veivuke ka ra sa vaqaqacotaki. Vukei ira na gone me ra vuli mai na nodra ivakaraitaki.

iTaviqaravi e Rawa ni Caka

• Ni o vakayagataka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale se ena “Wase 21: Na Emelesaiti” (Book of Mormon Stories, 56–57, se na kena vidio ena ChurchofJesusChrist.org), tukuna vei ira na gone na sala era a rawata kina na Nifaiti na kaukauwa me ra vakadrukai ira na Emelesaiti. Taroga vei ira na gone baleta na veika e rerevaki se dredre vei ira, ka vakadinadinataka ni rawa me ra masu vua na Tamada Vakalomalagi me ra vukei ena veika oqo.

• Wasea e dua na gauna a vukei iko kina na Kalou ni oti nomu masuti Koya. Sureti ira na gone me ra wasea na veika eso era sa sotava ena masu.

Alama 4:19

E rawa ni vaqaqacotaki ira tale eso na noqu ivakadinadina.

E vakavuqa e rawa ni veivakayarayarataki vakaukauwa sara vei ira tale eso na nona “ivakadinadina yalododonu” (Alama 4:19) e dua na gone. O na vukei ira vakacava na gone me ra kunea na sala me ra wasea kina nodra ivakadinadina?

iTaviqaravi e Rawa ni Caka

• Cega na ivolanikalou ena Alama 4:19, ka vakamacalataka ni gauna e raica kina o Alama na nodra cakaca na tamata, a nanuma o koya ni sala vinaka duadua me vukei ira kina oya me wasea na “ivakadinadina dodonu” vei ira. Vakayagataka na tabana ni itaviqaravi ni macawa oqo mo vakavulici vei ira na gone se cava na ivakadinadina kei na cava e okati kina. Vakayaloqaqataki ira mera mai wasea na veika era sa sotava.

• Livia eso na wai savasava ena dua na bilo iloilo, ka vakamacalataka ni wai e vaka na noda ivakadinadina baleta ni rawa ni da wasea vei ira tale eso. Livia na bilo wai ki na so na bilo lalai me baleti ira yadua na gone, ka tukuna vei ira na gone ni gauna eda wasea kina na noda ivakadinadina, eda sa vukei ira tale eso me kaukauwa cake nodra ivakadinadina.

• Kevaka era vinakata na gone, laiva me ra vakatovotovo ena nodra wasea nodra ivakadinadina. Vakatura e vica na sala e rawa ni ra vakaraitaka kina ni ra kila ni dina na kosipeli, vakakina ena nodra ivalavala.

Vakavulica na iVunau: Gone Qase Cake

Alama 1:2–9

Au rawa ni vulica meu kila na ivakavuvuli vakailasu.

Ena so na gauna ena noda bula, eda na sotava na tamata vakataki Neori—o ira era dau tovolea me ra cavilaki keda ena itukutuku rogorogo vinaka ia e lasu ka veivakamavoataki. Ni wasei na italanoa ena Alama 1:2–9 e rawa ni vukei ira na gone me ra vakavakarau ki na veigauna vakaoqo ena nodra bula.

iTaviqaravi e Rawa ni Caka

• Vukei ira na gone me ra wilika na Alama 1:2–4 me talevi kina eso na ivakavuvuli i Neori, e dua na qasenivuli vakailasu. Vukei ira me ra bulia e dua na kilakila mada, dina se lasu ni ra vakayagataka na itukutuku eso mai na veitikina oqo. Na cava na vuna e dau wakia vata kina ena so na gauna o Setani na dina kei na veika lasu? Vukei ira na gone me ra vakasamataka eso na ivakaraitaki.

• Ni ra railesuva vata na Alama 1:2–9 kerei ira yadua na gone me ra wilika e dua vei ira na ivolanikalou oqo: Maciu 7:21–23; 2 Nifai 26:29–31; Mosaia 18:24–26; kei na Ilamani 12:23–26. Era vakalasuya vakacava na ivakavuvuli nei Neori na ivolanikalou oqo? Me da vakayagataka vakacava na ivolanikalou me vaqaqacotaka noda ivakadinadina ni kosipeli?

Alama 1:26–30; 4:6–13

Niu lewena na Lotu, sa dodonu meu lomani ira ka qaravi ira na tani.

Ena so na gauna era dau veinanumi ka lomasoli na lewe ni Lotu ena gauna i Alama, ka so tale na gauna era sega ni dau yalovinaka ka viavialevu. Vukei ira na gone o vakavulica me ra vuli mai na veika era sa sotava.

iTaviqaravi e Rawa ni Caka

• Vukei ira na gone me ra wilika na Alama 4:6–13, ka vakamacalataka na vosa me vaka na “veivakalialiai,” “veivakacacani,” ka “veibeci” (vakayagataka e dua na ivolavosa ke ganita). E vakaivei na ivakarau ni yaloda ni vakaoqo na nodra itovo vei keda eso na tamata? Sureti ira na gone me ra vaqara na vosa ena Alama 1:26–30 ka vakamacalataka na ivakarau e vinakata na Tamada Vakalomalagi me da dau veirairaici kina.

• Kerei ira na gone me ra wilika na Alama 1:27, 30 ka cakava e dua na ituvatuva ni mataqali tamata era dau veivuke kina na lewe ni Lotu. Sureti ira na gone me ra vakasamataka na tamata ena nodra itikotiko se koronivuli era “[gadreva] na veivuke” (Alama 1:30) ni nodra loloma kei na veivukei. Me vaqaqacotaki na ivakavuvuli oqo, lagata vata e dua na sere baleta na yalovinaka, me vaka na “I’ll Walk with You” (Children’s Songbook, 140–41).

Alama 4:8–20

E rawa ni vaqaqacotaki ira tale eso na noqu ivakadinadina.

A solia na nona itutu vaka turaganilewa levu o Alama me rawa ni vakayagataka e levu na gauna me wasea na nona ivakadinadina ka vukei ira na tamata me ra veivutuni. Na nona ivakaraitaki ena rawa ni uqeti ira na gone me ra wasea na nodra ivakadinadina vakawasoma.

iTaviqaravi e Rawa ni Caka

• Wilika vata kei ira na gone na Alama 4:8–12, 15 ka kerei ira me ra dusia na leqa era a yaco tiko ena Lotu, me vaka e vakamacalataki ena veitikina eso oqo. Sureti ira na gone me ra vakatura eso na ka e rawa ni cakava o Alama me walia na leqa eso oqo. Vukei ira me ra raica, ena Alama 4:16–20, na ka a navuca o Alama me cakava. Na cava sa rui kaukauwa kina na ivakadinadina?

• Me vukea nodra kila na gone na cava na ivakadinadina kei na cava e oka kina, vakaraitaka na vidio “Apostle Testimony Montage” (ChurchofJesusChrist.org); lagata vata e dua na sere baleta na ulutaga, me vaka na “iVakadinadina” (Sere ni Lotu, naba 137); se vakayagataka na tabana ni itaviqaravi ni macawa oqo. Kerei ira na gone me ra wasea na ka era sa vulica me baleta na ivakadinadina mai na ivurevure eso oqo.

Vakauqeta na Vuli e Vale

Vukei ira na gone me ra vakasamataka e dua e rawa ni ra wasea vua nodra ivakadinadina ena macawa mai oqo. Vakayaloqaqataki ira me ra vola e dua na ituvatuva me vukea nodra rawata nodra takete.

Vakatorocaketaki ni Noda Veivakavulici

Taroga na taro eso e sureta na ivakadinadina. “Ni tarogi na veitaro e vakauqeti ira na vuli ni wasea na ivakadinadina ni ivakavuvuli era vakavulici tiko e sa rawa ni dua na sala kaukauwa ni kena sureti na Yalo” (Veivakavulici ena iVakarau ni iVakabula, 32). Mo sureti ira na gone me ra wasea nodra ivakadinadina, taroga na taro ena uqeti ira me ra vakasamataka ka wasea na nodra nanuma me baleta na iVakabula kei na Nona kosipeli. E rawa talega ni o taroga na veika era sa sotava ena masu, veiqaravi, na cakacaka vakalotu me vaka na papitaiso, se vakila na veivakayarayarataki ni Yalo Tabu.