“25–31 ni Me. Mosaia 29–Alama 4: ‘Ia, Era sa Tudei ka Sega ni Yavalati Rawa’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)
“25–31 ni Me. Mosaia 29–Alama 4,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
E vunau tiko o Alama Lailai, mai vei Gary L. Kapp
25–31 ni Me.
Mosaia 29–Alama 4
“Ia, Era sa Tudei ka Sega ni Yavalati Rawa”
Na wiliki ni ivolanikalou e sureta na ivakatakila. Mo dau tuvakarau mo ciqoma na itukutuku e vinakata na Turaga me solia vei iko.
Vola na Veika o Uqeti Kina
Eso beka era na raica na vakatutu nei Mosaia na Tui me veisosomitaki na vakatui kei na digitaki ni daunilewa me dua na veisau vakapolitiki vuku. Ia vei ira na Nifaiti, vakabibi vei ira era bula ena vakatulewa ni Tui valavala ca o Noa, na veisau oqo e dua ka vakaibalebale sara vakayalo. Era sa raica na kena sa mai vakavuna “na caka ca” e rawa ni vakavuna e dua na tui valavala ca kei na “rusa” e yaco vei ira na tamata (Mosaia 29:17), ka ra sa “gagadre vakaidina sara” me ra galala mai na veivakayarayarataki vakaoqori. Na veisau oqo e vakatarai ira me ra qarauna na nodra bula dodonu ka “dui saumi ga vei ira na nodra ivalavala ca” (Mosaia 29:38; raica talega na VV 101:78).
E dina sara, na kena mai cava na vakatulewa vakatui e sega ni kena ibalebale ni sa mai cava kina na leqa e sotavi tu ena veimatanitu vaka Nifaiti. Na tamata lawaki qaseqase vakataki Neori kei Emelesai era kauta mai na vakanananu lasu, era vakacacani ira na Yalododonu, ka vuqa na lewe ni Lotu era qaciqacia ka vuki tani. Ia “o ira na tamata yalomalumalumu ni Kalou” era “tudei ka sega ni yavalati rawa” se cava ga e yaco vakavolivoliti ira tu (Alama 1:25). Baleta na veisau e vakayacora o Mosaia, era rawa ni “domovata” me ra veivakayarayarataki ena veika vinaka (Alama 2:6).
Vakasama eso ni Vuli iVolanikalou Yadua
Sa rawa niu veivakayarayarataki ena veika vinaka ena noqu vanua.
Ni lima ga na yabaki ki na nodra vakatulewa na dauveilewai, e tubu mai e dua na veiba ka na vakatovolei kina na itukutuku i Mosaia me sa na rogoci na domodra na tamata kevaka era na digitaka na veika dodonu (raica na Mosaia 29:26). Na leqa oqo e baleta na galala ni lotu: e dua na tamata ka yacana o Emelesai sa saga me “vakuai ira mai na nodra dodonu kei na galala ni lotu [na tamata]” (Alama 2:4). O sa raica beka na kena sa vakayavalati tiko na dodonu ni lotu ena nomu vanua se matanitu? Na cava o sa vulica mai na veika era qai cakava na Nifaiti ena gauna oqo? (raica na Alama 2:1–7).
Ena vuqa beka na leqa bibi ena tara tu na nomu itikotiko. Ena rawa vakacava, ni o vakataki ira na Nifaiti, mo qarauna me rogo tale na domomu ena “domodra na tamata”? De o na tiko beka ena vanua e sega ni kaukauwa na rogoci ni domodra na tamata ki na matanitu; kevaka e vakakina, e tiko beka eso tale na sala ena rawa ni o veivakayarayarataki kina ena veika vinaka ena nomu itikotiko?
Sa rawa niu raica ka kila na ivakavuvuli lasu.
E dina ni qai vakatusa o Neori ni veika e vakatavulica o koya e lasu, na nona ivakavuvuli e vakayarayarataki ira tu na Nifaiti ena vuqa na yabaki (raica na Alama 1:15–16; 2:1–2; 14:14–18; 15:15; 21:4; 24:28). Na cava beka e sa rui veirawai kina vei ira na tamata na ivakavuvuli i Neori? Ni o wilika na Alama 1:2–4, raica kevaka e rawa ni o raica na lasu e tiko ena ivakavuvuli i Neori; ena rawa talega ni o raica ni vakatavulici tiko vata kei na so na dina vakatikina.
E vorati Neori rawa o Kitioni “ena vosa ni Kalou” (Alama 1:7, 9). E rawa beka ni o vakasamataka eso na ivolanikalou e vakaraitaka na lasu nei Neori? Oqo tiko oqo eso na kena ivakaraitaki, ia e vuqa tale tu: Maciu 7:21–23; 2 Nifai 26:29–31; Mosaia 18:24–26; kei na Ilamani 12:25–26. Ena rawa ni vukei iko vakacava na ivolanikalou eso oqo mo vakaraitaka na lasu esa vakavulici tu nikua?
E dua tale na iwalewale ni nomu vakayacora nomu vuli ena Alama 1 sai koya mo vakatauvatani Neori kei ira na dauvakamuri koya (tikina 3–9, 16–20) kei “na tamata ni Kalou” (tikina 25–30; raica talega na 2 Nifai 26:29–31). Sa rawa vakacava mo vakataki ira vakalevu cake na tamata ni Kalou? O rawa ni raica beka na vakacava na “bete vakailasu” ena nomu veiqaravi?
Na tisaipeli dina i Jisu Karisito era sega ni domona na lomadra na iyau.
Wase 1 kei na 4 ni vola i Alama e vakamacalataki kina na gauna sautu ni Lotu, ia e duidui na veika era cakava na lewe ni Lotu ena veigauna era bula sautu tiko kina. Na cava na duidui o raica? Mai na veika o sa kunea, na cava o nanuma me baleta na nodra ivakarau ni bula o ira “sa daumuria na Kalou ena yalomalumalumu” (Alama 4:15) kei na nodra rai ena iyau kei na bula sautu? Na cava o vakauqeti mo veisautaka ena nomu itovo ni rai me baleta na veika oqo?
Na “vosa ni Kalou” kei na “ivakadinadina dodonu” e rawa ni veisautaka na lomada.
Na cava e vakavuna me “yalorarawa sara vakalevu” o Alama (Alama 4:15) ena Alama 4? Eso beka era na kaya ni lesilesi vaka daunivakatulewa nei Alama ena rawa ni tamata vinaka duadua me walia na nodra leqa na tamata e raica o koya. Ia e nanuma o Alama ni tiko e dua tale na sala e vinaka cake. Na cava e vakauqeti iko me baleta na veika e vakayacora me vukei ira na nona tamata? Ena rawa ni vakauqeta mai na nomu vakanananu na sala ena rawa ni o veivakayarayarataki ena savasava vei ira na tiko wavoliti iko, kevaka e vakakina, cakacakataka na veivakasama oqori.
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Alama 1:19–25
Ena rawa ni vinaka ki na nomu vuvale na sala duidui eso era vakayacora na lewe ni Lotu ena gauna ni veivakacacani era sotava ena veitikina oqo. E rawa talega vei iko mo raica eso tale na sala matau mo muria ena gauna esa vakacacani kina na noda vakabauta. Na vidio ena ChurchofJesusChrist.org/religious-freedom/examples e rawa ni veivuke.
Alama 3:4
Na itukutuku cava era vinakata me kilai na Emelesaiti ena gauna era sa “vakatakilai [ira]”? (raica na Alama 3:4, 13). Na itukutuku cava beka eda rawa ni vakaraitaka—eda nakiti se sega—mai na keda irairai? Ena gauna vinaka beka oqo meda taleva tale mada na “Dress and Appearance” ena Me iSakisaki ni Tabagone (2011), 6–8.
Alama 4:2–3
Na cava eso na ka se veika eda sa sotava e sa “vakayadrati kina me da nanuma na nod[a] itavi” vua na Kalou? (Alama 4:3). E vinaka beka mo wasea na tikina oqo ni o sa vakayadrati ira mai na nomu vuvale ena mataka. Qai rawa ni dou veitalanoataka na bolebole ni noda vakayadrati vakayago me vukei keda meda kila vakavinaka na bolebole ni veivakayadrati vakayalo.
Alama 4:10–11
Ena rawa vakacava me da kakua ni “veivakatarabetaki levu vei ira na sega ni lewenilotu”? (Alama 4:10). E yaga talega me veitalanoataki na sala eda rawa ni qaqarauni ki na nodra ivakarau na tani, vakatabakidua o ira na lewe ni Lotu, me ra kakua ni tatarabe ni noda toso cake tiko vakayalo.
Alama 4:19
Me vukea na nomu vuvale me kila na kaukauwa ni vakadinadina, e rawa ni o tarogi ira me ra vakasamataka e dua na gauna era rogoca kina na nona ivakadinadina e dua ka qai tarai ira vakatitobu. Na cava beka e vakayagataka kina o Alama na ivakadinadina kei na vosa ni Kalou me tara na yalodra na tamata? (raica talega na Alama 31:5). Na cava e vinaka kina na iwalewale oqo mai na so tale me vakayagataki me vakayarayarataki ira na tani me ra veisau? E tiko beka eso na tamata eda rawa ni vaqaqacotaka ena noda wasea kei ira na noda ivakadinadina?
Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vakatautauvatataka na ivolanikalou ki na nomu bula. Vakasamataka matua na italanoa kei na ivakavuvuli ni volanikalou e rawa ni o bulataka vakacava. Me ivakaraitaki, ena rawa beka ni o vakatautauvatataka ena vuravura ni gauna nikua kei na leqa raraba era sotava tu na Nifaiti ena Alama 1–4.
Alama kei Emelesai, mai vei Scott M. Snow