Minerva K. Teichert (1888–1976), E tu i matai Limiai na Tui o Amoni, 1949-1951, iboro waiwai ena papa masonite, 35 15/16 x 48 na idi. Brigham Young University Museum of Art, 1969.

27 ni Epereli–3 ni Me

Mosaia 7–10

“Ena Kaukauwa ni Turaga”

Ni o wilika tiko, ena rawa ni kauta mai ki na nomu vakasama na Yalo eso na malanivosa se tikina. Vola na ka o vakila e veiganiti vei iko e na veitikina oqori.

Vola na Veika o Vakauqeti Kina

Ena gauna era marautaka tiko kina na “sautu” na tamata nei Mosaia na Tui e Saraemala (Mosaia 7:1), a vagolei na nodra vakasama ki na dua tale na ilawalawa ni Nifaiti, o ira era a biubiu ena vuqa na yabaki yani ki liu mera lai tiko ena vanua o Liai-Nifai. E sa oti yani e vuqa na itabagauna, ka sega ni ra rogoca e dua na ka o ira na tamata i Mosaia mai vei ira oqo. Sa qai kerei Amoni kina o Mosaia me liutaka e dua na lawalawa me vakasaqarai ira na Nifaiti era a lako yani oya. Era kunei ira na Nifaiti oqo o iratou na ilawalawa oqo,ni ra sa vesuki tu vei ira na Lemanaiti, ka “vu kece oqo mai na caka cala” (Mosaia 7:24). Ia, ni ratou yaco yani o Amoni kei iratou na tacina, sa basika vakasauri kina na inuinui ni veisereki.

Ena so na gauna eda vakataki ira na Nifaiti vesuki oqo, eda vakararawataki baleta na noda ivalavala ca, ka da vakasamataka tu meda kunea vakacava tale beka na vakacegu. Ena so na gauna eda vakataki Amoni, eda vakila na veivakauqeti meda dolele yani vei ira na tani ka da qai raica e muri ena noda sasaga oqori eda vakauqeti ira me ra “laveta cake na ulu[dra], ka marau, ka [era] vakararavi vua na Kalou” (Mosaia 7:19). Se vakacava sara na noda ituvaki, eda gadreva kece meda veivutuni ka “vuki vua na Turaga ena loma[da] taucoko,” ena vakabauta “ena sereki [keda] ko Koya” (Mosaia 7:33).

Vakasama eso ni Vuli iVolanikalou Yadua

Mosaia 7:14–33

Kevaka au na vuki vua na Turaga, nuitaki Koya, ka qaravi Koya, ena sereki au ko Koya.

Ni sotavi Amoni, e dua na Nifaiti mai Saraemala, a solia vua na Tui o Limiai e dua nai nuinui, ka vinakata o koya me solia talega na nuinui oya vei ira na nona tamata. Ni o wilika na Mosaia 7:14–33, raica na veika a tukuna o Limiai vei ira na nona tamata me vakayaloqaqataki ira, vaqaqacotaka nodra vakabauta, ka solia vei ira na inuinui ni na vukei ira na Kalou. E dina beka ni o sega ni vakacalai ena ivalavala ca vakataki ira na tamata i Limiai, ena rawa ni vukei iko vakacava na nona vosa mo vuki vua na Turaga? O na raica, me ivakaraitaki, ni a vakananuma vei ira na nona tamata o Limiai na itukutuku me baleta na veisereki ni Kalou (raica na tikina 18–20). E vukei iko vakacava na itukutuku eso oqo, vakakina na itukutuku ena ivolanikalou se na veika sotavi ena nomu bula, mo nuitaka na Kalou?

Mosaia 8:5–12

Na cava na 24 na peleti era a kunea na tamata i Limiai?

Ena nodra a vakasaqara voli e dua na ilawalawa lailai ni tamata i Limiai na vanua o Saraemala, era a kunea kina e 24 na peleti koula ka ceuti tu kina e dua na vosa era sega ni kila. Na peleti oqo, ka qai mai vakadewataka na Tui o Mosaia, e a tukuni ira e dua na kawa tamata era vakatokai me Jereti, era a lako mai ki na vanua yalataki mai na gauna ni Vale Cecere e Pepali ka ra a qai vakarusai e muri(raica na Mosaia 28:11-19). E muri e a qai vakalekalekataka o Moronai na peleti oqo (raica na Ica 1:1-2), ka qai yaco me ivola i Ica. Raica ena Mosaia 28:18 na revurevu ni tukutuku oqo vei ira na tamata i Mosaia.

Mosaia 8:12–19

E vakarautaka na Turaga na parofita, daurairai, ka dauvakatakila me vinaka ki na kawatamata.

Ena gauna a rogoca kina na ivakadinadina i Amoni o Limiai ni sa solia na Turaga e dua na daurairai, sa “marau vakalevu sara na tui, ka vakavinavinaka vua na Kalou” (Mosaia 8:19). Na cava o nanuma ni vakakina oya na veika a vakila o koya? Na cava o vulica me baleti ira na daurairai mai na vosa i Amoni ena Mosaia 8:13–19? Ena noda gauna, “na Mataveiliutaki Taumada kei na Tinikarua era tokoni me ra parofita, daurairai, ka dauvakatakila” (Bible Dictionary, “Seer”). Na cava na iotioti ni gauna o a vakasamataka kina vakatitobu na veivakalougatataki ni tiko na parofita, daurairai, ka dauvakatakila e vuravura? Ena rawa beka ni o volaitukutukutaka se vakacava na “yaga vakalevu” vei iko ni parofita, daurairai, kei na dauvakatakila (Mosaia 8:18).

Na Parofita o Josefa Simici sai koya na daurairai cecere ka tu ena ulu ni noda tabagauna (raica na V&V 21:1; 124:125; Josefa Simici—Ai Tukutuku 1:62). E a ivakaraitaki vakacava ni nona vakamacala o Amoni me baleta e dua ka daurairai ena gauna ni nona veiqaravi?

Mosaia 9–10

Au rawa ni sotava na noqu veibolebole “ena kaukauwa ni Turaga.”

E vakaraitaka vakadodonu o Senifi ni a so na nona cala. E makutu vakasivia o koya ena so na gauna, ka vakavuna na dredre vei ira na nona tamata—nodra qase na tamata i Limiai—ena nona veivakasalataki vakaca ena dua na veidinadinati kei na Tui o Leimani. Ia, e muri, ena gauna era a veivaluvaluti kina kei ira na Lemanaiti, e vukei ira na nona tamata me ra sotava na nodra bolebole ena vakabauta. Ni o wilika na Mosaia 9–10, vasaqara na veika era a cakava na tamata i Senifi me ra vakaraitaka na nodra vakabauta. E a vakaukauwataki ira vakacava na Kalou? Na cava e kena ibalebale vei iko mo toso ki liu “ena kaukauwa ni Turaga”? (Mosaia 9:17; 10:10–11).

Mosaia 10:11–17

Na noqu digidigi e rawa ni veivakayarayarataki vei ira na itabatamata eso.

Ena Mosaia 10:11–17, e a tarova vakacava na nodra ivakarau kei na itovo na nodra qase na Lemanaiti na nodra kila na dina na Lemanaiti? Na cava e a vakavuna na digidigi ni nodra qase na Lemanaiti vei ira na itabatamata muri mai? Vakasamataki ira na tamata era rawa ni vakayarayarataki ena nomu vakabauta kei na digidigi; na cava o sa cakava tiko mo vukei ira me ra vakabauti Karisito vakalevu cake?

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Mosaia 7:19–20

Raica na ivakaraitaki e dusia o Limiai me rawa ni vakauqeti ira na nona tamata me ra vakabauta. Na ivakaraitaki cava so e tiko ena ivolanikalou e vakauqeti keda meda “vakararavi vua na Kalou”? Na cava e kena ibalebale meda vakararavi vua na Kalou? (raica talega na Mosaia 9:17; 10:19). Na italanoa cava so ena noda bula se na nodra bula na noda qase eda rawa ni wasea me vakauqeta na vakararavi vakalevu cake vua na Kalou?

Mosaia 7:26–27

Na cava eda vulica me baleta na iVakabula mai na veitikina oqo? (raica talega na V&V 130:22). Na cava eda vakavinavinaka kina meda kila na veika oqo?

Mosaia 8:13–18

Me vukei ira na lewenivuvale me ra kila vinaka na ibalebale ni daurairai, e rawa mo vakaraitaka na iyaloyalo ni iyaya e dau veivuke meda rawa ni raica vinaka kina na ka, me vaka na vakadodo rairai, e dua na telescope, se microscope. Era tautauvata beka vakacava kei na daurairai na iyaya eso oqo? (raica na Mosese 6:35–36). Na cava era rawa ni raica na daurairai ka sega ni da raica rawa? Na ivakadinadina cava e tiko vei keda ni o Josefa Simici e daurairai?

E rawa ni o vakaraitaka na kedra itaba o ira na parofita, daurairai, ka dauvakatakila bula ka taroga na nomu vuvale na cava era kila baleti ira. Eda sa vakamuri ira tiko beka vakacaka?

Mosaia 9:14–18; 10:1-10

Ena gauna era ravuravu mai kina na Lemanaiti, era sa vakarau tu vakayago ka vakayalo na tamata i Senifi. Na cava eda rawa ni vulica mai vei Senifi kei ira na nona tamata me baleta na vakavakarau me baleta na veibolebole eso?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

Vakasaqara ena nomu veivakasama titobu vakayalo. Na idusidusi oqo e vakatura eso na tikina kei na ivakavuvuli meda vakanamata kina, ia me kakua ni yalana na vakatutu eso oqo na nomu vuli. Ena rawa ni o vakauqeti mai na veitikina se kunea eso na ivakavuvuli era sega ni cavuti tu eke. Laiva me liutaki iko na Yalo.

Na Raivotu vei Josefa Simici, mai vei Clark Kelley Price