“18–24 ni Me. Mosaia 25-28: ‘Era Sa Vakatokai Me Ra Tamata ni Kalou’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)
“18–24 ni Me. Mosaia 25-28,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
Na Saumaki Mai nei Alama Lailai, mai vei Gary L. Kapp
18–24 ni Me.
Mosaia 25–28
“Era Sa Vakatokai Me Ra Tamata ni Kalou”
Ni sa “rogo [vei Alama] na domo ni Turaga,” sa vola sara o koya na veika e tukuna vua na Turaga “me tu vua” (Mosaia 26:13, 33). O na vakamuria vakacava na ivakaraitaki nei Alama?
Vola na Veika o Uqeti Kina
Ni oti e tolu na itabatamata era tu ena vanua duidui, era sa duavata tale mai me dua ga na tamata na Nifaiti. Na tamata i Limiai, Alama, Mosaia—kei ira na tamata i Saraemala, era sega ni kawa i Nifai—“era sa okati vata kei ira na Nifaiti” (Mosaia 25:13). E vuqa vei ira era sa vinakata me ra lewena na Lotu sa tauyavutaka o Alama. Sa papitaiso oira kece era “sa gadreva me taura na yacai Karisito”, ka “sa vakatokai me ra tamata ni Kalou” (Mosaia 25:23–24). Ni oti e vuqa na yabaki ni veileti kei na veivakabobulataki, sa qai vaka mai me ra na marautaka e dua na gauna ni bula sautu o ira na Nifaiti.
Ia, sega ni dede, era sa tekivu vakacacani ira na Yalododonu o ira na tawavakabauta. Na ka vakamosiyalo kina na veika oqo sai koya ni vuqa vei ira na tawavakabauta era luvedra ga na tamata vakabauta—“na itabatamata tubu tiko mai” (Mosaia 26:1), ka oka kina o iratou na luvei Mosaia kei na dua na luvei Alama. E a qai yaco e dua na cakamana, ka itukutuku ni cakamana oqori e solia na inuinui vei ira na itubutubu era vakacudrui tu mai ena vei itabagauna. Ia na italanoa ni saumaki nei Alama e sega walega ni baleti ira na itubutubu ni gone ka ra sa lako sese tu. Na saumaki dina e dua na cakamana ka, ena dua gauna, e gadrevi me na yaco vei keda kece sara.
Vakasama eso ni Vuli iVolanikalou Yadua
E sa noqu itavi na noqu vakabauta kei na ivakadinadina.
Era vakila e dua na saumaki vakasakiti o ira era a rogoca na ivunau nei Penijamini na Tui (raica na Mosaia 5:1–7), ia na saumaki e sa ka sotavi vakatamata yadua ka sega ni rawa ni pasitaki tu mai vei ira na gone me vakataka e dua na iyau taukeni ni vuvale. E dodonu meda na sotava na noda saumaki vakataki keda ki na kosipeli i Jisu Karisito. Ni o na wilika ena Mosaia 26:1–6 me baleta na “itabatamata tubu cake tiko mai” era Nifaiti tawavakabauta, vakaraica na isau ni nodra tawavakabauta. E rawa talega ni o vakasamataki ira na tamata o diva tu mo rawa ni o kauti ira mai vei Karisito. E dina ni na sega ni rawa ni o solia vei ira na dina ni nomu saumaki mai, na Yalo ena rawa ni vakasolokakanataka na veika o rawa ni cakava me vukei ira me ra kunea na vakabauta. Ni o wilika na Mosaia 25–28 me baleta na nodra veivuke vei ira na itabatamata tubu cake tiko mai o Alama kei ira na lewe ni Lotu, ena rawa ni yaco mai vei iko eso tale na vakasama.
Raica talega na Vunau kei na Veiyalayalati 68:25–29.
Era vakasaqara o ira na italai yalodina ni Kalou me ra vakayacora na Nona lewa.
Ena so na gauna eda nanuma esa dau kila tu ga e dua na iliuliu ni Lotu vakai Alama na veika dodonu me caka. Ena Mosaia 26 eda wilika kina e dua na leqa ena Lotu ka se sega ni bau sotava o Alama, ka “rere de kitaka na ka sa sega ni dodonu ena mata ni Kalou” (Mosaia 26:13). Na cava e a cakava o Alama ena ituvaki oqo? (raica na Mosaia 26:13–14, 33–34, 38–39). Na cava e vakatututaka na veika e sotava o Alama me baleta na ivakarau mo walia kina eso na dredre sotavi ena nomu vuvale se ena nomu veiqaravi ena Lotu?
Ena rawa talega ni vinaka me tuvai na dina e vakatakila vei Alama na Kalou, e kune ena Mosaia 26:15–32. Mo kila ni so vei ira na dina oqo e a sega ni saumi vakadodonu kina na taro nei Alama. Na cava e tukuna vei iko me baleta na masu kei na ciqomi ni ivakatakila ni tamata yadua?
Na tagane kei na yalewa kecega e dodonu me sucu tale.
E a matata ni gadreva o Alama Lailai na sucu tale vakayalo, ni o koya kei iratou na luvei Mosaia eratou sa “tamata ivalavala ca sara,” ka sa ia tiko na “vakacacana na lotu ni Kalou” (Mosaia 28:4; 27:10). Ia, ni oti ga na nona veisau mai, e a vakadinadinataka o Alama ni tiko dina na veisau—ka sa bibi sara—vei keda kece: “Kakua ni kurabui,” e kaya o koya, “ni sa dodonu me sucu tale na tamata kecega ” (Mosaia 27:25; vakaikuritaki). Oya, e dina sara, e okati kina o iko.
Ni o wilika na veika e sotava o Alama, e kune ena Mosaia 27:8–37, o rawa ni tovolea mo biuti iko ena nona itutu. E sega ni o tovolea tiko mo vakacacana na Lotu, ia e rawa dina ni o vakasamataka eso na ka baleti iko e gadrevi me veisau. Ocei, me vakataki tamai Alama, e tokoni iko ka masulaki iko tiko “ena vakabauta”? Na veika sotavi cava eso sa veivuke me “vakatakila vei iko na kaukauwa kei na lewa ni Kalou”? (Mosaia 27:14). Na cava eso na “ka lelevu” sa kitaka na Turaga vei iko kei na nomu vuvale e dodonu mo “nanuma” tikoga? (Mosaia 27:16). Na cava o vulica mai na vosa kei na ivalavala nei Alama Lailai me baleta na kena ibalebale mo sucu tale? Na mataqali taro vakaoqo e rawa ni vukei iko ena nomu vakadikeva na nomu toso ni o sa sucu tale.
Raica talega na Mosaia 5:6–9; Alama 36; “Saumaki mai” (Ulutaga Vakosipeli, topics.ChurchofJesusChrist.org).
Sa Reki o Tamana, mai vei Walter Rane
E dau rogoca na Kalou na noqu masu ka na sauma me vaka Nona lewa.
E dua beka na itubutubu o kila me vaka na ituvaki i Alama Levu, ka digitaka tiko o luvena yalewa se tagane me veivakacacani. Se o iko beka na itubutubu oya. Na cava o kunea ena Mosaia 27:14, 19–24 ka solia vei iko na inuinui? Ena rawa ni vakayarayarataki iko vakacava na veitikina oqo ena nomu masu ena vukudra na tani?
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Mosaia 25:5–11
Na cava era a vakila na tamata i Mosaia ni sa wilika oti vei ira o koya na itukutuku ni tamata i Senifi kei ira na tamata i Alama? Esa maroroya tu beka na nomu vuvale eso na itukutuku e rawa ni o wiliwili mai kina? Ena rawa beka ni o vakaikuritaka na nomu itukutuku se tekivu maroroya e dua na nomu. Na cava o na biuta kina me vukea nomu vuvale (oka kina na nomu kawa ni veisiga ni mataka) me “vuabale na nodra marau” ka vulica me baleta na “taudonu ni nona vinaka na Kalou”? (Mosaia 25: 8, 10).
Mosaia 25:16
Na cava e a bibi kina me ra nanuma na tamata i Limiai ni a sereki ira mai na veivakabobulataki na Turaga? Na cava sa cakava ena vukuda na Turaga e dodonu meda daunanuma?
Mosaia 26:29–31; 27:35
Mai na tikina eso oqo, na cava me cakava e dua na tamata me ciqoma kina na veivosoti?
Mosaia 27:21-24
Ni o wilika na tikina eso oqo, vakasamataka e dua e rawa ni masulaka ka lolovaka na nomu vuvale.
Mosaia 27–28
Me vukea na nomu vuvale me raitayaloyalotaka na veika e yaco ena itukutuku ni veiwase oqo, e rawa ni o sureti ira me ra droinitaka eso na iyaloyalo ni tamata era tukuni ena italanoa ka vakayagataka na iyaloyalo eso oqori mo talanoataka tale. Se e rawa ni ra vakatasuasuataka na italanoa; ena rawa ni ra vakaraitaki vakacava na veisau eratou a sotava o Alama kei iratou na luvei Mosaia?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Vakayagataka na cakacaka ni liga. “Na Gospel Art Book kei na LDS Media Library ena ChurchofJesusChrist.org e lewena e vuqa na iyaloyalo kei na vidio e rawa ni vukea [nomu vuvale] me ra raica na vakasama kei na veika e yaco” (Veivakavulici ena iVakarau ni Turaga, 22).
Na droini ni kena rairai mai na agilosi vei Alama Lailai mai vei Kevin Keele