“4–10 ni Me. Mosaia 11-17: ‘Na Rarama … Ka Sega ni Vakabutotaki Rawa’” Lako Mai, Mo Muri Au—Me Baleti Ira na Tamata Yadua kei na Matavuvale: iVola i Momani 2020 (2020)
“4–10 ni Me. Mosaia 11-17,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
E Tu e Matana na Tui o Noa, o Apinatai, mai vei Andrew Bosley
4–10 ni Me.
Mosaia 11–17
“Na Rarama … Ka Sega ni Vakabutotaki Rawa”
E vakavuna na veisau levu vua ena dua na lewe ni lawalawa i Noa na Tui na vosa nei Apinatai (raica na Mosaia 17:2–4). Wilika na Mosaia 11–17 ni tu e lomamu e dua na masu ni o na ciqoma na veivakauqeti me baleta na veika o rawa ni veisau kina.
Vola na Veika o Uqeti Kina
Na bukawaqa ena rawa ni tekivu mai na dua na caudre lailai. E dua ga na tamata o Apinatai ka vakadinata tiko ki vua e dua na tui kaukauwa kei na nona ilawalawa. E sega ni ciqomi e levu na nona vosa, ka sa vakatauci vua na lewa me mate. Ia, na nona ivakadinadina i Jisu Karisito, o koya na “rarama … ka sega ni vakabutotaki rawa” (Mosaia 16:9), e vakacaudretaka e dua na ka e lomana na talatala gone o Alama. Ka qai caudre mai vakamalua na veisau nei Alama ena nona kauti ira mai na lewevuqa me ra veivutuni ka vakabauti Jisu Karisito. Na yameyame ka vakamatei Apinatai e qai malumalumu ka mate sobu, ia na bukawaqa ni vakabauta e tauyavutaka na nona vosa e tawamudu na kena veivakayarayarataki vei ira na Nifaiti—kei ira era wilika na nona vosa ena gauna nikua. E vuqa vei keda eda na sega ni sotava beka na veika e sotava o Apinatai baleta na noda ivakadinadina, ia e tiko na noda veigauna e vakatovolei kina na noda yalodei kei na vakabauti Jisu Karisito. Ena rawa beka ni vakacaudretaka mai na ivakadinadina kei na yalodei e tu vei iko ni o vulica na ivakadinadina i Apinatai.
Vakasama eso ni Vuli iVolanikalou Yadua
Au rawa ni tu taka na dina, ena gauna sara madaga au tu taudua.
Vakasamataka mada na kena veivakayalolailaitaki vei Apinatai ena nona vunauca tiko na veivutuni vei ira na tamata era sega saraga ni malele tu me ra veisautaka na nodra ivakarau dukadukali. E sega tu ga ni ciqomi na nona itukutuku ena veigauna. Ia e sega ni guce o Apinatai.
Ena gauna cava o sa bau vakila kina ni o tu taudua tu ena kena valataki na dina? Ni o wilika na Mosaia 11–13 kei na 17, na cava o sa vulica ni na rawa ni vukei iko mo tu vakarau tu ni gadreva na Turaga mo tu taka Nona kosipeli? Na cava eso tale na ivakavuvuli o vulica rawa mai na ivakaraitaki nei Apinatai?
Au gadreva meu bulataka e lomaqu na kena kilai vakavinaka na vosa ni Kalou.
Era kila tu na bete i Noa na Tui na vosa ni Kalou—era rawa ni cavuta na veitikina mai na ivolanikalou ka ra tukuna ni ra vakatavulica na ivakaro. Ia, era sega ni “volai tu e loma[dra],” na ivakaro ka ra “sega ni vakasaqara sara kina [me ra’ kila” (Mosaia 13:11; 12:27). Na kena isau, sa sega ni veisau na nodra bula.
Ni o wilika na Mosaia 12:19–30, vakasamataka se cava e kena ibalebale me vakasaqara na lomamu me kila vinaka na vosa ni Kalou. E vakauqeti iko beka na veika oqo mo veisautaka na sala ni nomu vulica na kosipeli?
Ena tokoni ira na Nona italai na Turaga ena Nona cakacaka.
Ena dua na yasana, eda rawa ni kunea na ivakaraitaki e vuqa ena veika e sotava o Apinatai e tokoni ira kina na Nona italai na Turaga—e rawa ni o kunea na ivakaraitaki eso oqo ena Mosaia 13:1–9. Ena dua tale na yasana, e vakatara talega na Turaga me vakacacani o Apinatai, kau vakavesu, ka vakamatei me baleta nona ivakadinadina. Na cava o raica ena veitikina oqo e vakaraitaka ni nuitaka na Turaga o Apinatai? E tara vakacava na ivakaraitaki i Apinatai na sala ni nomu raica na nomu ilesilesi kei na itavi?
E vakararawataki o Jisu Karisito me baleti au.
Era vakabauta na Tui o Noa kei ira na nona bete ni veivakabulai ena rawa ena lawa i Mosese. E vinakata o Apinatai me ra kila ni na rawa ga na veivakabulai mai vua na Mesaia, o Jisu Karisito. Ena Mosaia 14–15, vakaraica na vosa kei na malanivosa e vakamacalataka na iVakabula kei na veivakararawataki e sotava o Koya ena vukumu. Na tikina cava so e vakatitobutaka na nomu loloma kei na vakavinavinaka vei Koya?
E rawa vakacava me Tama ka Luvena talega o Jisu Karisito?
Na veitikina oqo e rawa ni vakavuna na veilecayaki baleta ni vaka me vakavulica tiko o Apinatai ni Tamada Vakalomalagi kei Jisu Karisito e dua ga na Tamata, ia eda kila erau rua na Tamata duidui. Na cava e vakaibalebaletaka tiko eke o Apinatai? E vakatavulica o Koya ni Kalou na Luvena—o Jiova—ena Dauveivueti (raica na Mosaia 15:1), bula vakayago, yaco me tamata vakatikina ka Kalou vakatikina (tikina 2–3). E soli Koya vakataucoko ki na lewa nei Kalou na Tamada (tikina 5–9). Baleta na veika oqo, e Luve ni Kalou o Jisu Karisito ka sa matataka vakataucoko na Kalou na Tamana (raica na Joni 14:6–10).
E tomana tiko ga o Apinatai ena nona vakamacalataka ni O Jisu Karisito e Tamana talega ena vakasama ni gauna eda ciqoma kina na Nona dauveivueti, esa yaco meda “vuana” (Mosaia 15:11–12). E dua tale na kena itukutukuni, eda sucu tale vakayalo ena Vukuna (raica na Mosaia 5:7).
Raica talega na Joni 5:25–27; 8:28–29; 17:20–23; “Na Tamada kei na Luvena,” Ensign, Epe. 2002, 12–18.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Mosaia 11–13; 17
E rau ivakaraitaki veivakauqeti ni tu taki na dina, ena gauna sara madaga e sega ni kilai levu tu kina. Era rawa ni sotava tiko na lewe ni nomu vuvale na veidre raraba me kua ni tu taki na nodra ivakatagadegede ni bula se vakabauta. Na cava era rawa ni vulici mai vei Apinatai kei Alama me baleta na tu taki ni dina? Na cakacaka ni liga e sala vata tiko yani kei na idusidusi oqo ena rawa ni vukea nomu vuvale me raitayaloyalotaka na italanoa oqo. Ni vulici oti na veiwase ni vola oqo, tuva me vakatasuasuataki vakaidina na veitikina me rawa ni vakatovotovotaka na nomu lewe ni matavuvale na sausaumi ni yaco mai na gauna e sa vakatovolei kina na tu taki ni nodra ivakatagedegede ni vakabauta. Se e rawa ni o veiwaseitaka vakai kemudou na veika dou sa sotava me baleta na kena tu taki na dina.
Mosaia 12:33–37; 13:11–24
Na cava e kena ibalebale me “volai e loma[da]” na ivakaro ni Kalou? (Mosaia 13:11). Ena rawa beka ni o vola eso na vakasama (se droinitaka eso nomu vakasama) ena dua na pepa koti tu vaka e dua na ate. Na cava e vakamareqeti kina vei keda na ivakaro? E rawa nida vola vakacava e lomada?
Na vulici ni ivolanikalou e rawa ni vukei keda meda vola na ivakaro e lomada.
Mosaia 14
Ena wase ni vola oqo o na kunea eso na vosa kei na malanivosa e vakamacalataki Jisu Karisito. E rawa ni vola na nomu matavuvale ni dou sa kunea. Na cava era vakila nomu lewe ni matavuvale me baleta na iVakabula ni vulici tiko na veivosa kei na malanivosa eso oqo?
Mosaia 15:26–27; 16:1-13
Era vakamacalataka na veitikina oqo na veika ena yaco vei ira na luve ni Kalou kevaka “e sega ni lako mai ki vuravura” o Jisu (Mosaia 16:6) se kevaka era sega ni muri Koya. Na cava eso na ka vinaka e mai yaco baleta ni a lako mai o Koya ka mai sorovaki keda? Raica talega na vidio “Why We Need a Savior” (ChurchofJesusChrist.org).
Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.
Vakatorocaketaki ni Noda Veivakavulici
Vakayagataka na iTalanoa kei na iVakaraitaki me Vakavulici Kina na iVakavuvuli ni Kosipeli E dau veivakavulici vakawasoma na iVakabula ena italanoa kei na vosavakatautauvata. Vakasamataka na ivakaraitaki kei na italanoa mai na nomu bula ka rawa ni cakava me bula mai kina nomu vuvale na ivakavuvuli vakosipeli (raica na Vakatavuvuli ena Sala ni iVakabula, 22).
E Ramase na Matana ena Ramase Uasivi, mai vei Jeremy Winborg