E tu o Apinatai e Matana na Tui o Noa, mai vei Andrew Bosley

4–19 ni Me

Mosaia 11--17

“E Dua na Rarama … E Sega ni Vakabutobutotaki Rawa”

Vakananuma vakatitobu ka masulaka mo kila na sala mo vakayagataka kina na italanoa kei na ivakavuvuli nei Abinadai ena Mosaia 11–17 me vukei ira na gone o vakavulica. Vola na veivakasama o ciqoma.

Vola na Veika o Uqeti Kina

Sureta na Veiwasei

Solia me ra wasea na gone na veika era kila baleta na italanoa kei Abinadai kei na Tui o Noa. E rawa ni veivuke na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale .

Vakavulica na iVunau: Gone Sobu

Mosaia 11–13; 17

E rawa niu tutaka na dina, kevaka sara mada ga au tu duadua.

E rau a yaloqaqa o Apinatai kei Alama ena nodrau valataka na dina. Mo na vakayagataka beka vakacava na italanoa oqo mo tara cake nodra yaloqaqa na gone ena gauna beka me ra na taqomaka kina nodra vakabauta?

iTaviqaravi e Rawa ni Caka

• Vakalekataka na kedratou italanoa o Apinatai, Tui o Noa, kei Alama ka kunei ena Mosaia 11–13 kei na 17. E rawa ni o vakayagataka na “Wase 14: Abinadi and King Noah” (Book of Mormon Stories, 38–42, se na kena vidio ena ChurchofJesusChrist.org). Sureti ira na gone me ra matanataka na italanoa, solia vei ira yadua na gone me ra vakaitavi ena itavi duidui.

• Taubale ena vanua ga o tu kina vata kei ira na gone ena nodra lagata e dua na sere e dau vakavuna na yaloqaqa, me vaka na “I Will Be Valiant” (Children’s Songbook, 162). Ni wilika vata na qaqa ni sere, ka vukei ira na gone me ra raica na veika e dau cakava e dua na tamata yalodina ka yaloqaqa. Digia e vica na tikina mai na Mosaia 11–13 kei na 17 mo wilika vei ira na gone, me vakaraitaka na nodrau a yalodina o Abinadai kei Alama (me kena ivakaraitaki, raica na Mosaia 13:1–4, 9).

Mosaia 12:33–36; 13:11–24

E dodonu meu muria na iVakaro e Tini.

E kila na Tui o Noa na ivakaro ia e sega ga ni muria. Ena rawa ni vukei ira na gone na vosa i Abinadai me ra kila na bibi ni kena muri na ivakaro.

iTaviqaravi e Rawa ni Caka

• Sureti ira na gone me ra wili ki na 10. Se solia vei ira e 10 na tikinipepa naba taki ka laiva me ra tuva vakadodonu. Vakamacalataka ni sa solia vei keda na Tamada Vakalomalagi e Tini na iVakaro me vukea noda lesu tale yani ka laki bula vata kei Koya. Vukei ira na gone me ra cavuqaqataka vata kei iko eso na iVakaro e Tini mai na Mosaia 12:33–36 kei na 13:11–24.

• Vakaraitaka e dua na iyaloyalo kei Mosese vata kei na iVakaro e Tini (me vaka na Kato ni iYaloyalo Vakosipeli, naba 14), ka vakamacalataka vakalekaleka na sala a ciqoma kina o Mosese na ivakaro mai vua na Kalou (raica na Na Lako Yani 19–20). Qai vakaraitaka e dua na iyaloyalo kei Apinatai (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale), qai tukuna vei ira na gone ni a vakananuma vua na Tui o Noa kei ira na nona bete baleta na iVakaro e Tini o Apinatai. Digitaka e vica na ivakaro mai na Mosaia 12:33–36 kei na 13:11–24 o nanuma ni bibi vei ira na gone o vakavulica, ka veitalanoataka vata kei ira na veivakalougatataki e yaco mai ena noda talairawarawa ki na ivakaro eso oqori.

• Lagata vata e dua na sere ni iVakaro me vaka “Keep the Commandments” (Children’s Songbook, 146). Na cava eda vakamuria kina na ivakaro?

Mosaia 14:5; 15:7–9

Era vakadinadinataki Jisu Karisito ena yaloqaqa o ira na parofita.

A vakavuvulitaka na Tui o Noa kei ira tale eso me baleti Jisu Karisito o Apinatai, ena gauna sara mada ga a rerevaki kina. Ena vaqaqacotaka beka vakacava nodra ivakadinadina na gone baleti ira na parofita na itukutuku kei Apinatai?

iTaviqaravi e Rawa ni Caka

• Wasea vei ira na gone eso na ka a vakavuvulitaka o Apinatai baleti Jisu Karisito ena Mosaia 14:5 kei na 15:7–9. Vukei ira na gone me ra kila ni a vinakata o Apinatai me ra muri Jisu na Tui o Noa kei ira nona tamata me rawa ni ra marau kina. Ena noda gauna, o ira na parofita bula era vakavulica vei keda me baleta na iVakabula. Wilika e dua na vakatotomi mai na koniferedi raraba, se wasea e dua na vidio me baleta e dua vei ira na parofita bula ena nona wasea nona ivakadinadina kei Jisu Karisito (me vaka na, raica na vidio “Special Witnesses of Christ” ena ChurchofJesusChrist.org).

• Vakaraitaka se droinitaka na iyaloyalo ni sinucodo, na valeniveivesu, kei na dua na bukawaqa. Vakavulica vei ira na gone ni a tuvakarau o Apinatai me vesu, biu ki valeniveivesu, ka me vakamai sara mada ga ena bukawaqa ena nona vakadinadinataki Jisu Karisito. E dina ni da na sega beka ni sotava na veika rerevaki oqo, me da yaloqaqa vakacava beka me vakataki Apinatai ena noda wasea noda ivakadinadina ena noda vosa kei na noda digidigi?

Vakavulica na iVunau: Gone Qase Cake

Mosaia 11–13; 17

E rawa niu tutaka na dina, kevaka sara mada ga au tu duadua.

Mo vakarautaki ira vakacava beka na gone o vakavulica me ra tutaka ena yaloqaqa na dina, kevaka sara mada ga era na kitaka taudua?

iTaviqaravi e Rawa ni Caka

• Sureti ira na gone me ra droinitaka na iyaloyalo ni veitiki duidui ni italanoa baleti Apinatai, Tui o Noa, kei Alama ka kunei ena Mosaia 11–13 kei na 17. Vukei ira me ra vakayagataka nodra iyaloyalo me ra talanoataka tale na italanoa, se vakayagataka na “Chapter 14: Abinadi and King Noah” (Book of Mormon Stories, 38–42, se na kena vidio ena ChurchofJesusChrist.org). Erau a dui tutaka vakacava na dina o Apinatai kei Alama? Na cava a sega kina ni tutaka na dina na Tui o Noa? (Raica na Mosaia 17:11–12). Vukei ira na gone me ra vakasamataka na gauna era tutaka kina na dina.

• Vukei ira na gone me ra vakasamataka na veigauna eso e rawa ni ra tutaka kina na dina, ka vukei ira me ra matanataka na veigauna eso oqori. Kena ivakaraitaki, na cava e rawa ni ra cakava ni dua e vinakata me ra sarava e dua na iyaloyalo sega ni veiganiti se ena gauna e sega ni vinakata kina e dua na itokani me curu mai e dua ena nodratou qito?

• Vakaraitaka na vidio “Dare to Stand Alone.” (ChurchofJesusChrist.org). A vakataki Apinatai beka vakaevei o Peresitedi Thomas S. Monson?

Mosaia 12:33–36; 13:11–24

E dodonu meu muria na iVakaro e Tini.

A vakavuvulitaka o Apinatai vua na Tui o Noa kei ira nona bete ca na iVakaro e Tini. Era sa kila beka na gone o vakavulica na vuna me da lomana ka talairawarawa kina vua na Kalou?

iTaviqaravi e Rawa ni Caka

• Lesi ira yadua na gone me ra wilika e dua vei ira na ivakaro ena Mosaia 12:35 kei na 13:11–24. Vukei ira na gone me ra vakasamataka na sala me ra veivukei kina vakataki ira me ra nanuma tiko na ivakaro yadua (me vaka na serekalitaki ni malanivosa, dua na ivukivuki, se dua na vosa tautavuvata). Na sere “The Commandments” (Children’s Songbook, 112) e rawa talega ni veivuke. Solia vei ira na gone na ate pepa, ka sureti ira me ra vola e dua se sivia na iVakaro e Tini ena nodra uto (raica na Mosaia 13:11)—me dua beka era nanuma ni dodonu me ra tovolea vakaukauwa cake me ra talairawarawa kina.

• Lagata vata e dua na sere baleta na ivakaro, me vaka na “Keep the Commandments” (Children’s Songbook, 146). Na veivakalougatataki cava e yaco mai ena noda talairawarawa ena ivakaro?

Na ivolanikalou e vakavulica vei keda na ivakaro ni Kalou.

Mosaia 14:6; 16:4–9

Niu ivalavala ca, au sa lakosese; ena vukui Jisu Karisito, sa rawa niu kune tale.

Me vakavuvulitaki Jisu Karisito, a cavuta o Abinadai na vosa ni parofita o Aisea, ka a vakatauvatani keda kei na sipi lakosese. O rawa ni vakayagataka vakacava na ivakatautauvata oqo mo vakavulici ira na gone baleta na iVakabula?

iTaviqaravi e Rawa ni Caka

• Sureti ira na gone me ra wasea na gauna e yali kina vei ira e dua na ka se na gauna era yali kina. E vakacava tu na ka era vakila? Na cava a cakava? Wilika vata na Mosaia 14:6 kei na 16:4–9. Na sala cava eda dau “lako tani” kina mai vua na Kalou? E vukei keda vakacava o Jisu Karisito me da lesu tale mai?

• Sureti ira na gone me ra raitayaloyalotaka e dua na qelenisipi. Na cava beka na vuna e rawa ni lakosese kina e dua na sipi? Vola ena papa na veika era tukuna mai. Eda tautauvata vakacava kei na sipi lakosese? Ena vakacava beka na lomana na Tamada Vakalomalagi ni da sa “kune” ena veivutuni kei na Veisorovaki ni iVakabula? (raica na V V 18: 10–13). Wasea na nomu ivakadinadina me baleta na iVola i Momani.

Vakayaloqaqataka na Vuli e Vale

Sureti ira na gone me ra tukuna vei ira nodra lewe ni matavuvale me ra wasea na veigauna eso era tutaka kina na dina, se uqeti ira na gone me ra wasea na veika eso era dui sotava.

Vakatorocaketaki Noda Veivakavulici

Na tokarua sa dua na idola ki na vuli. E yaga vei ira na gone ni caka vakavica na rogoci ni dua na ivakavuvuli ni kosipeli se qaravi ni dua na itaviqaravi. Tovolea mo tokaruataka na itaviqaravi ena sala duidui eso.