Na Saumaki nei Alama Lailai, mai vei Gary L. Kapp

18–24 ni Me.

Mosaia 25–28

“Era sa Vakatokai me ra Tamata ni Kalou”

E kila o Tamada Vakalomalagi na veika era gadreva me ra vulica kei na iwalewale me ra yacova yani kina. Vaqara Nona veituberi ni o wilika na Mosaia 25–28 ka railesuva na ituvatuva oqo.

Vola na Veika o Uqeti Kina

Sureta na Veiwasei

Vakaraitaka na iyaloyalo mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka kerei ira na gone me ra vakamacalataka na veika e yaco tiko ena iyaloyalo. Kevaka era kila tiko na gone na italanoa kei Alama Lailai kei iratou na luvei Mosaia, me ra wasea na veika era kila.

Vakavulica na iVunau: Gone Sobu

Mosaia 26:30–31

Na iVakabula e vinakati au meu veivosoti.

E vakavulici Alama na Turaga ni sa dau vosoti ira era veivutuni. Sa dodonu me da muria Nona ivakaraitaki ena noda vosoti ira era ivalavala ca vei keda.

iTaviqaravi e Rawa ni Caka

• Wilika vei ira na gone na malanivosa oqo mai na Mosaia 26:31: “Ni veivosoti vakai kemuni.” Me ra vakatovotovo na gone ena nodra kaya vakavica “Au sa vosoti iko” ka raica kevaka era kila na ibalebale ni veivosoti. Wasea e dua na gauna ena nomu bula o a vosota kina e dua se vosoti iko e dua.

• Vukei ira na gone me ra matanataka nodra veivosovosoti. Kerea e dua na gone me vaka ni a cakava e dua na ka me vakacudruya kina e dua tale na gone. Na cava e rawa ni kaya se cakava na gone kadua me vakaraitaka kina na veivosoti?

• Sureti ira na gone me ra droinitaka e dua na mata rarawa ena dua na yasa ni pepa kei na mata mamarau ena yasana kadua. Kerei ira me ra taura cake na mata rarawa ni ra tukuna e dua na gauna a vakararawataki ira kina e dua na tacidra se dua na itokani. Kerei ira me ra taura cake na mata mamarau ni ra tukuna na nodra sa vosota se nodra na qai vosota na tamata oya.

Mosaia 27:8–37

Na kosipeli e vukea nodra veisau na tamata ka yaco me vakataki Jisu.

Na veisau nei Alama Lailai kei iratou na luvei Mosaia e vakaraitaka ni ena vukui Jisu Karisito kei na Nona kosipeli, sa rawa kina vei keda na tamata kecega me da veisau ka yaco me vakataki Jisu vakalevu cake.

iTaviqaravi e Rawa ni Caka

• Tukuna vakalekaleka na saumaki mai nei Alama Lailai kei iratou na luvei Mosaia, me vaka e tukuni ena Mosaia 27:8–37. Me baleta na veivuke, raica na “Wase 18: Alma the Younger Repents” (Book of Mormon Stories, 49–52, se na kena vidio ena ChurchofJesusChrist.org). Qai tukuna tale na italanoa, me ra wasea na gone na kena matailalai era nanuma rawa. Me ra matanataka na italanoa, ka vukei ira me ra raica na duidui ena nodra itovo ni bula o Alama kei ira na luvei Mosaia ni ra se bera ni veivutuni kei na gauna sa oti kina.

• Vukei ira na gone me ra vakayagataka na tabana ni itaviqaravi ni macawa oqo me tukuni na kedratou italanoa o Alama kei iratou na luvei Mosaia. Wilika na Mosaia 27:24, ka vukei ira na gone me ra kila ni ratou a veisau o Alama kei iratou na luvei Mosaia baleta ni ratou a veivutunitaka nodratou ivalavala ca ka ciqoma na kosipeli i Jisu Karisito.

  

  Sa Reki o Tamana, mai vei Walter Rane

Mosaia 3: 28:1–8

E rawa niu wasea na kosipeli?

Ni oti nodratou saumaki mai, eratou sa gagadre vakalevu na luvei Mosaia me ratou wasea na kosipeli vei ira na tamata kece, oka kina na nodratou meca, o ira na Lemanaiti.

iTaviqaravi e Rawa ni Caka

• Vakayagataka na Mosaia 28:1–8 mo tukuna vei ira na gone me baleta nodratou lewa na luvei Mosaia me ratou vunautaka na kosipeli vei ira na Lemanaiti. Mo vukei, raica na “Wase 19: The Sons of Mosiah Become Missionaries” (Book of Mormon Stories, 53, se na kena vidio ena ChurchofJesusChrist.org). Na cava na vuna eratou via wasea kina na kosipeli? (raica na tikina e 3).

• Vukei ira yadua na gone me ra vakasamataka e dua e gadreva me kila eso tale na ka me baleta na kosipeli. Vukei ira na gone me ra tuva na veika me ra tukuna vua na tamata era vakasamataka tiko.

• Lagata vata e dua na sere me baleta na wasei ni kosipeli, me vaka na “I Want to Be a Missionary Now” (Children’s Songbook, 168). Dusia na malanivosa ena sere ka tukuna na ivakarau eda rawa ni wasea kina na kosipeli.

Vakavulica na iVunau: Gone Qase Cake

Mosaia 26:22–23, 29–30; 27:8-37

Sa dau vosoti ira walega era veivutuni na Kalou.

Kevaka e dua ena nomu kalasi e vakataroga voli kevaka e rawa ni vosoti dina sara, e rawa ni veivuke na vosa ni Kalou vei Alama Levu kei na veika a sotava o Alama Lailai.

iTaviqaravi e Rawa ni Caka

• Kerei ira na gone me ra vaka ni ra veivosaki tiko kei na dua e nanuma tu ni na sega vakadua ni vosoti koya na Kalou. Sureti ira me ra railesuva na vosa ni Kalou vei Alama Levu ena Mosaia 26:22–23, 29–30. Na cava era kunea e rawa ni vukea na tamata oya?

• Ni se bera na kalasi, kerea e dua vei ira na gone me wilika baleta na saumaki mai nei Alama Lailai, ka kunei ena Mosaia 27:8–37, ka vakarau mai me talanoataka ki na kalasi me vaka ni o koya o Alama Lailai. (Ke gadrevi, vakatura me kerea nona veivuke e dua nona itubutubu.) Ni talanoa tiko na gone, taroga na taro me vaka na “E vakaevei na lomamu ena gauna e … ?” se “Oti oya qai cava?”

• Sureti ira na gone me ra tuva na vosa mai na Mosaia 27:8–10 me vakamacalataka na ivakarau ni nodratou bula o Alama kei iratou na luvei Mosaia ni se bera nodratou saumaki mai. Oti qai kerei ira tale me ra vola e dua tale na ituvatuva mai na Mosaia 27:32–37 me vakamacalataka se ratou a qai vakaevei ni oti oya. Me vaka na tikina 24–29, na cava a vakavuna na veisau levu oqo vei Alama?

Mosaia 26:29–31

Meu vosoti, sa dodonu meu veivosoti.

Vukei ira na gone me ra raica na isema ni veivosoti era solia vei ira na tani kei na veivosoti era nuitaka me baleti ira.

iTaviqaravi e Rawa ni Caka

• Sureti ira na gone me ra wilika na Mosaia 26:29–31 ka wilika se basika vakavica mai na vosa “vosoti.” Na cava e vakatavulica vei keda na veitikina oqo me baleta na vosoti ira na tani? E vukei rau ruarua vakacava na tamata e cakava na cala kei koya e veivosoti na veivosoti?

• Kerea e dua na gone me droinitaka e dua na ikawakawa ena papa, ka wasea na iyatuvosa oqo a cavuta o Peresitedi Thomas S. Monson: “O koya e sega ni rawa ni vosoti ira na tani sa voroka na ikawakawa ena takoso kina o koya kevaka me na yacovi lomalagi, ni tamata kecega e gadreva na veivosoti” (George Herbert, cavuti ena “Hidden Wedges,” Ensign, Me 2002, 19). Bokoca e dua na iwase ni kawakawa, ka kerei ira na gone me ra veivuke ena kena tara tale, yadua na tikina ena dua na gauna, ni ra wasea na sala e rawa ni ra vosoti ira kina na tani. Sureti ira me ra vakasamataka e dua era gadreva me ra vosota.

Mosaia 27:8–24

Au rawa ni masu ka lolo me vakalougatataki ira au lomana na Kalou.

Vakasamataka na ivakarau mo vukei ira kina na gone me ra kila ni lolo e rawa ni vaqaqacotaka nodra vakabauta ena nodra masulaki ira na tamata era lomana.

iTaviqaravi e Rawa ni Caka

• Wilika vata na Mosaia 27:8–24, ka kerei ira na gone me ra raica na veika era a cakava o Alama kei ira nona tamata me ra vukei Alama Lailai kina. Wasea e dua na gauna o a lolo ka masulaka kina e dua, ka vakayaloqaqataki ira na gone me ra wasea na veika era sa sotava.

• Kerei ira na gone me ra vakasamataka e dua era kila ka gadreva na veivuke ni Kalou ena nona bula. Wasea nomu ivakadinadina ni rawa vei ira na gone me ra masu ka lolo ena vakabauta me vakalougatataka na tamata oqo na Kalou. Sureti ira na gone me ra masulaka na tamata era nanuma tiko, kevaka e rawa, lolovaki ira talega.

Vakayaloqaqataka na Vuli e Vale

Kerei ira na gone me ra digitaka e dua na ka era vulica mai na veika a sotava o Alama Lailai kei iratou na luvei Mosaia era na vinakata me ra wasea ena nodra matavuvale.

Vakatorocaketaki Noda Veivakavulici

Tokoni ira na iTubutubu. “Era sa qasenivuli ni kosipeli bibi duadua na itubutubu kivei ira na luvedra—sa nodra ruarua na itavi bibi kei na kaukauwa levu duadua me ra vakayarayarataka na luvedra (raica Nai Vakarua 6:6–7). Ni o vakavulici ira na gone ena lotu, vakasaqara ena masumasu na sala eso me ra tokoni kina nodra itubutubu” (Veituberi ena iVakarau ni iVakabula, 25).