Vakavulici Tui Limiai o Amoni

Minerva K. Teichert (1888-1976), Amoni ena matai Tui Limiai, 1949-1951, waiwai ena mesanaiti, 35 15/16 x 48 na idi. Univesiti ni Cakacakaniliga na Brigham Young, 1969.

27 ni Epereli–3 ni Me

Mosaia 7–10

“Ena Kaukauwa ni Turaga”

Wilika ena masumasu na Mosaia 7–10, ka vakananuma vakatitobu na veivakauqeti o ciqoma. Ena veivuke beka vakacava ena kena sotavi nodra gagadre na gone o vakavulica na dina eso ena veiwase oqo?

Vola na Veika o Uqeti Kina

ivakatakilakila ni veiwasei

Sureta na Veiwasei

Vakayaloqaqataki ira na gone me ra wasea na veika era kila baleta na veika e yaco ena veiwase oqo. E rawa ni o vukei ena “Chapter 13: Zeniff” (Book of Mormon Stories, 36–37, se na kena vidio ena ChurchofJesusChrist.org).

ivakatakilakila ni veivakavulici

Vakavulica na iVunau: Gone Sobu

Mosaia 7:18–20 33

A vukei ira na tamata ena ivolanikalou na Kalou, ka rawa Vua me vukei au.

O ira na tamata i Limiai, ka ra a vakabobulataki tu mai vei ira na Leimani, era a gadreva me ra vakabauta ni na vukei ira na Kalou, o koya sa dau vakananuma kina vakavuqa vei ira o Limiai na nona dau vukei ira na Nona tamata na Kalou.

iTaviqaravi e Rawa ni Caka

• Kerei ira na gone me ra wasea e dua na gauna era a gadreva kina na veivuke. Vakamacalataka ni ra sa leqa voli na tamata ni Tui o Limiai, a mani wasea o koya e dua na italanoa me vukea nodra vakabauta. Wilika na Mosaia 7:19 vei ira na gone, ka vakaraitaka e dua na kedra iyaloyalo na gone ni Isireli ena nodra kosova na Wasa Damudamu (raica na Moses Parting the Red Sea, ChurchofJesusChrist.org). Railesuva na italanoa oqo kei na italanoa ni mana, ka vukei ira na gone me ra matanataka na italanoa (raica na chapter 17 kei na 18 ena Old Testament Stories, se na kena vidio ena ChurchofJesusChrist.org). A vukei ira vakacava na tamata na Turaga? Vakadinadinataka ni rawa ni vukei keda talega na Turaga.

• Wilika na Mosaia 7:33 vei ira na gone ka vukei ira me ra kila na cava e vakavulica vei keda na tikina oqo me da cakava me da ciqoma na veivuke mai vua na Turaga. Vukei ira na gone me ra vakasamataka na ivukivuki me matataka na veika oqo, ka tokaruataka na tikina ni ra cakava na ivukivuki oqo. Na cava eso na ka eda gadreva kina na veivuke? Me da vakaraitaka vakacava ni da nuitaka na Turaga? Wasea e dua na ka o sotava o nuitaka kina na Turaga qai vukei iko o Koya.

• Digia eso na tikina mai na “Book of Mormon Stories” se “Nephi’s Courage” (Children’s Songbook, 118–19, 120–21) mo lagata vata kei ira na gone. Vukei ira me ra raica na ivakarau e vukei ira kina na tamata ena iVola i Momani na Turaga. Wasea eso tale na italanoa ni ivolanikalou o nanuma ni na vukei ira na gone me ra vulica me ra nuitaka na Turaga.

Mosaia 8:16–17

Na Kalou sa soli ira na parofita, daurairai, kei na dauvakatakila vei keda.

E rawa vakacava ni o vakayagataka na Mosaia 8:16–17 mo vakavulica kina vei ira na gone na nona itavi na parofita vakadaurairai?

iTaviqaravi e Rawa ni Caka

• Vakaraitaka vei ira na gone me ra biuta na ligadra e matadra me vaka ni ra rai tiko ena matailoilo se vakadodorairai. Wilika na Mosaia 8:17, ka kerei ira na gone me ra tokara nodra “matailoilo” ena veigauna era rogoca kina na vosa “daurairai.” Vakamacalataka ni sa soli ira mai na parofita vei keda na Kalou ka dua vei ira na nona itavi na parofita me “daurairai” baleta o koya e rawa ni “raica” na veika se bera ni yaco. Wasea eso na ivakaraitaki ni veika era sa raica ka vakatakila vei keda (okati kina na ivolanikalou), se wasea e dua na ivakaraitaki ni gauna e daurairai kina e dua na parofita (me vaka ena 1 Nephi 11:20–21).

• Cakava na weniyava pepa, ka droinitaka kina na iyaloyalo ni veika era sa vakasalataka vei keda na parofita. Biuta na weniyava oqori ena dua na gaunisala wavokita na rumu, ka vakamacalataka na iyaloyalo. Me ra veivukevuke na gone me ra parofita ka tuberi ira na vo ni gone me ra muria na weniyava eso oqo.

• Vakaraitaka na iyaloyalo e kune ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka sureti ira na gone me ra vakamacalataka na ka era raica. Vakamacalataka ni a daurairai na Parofita o Josefa Simici. A solia vua na Turaga na iyaya ni cakacaka ka vakatokai na Urimi kei na Cumimi kei na dua na vatu ni rairai me vakayagataka ena nona vakadewataka na iVola i Momani.

• Vakaraitaka e dua na iyaloyalo lekaleka ni dua na itukutuku ni koniferedi se qai oti wale toka mai vua na Peresitedi ni Lotu (se vakaraitaka e dua na kena iyaloyalo ka wilika e dua na ka sa vakavuvulitaka o koya). Wasea na nomu ivakadinadina ni o koya e dua na parofita, daurairai, ka dauvakatakila.

ivakatakilakila ni veivakavulici

Vakavulica na iVunau: Gone Qase Cake

Mosaia 7:18–20, 33; 9:14–19; 10:6–10, 19–21

A vukei ira na tamata ena ivolanikalou na Kalou, ka rawa Vua me vukei au.

Ko Senifi kei ira na nona tamata, ka ra sa vakaitikotiko ena nodra vanua na Leimani, era a bololaki mai vei ira na Leimani ka gadreva na veivuke ni Kalou. Na cava e rawa ni ra vulica na gone mai na italanoa oqo me baleta nona vukei ira na Luvena na Kalou?

iTaviqaravi e Rawa ni Caka

• Wasei ira vakatolu na gone, ka sureta na iwasewase yadua me ra vulica e dua vei ira na italanoa oqo mai na ivolanikalou: era kosova na wasa damudamu na Isireli (raica na Lako Yani 14:10–14, 21–31), lako voli ena lekutu na matavuvale i Liai (raica na 1 Nifai 16:9–16; 17:1–6), kei na nodra sereki na tamata i Senifi mai vei ira na Lemanaiti (raica na Mosaia 9:14–19; 10:6–10, 19–21). Era vakaraitaka vakacava na tamata ena italanoa eso oqo ni ra nuitaka na Kalou? A vukei ira vakacava na Turaga? E vukei keda vakacava o Koya ni da nuitaki Koya?

• Sureti iratou e tolu na gone me ratou vola e dua na veivakatovolei se bolebole ena papa. Kerea e dua na gone me wilika na Mosaia 7:33, ka vakayaloqaqataki ira na vo ni gone me ra bokoca e dua na veivakatovolei se bolebole ena veigauna era rogoca kina e dua na ka era rawa ni cakava me ra rawata kina na veivuke ni Turaga. Ena vukei keda vakacava me da ulabaleta noda bolebole na noda nuitaka na Turaga?

Mosaia 8:12–19

Sa vakarautaka na Kalou na parofita, daurairai, kei na dauvakatakila me yaga vei ira na kawatamata.

Eda tokoni iratou na Mataveiliutaki Taumada kei ira na iApositolo Le Tinikarua me ra parofita, daurairai, ka dauvakatakila. O na vakavulica vakacava vei ira na gone na kedra yaga na parofita?

iTaviqaravi e Rawa ni Caka

• Digia e vica na vosa bibi mai na Mosaia 8:12–19, ka vola ena papa. Sureta e dua na gone me wilika na tikina eso oqo, ka kerei ira na vo ni gone me ra laveta na ligadra ni ra rogoca na vosa yadua era tu ena papa. Tarova na wiliwili ka veivosakitaka vakalasi na vosa yadua.

• Kerei ira na gone me ra railesuva na Mosaia 8:16–18 me ra kila se cava na daurairai. Vola na iyatuvosa oqo ena papa: Na daurairai e vaka na . Vukei ira na gone me ra vakasamataka na sala eso me ra vakacavara kina na iyatuvosa me vakamacalataka na vuna e veivakalougatataki kina vei keda na daurairai—me vaka, na daurairai e vaka na dauveitaqomaki, ka dau vakasalataki keda mai na veika rerevaki.

• Digia e dua na malanivosa mai na Mosaia 8:16–17, ka vola ena papa, vakaisosomitaka na vosa yadua ena dua na ivakatakarakara buli. Solia vei ira na gone e dua na ituvatuva ni ivakatakarakara kei na vosa era matataka, me ra vakaraitaka se “vakadewataka” na malanivosa me vaka e dau cakava na daurairai. Na cava tale eso na sala era “sa yaga vakalevu kina” vei keda na parofita, daurairai, kei na dauvakatakila? (Mosaia 8:18).

Mosaia 9:14–18; 10:10–11

Niu sa malumalumu, e rawa ni vakaukauwataki au na Turaga.

Ni ra sotava na bolebole na gone, ena so na gauna era malumalumu ka veilecayaki. Vakayagataka na kedra italanoa na tamata i Senifi me ra vakavulici kina na gone ni rawa ni ra rawata na kaukauwa mai vua na Turaga.

iTaviqaravi e Rawa ni Caka

• Kerei ira na gone me ra wasea na sala eso e rawa ni ra kaukauwa kina vakayago. Na cava na kena ibalebale me tu vei keda “na kaukauwa ni tamata”? (raica na Mosaia 10:11). Na cava na kena ibalebale me tu vei keda “na kaukauwa ni Turaga”? (raica na Mosaia 9:17–18; 10:10). Eda dau rawata vakacava na kaukauwa ni Turaga?

• Sureti ira na gone me ra droinitaka na kena iyaloyalo e dua era nanuma ni tu vua na kaukauwa ni Turaga ka wasea na vuna era droinitaka kina na tamata oqo.

ivakatakilakila ni vuli

Vakauqeta na Vuli e Vale

Sureti ira na gone me ra wasea kei ira na nodra matavuvale e dua na italanoa mai na ivolanikalou ka vakauqeti ira me ra “vakararavi vua na Kalou” (Mosaia 7:19).

Vakatorocaketaki Noda Veivakavulici

Taroga na taro eso e veivakauqeti. Taroga na taro eso e sureti ira na gone me ra wasea nodra ivakadinadina ena dina eso vakosipeli. Me ivakaraitaki, kevaka o ni veivosakitaki ira tiko na parofita, e rawa ni o kerei ira na gone me ra wasea na ivakarau e sa vakalougatataki ira kina na parofita.

tabana ni itaviqaravi: na Turaga sa kacivi ira na parofita e vuravura