Veiqaravi ni Nomu Kalou, mai vei Walter Rane

20–26 ni Epereli

Mosaia 4–6

“E Dua na Veisau Qaqa”

Na ivakavuvuli cava nei Penijamini na Tui ena Mosaia 4–6 ena vukei ira vakavinaka duadua na gone o vakavulica me ra tekivu vakila “e dua na veisau qaqa” (Mosaia 5:2) e yalodra? Vola na veika o uqeti kina ni o vaqara ena masumasu na veituberi.

Vola na Veika o Uqeti Kina

Sureta na Veiwasei

Vola na yacadra na gone yadua ena nomu kalasi ena dua na tikinipepa, ka biuta na tikinipepa ena dua na koniteina. Ni o tomika na yaca yadua mai na koniteina, sureta na gone oqori me wasea e dua na ka e nanuma rawa mai na lesoni ni macawa sa oti se dua na ka e vulica mai vale ena macawa oqo mai na Mosaia 4–6 .

Vakavulica na iVunau: Gone Sobu

Mosaia 4:1–3, 10

Veivutuni ena kauta mai na reki.

Vukei ira na gone me ra vulica baleta na isolisoli vakasakiti ni veivutuni e rawa baleta nona Veisorovaki o Jisu Karisito.

iTaviqaravi e Rawa ni Caka

• Vakayagataka na Mosaia 4:1–3 kei na 10 mo vakavulica vei ira na gone na kena ibalebale me da veivutuni. Kena ivakaraitaki, vukei ira me ra kila ni ra a rarawataka na nona tamata na Tui o Penijamini na nodra ivalavala ca ka kerea na veivosoti (tikina 1–2), ka tukuna vei ira na Tui o Penijamini me ra biuta (se muduka) nodra ivalavala ca (tikina 10). Wilika vei ira na tikina 3 , ka taroga se vakaevei na lomadra ni ra veivutuni.

• Taroga vei ira na gone se na cava era vakila ni duka nodra isulu. E vakaevei na ivakarau ni yaloda ni da sa savasava tale? Vakamacalataka me vaka ga na sava isulu duka, e rawa ni da veivutuni ni da cakava e dua na cala. Vakaraitaka e dua na iyaloyalo kei Jisu Karisito ka vakadinadinataka ni tu Vua na kaukauwa me kauta laivi noda ivalavala ca ka vakasavasavataki keda kevaka eda veivutuni. Lagata vata na ikarua ni qaqa ni “Help Me, Dear Father,”Children’s Songbook, 99. Taroga vei ira na gone se cava e vakatavuvulitaka na sere me baleta na veivutuni.

Mosaia 4:13–26

E dodonu meu raici ira na tamata ena loloma kei na yalovinaka.

Mo vakayagataka beka vakacava na Mosaia 4:13–26 mo vakavulica kina vei ira na gone me ra dau “veilomani ka veiqaravi vakataki ira”? (tikina 15).

iTaviqaravi e Rawa ni Caka

• Droinitaka e dua na ate lailai ena papa. Kerei ira na gone me ra wasea na sala eso e rawa ni ra yalovinaka kina vei ira na tani. Ena veigauna era veiwasei kina, bokoca na ate ka droinitaka e dua na ka levu cake. Vakadinadinataka ni na tubu noda lomani ira na tani ena gauna eda yalovinaka kina vei ira. Solia vei ira na gone na ate pepa, ka sureti ira me ra droinitaka ena ate na sala e rawa ni ra vakaraitaka kina na loloma ka yalovinaka.

• Vukei ira na gone me ra vakasamataka mai na ivukivuki me ra cakava ni ra lagata e dua na sere baleta na lomani ira na tani, me vaka na “Jesus Said Love Everyone” se “Love One Another” (Children’s Songbook, 61, 136).

Mosaia 5:5–15

Niu veiyalayalati kei na Kalou, au taura vei au na yaca i Karisito.

Vakasamataka vakatitobu na ivakarau mo vukei ira kina na gone o vakavulica me ra cakava na veiyalayalati ni papitaiso kei na Kalou ka “vakatokai me luvei Karisito” (Mosaia 5:7).

iTaviqaravi e Rawa ni Caka

• Vukei ira na gone me ra cakava na itokaniyaca ka toka kina na yaca “Jisu Karisito” ka kabira ena nodra sote donumaka nodra ate (raica na tabana ni itaviqaravi ni macawa qo). Vakamacalataka ni vakavuvulitaka na Tui o Penijamini vei ira nona tamata ni da cakava na veiyalayalati se yalayala vua na Kalou, sa vaka ni sa “volai tikoga e [lomada]” na yaca i Karisito (Mosaia 5:12). Na cava eda yalataka me da cakava ena noda papitaiso ka vakayagataka na sakaramede? (raica na Mosaia 5:8; VV 20:37, 77, 79).

• Tarogi ira na gone se cava era na cakava me ra itokani kina vua e dua (me vaka na, veivosaki vata, cakacaka vata, ka veimaliwai vata). Wilika na Mosaia 5:13 vei ira na gone. Na cava eda rawa ni cakava me da kilai Jisu Karisito vakavinaka cake kina me kakua kina ni “vulagi” vei keda?

Vakavulica na iVunau: Gone Qase Cake

Mosaia 4:1–11

Au Rawa ni Veivutuni.

Mo vukei ira vakacava na gone me ra kila na kena ibalebale me da veivutuni? Na tikina cava ena Mosaia 4:1–11 o nanuma ni na vukei ira?

iTaviqaravi e Rawa ni Caka

• Vola na vosa veivosoti ena papa. Wilika vata na Mosaia 4:1–3, ka kerei ira na gone me ra vaqara na vosa ena tikina 3 ka vakamacalataka na veivakalougatataki e dau yaco mai ena gauna eda veivutuni kina ka ciqoma na veivosoti.

• Kerei ira na gone me ra cavuta na veika eso e dodonu me da cakava me taucoko ka dina kina noda veivutuni. Vukei ira me ra kunea eso na veika oqo ena Mosaia 4:10, ka veivosakitaka na ibalebale ni vosa kei na malanivosa e kunei ena malanivosa oya. Wasea e dua na italanoa ka vakaraitaka na veivutuni, mai na nomu bula beka ga se mai na dua na mekasini ni Lotu se qai taba wale toka.

• Vukei ira na gone me ra kunea na vosa ena Mosaia 4:6, 9, kei na 11 ka vakamacalataki Tamada Vakalomalagi. Na cava na vuna e bibi kina me da kila na ivakarau ni yaloi Tamada Vakalomalagi ni gadrevi me da veivutuni? Wasea nomu ivakadinadina ena ivakarau o vakila kina na loloma ni Kalou ni o veivutuni.

Mosaia 4:12–26

E uqeti au na kosipeli meu dau raici ira na tani ena loloma kei na yalovinaka.

E vakavuvulitaka na Tui o Penijamini ni da lako mai vei Karisito ka rawata na vakabokoci ni noda ivalavala ca, eda sa “vakasinaiti ena loloma ni Kalou” (Mosaia 4:12), ka na vakavuna me da loloma ka yalovinaka vei ira na tani.

iTaviqaravi e Rawa ni Caka

• Vukei ira na gone me ra vakasaqaqara ena Mosaia 4:13–16, 26 ka raica na malanivosa e vakamacalataka na ivakarau eda rawa ni qaravi ira kina na tani. Sureti ira me ra matanataka na veika oqo se droinitaka na kedra iyaloyalo, me ra qai kilakila na vo ni gone na malanivosa. Me da vakaraitaka vakacava na loloma kei na yalovinaka e vale, e koronivuli, se ena lotu?

• Sureti ira na gone me ra wasea e dua na gauna era a lomana ka veiqaravi kina ena vukuna e dua kei na ivakarau ni yalo e kauta mai vei ira na gauna oqori. Na cava na vuna era na sega beka kina ni via qaravi ira na tani eso? Taroga vei ira na gone na cava era na tukuna vua e dua me vakayarayarataki koya me vukea e dua na tamata e vakaleqai tu E rawa ni ra kunea na vakasama ena Mosaia 4:16–26.

E vakavulici keda o Jisu Karisito me da yalovinaka vei ira na tani

Mosaia 5:5–15

Niu papitaiso ka vakayagataka na sakaramede, au sa taura vei au na yaca i Karisito.

E vuqa vei ira na gone o vakavulica era sa papitaiso oti beka ka ra sa vakavouya tiko nodra veiyalayalati ena sakaramede. Vakananuma vei ira ni dua na tiki bibi ni nodra veiyalayalati ni papitaiso me ra taura vei ira na yaca i Jisu Karisito.

iTaviqaravi e Rawa ni Caka

• Droinitaka e dua na iwirini ena papa, ka biuta kina e dua na iyaloyalo kei Jisu Karisito ena lomadonu ni iwirini. Sureti ira na gone me ra droinitaka na kedra iyaloyalo ni o ni wilika vata na Mosaia 5:8 . Na cava e tukuna na tikina oqo ni dodonu me da taura vei keda? na cava eda sa “veiyalayalati[taka]”? Sureti ira na gone me ra vola na vosa Karisito ena kedra iyaloyalo ka biuta na iyaloyalo ena loma ni iwirini vata kei na iVakabula. Na cava eda yalataka me da cakava ena noda papitaiso ka vakayagataka na sakaramede? (raica na Mosaia 18:8–9; V V 20:77, 79).

• Vosa vei ira na gone me baleta na vuna era dau biuta kina na tamata na yacadra ena veika eso, me vaka na itavilesi vakavuli, siqeleti ni qito, kei na so tale (raica na Mosaia 5:14–15). Me da vakaraitaka vakacava ni sa “volai tikoga e [lomada]” na yaca i Karisito? Mosaia 5:12

• Sureta e dua na gonetagane se yalewa mai na tabanalevu me sikova mai na nomu kalasi ka vakamacalataka na veiyalayalati eda vakavouya ena noda vakayagataka na sakaramede. Wilika vata kei ira na gone na masu ni sakaramede ena Vunau kei na Veiyalayalati 20:77 kei na 79 ka sureti ira me ra vaqara na malanivosa e vakamacalataka na ka eda yalataka me da cakava kei na ka e yalataka na Kalou me kena isau.

Vakayaloqaqataka na Vuli e Vale

Sureti ira na gone me ra droinitaka e dua na ka era vulica nikua ka vakayagataka nodra droini me ra vakavulica nodra matavuvale.

Vakatorocaketaki Noda Veivakavulici

Vakavulici ira na gone me ra vola na veika era uqeti kina. O ira sara mada ga na gone e rawa ni ra vulica me ra vakamatautaki ira ena katona na veivakauqeti vakayalo—me vaka, na vakatakilakilataki ivolanikalou, se vakacuru itukutuku rawarawa ga ena ivolaniveisiga.