Karisito sa tucake tale kei ira na Nona iApositolo

Karisito kei ira na iApositolo, mai vei Del Parson

30 ni Maji–12 ni Epereli.

Siganimate

“Ena Tucake Tale ko Koya … ka sa Tu e Tabana na Veivakabulai ”

Ni o wilika na ivolanikalou e vakaturi eke ena Lako Mai, Mo Muri Au—Baleta na Tamata Yadua kei na Matavuvale, ena vukei iko na Yalo mo kila na veika mo vakanamata kina me vukei ira na gone me ra vakila na loloma ni iVakabula ena Sigatabu ni Siganimate.

Vola na Veika o Uqeti Kina

ivakatakilakila ni veiwasei

Sureta na Veiwasei

Tukuna vei ira na gone na veika o dau cakava mo nanuma kina na iVakabula ena Siganimate. Sureti ira me ra wasea na veika era sa cakava.

ivakatakilakila ni veivakavulici

Vakavulica na iVunau: Gone Sobu

1 Nifai 11:27; Mosaia 3:5; 15:7; Ilamani 14:16–17

Era sa kila na parofita ni iVola i Momani ni na lako mai ko Jisu Karisito.

E rawa ni vaqaqacotaka nodra vakabauti Koya na gone na nodra vulica na veika era vakavulica na parofita ni iVola i Momani me baleta na itavi kei na veiqaravi e vuravura i Jisu Karisito.

iTaviqaravi e Rawa ni Caka

• Vakaraitaka na iyaloyalo ni iVakabula ena nona papitaiso, vakabulai ira na tani, nona vakamatei ena kauveilatai, kei na nona sa vakaturi cake (raica na tabana ni itaviqaravi ena macawa oqo se iVola ni iYaloyalo Vakosipeli, nos. 35, 41, 57, 59). Kerei ira na gone me ra vakamacalataka na ka e yaco tiko ena iyaloyalo yadua. Vakamacalataka ni se vo tu e vuqa na yabaki me lako mai ki vuravura o Jisu, a vakatakila na Kalou vei ira na parofita ena iVola i Momani ni na mai cakava o Koya na veika oqo. Wilika na 1 Nifai 11:27; Mosaia3:5; 15:7; kei na Ilamani 14:16–17, ka vukei ira na gone me ra vakasotara na ivolanikalou eso oqo kei na kena iyaloyalo.

• Ni ra cakava tiko na gone na tabana ni itaviqaravi ni macawa oqo, veitalanoataki ira na parofita era taba tu kei na cava era vakavulica baleti Jisu Karisito. Wasea vata kei ira na gone eso na ka vakasakiti sa cakava vei keda o Jisu.

3 Nifai 11:1–17

A vakaturi cake tale ko Jisu.

Vakavulica vei ira na gone me kedra ikuri na tamata era a raica na iVakabula sa vakaturi cake tale mai Jerusalemi, e udolu vakaudolu era a raici Koya ena Nona rairai mai Amerika.

iTaviqaravi e Rawa ni Caka

• Vakaraitaka na iyaloyalo ni nona mate kei na tucake tale na iVakabula. Sureti ira na gone me ra wasea na veika era kila baleta na veika a yaco oqo. Kevaka e gadrevi, vakayagataka na “Wase 53: Sa Vakamatei ena Kauveilatai ko Jisu” kei na “Wase 54: Sa Vakaturi Cake Tale ko Jisu” (iTalanoa ni Veiyalayalati Vou, 136–38, 139–44, se na kena vidio ena ChurchofJesusChrist.org) mo tukuna vei ira na gone na italanoa oqo.

• Ni o vakayagataka na iyaloyalo mai na iVola ni Yaloyalo Vakosipeli se Lako Mai, Mo Muri Au—Baleta na Tamata Yadua kei na Matavuvale, tukuna vei ira na gone me baleta nona veisiko na iVakabula sa tucake tale mai na mate, me vaka e vakamacalataki ena 3 Nifai 11:1–17. Tokaruataka vakavica na italanoa, ka vukei ira na gone me ra vukei iko. Vakabibitaka na veika matailalai o nanuma ni na vakaibalebale vei ira na gone. Mo vakabibitaka, e dina ga ni sa mate ena kauveilatai o Jisu, era rawa ni raica na tamata ni sa tucake tale mai na mate o Koya. Me ra veivukevuke na gone ena nodra talanoataka tale na italanoa ena nodra vosa.

• Lagata vata na “Easter Hosanna” se na iotioti ni qaqani “Book of Mormon Stories” (Children’s Songbook, 68–69, 118–19). Sureti ira na gone me ra droinitaka na kedra iyaloyalo vata kei ira nodra itubutubu. Qai kerei ira na gone me ra wasea nodra droini kei na nodra nanuma se na vakacava na veika era na vakila kevaka era a tu e kea ena nona sikovi ira na Nifaiti o Jisu.

Mosaia 3:7; Alama 7:11–12

E kila o Jisu Karisito na ivakarau me vakacegui au kina.

Ni a sotava o Jisu Karisito na nodra “mosi kei na nodra tauvimate na nona tamata” (Alama 7:11), E kila o Koya na veika eda vakila, ena gauna sara mada ga e sega tale ni dua e vakila.

iTaviqaravi e Rawa ni Caka

• Wilika vei ira na gone na imatai ni vica na laini ena Mosaia 3:7, ka sureti ira me ra vaka ni ra vakila tiko na “mosi … , viakana, karamaca, kei na oca.” Kerei ira me ra wasea na gauna era a vakila kina na veika oqo. Qai tukuna vei ira na gone ni veitikina oqo e vakamacalataka eso na ka a vakila o Jisu Karisito ena gauna a vakararawataki voli kina ena Were o Kecisemani. Ena vuku ni ka oqo, sa kila kina o koya na ivakarau me vukei keda kina ni da vakila na veika oqo.

• Wilika i cake na Alama 7:11 , ka tarogi ira na gone kevaka era kila e dua e tauvimate se mosi. Vakadinadinataka ni a vakila o Jisu Karisito na noda “mosi kei na tauvimate” me rawa ni kila na ivakarau me vakacegui keda kina (Alama 7:12).

ivakatakilakila ni veivakavulici

Vakavulica na iVunau: Gone Qase Cake

2 Nifai 9:10–15; Alama 11:41–45; 40:21–23

Baleta ni sa vakaturicake tale o Jisu, au na vakaturicake talega.

Na iVola i Momani e vakamacalataka vakamatata na ibaleble ni vakaturi cake tale. O na vukei ira vakacava na gone me ra vulica na dina oqo?

iTaviqaravi e Rawa ni Caka

• Kerei ira na gone me ra tukuna vei iko na veika era kila me baleta na mate kei na Tucake tale i Jisu Karisito. Vola ena papa ni volavola na taro eso me vaka Na cava na kena ibalebale me da vakaturi cake tale? kei na O cei ena vakaturi cake tale? Vukei ira na gone me ra kunea na isaunitaro ena 2 Nifai 9:10–15; Alama 11:41–45; kei na Alama 40:21–23 ka wasea vata kei ira na kalasi na veika era raica.

• Tukuna vei ira na gone me baleta e dua o kila ka sa mate. Kerei ira me ra vakatayaloyalotaka ni o sega ni kila me baleta na Tucake tale. Era na vukei iko vakacava mo kila? Vakayaloqaqataki ira me ra vakayagataka na 2 Nifai 9:10–15; Alama 11:41–45; se Alama 40:21–23 me ra vakavulica vei iko na tucake tale. Sureti ira talega me ra wasea nodra ivakadinadina ena nona Tucake tale na iVakabula me tiki ni nodra isau ni taro.

Masu tu o Jisu ena Were o Kecisemani

Kecisemani, mai vei Michael T. Malm

Inosi 1:2–8; Mosaia 27:8–24; Alama 13:11–12; 24:7–19

Na Veisorovaki i Jisu Karisito e vakasavasavataki au ka veisautaki au.

Na iVola i Momani e solia e levu na ivakaraitaki ni tamata era a veisautaki ena vuku ni Veisorovaki ni iVakabula. Vakasamataka na ivakarau ena uqeti ira kina na gone na veika era sotava oqo me ra veivutuni ka gole vua na iVakabula.

iTaviqaravi e Rawa ni Caka

• Vakaraitaka vei ira na gone e dua na sote vulavula savasava kei na dua na sote vulavula duka. Wilika vata na Alma 13:11–12. Era a vakasavasavataki vakacava na tamata mai na nodra ivalavala ca? Na cava beka era a vakila kina me baleta na ivalavala ca? Tukuna na ivakarau ni yalomu ena gauna o veivutuni kina ka ciqoma na veivosoti, ka wasea nomu ivakadinadina ena Nona kaukauwa na iVakabula me vakasavasavataki keda mai na ivalavala ca.

• Sureti ira na gone me ra digia e dua vei ira oqo me ra vulica na veika e baleti koya: Inosi (raica na Inosi 1:2–8), Alama Lailai (raica Mosaia 27:8–24), se o ira na Anitai Nifai Liai (raica na Alama 24:7–19). Ni o ni wilika vata na italanoa, sureti ira na gone me ra wanonova na ivakarau e veisau kina na tamata se ilawalawa oqo ena vuku ni Veisorovaki i Jisu Karisito. Ena rawa vakacava meda muria nodrau ivakaraitaki na tamata oqo?

Mosaia 3:7; 15:5; Alama 7:11

A colata Vua na noda rarawa kei na tauvimate kece o Jisu Karisito.

Me ikuri ni nona vakararawataki ena vuku ni noda ivalavala ca, a sotava talega na iVakabula na noda mosi, tauvimate, kei na veimalumalumu tale eso me rawa ni kila kina na ivakarau me vakacegui keda kina.

iTaviqaravi e Rawa ni Caka

• Lesi ira yadua na gone me ra vaqaqara ena dua vei ira na tikina oqo me ra raica na veika a sotava o Jisu Karisito: Mosaia 3:7; Mosaia 15:5; se Alama 7:11. Sureti ira me ra vola ena papa ni volavola na veika era kunea ka vakasamataka eso na gauna era a vakila kina eso na ka oqo. Me vaka na Alama 7:12, cava na vuna e sotava kina o Jisu na veika kece oqo? Na cava e bibi kina meda kila ni a sotava o Koya na veika oqo ena vukuda?

• Lagata vata e dua na serenilotu baleta na iVakabula, me vaka na “Au sa Kila ni Bula Tu” (Sere ni Lotu, naba 136). Sureti ira na gone me ra vaqara na serenilotu ena malanivosa e vakamacalataka na nona dau vakacegui keda na iVakabula, ka tukuna na vuna era vakaibalebale kina vei keda na malanivosa eso oqo. Wasea na nomu ivakadinadina baleti Jisu Karisito, ka sureti ira na gone me ra wasea na nodra.

ivakatakilakila ni vuli

Vakauqeta na Vuli e Vale

Sureti ira na gone me vaqara e dua ena macawa oqo e gadreva tu me vakacegui. Vakayaloqaqataki ira me ra wasea vata kei na tamata oqo na veika era sa vulica me baleta na iVakabula ena nona colata vei Koya na noda mosi me rawa kina ni vakacegui keda.

Vakatorocaketaki Noda Veivakavulici

Sureta na veiwasei. Taroga na nodra vakasama, na veika era vakila, kei na ka era sa sotava na gone. O na raica ni dau tu vei ira na vakasama rawarawa ia e bibi sara.

tabana ni itaviqaravi: Era vakadinadinataki Jisu Karisito na parofita ni iVola i Momani