Jekope kei Inosi, mai vei Scott Snow

23–29 ni Maji

Inosi–Vosa i Momani

Sa Cakacaka e Lomaqu ko Koya meu Cakava na Lomana

Inosi, Jeromi, Omanai, kei na Vosa i Momani era ivola leleka ka levu na veilesoni vivinaka e tu kina. Vaqara na lesoni eso oqo, ka vakananuma vakatitobu na sala mo vukei ira kina na gone me ra vulica. E rawa talega ni veivuke na vakasama eso ena ituvatuva oqo.

Vola na Veika o Uqeti Kina

Sureta na Veiwasei

Vukei ira na gone me ra nanuma na veika era sa vulica mai na lesoni ena macawa sa oti. Era a wasea beka na veika era sa vulica ki na nodra matavuvale kei na so tale.

Vakavulica na iVunau: Gone Sobu

Inosi 1:1–19

E rawa niu vosa vua na Kalou ena masu.

Na veika a sotava o Inosi e vakavuvulitaka e vica na ka dina me baleta na masu. E rawa vakacava ni o vakauqeti ira na gone me ra muria na ivakaraitaki nei Inosi?

iTaviqaravi e Rawa ni Caka

• Vakaraitaka e dua na iyaloyalo kei Inosi; kena ivakaraitaki, raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, se vakayagataka na iyaloyalo Masu Tiko o Inosi (iVola ni iYaloyalo Vakosipeli, naba 72). Kerei ira na gone me ra tukuna na veika e yaco tiko ena iyaloyalo, ka wasea na veika a sotava kina o Inosi. E rawa ni o vakayagataka na “Chapter 11: Enos” (Book of Mormon Stories, 30–31, se na kena vidio ena ChurchofJesusChrist.org).

• Kerei ira na gone me ra wasea na veika era dau taleitaka me ra veitalanoataka kei ira nodra itubutubu. Vakamacalataka ni masu vua na Tamada Vakalomalagi sai koya na sala e rawa ni ra vosa kina Vua. Ni o wilika na Inosi 1:1–4 vei ira na gone, sureti ira me ra vaka ni o ira o Inosi ena nodra matanataka na vakasasa, tekiduru me masu, kei na so tale. Vakamacalataka ni a rogoca na Tamada Vakalomalagi na masu nei Inosi ka vosota nona ivalavala ca.

• Lagata vata e dua na sere baleta na masu, me vaka na “A Child’s Prayer” (Children’s Songbook, 12–13). Sureti ira na gone me ra laveta na ligadra ena veigauna era rogoca kina “masu” se dua tale na vosa tokaruataki. Vakadinadinataka na mana ni masu ena nomu bula.

Ni da luve ni Kalou, e rawa ni da masu vei Tamada Vakalomalagi.

Vosa i Momani 1:3–8

Au rawa niu vakalougatataki ira eso tale niu vakarogoca na Yalo Tabu.

Ena gauna e biuta vata tiko kina na iVola i Momani, a uqeti o Momani me okata talega na peleti lalai i Nifai. E sega ni kila na cava na vuna e gadrevi kina na peleti lalai, ia nikua eda sa vakalougatataki ni a muria na veivakauqeti oya. Na ivakaraitaki oya e rawa ni vakauqeti ira na gone me ra dau muria na Yalo.

iTaviqaravi e Rawa ni Caka

• Sureti ira na gone me ra wasea na italanoa era sa vulica mai na iVola i Momani me yacova mai na gauna oqo ena yabaki oqo e rawa ni vukei ira na (iyaloyalo eso mai na Lako Mai, Mo Muri Au—Baleta na Tamata Yadua kei na Matavuvale se na iVola ni iYaloyalo Vakosipeli me ra nanuma). Vakamacalataka ni tu vei keda na italanoa eso oqo ena iVola i Momani baleta ni a rogoca o Momani ni tukuna vua na Yalo Tabu me vakacuruma talega. Cava na vuna e vinakata kina na Tamada Vakalomalagi me tu vei keda na italanoa eso oqo?

• Wasea e dua na italanoa mai na mekasini ni Lotu se mai na dua na itukutuku ena koniferedi raraba baleta e dua a muria na veivakauqeti ni Yalo Tabu. Se wasea e dua na veika o sotava. Sureti ira na gone me ra droinitaka na iyaloyalo ni italanoa o ya. Era a vakalougatataki vakacava na tamata ena italanoa eso oqo baleta ni ra a muria na Yalo Tabu?

• Kerea e dua na lewe ni tabanalevu me sikova mai na kalasi ka wasea e dua na gauna a muria kina e dua na veivakauqeti ni Yalo Tabu. A vakalougatataki ira vakacava eso tale na veika a cakava? Vakamacalataka ni vinakata na Tamada Vakalomalagi me da vukei ira ka vakalougatataki ira eso tale, o koya sa tala mai kina na Yalo Tabu me tuberi keda.

• Lagata vata e dua na sere baleta na Yalo Tabu, me vaka na“The Still Small Voice”Children’s Songbook, 105). Lagata vakavica ena veisala duidui, me vaka na vakatotolo, berabera, se ena vakasolokakana. Ni o vakasolokakanataka na sere, cega ki na Vosa i Momani 1:7, ka dusia ni a vakamacalataka o Mimani na Yalo Tabu me dua na vakasolokakana.

Vakavulica na iVunau: Gone Qase Cake

Inosi 1:1–19

Sa dau rogoca ka sauma na Tamada Vakalomalagi na noqu masu yalodina.

E rawa sara ni dau rawarawa ka vakawaleni na noda masu. Na veika a sotava o Inosi e ivakananumi vei keda ni kena ciqomi na isau ni noda masu ena so na gauna e dau gadrevi kina na “sasaga vakaukauwa” kei na “masu vagumatua” (Inosi 1:2, 11).

iTaviqaravi e Rawa ni Caka

• Sureti ira na gone me bobo na matadra ka ra vakatayaloyalotaka ni ra veivosaki tiko e matana votu kei na Tamada Vakalomalagi. Na cava beka era na vinakata me ra veitalanoataka vata kei Koya? Sureti ira na gone me ra vakasamataka mada na veivosaki e matana votu vata kei Tamada Vakalomalagi ena veigauna yadua eda masu kina.

• Sureti ira na gone me ra cakacaka yarua ka wilika na Inosi 1:1–5. Kerei ira me ra vaqara na veitikina oqo ena dua na vosa se malanivosa ka vakamacalataka na masu nei Inosi ka wasea na veika era raica ena kalasi. Na cava era tukuna na veivosa oqo baleti Inosi kei na veika a sotava? Me ra wasea na gone na veika tale eso e vakauqeti ira me baleta na masu nei Inosi. Wasea e dua na gauna a “waloloi” kina na yalomu ka “o tagi” kina vua na Turaga (Inosi 1:4). Me ra vakananuma vakatitobu na gone e dua na ka e rawa ni ra cakava me vakaibalebale vakalevu cake kina nodra masu.

• Kerei ira na gone me ra vola eso na ka era dau masulaka, ena papa se ena tabana ni itaviqaravi ena macawa qo. Qai sureti ira me ra vakasaqara ena Inosi 1:2, 9, 13–14, kei na 16 na veika a masulaka o Inosi, ka vakuria na veika oqori ki na ituvatuva. Veivosakitaka na ivakarau e rawa ni ra muria kina na gone na ivakaraitaki nei Inosi ena nodra masu; taura mada, e rawa ni o veivosakitaka na vuna a tuvakarau kina o Inosi me masulaki ira na Leimani—o cei na kena meca—ka sureti ira na gone me ra masulaka e dua e caka ca vei ira ena macawa oqo.

Vosa i Momani 1:3–8

E rawa niu vakalougatataki ira eso tale niu vakarogoca na Yalo Tabu.

E kila na Turaga ni na yali na imatai ni 116 na draunipepa ena iVola i Momani sa vakadewataki oti (raica na V V 10; Saints, volume 1, wase 5). Me sosomitaki na veika sa yali oqo, a vakauqeti Momani mai na Yalo me vakacuruma na peleti lalai ena iVola i Momani. E rawa vakacava ni o vakauqeti ira na gone me ra muria na ivakaraitaki nei Momani ka vakarorogo ki na Yalo?

iTaviqaravi e Rawa ni Caka

• Kerei ira na gone me ra veivukevuke ena wiliwili mai na iVola i Momani 1:3–8 yadudua ena dua na gauna, ka qai vukei ira me ra vakalekataka na veika era vulica mai na veitikina yadua. Vakamacalataka ni a muria o Momani na Yalo ena nona vakacuruma na peleti lalai i Nifai (ka ra sa tu oqo me 1 Nifai ki na Omanai) ena iVola i Momani. Eda vakalougatataki vakacava ni a vakarorogo o Momani ki na Yalo? Ena duatani beka vakacava na iVola i Momani kevaka a sega ni vakarorogo? Wasea mada e dua na gauna o a uqeti kina mai na Yalo Tabu mo cakava e dua na ka. Sureti ira na itabagone me ra wasea eso na veika era sa sotava oti.

• Sureta e dua na gone me wilika na Vosa i Momani 1:7 kei na dua tale me wilika na Vunau kei na Veiyalayalati 8:2–3. Na cava e vakavuvulitaka na veitikina oqo baleta na ivakarau e vosa kina vei keda na Yalo Tabu? Vukei ira na gone me ra kila na gauna a vakauqeti ira kina na Yalo Tabu. Vakayagataka na Moronai 7:12 mo vakamacalataka ni kevaka e dua na vakasama e vinaka ka uqeti keda me da cakava na ka vinaka, oya e lako mai vei Tamada Vakalomalagi. Kena ivakaraitaki, vakasamataka mo vakaraitaka na vidio “Preparation of Thomas S. Monson: Always Follow the Promptings of the Spirit” (ChurchofJesusChrist.org). Sureti ira na gone me ra vakarorogo ki na veivakauqeti mo caka vinaka ka muria.

Vakayaloqaqataka na Vuli e Vale

Vakayaloqaqataki ira na gone me ra kerei ira nodra lewe ni matavuvale me ra wasea na veika era sa sotava ena masu se na Yalo Tabu.

Vakatorocaketaki Noda Veivakavulici

Vakayagataka na ivakatagi. Na sere ni Lalai kei na serenilotu e rawa ni vukei ira na gone ena itabayabaki kecega me ra kila ka nanuma na dina vakosipeli. Na lagasere sa rawa talega ni vakabulabulataki ira na gone ena sotavi ni ka vakavuli. (Raica na Veivakavulici ena iVakarau ni iVakabula, 22.)