Ena Tuberi iko ko Koya e Ligana, mai vei Sandra Rast

24 ni Feperueri–3 ni Maji

2 Nifai 26–30

“A Cakacaka Totoka ka Veivakurabuitaki”

Ni se bera ni o tuva na itaviqaravi ni vuli baleti ira na gone, vulica mada na 2 Nifai 26–30. Oqo ena sureta na Yalo ki na nomu vakavakarau

Vola na Veika o Uqeti Kina

Sureta na Veiwasei

Taura cake e dua na iVola i Momani, ka vakamacalataka ni a sa raica rawa mai o Nifai ni na dua na ka bibi ena noda gauna oqo na iVola i Momani. Kerei ira na gone me ra wasea e dua na ka era sa vulica me baleta na iVola i Momani ena yabaki oqo.

Vakavulica na iVunau: Gone Sobu

2 Nifai 26:33

E vinakati keda kece o Jisu Karisito me da lako yani Vua.

E vakadinadinataka o Nifai ni iVakabula e lomana na tamata kecega, se o cei ga o ira, ka sureti ira kece o Koya, me ra “vakaivotavota ena nona vinaka.”

iTaviqaravi e Rawa ni Caka

• Vakaraitaka na kedra iyaloyalo na duidui matatamata kei na duidui itovo (e rawa beka ni o raica eso ena mekasini ni Lotu). Kerei ira na gone me ra vakamacalataka eso na veika matailalai era raica ena iyaloyalo. Cega nomu ivolanikalou ki na 2 Nifai 26:33 ka wilika, “sa sureti ira kecega ko [Jisu Karisito] me ra lako mai vua.” Tokaruataka vata kei ira na gone na malanivosa oqo ena nomu dusia na iyaloyalo. Qai dusi ira yadua na gone ka kaya, “E sureti iko ko Jisu Karisito mo lako mai Vua.” Na cava e rawa ni da cakava me da lako yani kina vua na iVakabula?

• Lagata vata kei ira na gone e dua na sere baleta na lomani ira na tamata kecega, me vaka na “I’ll Walk with You” se“We Are Different” (Children’s Songbook, 140–41, 263). Dusia na vosa se malanivosa ena sere o nanuma ni vakaqaqacotaka na itukutuku ena 2 Nifai 26:33.

2 Nifai 28:2; 30:6

Na iVola i Momani e dua na veivakalougatataki.

Vakasamataka na sala mo vukei ira kina na gone ena nomu kalasi me ra vakila ni iVola i Momani “sa ka ni veivakalougatataki vei ira mai na liga ni Kalou” (2 Nifai 30:6).

iTaviqaravi e Rawa ni Caka

• Vakaraitaka vei ira na gone e dua na iVola i Momani e olo tu vakailoloma, ka tukuna vei ira ni dua na ka talei e tiko e loma Me ra taura na iloloma, ka solia eso na itukutuku me vukea nodra kila se cava oya; me vaka, e dua na ka sa solia mai vei keda na Turaga, e vukei keda me da vakabauti Jisu Karisito, kei na so tale. Wilika mai na 2 Nifai 30:6: “sa ka ni veivakalougatataki vei ira mai na liga ni Kalou.” Me ra dolava na gone na iloloma, qai vakamacalataka ni dodonu me da dolava na iVola i Momani ka wilika me da ciqoma na veivakalougatataki e tu kina.

• Wilika na 2 Nifai 28:2 vei ira na gone. Vakamacalataka ni a raica o Nifai “ni na yaga vakalevu sara” vei keda na iVola i Momani, kena ibalebale ni na vukei keda ka vakalougatataki keda. Tukuna vei ira na gone na vuna ena yaga vakalevu sara kina vei ira na iVola i Momani. Wasea na nomu tikina taleitaki se italanoa mai na iVola i Momani, ka sureti ira na gone me ra wasea na nodra. Vakaraitaka vei ira eso na iyaloyalo mai na iVola ni Yaloyalo Vakosipeli me solia eso na vakasama.

2 Nifai 28:30

Dau vakavulici au vakalalai na Tamada Vakalomalagi.

O na rawa beka ni vakasamataka e dua na lesoni vakaraitaki se dua na itaviqaravi ka na vukei ira na gone me ra raica na ibalebale ni vuli ena “vosa ena vosa.” Na vakatutu e ra e rawa ni vakavurea eso na vakasama.

iTaviqaravi e Rawa ni Caka

• Vukei ira na gone me ra cakava e dua na pasela rawarawa se tara e dua na ka ena buloko kau. Solia vei ira e dua na tiki ni pasela se dua na buloko kau ena dua na gauna, ena gauna era sa tara tiko kina, vakamacalataka ni oqo na ivakarau e vakavulici keda kina na Tamada Vakalomalagi—dua na ka dina ena dua na gauna. Na cava ena yaco kevaka eda via biuta vata kecega na tikina ena dua na gauna?

• Vakavulica vei ira na gone e dua na maqosa ena ikalawa lalai, me vaka a vesuka e dua na ibuki bebe se droinitaka e dua na iyaloyalo. Wiliwili mai na 2 Nifai 28:30: “Au na solia vei ira na luve ni tamata na vosa ena vosa, … vakalailai eke ka vakalailai e kea.” Na cava na vuna e vakavulici keda kina na Kalou vakalailai eke ka vakalailai e kea?

Vakavulica na iVunau: Gone Qase Cake

2 Nifai 26:23–28, 33

E vinakati keda kece o Jisu Karisito me da lako yani Vua.

Vukei ira na gone me ra vakila ni veisureti me da lako mai vei Karisito e vagolei vei ira kei ira kecega na tamata.

iTaviqaravi e Rawa ni Caka

• Veivosakitaka vata kei ira na gone me baleta na gauna era a sureti ira kina na itokani se na matavuvale me ra lako mai ki na dua na soqo, me vaka na marautaki ni dua na siganisucu. Na cava era a cakava me ra vakayaloqaqataki ira kina na tamata me ra lako mai? Wilika vata kei ira na gone na 2 Nifai 26:23–28, 33, ka vukei ira me ra kunea na ka e sureti keda tiko kina na Turaga me da cakava. Kerei ira na gone me ra cakava e dua na kadi se ivola ka sureta kina e dua me lako mai vei Jisu Karisito. Vakayaloqaqataki ira me ra vakayagataka eso na malanivosa mai na veitikina oqo ena nodra veisureti (kevaka e gadrevi, vola eso na malanivosa ena papa me veivuke).

• Wilika na 2 Nifai 26:33 vata kei ira na gone, ka vukei ira me ra cakava e dua na lisi se o cei, me vaka na veitikina oqo, e sureti me “vakaivotavota ena vinaka ni [Turaga].” (O na gadreva beka mo vakamacalataka ni o “ira na tawavakabauta” o ira era sega ni vakabauta na Kalou.) Sureti ira me ra vakuria na yacadra ena lisi. Me da vakaivotavota vakacava ena nona vinaka na Turaga?

• Veivosaki vakalekaleka kei ira na gone ena ivakarau era duatani kina na gone e veiyasai vuravura, ka vakadinadinataka ni Turaga e lomani ira kece (raica na 2 Nifai 26:24, 33). Sureti ira na gone me ra droinitaka e dua na iyaloyalo kei Jisu vata kei ira e vuqa na veimataqali gone.

2 Nifai 28:27–30

E dau vakatakila na dina o Tamada Vakalomalagi mai na “vosa ena vosa.”

A veivakasalataki o Nifai ena ivakarau ni rai ni da sa sega tale ni gadreva e dua na dina mai vua na Kalou. Vukei ira na gone me ra raica ni sasaga ni bula taucoko na vuli kosipeli.

iTaviqaravi e Rawa ni Caka

• Digitaka e dua na malanivosa mai na 2 Nifai 28:30, ka kerea e dua na gone me vola na imatai ni vosa ena papa. Qai kerea e dua tale na gone me vola na vosa ka tarava, ka vaka tiko kina me yacova ni sa volai oti na malanivosa taucoko. E tautauvata vakacava na itaviqaravi oqo kei na ivakarau e solia kina vei keda na dina na Kalou?

• Vukei ira na gone me ra wilika ka kila na 2 Nifai 28:27–30, vaqara na isau ni taro vakaoqo: Na cava era vakavulica na veitikina vakaoqo me baleti ira na tamata era nanuma ni sa rauta na dina sa tu vei ira ka ra sega ni gadreva tale e dua? Kerei ira me ra vakatura na ivakarau eda rawa ni vakaraitaka kina vua na Turaga ni da vinakata me da ciqoma eso tale na dina mai Vua.

2 Nifai 29:7–11

Erau cakacaka vata na iVola i Momani kei na iVolatabu.

Ni sa tu vei keda na iVolatabu, eso na tamata era nanuma ni sega ni gadrevi na iVola i Momani. Na veitikina oqo e rawa ni vukei ira na gone me ra kila, ka vakamacalataka talega vei ira tale eso, na vuna eda vakavinavinakataka kina na ivola ruarua ni vosanikalou oqo.

iTaviqaravi e Rawa ni Caka

• Solia vua e dua na gone na iVola i Momani ki vua tale e dua na iVolatabu. Taroga vei ira se rau tautauvata vakacava na ivola e rua oqo, vakakina na kedrau duidui. Vakaraitaka vei ira na gone na mape ni vuravura, ka vukei ira me ra vakasotara na ivola yadua ki na yasa ni vuravura e vu mai kina. Wilika ka veivosakitaka na 2 Nifai 29:8. Na cava na vuna e solia kina vei keda na Kalou e rua na “ivakadinadina” se rua na ivolanikalou ka vakavulica vei keda me baleti Koya?

• Kerei ira na gone me ra vakatayaloyalotaka ni tukuna vei ira e dua nodra itokani, “Au sega ni gadreva meu wilika na iVola i Momani. Au sa wilika oti na iVolatabu.” Me wiliki vata na 2 Nifai 29:7–11, ka vakamacalataka na malanivosa kei na vakasama me vaka na gagadre. Qai kerei ira me ra wasea na vakasama eso era na tukuna vua nodra itokani.

Vakayaloqaqataka na Vuli e Vale

Sureti ira na gone me ra vakamacalataka vei ira nodra matavuvale na sala erau cakacaka vata kina na iVolatabu kei na iVola i Momani me vakadinadinataki Jisu Karisito.

Vakatorocaketaki Noda Veivakavulici

Vakabibitaki Ira na Tamata, Sega ni Lesoni Na vakasama eso ena ituvatuva oqo era vakatutu walega. Yalo galala mo moici ira ki na nodra gagadre kei na nodra rawaka na gone o vakavulica.