tagane era cakacaka ena dua na loga ni olive

Talanoa Vakaibalebale ni Vu ni Olive, mai vei Brad Teare

16–22 ni Maji

Jekope 5–7

E Cakacaka Vata kei keda na Turaga

Vulica, vakasamataka, vakatitobu, ka masulaka mo kila na sala mo vakavulica vakavinaka duadua kina vei ira na gone na dina e kunei ena Jekope 5–7. Vola na veivakauqeti cava ga o ciqoma.

Vola na Veika o Uqeti Kina

ivakatakilakila ni veiwasei

Sureta na Veiwasei

Me tekivu e dua na veivosaki me baleta na itukutuku e kunei ena Jekope 5–7, sureti ira na gone me ra veivosakitaka na veika ena nodra bula e vukea nodra vakila na nodrau loloma na Tamada Vakalomalagi kei Jisu Karisito. Eda vakaraitaka vakacava noda lomani ira tale eso?

ivakatakilakila ni veivakavulici

Vakavulica na iVunau: Gone Sobu

Jekope 5

O ira na daukaulotu era dau qaravi ira na luvena na Tamada Vakalomalagi.

Vakasamataka vakatitobu na ivakarau mo wasea kina na vakasama ni vu ni olive ena ivakarau me ra kila kina na gone.

iTaviqaravi e Rawa ni Caka

• Vakaraitaka na iyaloyalo ni dua na vunikau, se taubale i tuba mo raica e dua na vunikau, qai railesuva vakalekaleka na veitikina bibi ena vakasama ni vuni olive ena Jekope 5. Kena ivakaraitaki: na Turaga ni were ni vaini (o koya e rawa ni matataki Jisu) a cakacaka vakaukauwa me qarava na nona vuniolive (ka rawa ni matataki ira na tamata e vuravura) baleta ni sa rui kauwaitaki ira vakalevu. A kacivi ira na tamata cakacaka (ka rawa ni matataki ira na daukaulotu) me ra veivuke ena kena qaravi na vunikau. Digia e dua se rua na tikina mai na Jekope 5 me wiliki vei ira na gone (me vaka na tikina 71–72).

• Tarogi ira na gone kevaka era kila e dua sa lesu mai ena kaulotu, se tukuna e dua o kila. Vukei ira na gone me ra vakatakila ena mape na veivanua era veiqaravi tiko kina na daukaulotu oqori. Vakamacalataka ni o Jekope a vakatauvatana na vuravura ki na so na vuniolive. Na vunikau era vaka na tamata e vuravura, kei na nodra qarauni na vunikau eso oqori e vaka na ka era cakava na dakaulotu vei ira na luve ni Kalou. Na cava era cakava na daukaulotu me ra vakalougatataki kina na luve ni Kalou? Ni vakaraica vata eso na isau ni taro oqo ena dua na sere me vaka na “Called to Serve” (Children’s Songbook, 174–75). Me da vakataki ira vakacava na daukaulotu?

na daukaulotu veiwatini kei ira tale eso ena kompiuta

Na cakacaka ni kaulotu e dua na sala e rawa ni da vukei ira kina na luve ni Kalou me ra lesu tale Vua.

Jekope 6:5

E lomani au na Tamaqu Vakalomalagi

Mo vakavulica vakacava vei ira na nomu kalasi ni lomani ira taucoko na luvena na Kalou ka dodoka tu na “liga ni Nona loloma cecere” vei ira?

iTaviqaravi e Rawa ni Caka

• Sureti ira na gone me ra mokoti ira vakataki ira. Ena vakacava na lomada ni mokoti keda e dua eda dau lomana? Wilika na Jekope 6:5 vei ira na gone, ka vakamacalataka ni veimalanivosa “ka kabita na Kalou me vaka na nona kabiti kemudou” ka sa “dodoka tiko yani na liga ni nona loloma cecere vei kemudou” vakavulica ni lomani keda na Tamada Vakalomalagi ka vinakata me da lesu mai Vua ena dua na siga.

• Lagata vata e dua na sere baleta na loloma, me vaka na “I Feel My Savior’s Love” (Children’s Songbook, 74–75). Sureti ira na gone me ra cavuta eso na ka ena vukea nodra vakila na nona loloma na iVakabula.

Jekope 7:1–23

Au rawa ni tutaka na veika au kila ni dina.

O Jekope na ivakaraitaki vakasakiti ni dua a vukei koya nona ivakadinadina tudei me taqomaka na dina ni tu na veisaqasaqa.

iTaviqaravi e Rawa ni Caka

• Tukuna na kedrau italanoa o Jekope kei Seremi (Jekope 7:1–23) ena ivakarau me ra kila kina na gone. E rawa ni o vakayagataka na “Wase 10: Jacob and Sherem” (Book of Mormon Stories, 27–29, se na kena vidio ena ChurchofJesusChrist.org). Qai talanoataka tale, ia ena gauna oqo me ra qai vakacuruma mai na gone na kena matailalai eso. Taroga vei ira na veika era vulica mai vei Jekope. E rawa vakacava ni da vakamuria na Nona ivakaraitaki?

• Sureti ira na gone me ra lagata e dua na sere baleta na digitaka na dodonu, me vaka na “Dare to Do Right” se “Stand for the Right” (Children’s Songbook, 158, 159). Kerei ira me ra tucake ena veigauna era lagata kina na vosa me vaka na dodonu se dina.

ivakatakilakila ni veivakavulici

Vakavulica na iVunau: Gone Qase Cake

Jekope 5

Sa kauwaitaki ira na Nona tamata na Turaga.

A wasea o Jekope na vakasama ni vu ni olive me vukea nodra sureti Nona tamata me ra lako mai vei Karisito. E rawa ni vakakina vei ira na gone o vakavulica.

iTaviqaravi e Rawa ni Caka

• Wilika ka vakamacalataka vei ira na gone na veitikina bibi ka vakalekataka na vakasama ni vu ni olive, me vaka na Jekope 5:3–4, 28–29, 47, kei na 70–72, ka sureti ira na gone me ra droinitaka na iyaloyalo ni veika e vakamacalataka na veitikina oqo. Na cava eda vulica mai na veitikina oqo baleta na veika e nanuma na Turaga vei ira Nona tamata? Kerei ira na gone me ra vakatayaloyalotaka ni ra qarava tiko e dua na vu ni olive ni o umana vakalekaleka na tikina 61–71 (e rawa ni ra matanataka na kelikeli, suisui, kei na so tale). Sureti ira e vica na gone me ra wilika na Jekope 5:11, 41, 47, kei na 72, me ra vaqara na veika e vakaraitaka na levu ni nona kauwaitaka na Turaga ni loga ni olive (o Jisu Karisito) na vunikau. Na cava e cakava na iVakabula me vakaraitaka kina Nona kauwaitaki keda? E rawa ni veivuke ena itaviqaravi oqo na vidio “Old Testament Olive Vineyard” (ChurchofJesusChrist.org).

• Tuva eso na ivakatakarakara ena Jekope 5 ena papa, me vaka na were ni vaini, na turaga ni were ni vaini, na tamata cakacaka, kei na vu ni olive. Qai cakava tale e dua na ituvatuva, me ra duitutu, na veika e matataka na ivakatakarakara oqo, me vaka na vuravura, na iVakabula, iliuliu ni Lotu se daukaulotu, kei ira na tamata ni Kalou. Wilika vata na tikina eso mai na Jekope 5 ka tukuna na ivakatakarakara eso oqo, qai vukei ira na gone me ra droinitaka na laini ena papa me semata na ivakatakarakara kei na kena ibalebale (raica, me ivakaraitaki, tikina 3–4, 28–29, 47, 70–72).

Jekope 6:4-5

E lomani au na Tamada Vakalomalagi ka na vosoti au niu veivutuni.

Sa ka bibi me da vukei ira na gone eda vakavulica me ra kila ni lomani ira na Kalou ka na dau vosoti ira tikoga ni ra veivutuni ena yalodina.

iTaviqaravi e Rawa ni Caka

• Vola ena papa e dua na ivolakabi me rua na kena iyatu, ka vola kina Tamada Vakalomalagi kei Keda. Wilika vata na Jekope 6:4–5, ka kerea na veimama ni kalasi me ra vaqara na malanivosa e baleta na Kalou kei na ikarua ni veimama na malanivosa e baleti keda. Vola na veika era raica rawa ena kena lomanibai dodonu. Vukei ira me ra kila na vosa era sega ni kila.

• Wasea na italanoa nei Elder Allen D. Haynie me baleta na dukadukali ena tobu ni soso ena nona itukutuku ena “Nanumi Koya Eda sa Dau Vakanuinui Kina” (Ensign se Liaona, Nove 2015, 121–22). Na cava e vakavulica vei keda na italanoa oqo baleta na veika eda gadreva me da cakava me rawa ni da vakabulai kina ena matanitu ni Kalou? Na cava tale eda vulica mai na Jekope 6:4–5?

Jekope 7:1–23

Au rawa ni tutaka na veika au kila ni dina.

Mo uqeti ira beka vakacava na gone me ra tutaka na dina me vakataki Jekope?

iTaviqaravi e Rawa ni Caka

• Sureti ira na gone me ra matanataka na nodrau veivosaki o Jekope kei Seremi, ni vakayagataki na Jekope 7:1–23 me idusidusi. Se vakaraitaka na vidio “Jacob and Sherem” (ChurchofJesusChrist.org). Kerei ira na gone me ra veivosakitaka nodra tiki ni italanoa taleitaki. A tutaka vakacava o Jekope na veika e kila ni dina? Sureti ira na gone me ra wasea na veika era sotava ni ra tutaka na dina, se wasea na nomu.

• Sureti ira na gone me ra lagata e dua na sere baleta na digitaka na dodonu, me vaka na “Dare to Do Right” se “Stand for the Right” (Children’s Songbook, 158, 159). Wasei ira vakailala, qai sureti ira me ra cakava e dua na itawake veivakauqeti se vola kabi ka matataka e dua na ka era tutaka se ra vakabauta.

ivakatakilakila ni vuli

Vakayaloqaqataka na Vuli e Vale

Sureti ira na gone me ra vakasamataka e dua na sala e rawa ni ra vukea kina nodra matavuvale me ra vakila na loloma ni iVakabula—me vaka, na kena vakamacalataki na veika era sa vulica me baleta na ivakarau e qarava kina na Turaga ni were ni vaini na nona vu ni olive.

Vakatorocaketaki Noda Veivakavulici

Era taleitaka na gone me ra wasea na veika era sa vulica tiko. Ni ra se gone ga, sa rawa vei ira me ra vaqaqacotaka na lewe ni nodra matavuvale. Vakauqeti ira me ra wasea kei na nodra matavuvale na veika era vulica ena Lalai. (Raica na Veivakavulici ena iVakarau ni iVakabula 30.)

tabana ni itaviqaravi: o ira na daukaulotu era dau qaravi ira na luvena na Tamada Vakalomalagi.